‘Ivhani Na Vhushaka Vhu Bvaho Mbiluni’
‘Ivhani Na Vhushaka Vhu Bvaho Mbiluni’
“U funana nga tshaṋu nga hu vhe vhushaka ha dzimbilu.”—VHA-ROMA 12:10.
1, 2. Muṅwe murumiwa na muapostola Paulo vho ḓiphina nga vhushaka vhufhio na vhahavho?
MIṄWAHANI yawe ya 43 e tshumeloni ya vhurumiwa ngei Vhubvaḓuvha Bvungwi, Don o vha a tshi ḓivhelwa u funa vhathu vhe a vha a tshi khou vha shumela. Musi a tshi khou lwisana na vhulwadze he mafheleloni ha mu vhulaha, vhaṅwe vhe a vha a tshi guda navho Bivhili vho tshimbila khilomithara dza zwigidi u itela u ḓa vhulaloni hawe u mu vhudza uri, “Kamsahamnida, kamsahamnida!” nga Lukorea—zwine zwa amba uri “Ro livhuha, ro livhuha!” Lufuno lwa Don lwo kwama mbilu dzavho.
2 Yeneyi tsumbo ya Don a si yone i yoṱhe. Kha ḓana ḽa u thoma ḽa miṅwaha, muapostola Paulo o sumbedza lufuno lu bvaho mbiluni vhathu vhe a vha a tshi vha shumela. Paulo o vha o ḓiṋekedza. Naho o vha e na lutendo lwo khwaṱhaho, o vha a tshi dovha a vha na vhulenda na u ṱhogomela, “sa mumamisi a tshi kuvhatedza vhana vhawe vhukuma.” O ṅwalela tshivhidzo tsha ngei Thesalonika a ri: “[Nge ra ni funa zwi tshi bva mbiluni, NW], a ro ngo takalela u ni kumedza mafhungo-maḓifha a Mudzimu fhedzi, ro ni kumedza na mimuya yashu, nge na vha vhafunwa vhashu.” (1 Vha-Thesalonika 2:7, 8) Nga murahu, musi Paulo a tshi vhudza vhahawe vha Vhaefesa uri a vha tsha ḓo dovha vha mu vhona, “tshililo kha vhone vhoṱhe tsha vha tshihulu; vha fara Paulo nga zwanḓa vha mu kuvhatedza.” (Mishumo 20:25, 37) Zwi khagala uri vhushaka he ha vha vhu hone vhukati ha Paulo na vhahawe ho vha vhu si ha u sokou vha na lutendo lu fanaho fhedzi. Vho vha vha tshi funana zwi tshi bva mbiluni.
Vhushaka vhu Bvaho Mbiluni na Lufuno
3. Maipfi a Bivhili ane a vha vhushaka ha dzimbilu na lufuno a tshimbidzana hani?
3 Maṅwaloni, vhushaka vhu bvaho mbiluni, u pfelana vhuṱungu, na u vhavhalela, zwi tshimbidzana na iṅwe ya pfaneleo khulwane dza Vhukriste—lufuno. (1 Vha-Thesalonika 2:8, NW; 2 Petro 1:7) U fana na zwipiḓa zwavhuḓi zwa daimane, dzenedzi pfaneleo dzoṱhe dza Mudzimu dzi a tshimbidzana u itela u bveledza mvelelo dzavhuḓi. A dzi iti uri Vhakriste vha vhe tsini na tsini fhedzi, fhedzi dzi dovha dza ita uri vha vhe tsini na Khotsi avho wa ṱaḓulu. Zwiṅwe hafhu, muapostola Paulo o ṱuṱuwedza vhatendi ngae a ri: “Lufuno lu songo vha na tshimbevha. . . . U funana nga tshaṋu nga hu vhe vhushaka ha dzimbilu.”—Vha-Roma 12:9, 10.
