Naa Ni a zwi Ḓivha zwa uri Dakalo Ḽi Bveledzwa nga u Ṋea?

MUṄWE Mukriste wa tshisadzini a fulufhedzeaho o fhedza miṅwaha i ṱoḓaho u vha 50 a tshi khou fhisetshela tshumeloni ya Vhukriste. Naho mvelelo dza vhulala dzo mu ita uri a vhe muhoṱa, o vha o ḓiimisela u dalela Holo ya Muvhuso ntswa ye ya vha i tshi khou fhaṱiwa. A tshi ḓitika nga mahaḓa a muṅwe Mukriste wa tshinnani, o dzhena holoni nahone a tshimbila nga u ongolowa o livha hune a khou ya hone—kha bogisi ḽa muṋeelo. Henefho a posa tshelede i si gathi ye a vha a tshi khou i vhulungela wonoyo mushumo. Naho o vha a nga si kone u ṱanganela kha mushumo wa u fhaṱa holo, o vha a tshi ṱoḓa u thusa.

Onoyo mufumakadzi wa Mukriste a nga ni humbudza nga ha muṅwe mufumakadzi a fulufhedzeaho—“tshilikadzi ya mutshinyali” we Yesu a mu vhona a tshi khou posa zwikwati zwivhili kha mbulungelo ya mali thembeleni. A ro ngo vhudziwa nga zwiimo zwawe, fhedzi u sa vha na munna nga tshenetsho tshifhinga zwo vha zwi tshi nga ita uri mufumakadzi a vhe na vhuleme vhuhulwane ha masheleni. Yesu o mu pfela vhuṱungu, nga ṅwambo wa uri o pfesesa vhuimo hawe. Nga u mu shumisa sa tsumbo kha vhafunziwa vhawe, o ṱhogomela uri muṋeelo wawe muṱuku wo vha u tshi imela “zwoṱhe zwiné a vha nazwo’, zwiḽiwa zwawe zwoṱhe.”—Marko 12:41-44.

Ndi ngani mufumakadzi a shayaho a fanaho na yeneyo tshilikadzi ya mutshinyali a tshi ita honoho vhuḓidini? Zwi khagala, uri ndi nga ṅwambo wa uri o vha o ḓikumedza vhukuma kha Yehova Mudzimu, he vhurabeli hawe ha vha ho ḓitika tshoṱhe thembeleni ya Yerusalema. Naho o vha a si na zwinzhi zwe a vha a tshi nga zwi ṋeela, o vha a tshi ṱoḓa u tikedza tshumelo khethwa. Nahone u fanela u vha o wana dakalo ḽa vhukuma nga u ṋeela zwoṱhe zwe a vha a tshi nga kona.

U Ṋeela u Itela u Tikedza Mushumo wa Yehova

U ṋeela nga thundu dzi vhonalaho na nga tshelede zwo vha zwi tshipiḓa tsha ndeme vhurabelini ho kunaho, nahone tshifhinga tshoṱhe zwo vha zwi tshi bveledza dakalo ḽihulwane. (1 Koronika 29:9) Miṋeelo ya Isiraele ḽa kale yo vha i sa shumiswi fhedzi u itela u khavhisa thembele, fhedzi yo vha i tshi dovha ya ita uri masia oṱhe a vhurabelini ha Yehova henefho a shume ḓuvha ḽiṅwe na ḽiṅwe. Mulayo wo amba uri vhanna vha Isiraele vha fanela u ṋeela nga tshafumi kha zwibveledzwa zwavho u itela u tikedza Vhalevi, vhe vha vha vha tshi ita tshumelo dza thembeleni. Fhedzi na Vhalevi na vhone vho vha vha tshi fanela u ṋeela kha Yehova tshafumi tsha zwibveledzwa zwine vha zwi ṱanganedza.—Numeri 18:21-29.

