O Vhudza Vhane a Dzhena Navho Kilasini Zwine a zwi Tenda

NAA ni a ṱoḓa u thusa vhane na dzhena navho kilasini uri vha pfesese zwavhuḓi zwine na zwi tenda zwo thewaho Bivhilini? Magdalena, wa miṅwaha ya 18 a re mugudiswa tshikoloni tsha murole wa nṱha ngei Poland, u anzela u amba na vhane a dzhena navho kilasini nga ha zwine a zwi tenda samusi e muṅwe wa Ṱhanzi dza Yehova. Nga ṅwambo wa zwenezwo, kanzhi u vhudziswa mbudziso dzi fanaho na, ‘Zwi amba mini u vha muṅwe wa Ṱhanzi dza Yehova?’ na uri ‘Naa ni a tenda Yesu Kristo?’ O vha a tshi thusa hani vhane a dzhena navho kilasini? Magdalena o rabela Yehova u itela vhulivhisi nahone o tshila u tendelana na thabelo dzawe.—Yakobo 1:5.

Ḽiṅwe ḓuvha, Magdalena a vhudzisa mudedekadzi ane a ṱhonifha thendo dzawe arali a tshi nga sumbedza kilasi vidio ine ya pfi Jehovah’s Witnesses—The Organization Behind the Name. * Onoyo mudedekadzi a tenda zwenezwo. Nga murahu Magdalena a vhudza vhane a dzhena navho kilasini a ri: “Ndi khou dzudzanya uri khonani yanga i sumbedze kilasi mbekanyamushumo ya mimunithi ya 90. I ḓo katela u sumbedzwa ha vidio na khaseledzo nga ha Ṱhanzi dza Yehova. Naa ni ḓo ḓa?” Muṅwe na muṅwe a tenda. Magdalena na Wojciech, ane a vha muevangeli wa tshifhinga tshoṱhe a re na tshenzhelo, vha thoma u lugiselela yeneyo mbekanyamushumo.

Ro vha ro dzudzanya u thoma yeneyo mbekanyamushumo nga nyambo ya mimunithi ya 20 yo thewaho kha bugwana ine ya pfi Ṱhanzi dza Yehova—Ndi Vhonnyi? Vha Tenda Mini? * uri i tevhelwe nga khaseledzo ya mbudziso na phindulo. Vidio yo vha i tshi ḓo sumbedzwa nga murahu ḽaiburarini ya tshikolo. Mugudiswa muṅwe na muṅwe kilasini o vha a tshi ḓo ṋewa tshifhiwa—fulobo khulwane i re na bugwana dzi si gathi, bugu ine ya pfi Questions Young People Ask—Answers That Work, * na zwiṅwe zwibammbiri na dzimagazini.

Nga ḓuvha ḽa mbekanyamushumo, ho vha hu na vhane a dzhena navho kilasini vha 14, mudededzi, na vhaṅwe vhagudiswa vhaṋa vhe vha vha vhe henefho laiburari. Wojciech o thoma nga u ṱalutshedza uri vhaṅwe vharendi na vhaṅwali vha Poland vha shumisa dzina ḽa Mudzimu, Yehova, kha dzibugu dzavho. O dovha a amba nga dziṅwe katekisima dza kale dza Katolika dzine dza vha na dzina ḽa Mudzimu. Musi a tshi ṱalusa mushumo wa musalauno wa Ṱhanzi dza Yehova, o vha sumbedza bugwana dzi re na ofisi dza madavhi o fhamba-fhambanaho na zwifanyiso zwa Holo nnzhi dza Guvhangano.

Ha thomiwa khaseledzo i nyanyulaho. Magdalena na Wojciech vho shumisa Bivhili u itela u fhindula mbudziso. Zwenezwi zwa kwama vhathetshelesi na u ita uri vha tende zwa uri Ṱhanzi dza Yehova a dzi funzi mihumbulo yadzo. Ndi dzifhio dziṅwe mbudziso dzo vhudziswaho, nahone dzo fhindulwa hani?

Mbudziso: Bivhili i na mibulo minzhi i sa pfali na mafanyisi, zwine zwa nga ṱalutshedzelwa nga nḓila nnzhi. Naa zwi a konadzea u tshila u tendelana na zwine Bivhili ya zwi amba?

Phindulo: Vhaṅwe vha amba uri Bivhili i nga shumiswa u itela u tikedza muhumbulo muṅwe na muṅwe une na vha nawo. Fhedzi humbulani: Arali ni tshi khou ṱoḓa u ḓivha zwe muṅwali a zwi amba nga mafhungo awe, naa a si khwine u mu vhudzisa? U fhambana na vhaṅwali vha dzibugu  vho no faho, Muṅwali wa Bivhili, Yehova Mudzimu, u a tshila. (Vha-Roma 1:20; 1 Vha-Korinta 8:5, 6) Vhubvo ha mafhungo a re kha luṅwalo a nga sumbedza ṱhalutshedzelo yo teaho. Zwiṅwe hafhu, Bivhili i anzela u amba nga mafhungo a fanaho fhethu hunzhi, ngauralo u vhambedza eneo maṅwalo zwi ḓo thusa. Nga zwenezwo ri nga tendela Mudzimu a tshi livhisa mihumbulo yashu, zwi tshi tou nga ene muṋe u khou ri ṱalutshedza luṅwalo. Nga u ita zwenezwo, naa ri nga si ḓivhe zwine a zwi funa na u tshila u tendelana nazwo samusi zwo dzumbululwa Bivhilini?