4. Mubulo une wa ri “vhushaka ha dzimbilu” u amba mini?
4 Ipfi ḽa Lugerika ḽe Paulo a ḽi shumisa kha “vhushaka ha dzimbilu” ḽo vhumbwa nga zwipiḓa zwivhili, tshiṅwe tshi amba vhukonani nahone tshiṅwe tshi amba lufuno lwa tsiko. Samusi muṅwe mugudi o zwi ṱalusa, hezwi zwi amba uri Vhakriste “vha fanela u ṱalulwa nga vhukonani vhune ha vha pfaneleo ya muṱa u re na lufuno, vhuthihi, na u tikedzana.” Naa yeneyo ndi nḓila ine na ḓipfa ngayo nga vhahaṋu vha tshinnani na vha tshisadzini vha Vhakriste? Lufuno—u ḓipfa ni mashaka—zwi fanela u vha hone tshivhidzoni tsha Vhukriste. (Vha-Galata 6:10) Nga zwenezwo, The New Testament in Modern English, yo ṅwaliwaho nga J. B. Phillips, i ṱalutshedzela Vha-Roma 12:10 nga uri: “Kha ri funane zwi tshi bva mbiluni sa vharathu na vhakomana.” Nahone The Jerusalem Bible i ri: “Funanani u fana na murathu na mukomana.” Ee, Vhakriste a vha funani fhedzi nga ṅwambo wa uri zwo tea kana nga ṅwambo wa uri vha a kombetshedzwa u ita nga u ralo. Ri fanela u ‘vha na lufuno lwa u funa vharathu lu só ngo tou ṱumetshedzwaho, lu bvaho mbiluni, lu sá tumiwi.’—1 Petro 1:22.
‘U Funzwa nga Mudzimu u Funana’
5, 6. (a) Yehova o shumisa hani mabuthano a tshaka dzoṱhe u itela u funza vhathu vhawe nga ha lufuno lwa Vhukriste? (b) Vhushaka vhukati ha vhahashu vhu khwaṱha hani nga murahu ha tshifhinga tshilapfu?
5 Naho kha ḽino shango “lufuno lwa vhanzhi” lu tshi khou fhungudzea, Yehova u khou funza vhathu vhawe vha musalauno “u funana.” (Mateo 24:12; 1 Vha-Thesalonika 4:9) Mabuthano a tshaka dzoṱhe a Ṱhanzi dza Yehova ndi zwifhinga zwi swayeaho vhukuma zwa honoho u gudiswa. Kha enea mabuthano, Ṱhanzi dza henefho dzi ṱangana na vhahadzo vha bvaho mashangoni a kule, nahone Ṱhanzi nnzhi dzo vula mahaya adzo u itela u ṱanganedza vhaimeleli vha bvaho kha mashango a nnḓa. Kha ḽiṅwe buthano ḽa zwenezwino, vhaṅwe vho vha vha tshi bva kha mashango ane kanzhi vhathu vha hone vha si sumbedzane maḓipfele avho khagala. Muṅwe Mukriste we a thusa nga vhudzulo o ri: “Musi vhenevha vhaimeleli vha tshi tou thoma u swika, vho vha vha tshi khou ofha vhukuma. Fhedzi nga murahu ha maḓuvha a rathi musi vha tshi khou onesa, vhone na vhoṋemuḓi vho kuvhatedzana nahone vha tshi khou tsengisa miṱodzi. Vho ḓiphina nga lufuno lwa Vhukriste lune vha sa ḓo vhuya vha lu hangwa.” U sumbedza muya wa u ṱanganedza vhaeni kha vhahashu, hu sa londwi vhubvo havho, zwi nga vhuyedza mueni na ṋemuḓi.—Vha-Roma 12:13.
6 Zwine zwa ṱanganwa nazwo mabuthanoni zwi a nyanyula, nahone hu a vha na vhushaka ha tsini-tsini musi Vhakriste vha tshi shumela vhoṱhe Yehova lwa tshifhinga tshilapfu. Musi ri tshi ḓivha vhahashu zwavhuḓi, ri nga funa nga maanḓa pfaneleo dzavho dzavhuḓi—u amba havho ngoho, u fulufhedzea, vhuthu, mafunda, u humbulela, u pfela vhuṱungu, na u sa vha na tseḓa. (Psalme ya 15:3-5; Mirero 19:22) Mark, we a shuma sa murumiwa ngei Vhubvaḓuvha Afurika, o ri, “U shumisana na vhahashu zwo fhaṱa vhushaka vhune ha sa ḓo vhuya ha fhela.”