 Naho Vhakriste vho vhofhololwa kha ṱhoḓea dza Mulayo wa mulanga, maitele a uri vhashumeli vha Mudzimu vha fanela u ṋeela nga zwithu zwi vhonalaho u itela u tikedza vhurabeli ha ngoho ho ngo shanduka. (Vha-Galata 5:1) Zwiṅwe hafhu, Vhakriste vha ḓana ḽa u thoma vho vha vha tshi takalela u ṋeela u itela u thusa vhahavho vha shayaho. (Mishumo 2:45, 46) Muapostola Paulo o humbudza Vhakriste uri samusi Mudzimu o vha ṋea nga mafunda zwithu zwavhuḓi, vha fanela u sumbedza eneo mafunda kha vhaṅwe. O ṅwala a ri: “Vho pfumaho lwa tshifhinga tsha zwino vha faye, vha sa ḓó ḓi-ita vhahulwane, na hone vha so ngo fulufhela lupfumo lu sí na halwo, vha fulufhele Mudzimu, ané a ri kumedza zwoṱhe lwa u tou pfumisa, uri ri ḓifhelwe ngazwo’. Nga vha ite zwivhuya, vha pfume u ita zwo nakaho, vha vhe vhakovhi, vha u ita vhushaka na vhaṅwe. Vhané vha ḓi-kuvhanganyela zwiné zwa ḓo ita thikho yavhuḓi ya matshelo, uri vha wane vhutshilo vhu re vhutshilo nangoho. Vhunga nó pfumiswa kha zwoṱhe ndi uri ni tonde hoṱhe mbilu dzaṋu dzó ṱamba, ná ralo Mudzimu a nga livhuhiwa nga riṋe.” (1 Timotheo 6:17-19; 2 Vha-Korinta 9:11) I ngoho, u ya nga zwe a ṱangana nazwo, Paulo o vha a tshi nga khwaṱhisedza maipfi a Yesu ane a ri: “Mashudu a muṋei a fhira a muṋeiwa.”—Mishumo 20:35.

U Ṋeela ha Vhukriste Ṋamusi

Na ṋamusi, Vhashumeli vha Yehova vha bvela phanḓa vha tshi shumisa thundu dzavho dzi vhonalaho u itela u thusana na u tikedza mushumo wa Mudzimu. Na vhane vha shaya, vha a ṋeela zwine vha nga kona. “Mukoma a fulufhedzeaho na wa vhuṱali” u pfa e na vhuḓifhinduleli kha Yehova ha u shumisa zwavhuḓi yeneyo thundu ine ya ṋeelwa. (Mateo 24:45) Miṋeelo i shumiselwa uri ofisi dza davhi dzi shume, kha u ṱalutshedzelwa na u bveledzwa ha Dzibivhili na khandiso dza Bivhili, u itela u dzudzanya maguvhangano mahulwane a Vhukriste, u gudisa na u rumela vhalavhelesi vha dalelaho na vharumiwa, u ṋea thuso musi hu na khombo, u katela na dziṅwe ndivho dza ndeme. Kha ri ṱhogomele iṅwe ya dzenedzo ndivho dza ndeme—ya u thusa kha u fhaṱwa ha fhethu ha vhurabeli.

 Ṱhanzi dza Yehova vha ṱangana zwifhinga zwo vhalaho nga vhege Holoni dzavho dza Muvhuso u itela u vhuyelwa nga pfunzo ya zwithu zwa muya na vhukonani havhuḓi. Naho zwo ralo, mashangoni manzhi zwiimo zwa ikonomi zwi ita uri Ṱhanzi dza henefho dzi konḓelwe u tikedza mushumo wa u fhaṱiwa ha Holo dza Muvhuso dzi songo thoma dza wana iṅwe thuso ya tshelede. Nga zwenezwo, nga 1999, Ṱhanzi dza Yehova dzo thoma mbekanyamushumo ya u shumisa tshelede i bvaho mashangoni o pfumaho u itela u fhaṱa Holo dza Muvhuso kha mashango a shayaho. Zwiṅwe hafhu, vhashumi vha u ḓifunela vha zwigidi vho no ḓiṋeela tshifhinga na vhutsila zwavho, kanzhi u itela u shuma madzinguni a kule kha eneo mashango. Tshifhingani tsha u fhaṱa, Ṱhanzi dza henefho dzi a guda vhutsila ha u fhaṱa na u ṱhogomela, nahone Tshikwama tsha Holo ya Muvhuso tshi ita uri zwi konadzee u renga zwishumiswa zwine zwa ṱoḓea. Ṱhanzi dzine zwino dza khou shumisa dzenedzi holo ntswa dzi a livhuha vhukuma uri vhatendi ngadzo vha a ṋeela nga tshifhinga na nga tshelede yavho. Ṱhanzi dza henefho dzi dovha dza ṋeela ṅwedzi muṅwe na muṅwe u itela u ṱhogomela Holo ntswa ya Muvhuso na u thusa u lifha tshinyalelo dza u fhaṱa, zwi tshi dovha zwa thusa kha u fhaṱiwa ha dziṅwe Holo nnzhi dza Muvhuso.

