Mbudziso Dzi Bvaho Ha Vhavhali

Tshivhidzo tsha Vhukriste tshi dzhia hani vhupangwa?

Ipfi ḽa Mudzimu ḽi sasaladza u kambiwa na vhupangwa sa vhuḓifari vhu sa ṱanganedzei kha vhathu vhane vha shumela Mudzimu. Ngauralo, tshivhidzo tsha Vhukriste tshi dzhia vhupangwa vhu tshi fana na u kambiwa. Zwidakwa na vha vhupangwa vha nga si vhe tshipiḓa tsha tshivhidzo tsha Vhukriste.

Mirero 23:20, 21 i ri: “U songo dzula na vhadzia-u-nwa, vhane vha nyadzisa mivhili yavho. Ngauri munwi na muphagi vha ḓo shaya; khofhe dzi ambadza muthu madzanganda.” Kha Doiteronomio 21:20, ri vhala nga ha vhathu vha “tshipimbi na tshikhuna,” vhe vha vha vha tshi fanela u vhulahwa u ya nga Mulayo wa Mushe. U ya nga yeneyi ndimana, zwithu zwivhili zwe zwa vha zwi tshi ambelwa kha onoyo muthu wa tshikhuna na a sa rembuluwi ho vha hu ‘u ḽesa na u kambiwa.’ Zwi tou pfala uri vhupangwa ho vha hu sa tendelwi tshifhingani tsha Isiraele ḽa kale kha vhathu vhane vha ṱoḓa u shumela Mudzimu.

Nga zwenezwo, vhupangwa ndi mini, nahone Maṅwalo a Tshigerika a Tshikriste a ri mini nga ha enea mafhungo? Muthu a re na vhupangwa u ṱaluswa sa “muthu ane a phaga na ane a ṱoḓesa zwithu zwinzhi zwa u ḽa na u nwa.” Ngauralo, vhupangwa vhu ambela kha u phaga, nahone Ipfi ḽa Mudzimu ḽi ri vhudza uri ‘vhadzia u ḽesa na u nwesa’ a vha nga ḽi ifa ḽa Muvhuso wa Mudzimu.  (1 Vha-Korinta 6:9, 10; Vha-Filipi 3:18, 19; 1 Petro 4:3) Hafhu, musi muapostola Paulo a tshi sevha Vhakriste malugana na u tovhola “mishumo ya ṋama,” o amba na nga ha “u kambiwa, vhupangwa na zwine zwa nga zwenezwo.” (Vha-Galata 5:19-21) Kanzhi u ḽesa zwi tshimbidzana na u kambiwa na u ita phosho. Zwiṅwe hafhu, vhupangwa vhu a katelwa kha mubulo wa Paulo une wa ri “na zwine zwa nga zwenezwo.” U tou fana na miṅwe “mishumo ya ṋama,” Mukriste ane a ḓivhelwa vhupangwa ane a hana u shandula vhuḓifari hawe ha vhupangwa o tewa nga u bviswa tshivhidzoni.—1 Vha-Korinta 5:11, 13. *

Naho Ipfi ḽa Mudzimu ḽi tshi dzhia u kambiwa hu tshi fana na vhupangwa, mudzia-u kambiwa u a vhonala u fhirisa muthu ane a ḽesa. Zwiga zwa mudzia-u-kambiwa zwi a vhonala nga hu leluwaho vhukuma. Naho zwo ralo, u ṱolisisa mbuno dzine dza sumbedza uri muthu ndi mudzia-u-ḽesa zwi a konḓa ngauri a zwi vhonali nga hu leluwaho kha mbonalo ya muthu. Nga zwenezwo, u dzudzanya zwiimo zwo raloho zwi ṱoḓa vhulondi vhuhulwane na ṱhalukanyo kha vhahulwane vha tshivhidzo.

Sa tsumbo, u khwaṱhesa zwi nga kha ḓi vha tshiga tsha u vha na vhupangwa, fhedzi zwenezwo a zwi anzeli u vha nga u ralo misi yoṱhe. U vha ha muthu na muvhili zwi nga kha ḓi amba uri u na vhulwadze. A nga kha ḓi vha o tou zwi mamela. Ri fanela u dovha ra zwi ṱhogomela uri u khwaṱhesa zwi tshimbidzana na zwiimo zwa ṋama, hu uri vhupangwa vhu tshimbidzana na ngelelo. U khwaṱhesa zwi ṱaluswa sa “u vha na muvhili wo kalulaho,” ngeno vhupangwa hu “u phaga kana u ḽesa.” Ngauralo, uri muthu u na vhupangwa a zwi vhonali nga ṅwambo wa u vha hawe na muvhili, fhedzi zwi vhonala kha mavhonele awe siani ḽa zwiḽiwa. Muthu a nga kha ḓi vha e na muvhili wo linganelaho kana a nga kha ḓi vha o sekena, fhedzi a nga vha na vhupangwa. Zwiṅwe-hafhu, nḓila ine vhathu vha dzhia ngayo muvhili sa wo linganelaho i a fhambana zwi tshi ya nga fhethu hune vha dzula hone.

Ndi dzifhio tswayo dza u vha na vhupangwa? U vha na vhupangwa zwi vhonala nga u sa kona u ḓilanga ha muthu, khamusi nga u tou ḽesa zwiḽiwa u vhuya u swika muthu a sa tsha kona na u tshimbila kana u vhuya u swika a tshi lwala. U sa kona hawe u ḓilanga zwi sumbedza uri ha dzhieli nṱha samba ḽine a khou ḽi itela Yehova na dzina ḽavhuḓi ḽa vhathu Vhawe. (1 Vha-Korinta 10:31) Kha ḽiṅwe sia, muthu ane a ḽesa nga tshiṅwe tshifhinga a nga si dzhiiwe sa ‘mudzi-u-ḽesa.’ (Vha-Efesa 5:5) Naho zwo ralo, u ya nga bugu ya Vha-Galata 6:1, Mukriste o raloho a nga kha ḓi ṱoḓa thuso. Paulo u ri: “Vharathu, nahó muthu o kanganyedzwa, a vhuya a khakha, inwi ni re vha Muya, wé a ralo mu vhuyedzedzeni nga muya wa u vuḓa.”

Ndi ngani nyeletshedzo ya Bivhili ya u iledza u ḽesa i ya ndeme zwihulu-hulu ṋamusi? Ngauri zwihulu-hulu ṋamusi, Yesu o sevha a ri: “Ḓi-thanyeleni, uri dzimbilu dzaṋu dzi sa ḓo lemedzwa nga vhupangwa na nga u nwesa na nga u vhilaelela vhutshilo vhuno, ḓuvha heḽo ḽa vhilula u ni ḓela. Ngauri ḽi ḓo nga tshifu.” (Luka 21:34, 35) U iledza u ḽesa nga nḓila i songo linganelaho ndi zwa ndeme u itela uri ri iledze kutshilele kune kwa huvhadza vhumuya hashu.

U linganyisela ndi vhugala ha Mukriste. (1 Timotheo 3:2, 11) Ngauralo, Yehova u ḓo thusa vhoṱhe vhane vha lwela u shumisa nyeletshedzo ya Bivhili kha u linganyisela nḓila ine vha ḽa na u nwa ngayo.—Vha-Heberu 4:16.

[Ṱhaluso dzi re magumoni a siaṱari]