7. Ndi mini zwine zwa ṱoḓea kha riṋe u itela u ḓiphina nga lufuno lwa Vhukriste tshivhidzoni?
7 U itela u swikelela honoho vhushaka na u ita uri vhu dzule vhu hone tshivhidzoni, miraḓo yatsho i fanela u vha tsini na tsini. Nga u vha hone miṱanganoni ya Vhukriste ya tshivhidzo tshifhinga tshoṱhe, ri khwaṱhisa vhukonani vhune ra vha naho na vhahashu vha tshinnani na vha tshisadzini. Nga u vha hone miṱanganoni, na u ita vhukonani nga phanḓa na nga murahu ha miṱangano na u ṱanganela khayo, ri a ṱuṱuwedzana u ‘funa mishumo mivhuya.’ (Vha-Heberu 10:24, 25) Muṅwe muhulwane wa ngei United States o ṱalutshedza a ri: “Ndi kha ḓi humbula musi ndi tshi kha ḓi vha ṅwana, tshifhinga tshoṱhe muṱa wahashu wo vha u muṅwe wa miṱa ine ya fhedzisela u ṱuwa Holoni ya Muvhuso, u tshi ḓiphina nga nyambedzano ya vhukonani na i fhaṱaho.”
Naa Ni Fanela u ‘Ṱanḓavhuwa’?
8. (a) Paulo o vha a tshi khou amba mini musi a tshi ṱuṱuwedza Vhakorinta uri vha ‘ṱanḓavhuwe’? (b) Ri nga ita mini u itela uri hu vhe na lufuno tshivhidzoni?
8 U itela u ṱanganela nga vhuḓalo kha lwonolwo lufuno, ri fanela u ‘ṱanḓavhusa’ mbilu dzashu. A tshi ṅwalela tshivhidzo tsha Korinta, muapostola Paulo o ri: “Mbilu yashu ya ṱanḓavhuwa phanḓa haṋu. Vhudzulo haṋu a si huṱuku ngomu hashu.” Paulo o vha ṱuṱuwedza uri na vhone vha ‘ṱanḓavhuwe’ nga hu fanaho. (2 Vha-Korinta 6:11-13, NW) Naa na inwi ni nga ‘ṱanḓavhusa’ lufunoni lwaṋu? A no ngo fanela u lindela vhaṅwe vha tshi dzhia vhukando. Vhurifhini hawe he a vhu ṅwalela Vharoma, Paulo o ṱumanya ṱhoḓea ya u vha na vhushaka vhu bvaho mbiluni na heyi nyeletshedzo: “U hulisana muṅwe a fhire muṅwe.” (Vha-Roma 12:10) U itela u hulisa vhaṅwe, ni nga dzhia vhukando ha u lumelisa vhaṅwe miṱanganoni. Ni nga dovha na vha ramba uri vha ṱanganele na inwi vhuḓinḓani ha tsimu kana kha u lugiselela muṱangano. U ita nga u ralo zwi thusa kha u ita uri lufuno lu engedzee.
9. Ndi vhukando vhufhio he vhaṅwe vha vhu dzhia u itela u vha khonani dza tsini-tsini na Vhakriste ngavho? (Ni nga katela na tsumbo iṅwe na iṅwe ya henefho.)
9 Miṱa na vhaṅwe vhathu tshivhidzoni vha nga “ṱanḓavhuwa” nga u dalelana, khamusi nga u ḽa zwiḽiwa vhoṱhe, na nga u ṱanganela kha mishumo yavhuḓi. (Luka 10:42; 14:12-14) Hakop zwifhinga zwoṱhe o vha a tshi dzudzanya pikiniki ya zwigwada zwiṱuku. U a ṱalutshedza: “Hu ḓa vhaṱuku na vhahulwane, u katela na vhabebi vha re vhoṱhe. Muṅwe na muṅwe u ya hayani o takala, nahone vha tshi ḓipfa vhe tsini na tsini.” Samusi ri Vhakriste, a ro ngo fanela u vha vhatendi fhedzi, fhedzi ri fanela u dovha ra vha khonani dza vhukuma.—3 Yohane 14.