Holo dza Muvhuso dzi fhaṱiwa hu tshi shumiswa maitele na zwishumiswa zwa henefho. Naho dzenedzo holo dzi songo serekana, ndi dzavhuḓi, nahone dzi a shumisea. Musi mbekanyamushumo ya u fhaṱa i tshi thoma nga 1999, mashango a ṱoḓaho u vha 40 a si na zwishumiswa zwinzhi o katelwa. U bva zwenezwo, mbekanyamushumo ya u fhaṱa yo engedzea u itela uri i katele mashango a 116, u katela zwivhidzo zwi fhiraho hafu zwa Ṱhanzi dza Yehova. Kha miṅwaha miṱanu yo fhiraho, Holo dza Muvhuso dzi fhiraho 9000 dzo fhaṱiwa nga ṅwambo wa yeneyo ndugiselelo, mbalotshikati ya holo dzi fhiraho ṱhanu ḓuvha ḽiṅwe na ḽiṅwe! Naho zwo ralo, kha enea mashango a 116, hu kha ḓi vha na ṱhoḓea ya Holo dza Muvhuso dza 14 500. Nga phaṱhutshedzo ya Yehova na nga u ḓifunela na mafunda a Ṱhanzi shangoni ḽoṱhe, hu a fulufhelwa uri hu ḓo vha na tshelede yo linganaho ya u swikelela yeneyo ṱhoḓea.—Psalme ya 127:1.

 Holo dza Muvhuso dzi Ita uri hu vhe na Nyengedzeo

Honovhu vhuḓidini vhuhulwane ho vha na mvelelo ifhio kha Ṱhanzi dza henefho na kha mushumo wa u huwelela Muvhuso? Fhethu hunzhi, hu a vha na nyengedzeo khulwane kha vhane vha ḓa miṱanganoni musi ho no fhaṱiwa Holo ya Muvhuso. Ri wana tsumbo yo ḓoweleaho kha muvhigo u bvaho Burundi: “Nga u ṱavhanya musi Holo ya Muvhuso i tshi tou fhela, yo mbo ḓi ḓala. Sa tsumbo, iṅwe Holo ya Muvhuso yo fhaṱelwa tshivhidzo tshe tsha vha tshi na mbalotshikati i ṱoḓaho u vha 100 ya vhane vha ḓa miṱanganoni yavho. Holo yavho ya Muvhuso ntswa yo vha i na zwidulo zwavhuḓi zwa 150. Nga tshifhinga tshe ya fhedzwa ngatsho, ho vha hu na vha 250 vhane vha ḓa miṱanganoni.”

Ndi ngani hu tshi vha na yeneyo nyengedzeo? Ndi ngauri zwigwada zwa vhahuweleli vha Muvhuso zwine zwa sa vhe na fhethu ho dzudzanyeaho ha u ṱanganela, fhedzi zwi tshi ṱanganela nga fhasi ha muri kana mudavhini nga zwiṅwe zwifhinga a zwi fulufhelwi. Kha ḽiṅwe shango, khakhathi dza vhutshavha dzo vha dzi tshi dzhiiwa dzi tshi tshimbidzana na zwigwada zwiṱuku zwa vhurereli, nahone mulayo wo vha u tshi ṱoḓa uri miṱangano yoṱhe ya vhurereli i farelwe nga ngomu ha nnḓu ya vhurabeli.

U vha na holo dzavho zwi dovha zwa thusa Ṱhanzi dza Yehova u sumbedza lushaka uri a dzi vhafunziwa vha muṅwe mufunzi. Ofisi ya davhi ya Zimbabwe ya Ṱhanzi dza Yehova yo ṅwala ya ri: “Tshifhingani tsho fhiraho, vhahashu kha ḽeneḽi shango vho vha vha tshi anzela u ṱanganela mahayani, nahone vhathu vha henefho vho vha vha tshi ṱalusa tshivhidzo nga dzina ḽa muṋe wa muḓi une wa khou ṱanganelwa khawo. Vho  vha vha tshi nga ambela kha vhahashu sa vhane vha vha miraḓo ya kereke ya ‘Vho-Mukene-mukeneṅene.’ Zwenezwi zwoṱhe zwi khou shanduka zwino musi vhathu vha tshi vhona tswayo dzine dza ṱalusa zwavhuḓi holo iṅwe na iṅwe sa ‘Holo ya Muvhuso ya Ṱhanzi dza Yehova.’ ”

Vha Ṋeaho vhó Takala

Muapostola Paulo o ṅwala a ri: “A ṋeaho ó takala ndi ene a funwaho nga Mudzimu.” (2 Vha-Korinta 9:7) Vhukuma, miṋeelo minzhi i a thusa. Fhedzi tshipiḓa tshihulwane tsha tshikwama tshine tsha ṋeelwa u itela u tikedza mushumo wa Ṱhanzi dza Yehova tshi bva mabogisini a miṋeelo ya Holo ya Muvhuso. Hu sa londwi uri ndi minzhi kana ndi miṱuku, miṋeelo yoṱhe ndi ya ndeme nahone a i dzhielwi fhasi. Humbulani uri Yesu o vha o ima fhethu he a vha a tshi kona u vhona tshilikadzi ya mutshinyali i tshi ṋeela zwikati zwayo zwivhili. Na vharuṅwa na Yehova vho mu vhona. A ri vhuyi ra ḓivha na dzina ḽa tshilikadzi, fhedzi Yehova o ita vhungoho ha uri nyito yawe ya u ḓifunela i ṅwalwe u itela uri i dzule nga hu sa fheli Bivhilini.

