Zwi Fhira u Sokou vha Mutambo Zwawo

VHANA vha funa u tamba. Bugu ine ya pfi The Developing Child i ṱalutshedza u ri: “Zwenezwo zwi a vhuyedza. Ndi hone hune mavhonele a ṅwana a fhaṱea hone.” Nga u tamba, vhana vha guda u shumisa zwipfi zwavho, u pfesesa vhupo vhune vha vha khaho, na u kona u shumisana na vhaṅwe.

Musi vhe na miṅwaha miṋa kana miṱanu, vhana vha thoma u tamba vhe vhuimoni ha vhathu vhahulwane sa tshipiḓa tsha mitambo yavho. Yesu o vhuya a amba nga ha vhana musi vha tshi khou tamba. Vhaṅwe vha ṱoḓa u tamba vhe “minyanyani ya mbingano,” vhaṅwe vha ṱoḓa u tamba vhe “dzimpfuni,” nahone sa vhana vha a ṱaṱisana nga tshavho nga ṅwambo wa uri vhaṅwe a vha ṱoḓi u ṱanganela. (Mateo 11:16, 17) Mitambo yo raloho i nga ita uri vhana vha vhe na miṅwe mishumo ya ndeme mihumbuloni yavho musi vha tshi khou aluwa.

Vhana vha re kha tshifanyiso vha khou tamba sa mufunzi wa Bivhili na mugudiswa. A vha khou fara pfunzo ya Bivhili, fhedzi vha na muhumbulo wa u ṱanganela kha mulaedza wa Bivhili. Nahone yeneyi ngudo ndi ya ndeme vhukuma, ngauri Yesu o vhudza vhatevheli vhawe uri vha ite vhathu vhafunziwa na u vha funza u ita zwoṱhe zwe a vha funza zwone.—Mateo 28:19, 20.

Vhabebi vhane vhana vhavho vha funa u tamba vha tshi khou fara pfunzo dza Bivhili, u ṋekedza nyambo, kana u huwelela nga nnḓu nga nnḓu vha fanela u ḓipfa vho hulisea nga zwenezwo. Nga ho ḓoweleaho, vhana vha ita zwine vha zwi vhona kha vhathu vhahulwane henefho hune vha dzula hone. Mitambo ya vhana yo thewaho Bivhilini ndi musumbedzo wa uri vho aluswa ‘nga u laiwa na u kwengweledzelwa zwa Murena.’—Vha-Efesa 6:4, Charles B. Williams.

Yehova u ṱoḓa vhana vha tshi ṱanganela kha vhurabeli ha ngoho. O vhudza Mushe uri a katele na “vhana” musi hu tshi khou vhaliwa Mulayo. (Doiteronomio 31:12) Arali vhana vhaṱuku vha katelwa, zwenezwo zwi ḓo vhonala kha zwine vha zwi tamba. Nahone ṅwana ane a tamba a tshi khou edzisa u vha mushumeli wa Mudzimu u vha a tshi khou dzhia vhukando ha u thoma ha u ṱoḓa u vha mushumeli wawe.