10. Ri fanela u ita mini musi ri na vhuleme na vhahashu?
10 Naho zwo ralo, nga zwiṅwe zwifhinga, u sa fhelela zwi nga ita uri hu vhe na vhuleme kha u ṱahulela vhukonani na u vha na lufuno. Ri nga ita mini? Tsha u thoma, ri nga rabela uri ri vhe na vhushaka havhuḓi na vhahashu. Ndi zwine Mudzimu a zwi funa uri vhashumeli vhawe vha vhe na vhukonani, nahone u ḓo fhindula dzenedzo thabelo dzi bvaho mbiluni. (1 Yohane 4:20, 21; 5:14, 15) Ri fanela u dovha ra dzhia vhukando u tendelana na thabelo dzashu. Ric, muḓinḓa a dalelaho wa ngei Vhubvaḓuvha Afurika, u kha ḓi humbula muṅwe wahawe we a vha e muthu wa vhuhali nahone zwi tshi konḓa u tshilisana nae. Ric u a ṱalutshedza: “Nṱhani ha u iledza onoyo wahashu, nda ḓiimisela u mu ḓivha khwine. O wana uri khotsi a wahawe vho vha vha tshi laya lwo kalulaho. Nga murahu ndo no pfesesa nḓila ye wahashu a konḓelwa ngayo u lwisana na u kunda honoho vhubvo na mvelaphanḓa khulwane ye a i ita, ndo pfa ndi tshi mu funa. Ra mbo ḓi vha khonani dzavhuḓi.”—1 Petro 4:8.
Vhudzani Vhaṅwe Maḓipfele Aṋu!
11. (a) Ndi mini zwine zwa ṱoḓea u itela uri lufuno lu engedzee tshivhidzoni? (b) Ndi ngani u sa vhudza vhaṅwe maḓipfele aṋu zwi tshi tshinya muyani?
11 Ṋamusi, vhathu vhanzhi vha tshila vha sa vhuyi vha ita vhukonani ha tsini na muthu naho e ufhio. Zwi ṱungufhadza lungafhani! A zwo ngo fanela u vha nga u ralo tshivhidzoni tsha Vhukriste. Lufuno lwa vhukuma lwa vhurathu na vhukomana a lu sokou vha nyambedzano zwayo na mikhwa yavhuḓi; kana u sumbedzwa nga u takalesa. Ri fanela u ḓiimisela u sumbedza maḓipfele, samusi na Paulo o zwi ita kha Vhakorinta, nahone ri sumbedze vhatendi nga riṋe uri ri a vhilaelela vhukuma mutakalo wavho. Naho hu si muthu muṅwe na muṅwe ane a vha na vhukonani kana u ambesa, u ḓiita tshilendele zwi nga huvhadza vhukuma. Bivhili i sevha u ri: “Wa tshilendele u tevhela mbilu yawe; na zwa lukuna u lwa nazwo’.”—Mirero 18:1.
12. Ndi ngani vhudavhidzano havhuḓi vhu ha ndeme kha vhushaka ha tsini tshivhidzoni?
12 U davhidzana hu bvaho mbiluni ndi ha ndeme kha vhukonani ha ngoho. (Yohane 15:15) Roṱhe ri a ṱoḓa khonani dzine ra nga dzi vhudza mihumbulo na maḓipfele zwashu zwa nga ngomu-ngomu. Zwiṅwe hafhu, musi ri tshi ḓivhana zwavhuḓi, zwi a leluwa u fusha ṱhoḓea dza vhaṅwe. Musi ri tshi vhilaelela madzangalelo a vhaṅwe nga yeneyo nḓila, ri engedza lufuno, nahone ni ḓo vhona vhungoho ha maipfi a Yesu ane a ri: “Mashudu a muṋei a fhira a muṋeiwa.”—Mishumo 20:35; Vha-Filipi 2:1-4.
