Ifa Ḽine na nga ḽi Fulufhela

“ARALI muṅwe muthu a ni vhudza uri hu na ifa ḽaṋu ḽine na fanela u ḽi wana, ni ṱhogomele. Ngauri ni nga kha ḓi vha ni tshi khou fhurwa.”

Yeneyo ndi tsevho ye ya vhewa kha ḓiresi ya internet ya dzangano ḽa Postal Inspection Service ḽa ngei United States. Ndi ngani yeneyo tsevho i ya ndeme? Ngauri vhathu vha zwigidi vho no wana marifhi ane a ri: ‘Shaka ḽaṋu ḽo lovha nahone ḽo ni siela ifa.’ Nga ṅwambo wa zwenezwo vhathu vhanzhi vha mbo ḓi rumela tshelede ine ya lingana rannda dza 210 u itela uri vha wane mafhungo nga vhuḓalo malugana na ḽeneḽo ifa, uri vha vhudzwe uri ḽeneḽo ifa ḽi ngafhi na uri ḽi nga wanala hani. Vho fheleledza vho nyabwa vhukuma. Vhoṱhe vho wanaho eneo marifhi—a vho ngo wana tshithu.

Honoho vhukwila vhu kunga vhathu vhane vha vha na dzangalelo ḽa u wana ifa. Naho zwo ralo, Bivhili i amba zwavhuḓi nga ha vhane vha ṋea vhaṅwe ifa musi i tshi ri: “Ifa ḽa muvhuya ndi ḽa vhana vhawe na ḽa vhaḓuhulu.” (Mirero 13:22) Zwi re zwone ndi uri, a hu na muthu na muthihi nga nnḓa ha Yesu Kristo we a vhuya a amba maipfi a ḓivhea na a funwaho vhukuma u fana na e a a amba kha Pfunzo yawe ya Thavhani: “Vhane vha ḓo takala, ndi vha vhulenda, ngauri vhané shango ḽa ḓo vha ifa ḽavho ndi vhenevho.”—Mateo 5:5, NW.

Maipfi a Yesu a ri humbudza zwe Khosi Davida wa Isiraele ḽa kale a hevhedzwa u zwi ṅwala maḓanani manzhi a miṅwaha o fhelaho: “Shango ḽi ḓo vha ifa ḽa vho vuḓaho; ndi vhone vha u ḓo takalela muḓalo wa mulalo.”—Psalme ya 37:11.

‘U wana shango sa ifa’—ndi tshilavhelelwa tshi takadzaho vhukuma! Fhedzi naa ri nga vha na vhungoho ho khwaṱhaho ha uri zwenezwi a si vhukwila ho itelwaho u fhura vhathu u fana na ho ambiwaho mathomoni? Vhukuma, ri nga vha naho. Samusi shango ḽi tshipiḓa tsha tsiko i mangadzaho ya Yehova, ene muṋe sa Musiki na Muṋe waḽo u na ndugelo ya u ḽi ṋea ane a funa sa ifa ḽawe. A tshi shumisa Khosi Davida, Yehova o fulufhedzisa Murwa Wawe ane a mu funa, Yesu Kristo a ri: “Nkhumbele, ndi U ṋee Vhannḓa, vha vhe ifa ḽau, na migumo ya ḽifhasi, i vhe shango ḽau.” (Psalme ya 2:8) Nga tshenetshi tshiitisi, muapostola Paulo o ṱalusa Yesu sa ene “we [Mudzimu] a mu vhea uri a vhe mu-ḽa-ifa wa zwoṱhe.” (Vha-Heberu 1:2) Ngauralo, ri nga vha na fulufhelo ḽo khwaṱhaho ḽa uri musi Yesu a tshi amba uri ‘shango ḽi ḓo vha ifa’ ḽa vha vhulenda, o ita zwenezwo e na lutendo lwo khwaṱhaho, nahone e na maanḓa oṱhe a u ḓadzisa fulufhedziso ḽawe.—Mateo 28:18.

Ngauralo, mbudziso ya ndeme ndi ya uri, ḽeneḽo fulufhedziso ḽi ḓo ḓadzea hani? Hoṱhe hune ra sedza hone ṋamusi, zwi vhonala  zwi tshi nga vhathu vha re na maanḓa na vho ṱalifhaho ndi vhone vhathu vhane vha khou bvelela vhukuma nahone vha khou wana tshiṅwe na tshiṅwe tshine vha tshi funa. Vhavhuya vha ḓo wana mini? Zwiṅwe-hafhu, shango ḽo tshinyadzwa nga vhuleme vhuhulwane ha u tshinyadzwa ha mupo, nahone ḽo tshinyadzwa nga vhadzia-vhupangwa na matsilu. Naa shango ḽi ḓo vha ḽi tshi kha ḓi vha ḽa ndeme u ḽi wana sa ifa? Ri ni ramba uri ni vhala thero i tevhelaho u itela u wana phindulo ya dzenedzi mbudziso na dziṅwe dza ndeme.

[Tshifanyiso kha siaṱari 3]

Naa ni ḓo wana ifa ḽa ngoho?