Mbudziso: Ndi phambano ifhio i re hone vhukati ha Vhakriste na Ṱhanzi dza Yehova?

Phindulo: Ri Vhakriste! Fhedzi nṱhani ha u sokou amba uri dzi Vhakriste, Ṱhanzi dza Yehova dzi lwela u tshila u tendelana na zwine dza zwi tenda na zwine Mudzimu a khou dzi funza zwone u itela uri dzi vhuyelwe. (Yesaya 48:17, 18) Samusi pfunzo dzavho dzoṱhe dzo thewa Bivhilini, dzi a zwi ḓivha uri dzi na mafhungo-ngoho.—Mateo 7:13, 14, 21-23.

Mbudziso: Ndi ngani ni tshi ya kha vhathu vhane ni si vha ḓivhe na luthihi nahone na amba navho? Naa zwenezwo a si u kombetshedza vhaṅwe uri vha tende zwine na zwi tenda?

Phindulo: Naa ni humbula uri zwo khakhea musi muṅwe muthu a tshi amba na inwi zwavhuḓi tshiṱaraṱani nahone a ni vhudzisa nḓila ine na humbula ngayo nga ha zwiṅwe zwithu? (Yeremia 5:1; Tsefanya 2:2, 3) (Nga zwenezwo Wojciech na Magdalena vha sumbedza nḓila ine vha vhudzisa ngayo vhafhiri vha gondo arali Mudzimu a tshi ṱhogomela vhathu vhe vha vha vha tshi khou shengela nga ṅwambo wa muḓalo wo iteaho zwenezwino ngei Poland.) Musi ro no pfa nḓila ine muthu a humbula ngayo, ri mu vulela Bivhili. Arali muthu a sa funi u amba, ri a mu onesa nahone ra fhirela phanḓa. (Mateo 10:11-14) Naa zwenezwo ndi u kombetshedza vhaṅwe uri vha ambe? Kana naa vhathu a vho ngo fanela uri vha vhe na nyambedzano?

Mbudziso: Ndi ngani ni sa pembeleli holodei?

Phindulo: Ri pembelela fhedzi tshiitea tshe Bivhili ya ri laedza uri ri tshi pembelele—Tshihumbudzo tsha lufu lwa Yesu Kristo. (1 Vha-Korinta 11:23-26) Malugana na dziholodei, ni nga ṱoḓisisa nga ha vhubvo hadzo nga u sedza kha dzi-encyclopedia na kha dziṅwe bugu dzi fulufhelwaho. Arali na ita nga u ralo, ni ḓo zwi vhona nga hu leluwaho uri ndi ngani ri sa pembeleli zwenezwo zwiitea.—2 Vha-Korinta 6:14-18.

Ho vhudziswa mbudziso nnzhi nahone dza fhindulwa. Yeneyo khaseledzo yo fhedza tshifhinga tshilapfu lwe u sumbedzwa ha vidio ha fhiriselwa phanḓa.

Vhagudiswa vho aravha hani? Litshani Magdalena a ri vhudze: “Ndo mangadzwa nga uri vhaṅwe vhagudiswa vhane vha anzela ita zwa vhutsilu na u goḓa vhaṅwe vho vhudzisa mbudziso dza ndeme. Naho vho vha vha tshi amba uri a vha tendi uri Mudzimu u hone, tshifhingani tsha khaseledzo vho sumbedza u vha na lutendo kha Mudzimu!” Vhe vha vha vhe hone vho takalela u ṱanganedza zwifhiwa—tshivhalo tsha bugu dza 35, bugwana dza 63, nahone vho tshimbidzelwa magazini dza 34.

Ndi mvelelo dzavhuḓi lugafhani dze yeneyo mbekanyamushumo ya vha nadzo! A yo ngo thusa fhedzi vhane Magdalena a dzhena navho kilasini uri vha ḓivhe na u pfesesa Ṱhanzi dza Yehova khwine, fhedzi yo dovha ya ṱuṱuwedza vhunzhi ha vhaswa u humbula nga ha ndivho ya vhutshilo. Zwi nga vha hani arali na lingedza u thusa vhane na dzhena navho kilasini u guda zwo engedzeaho nga ha zwine na zwi tenda?

[Ṱhaluso dzi re magumoni a siaṱari]

[Tshifanyiso kha siaṱari 31]

Magdalena na Wojciech vha tshi khou lugisela khaseledzo