Mbudziso dzi Bvaho ha Vhavhali

Musi Yesu a tshi funza vhatevheli vhawe u ‘adzima hune vha si fulufhele tshithu,’ naa o vha a tshi khou amba uri vha songo ṱoḓa na tshelede ye vha i hadzima muthu?

Maipfi a Yesu o ṅwaliwaho kha Luka 6:35 a pfala zwavhuḓi vhukuma ri na zwo ambiwaho kha Mulayo wa Mushe mihumbuloni. Henefho Mudzimu o vhudza Vhaisiraele uri vha adzime Vhaisiraele ngavho tshelede hu si na nzwalelo ine ya fanela u vhuiswa kha vhane vha shaya nahone vhane vha ṱoḓa thuso. (Ekisodo 22:25; Levitiko 25:35-37; Mateo 5:42) Honoho u hadzima ho vha hu sa itelwi u vhambadza kana zwa vhubindudzi. Nṱhani hazwo, ho vha hu tshi itela u thusa vhashai. Zwi re zwone ndi uri, zwo vha zwi sa ḓo vha u sumbedza lufuno u hadzimisa wahau u itela u bindula. Naho zwo ralo, we a hadzimiwa tshelede o vha a tshi tea u i humisela, nahone o vha a tshi tea u ita vhungoho ha uri u ḓo lifha yeneyo tshelede, khamusi nga u tou ita muano.—Doiteronomio 15:7, 8.

Musi Yesu a tshi tikedza wonoyo Mulayo, o ṋea iṅwe nḓila yo ṱanḓavhuwaho ine wa nga shumiswa ngayo, nga u amba uri ane a khou hadzima ho ngo tea u ‘fulufhela tshithu.’ U fana na Vhaisiraele, tshiṅwe tshifhinga Vhakriste vha a vha na vhuleme ha zwa ikonomi kana zwiṅwe zwiimo zwine zwa nga zwenezwo zwine zwa ita uri vha vhe vhashai. Arali wahashu wa Mukriste a re kha vhuimo ho raloho a tshi khou ṱoḓa thuso ya zwa dzitshelede, naa zwi nga si vhe u sumbedza vhuthu arali ra mu ṋea thuso yo raloho? I ngoho, lufuno lwa vhukuma lu ḓo sudzulusela Vhakriste ngae uri vha thuse wahavho we khamusi nga mulandu wa zwiṅwe zwiimo a ḓiwana e na vhuleme vhuhulwane ha zwa dzitshelede. (Mirero 3:27) Zwi nga kha ḓi konadzea u ṋea onoyo wahashu tshifhiwa, naho arali yeneyo tshelede i sa swiki ine muthu a nga i hadzimisa.—Psalme ya 37:21.

Ḓanani ḽa u thoma ḽa miṅwaha C.E., muapostola Paulo na Baranaba vho vha vho ṋewa mushumo wa u isa miṋeelo i bvaho kha Vhakriste vha ngei Asia Minor i tshi khou ya kha vhahavho vha ngei Yudea, vhe vha vha vha tshi khou fa nga nḓala. (Mishumo 11:28-30) Nga hu fanaho na ṋamusi, musi ho vha na khombo, Vhakriste vha anzela u rumela zwifhiwa kha vhahavho vha shayaho. Nga u ita nga u ralo, vha dovha vha ṱanziela kha vhaṅwe. (Mateo 5:16) I ngoho, mavhonele na zwiimo zwa ane a khou ṱoḓa thuso zwi fanela u ṱhogomelwa. Ndi ngani a tshi khou ṱoḓa thuso? Maipfi a Paulo ndi a ndeme vhukuma musi zwi tshi ḓa kha eneo mafhungo: “Arali muthu á sa funi u shuma, na u ḽa a songo ḽa.”—2 Vha-Thesalonika 3:10.

Arali wahashu ane a khou ṱoḓa thuso ya zwa dzitshelede a tshi khou tou ṱoḓa tshelede lwa tshifhinganyana nahone a dovha a i vhuisa, a nga kha ḓi hadzimiwa yeneyo tshelede hu si na nzwalelo ine a fanela u i vhuisa. Nga fhasi ha zwiimo zwo raloho, u hadzima tshelede hu na tshilavhelelwa tsha uri yeneyo tshelede i vhuiswe zwi ḓo vha zwi sa hanedzani na maipfi a Yesu a re kha Luka 6:35. Hu fanela u itwa thendelano yo tou ṅwalwaho fhasi, nahone muthu o hadzimiwaho u fanela u ita vhungoho ha uri a lifhe yeneyo tshelede nga tshifhinga tshee vha tendelana ngatsho. Vhukuma, lufuno lwa Vhukriste lu fanela u sudzulusela we a hadzimiwa uri a lifhe yeneyo tshelede samusi lwo sudzulusela muthu we a hadzima.

Muthu ane a khou ṱoḓa u hadzima muṅwe tshelede u fanela u thoma a ṱolisisa zwiimo zwa muṱa wawe. Sa tsumbo, naa arali a hadzima wahawe yeneyo tshelede u ḓo vha a kha ḓi kona u ṱhogomela ṱhoḓea dza muṱa wawe, ine ya vha ṱhoḓea ya Maṅwalo? (2 Vha-Korinta 8:12; 1 Timotheo 5:8) Naho zwo ralo, Vhakriste vha ṱoḓa zwibuli zwa u sumbedzana lufuno, u sumbedza lufuno lwo raloho nga nḓila dzine dza tshimbidzana na maitele a Bivhili.—Yakobo 1:27; 1 Yohane 3:18; 4:7-11.