13. Ri nga ita mini u itela u sumbedza lufuno lwa vhukuma kha vhahashu?
13 U itela uri lufuno lwashu lu vhuyedze vhukuma, ri fanela u lu sumbedza. (Mirero 27:5) Arali lufuno lwashu lu lwa vhukuma, zwi vhonala uri na tshifhaṱuwo tshashu tshi a zwi sumbedza, nahone lu nga sudzulusela mbilu dza vhaṅwe u dzhia vhukando. Munna wa vhuṱali o ṅwala a ri: “Maṱo matshena a takadza mbilu.” (Mirero 15:30) Mishumo ya u humbulelana i dovha ya ita uri hu vhe na lufuno. Naho hu si na muthu ane a nga renga lufuno lwa vhukuma, tshifhiwa tshine tsha ṋewa tshi tshi bva mbiluni tshi nga vha tsha ndeme vhukuma. Garaṱa, vhurifhi, na “fhungo ḽe ḽa bulwa nga tshifhinga tshaḽo”—zwoṱhe zwenezwi zwi nga sumbedza lufuno lwa vhukuma. (Mirero 25:11; 27:9) Musi ro no ita vhukonani na vhaṅwe, ri fanela u vhu khwaṱhisa nga u bvela phanḓa ri tshi sumbedza lufuno lu si na tseḓa. Zwihuluhulu zwifhingani zwa khombo, ri ḓo ṱoḓa u thusa khonani dzashu. Bivhili i ri: “Khonani ndi ṱhama ya maḓuvha oṱhe; ndi mukomana we a bebelwa ḓuvha ḽa khombo.”—Mirero 17:17.
14. Ri nga ita mini arali muṅwe muthu a tshi vhonala a sa aravhi kha u vha hashu na vhukonani?
14 Vhukuma, ri nga si lavhelele u vha tsini na muṅwe na muṅwe tshivhidzoni. Nga lwa nzulele hu ḓo vha na vhaṅwe vhane ra ḓipfa ri tsini-tsini navho u fhira vhaṅwe. Ngauralo arali muṅwe muthu a tshi vhonala a si na vhukonani kha inwi nga nḓila ine na funa ngayo, ni songo ṱavhanyedzela u phetha uri hu na tshiṅwe tshithu tsho khakheaho kha inwi kana kha onoyo muthu. Nahone ni songo vhuya na lingedza u kombetshedza uri onoyo muthu a vhe khonani yaṋu. Arali na sokou sumbedza u vha na vhukonani, ni nga kona u vha na khonani ya tsini-tsini tshifhingani tshi ḓaho.
“Ané Nda mu Takalela ndi Iwe”
15. U khoḓwa kana u sa khoḓwa, zwi vha na mvelelo ifhio kha vhaṅwe?
15 Yesu u fanela u vha o takala lungafhani musi a tshi khou lovhedzwa a tshi pfa maipfi a bvaho ṱaḓulu ane a ri: “Ané nda mu takalela ndi iwe!” (Marko 1:11) Wonoyu mubulo wa u ṱanganedzwa u fanela u vha wo khwaṱhisa lutendo lwa Yesu lwa uri Khotsi awe vha a mu funa. (Yohane 5:20) Zwi ṱungufhadzaho ndi uri vhaṅwe a vha vhuyi vha pfa honoho u khoḓwa hu bvaho kha vhane vha vha ṱhonifha na u vha funa. Ann uri: “Vhaswa vhanzhi vha fanaho na nṋe a vha na miraḓo ya muṱa ine ya ṱanganedza thendo dzavho dza Vhukriste. Zwine ra zwi pfa hayani ndi u sasaladzwa fhedzi. Hezwi zwi ita uri ri tsikeledzee vhukuma.” Naho zwo ralo, musi vha tshi vha tshipiḓa tsha tshivhidzo, vha pfa thikhedzo ya lufuno, ya muṱa wa muya u ṱhogomelaho—vhokhotsi na vhomme, vharathu na vhakomana na dzikhaladzi lutendoni.—Marko 10:29, 30; Vha-Galata 6:10.
