Muvhigo Wa Vhahuweleli Vha Muvhuso

Vhurifhi vhu Bvaho kha Alejandra

U ṄWALA vhurifhi zwo sumbedza u vha nḓila i shumaho ya u ṱanziela. Naho nga zwiṅwe zwifhinga hu tshi nga vhonala hu si na mvelelo, vhane vha bvela phanḓa vha tshi shumisa enea maitele vho fhaṱutshedzwa vhukuma. Vha humbula nyeletshedzo ya Bivhili ine ya ri: “Zwala mbeu yau hú tshee matsheloni; na nga madekwana tshanḓa tshau tshi songo awela. Ngauri a U ḓivhi ine ya ḓo mela; kana hu ḓo mela ino, kana iḽa; khamusi dzoṱhe mbili dzi ḓo mela zwavhuḓi.”—Muhuweleli 11:6.

Alejandra, ane a vha muswa wa Ṱhanzi we a vha a tshi khou shuma ofisini ya davhi ya Ṱhanzi dza Yehova ngei Mexico miṅwaha i ṱoḓaho u vha fumi, o vha o farwa nga vhulwadze ha khentsara. Tshiimo tshawe tsha ṋaṋa, nahone a fhelelwa nga maanḓa lwe a kundwa u bvela phanḓa na maitele awe a ḓuvha ḽiṅwe na ḽiṅwe. Naho zwo ralo, a sa ṱoḓi u litshelela vhuḓinḓa hawe, Alejandra a phetha u ṅwala marifhi. O ṅwala nga ha ndugiselelo ya pfunzo ya Bivhili ya hayani ya mahala nahone a dzhenisa na ṋomboro dza luṱingo dza mme awe. Nga zwenezwo a ṋea mme awe eneo marifhi uri vha a sie miḓini ine vha wana hu si na vhathu musi vha tshi khou ita vhuḓinḓa ha nnḓu nga nnḓu.

Nga tshenetsho tshifhinga, Diojany, ṅwananyana a bvaho Guatemala, o ya a shuma sa mushumi wa nḓuni ngei Cancún, Mexico. Musi e henefho, a ṱangana na Ṱhanzi dza Yehova nahone a ḓiphina nga u haseledza Bivhili navho. Nga murahu, vhatholi vhawe vha phetha u pfulutshela Ḓoroboni ya Mexico nahone vho vha vha tshi ṱoḓa uri a ṱuwe navho. Diojany o vha a sa ṱoḓi u pfuluwa navho nga ṅwambo wa uri zwo vha zwi tshi ḓo amba uri a nga si tsha ḓo vhonana na Dziṱhanzi.

Vhatholi vhawe vha mu khwaṱhisedza nga uri: “Ni songo vhilaela, Ṱhanzi dza Yehova dzi wanala huṅwe na huṅwe. Ri ḓo vha ṱoḓa nga u ṱavhanya musi ri tshi tou swika henengei.” E na tshilavhelelwa tshavhuḓi, Diojany a tenda u ṱuwa navho. Musi vhe Ḓoroboni ya Mexico, vhatholi vha Diojany vha ṱoḓa Dziṱhanzi. Nga ṅwambo wa zwiṅwe zwiitisi, vho vha vha si khou kona u vha wana, naho ho vha hu na Ṱhanzi dzi fhiraho 41 000 na zwivhidzo zwa 730 kha yeneyo ḓorobo.

Hu si kale, Diojany o vha a tshi khou kulea nungo nga ṅwambo wa uri o vha a si khou kona u wana Dziṱhanzi uri a bvele phanḓa na khaseledzo dzawe dza Bivhili. Ḽiṅwe ḓuvha, mutholi wawe wa mufumakadzi a ḓa khae, a ri: “Zwi a mangadza! Mudzimu waṋu o pfa thabelo dzaṋu.” A tshi khou mu ṋekedza vhurifhi hawe, o ri: “Ṱhanzi dzo ni siela hovhu vhurifhi.” Ho vha hu vhurifhi vhu bvaho kha Alejandra.

Diojany o mbo ḓi kwamana na mme a Alejandra na murathu wawe, ane a pfi Blanca, nahone a ṱanganedza pfunzo ya Bivhili. Nga murahu ha dzivhege dzi si gathi, a ṱangana na Alejandra nahone a tou vha madele mapfani. Alejandra a mu ṱuṱuwedza u bvela phanḓa na u guda Bivhili uri a ite mvelaphanḓa ya muya.

Nga murahu ha miṅwedzi i si gathi, nga July 2003, Alejandra a fa, nahone o siela vhatendi ngae tsumbo yavhuḓi ya lutendo na tshivhindi. Musi vhe mbulungoni, vhanzhi vho vha vho kwamea vhukuma musi vha tshi ṱangana na Diojany na u pfa a tshi ri: “Alejandra na muṱa wahawe vho vha vhe tsumbo yavhuḓi kha nṋe. Ndo ḓiimisela u shumela Yehova nahone nda lovhedzwa nga u ṱavhanya. Ndo ṱulutshelwa lungafhani u dovha nda vhona Alejandra Paradisoni ine ya khou ḓa!”

Ee, na vhurifhi vhupfufhi vhu nga vha na mvelelo dzavhuḓi na dzi fhedzaho tshifhinga tshilapfu!