“Ni Tshi Rabela ni Ambe Ni Ri”

NAA ni a ḓivha maipfi a Thabelo ya Murena? Ndi thabelo ya tsumbo ye ya funzwa nga Yesu Kristo. Tshifhingani tsha Pfunzo yawe ya bvumo ya Thavhani, Yesu o ri: “Ndi zwone, ni tshi rabela ni ambe ni ri.” (Mateo 6:9) Samusi yo thomiwa nga Yesu, kanzhi i vhidzwa Thabelo ya Murena, nahone i dovha ya vhidzwa thabelo ya Khotsi Ashu.—Latin, Paternoster.

Vhathu vhashu shangoni ḽoṱhe vha rwela ngomani Thabelo ya Murena na u i dovholola misi yoṱhe, khamusi ḓuvha ḽiṅwe na ḽiṅwe. Miṅwahani ya zwenezwino, vhanzhi vho dovholola yeneyi thabelo zwikoloni na kha zwiitea zwa shango. Ndi ngani Thabelo ya Murena i tshi dzhielwa nṱha nga u ralo?

Ḓanani ḽa vhuṋa ḽa miṅwaha, mugudi wa zwa vhurereli ane a vhidzwa Cyprian o ṅwala a ri: “Ndi thabelo ifhio ine ya nga vha ya muya vhukuma u fhira ye ya rabelwa nga Kristo . . . ? Ndi thabelo ifhio i yaho ha Khotsi ine ya vha ya ngoho u fhira ye ra ṋewa yone nga Murwa ine ya vha Mafhungo-ngoho?”—Yohane 14:6.

Kha katekisima yayo, Kereke ya Katolika ya Roma i dzhia thabelo ya Khotsi Ashu i “thabelo ya mutheo ya Vhakriste.” The World Book Encyclopedia yo ṱhogomela uri yeneyi thabelo ndi ya ndeme vhurerelini hoṱhe ha ḽa Vhudzhagane, nahone ya i ṱalusa sa miṅwe “mibulo ya ndeme ya lutendo lwa Vhakriste.”

Naho zwo ralo, zwi fanela u ṱhogomelwa uri  vhunzhi ha vhathu vhane vha dovholola Thabelo ya Murena a vha i pfesesi nga vhuḓalo. Gurannḓa ya Ottawa Citizen ya Canada yo ri: “Arali ni Mukriste wa vhubvo vhuṅwe na vhuṅwe ni a kona u amba Thabelo ya Murena nga u ṱavhanya ni tshi khou tou elela ni sa imi, fhedzi ni nga vha na vhuleme ha u i amba nga u ongolowa nahone ni tshi khou pfesesa zwine na khou amba.”

Naa vhukuma ndi zwa ndeme u pfesesa thabelo dzashu dzine ra dzi rabela kha Mudzimu? Ndi ngani Yesu o ri ṋea Thabelo ya Murena? I amba mini kha inwi? Kha ri livhise ṱhogomelo kha dzenedzi mbudziso.