16. Ndi ngani u sumbedza mavhonele a u sasaladza kha vhaṅwe zwi sa thusi?
16 Kha dziṅwe mvelele, vhabebi, vhaaluwa, na vhadededzi a vha vhuyi vha khoḓa vhaswa zwi tshi bva mbiluni nga ṅwambo wa uri vha humbula uri u khoḓa honoho hu nga ita uri vha sa londe kana u ḓikukumusa. Eneo mahumbulele a nga kwama miṱa ya Vhukriste na tshivhidzo. U itela u amba nga ha nyambo kana vhuṅwe vhuḓidini, vhaaluwa vha nga kha ḓi ri: “No ita zwavhuḓi, fhedzi ni nga ita zwi fhiraho zwenezwo!” Kana nga iṅwe nḓila, vha nga kha ḓi amba zwine vha si zwi takalele kha muswa. Nga u ita nga u ralo, vhanzhi vha tenda uri vha khou ṱuṱuwedza vhaswa uri vha swikelele zwine vha nga zwi kona. Fhedzi eneo maambele a anzela u vha na mvelelo dzo fhambanaho, samusi vhaswa vha tshi nga kulea nungo kana u ḓipfa vha nga si kone u swikelela zwenezwo.
17. Ndi ngani ri tshi fanela u ṱoḓa zwibuli zwa u khoḓa vhaṅwe?
17 Naho zwo ralo, u khoḓa a ho ngo fanela u vha marangaphanḓa a u ṋea nyeletshedzo fhedzi. U khoḓa hu bvaho mbiluni hu ita uri hu vhe na vhushaka muṱani na tshivhidzoni, zwine zwa ṱuṱuwedza vhaswa u ṱoḓa nyeletshedzo kha vhahashu vha tshinnani na vha tshisadzini vha re na tshenzhelo. Ngauralo nṱhani ha u tendela mvelele i tshi langa nḓila ine ra fanela u fara ngayo vhaṅwe, kha ri ‘ambare muthu muswa, we a ri a tshi vhumbiwa ha vha u tevhedza Mudzimu, a vhumbwa ó luga, e mukhethwa, zwi tshi bva kha mafhungo-ngoho.’ Khoḓani samusi na Yehova a tshi ita nga ralo.—Vha-Efesa 4:24.
18. (a) Vhaswa, ni fanela u dzhia hani nyeletshedzo i bvaho kha vhaaluwa? (b) Ndi ngani vhaaluwa vha tshi rabela na u humbula nga ha nḓila ine vha nga ṋea ngayo nyeletshedzo?
18 Kha ḽiṅwe sia, vhaswa, ni songo phetha nga uri arali vhathu vhahulwane vha tshi khou ni khakhulula kana u ni ṋea nyeletshedzo, zwi amba uri vha a ni vhenga. (Muhuweleli 7:9) A zwo ngo ralo na khathihi! Vha khou itiswa nga u ni vhilaelela na u ni funa zwa vhukuma. Arali zwi vhe zwi songo ralo, ndi ngani vha tshi nga ita vhuḓidini ha uri vha ambe na inwi nga ha eneo mafhungo? Nga ṅwambo wa u ḓivha mvelelo ine maipfi a nga vha nayo, vhathu vhahulwane—zwihuluhulu vhahulwane vha tshivhidzo—kanzhi vha fhedza tshifhinga tshinzhi vha tshi khou humbula na u rabela musi vha sa athu u ṋea nyeletshedzo, samusi vha tshi ṱoḓa u ita zwo lugaho fhedzi.—1 Petro 5:5.
