‘Ni Vhudzise Ane a Fanelea’

DAMASEKO wo vha u muḓi wo pfumaho wa ḓana ḽa u thoma ḽa miṅwaha ḽa Ḽifhinga ḽashu ḽo Ḓoweleaho. Samusi wo vha wo tangwa nga dzitsimu, wo vha u fhethu havhuḓi he vhathu vha vha vha tshi ḓa nga dzigamela vha tshi bva mashangoni a vhubvaḓuvha. Nga murahunyana ha lufu lwa Yesu Kristo, ho vha hu na tshivhidzo tsha Vhukriste Damaseko. Vhukati ha miraḓo yatsho ho vha hu na Vhayuda vhe khamusi vha vha vhe vhatevheli vha Yesu tshifhingani tsha Vhuṱambo ha Pentekoste ngei Yerusalema nga 33 C.E. (Mishumo 2:5, 41) Vhaṅwe vhafunziwa vha bvaho Yudea vha nga vha vho pfulutshela Damaseko musi vha tshi thoma u tovholwa nga murahu ha u kanḓwa ha Stefano nga matombo.—Mishumo 8:1.

Hu ṱoḓaho u vha nga 34 C.E, Mukriste a bvaho Damaseko a vhidzwaho Anania o wana mushumo muhulwane. Murena o mu vhudza a ri: “Takuwa, U ye mukotoni une wa pfi Wo Lugaho, huno nḓuni ya Yuda U vhudzise hu re na Saulo wa Tariso; ngauri u khou rabela.”—Mishumo 9:11.

Mukoto une wa vhidzwa u pfi Wo Lugaho wo vha u vhulapfu ha khilomithara dza 1,5 nahone u tshi pfuka nga vhukati ha Damaseko. Kha tshifanyiso tsho korwaho tsha ḓana ḽa vhu-19 ḽa miṅwaha tshi re kha ḽino siaṱari, ri a kona u vhona nḓila ye wonoyo mukoto wa vha u ngayo nga zwenezwo zwifhinga zwa kale. Musi ri tshi sedza nḓila ye wa vha u ngayo, zwi vhonala uri Anania a nga vha o ṱoḓa nnḓu ya Yuda tshifhinga tshilapfu. Naho zwo ralo, Anania o fheleledza o i wana nahone zwenezwo zwa ita uri Saulo a vhe muapostola Paulo, muhuweleli a fhiseaho wa mafhungo maḓifha.—Mishumo 9:12-19.

Yesu o rumela vhafunziwa vhawe nahone a vha vhudza a ri ‘ni vhudzise ane a fanelea’ mafhungo maḓifha. (Mateo 10:11) Zwi vhonala uri Anania o vhudzisa kana u ṱoḓa Paulo zwa vhukuma. U fana na Anania, Ṱhanzi dza Yehova dzi ṱoḓa dzo takala vhane vha fanelea nahone dzi a takala musi vhathu vha tshi ṱanganedza mafhungo maḓifha a Muvhuso. U ita vhuḓidini ha u wana vha faneleaho zwi a vhuyedza vhukuma.—1 Vha-Korinta 15:58.

[Tshifanyiso kha siaṱari 32]

‘Mukoto une wa pfi Wo Lugaho’ wa musalauno

[Ṱhaluso ya Vhubvo ha Tshifanyiso kha siaṱari 32]

From the book La Tierra Santa, Volume II, 1830