“Yehova u na Lufuno Luhulwane”
19. Ndi ngani vhe vha vhaiswa vha tshi fanela u ṱoḓa thuso kha Yehova?
19 Mvelelo dzi si dzavhuḓi nga murahu ha musi ho sumbedzwa lufuno lu bvaho mbiluni dzi nga vha dzo sia vhaṅwe vhe na maḓipfele a uri u bvela phanḓa vha tshi sumbedza lufuno lu bvaho mbiluni zwi ḓo tou ṋaṋisa u vhaisala. Vha ṱoḓa tshivhindi na lutendo lwo khwaṱhaho uri vha dovhe vha vhudze vhaṅwe maḓipfele avho. Fhedzi a vho ngo fanela u vhuya vha hangwa uri Yehova “ha kule na roṱhe ri re fhano.” U ri ramba uri ri sendele tsini nae. (Mishumo 17:27; Yakobo 4:8) U dovha a pfesesa u ofha hashu u vhaiswa, nahone u fulufhedzisa uri tikedza na uri thusa. Mupsalme Davida o ri khwaṱhisedza a ri: “Yehova u sendela ha vha dzimbilu dzo vunḓekanaho, u tshidza vha mimuya yo huvhalaho.”—Psalme ya 34:18.
20, 21. (a) Ri zwi ḓivha hani uri ri nga vha na vhushaka ha tsini na Yehova? (b) Ndi mini zwine zwa ṱoḓea u itela u vha na vhushaka ha tsini na Yehova?
20 U vha na vhukonani ha tsini-tsini na Yehova ndi vhushaka ha ndeme vhukuma vhune ra nga vhu ṱahulela. Fhedzi naa honoho vhukonani vhu a konadzea zwa vhukuma? Ee. Bivhili i amba nga vhanna na vhasadzi vho lugaho vhe vha ḓipfa vhe tsini-tsini na Khotsi avho wa ṱaḓulu. Mibulo yavho ya lufuno yo vhulungwa u itela u ri ṋea fulufhelo ḽa uri na riṋe ri nga sendela tsini na Yehova.—Psalme ya 23, 34, 139; Yohane 16:27; Vha-Roma 15:4.
21 Zwine Yehova a zwi ṱoḓa u itela u vha na vhushaka nae zwi a swikelelea nga muṅwe na muṅwe. Davida o vhudzisa a ri: “Yehova, ndi nnyi wa u ḓo dzhena nḓuni yau? Ndi nnyi wa u ḓo dzula kha thavha-khethwa yau. Ndi uyo ané a tshimbila nga yo lugaho, ané a ita zwivhuya, a amba a ngoho nga mbilu.” (Psalme ya 15:1, 2; 25:14) Musi ri tshi vhona uri u shumela Mudzimu zwi bveledza mitshelo yavhuḓi na u ita uri a ri livhise na u ri tsireledza, ri ḓo ḓivha uri “Yehova u na lufuno luhulwane.”—Yakobo 5:11, NW.
22. Yehova u ṱoḓa vhathu vhawe vha tshi vha na vhushaka ha mufuda-ḓe?
22 Ro fhaṱutshedzwa lungafhani nga uri Yehova u ṱoḓa u vha na vhushaka ha tsini na vhathu vha songo fhelelaho! Nga zwenezwo naa a ro ngo fanela u sumbedzana honoho vhushaka vhu bvaho mbiluni nga tshashu? Nga thuso ya Yehova, muṅwe na muṅwe washu a nga ṱanganela kha honovhu vhushaka vhune ha vha pfaneleo ya vhurathu na vhukomana hashu ha Vhukriste. Nga fhasi ha Muvhuso wa Mudzimu, muṅwe na muṅwe kha ḽifhasi u ḓo ṱanganela kha honoho vhushaka nga hu sa fheli.
Ni nga Ṱalusa?
• Hu fanela u vha na muya-ḓe tshivhidzoni tsha Vhukriste?
• Muṅwe na muṅwe washu a nga sumbedza hani lufuno lu bvaho mbiluni tshivhidzoni?
• U khoḓa hu bvaho mbiluni hu engedza hani lufuno lwa Vhukriste?
• Lufuno lwa Yehova lu ri tikedza na u ri khwaṱhisa nga nḓila-ḓe?
[Mbudziso Dza Pfunzo]
[Tshifanyiso kha siaṱari 15]
U funana ha Vhakriste hu fhira u sokou kombetshedzea u ita nga u ralo
[Zwifanyiso kha siaṱari 16, 17]
Naa ri nga “ṱanḓavhuwa” kha lufuno lwashu?
[Tshifanyiso kha siaṱari 18]
Naa ni a sasaladza kana u ṱuṱuwedza?