Nga nnḓa ha u fhaṱiwa ha Holo ya Muvhuso, miṋeelo yashu i tikedza na maṅwe masia oṱhe a ndeme a mushumo wa Muvhuso. U shumisana hashu nga yeneyi nḓila zwi ri ṋea tshiitisi tsha u takala na “uri u livhuha Mudzimu hu fhufhume kha vhanzhi.” (2 Vha-Korinta 9:12) Vhahashu vha Vhakriste vha ngei Benin vha a vhiga: “Ḓuvha ḽiṅwe na ḽiṅwe thabelo dza u livhuha dzi ya kha Yehova nga ṅwambo wa thuso ya tshelede ine ya ṱanganedziwa i tshi bva kha vhahashu vha tshaka dzoṱhe.” Nga hu fanaho, roṱhe vhane ra ṱanganela kha u tikedza mushumo wa Muvhuso nga tshelede ri wana dakalo ḽine ḽa vha hone nga u ṋea ha Vhukriste!

[Bogisi/Tshifanyiso kha siaṱari 22, 23]

Nḓila Dzine Vhaṅwe Vha Khetha u Ṋeela Ngadzo

MIṊEELO YA MUSHUMO WA SHANGO ḼOṰHE

Vhanzhi vha vhetshela thungo, kana u vhekanya tshelede ine vha i longa mabogisini a muṋeelo o ṅwaliwaho “Miṋeelo ya Mushumo wa Shango Ḽoṱhe—Mateo 24:14.”

Ṅwedzi muṅwe na muṅwe, zwivhidzo zwi rumela yeneyi tshelede ofisini ya Ṱhanzi dza Yehova ine ya ṱhogomela mashango avho. Miṋeelo ya u tou ḓifunela ya tshelede i nga kha ḓi rumelwa nga ho livhaho kha Watch Tower Bible and Tract Society of Pennsylvania, c/o Accounting Office, Private Bag X2067, Krugersdorp, 1740, South Africa, kana ofisini ya davhi i ṱhogomelaho shango ḽa vhoiwe. Musi ni tshi ṋeela nga tsheke, ni ṅwale uri “Watch Tower.” Dzhuwele kana zwiṅwe zwithu zwa ndeme na zwone zwi nga ṋeelwa. Yeneyi miṋeelo i fanela u rumelwa na vhurifhi vhupfufhi vhu bulaho uri zwenezwo ndi tshifhiwa.

U ṊEELA HO DZUDZANYWAHO

Nga nnḓa ha zwifhiwa zwo tou livhaho zwa tshelede na miṋeelo ya tshelede i yaho nga zwiimo, hu na maṅwe maitele a u ṋea u itela u vhuyedza mushumo wa Muvhuso shangoni ḽoṱhe. Eneo maitele a katela:

Ndindakhombo: Watch Tower Society i nga ḓi ṅwaliswa sa ine ya ḓo vhuyelwa kha ndugiselelo ya tshelede ya ndindakhombo ya vhutshilo, kha tshelede ya u notha kana ya phesheni.

Tshelede yo Hadzimiswaho: Tshelede yo hadzimiswaho i nga ṋekedzwa Watch Tower Society sa tshifhiwa kana nga ndugiselelo ine nzwalelo yayo ya bvela phanḓa u ṋewa muṋe wayo.

Zwifhaṱo na Ndaka: Zwifhaṱo na ndaka zwine zwa rengisea zwi nga ṋeelwa sa tshifhiwa kana arali hu nnḓu, hu nga itwa pfano ya uri i si dzhiiwe musi ane a khou dzula henefho a tshi kha ḓi tshila. Ḓivhadzani ofisi ya davhi ya hune na dzula hone ni sa athu ṋea ndaka naho ifhio.

Mbofho: Thundu kana tshelede zwi nga ṋewa Watch Tower Society nga u tevhedza ndaela ya mufu i re mulayoni.

Arali ni tshi ṱoḓa mafhungo o engedzeaho, ni fanela u kwamana na Accounting Office nga luṱingo kana nga u tou ṅwala vhurifhi kha ḓiresi yo ṅwaliwaho afho fhasi kana ofisi ya davhi ine ya ṱhogomela shango ḽa vhoiwe.

Accounting Office

Watch Tower Bible and Tract Society of Pennsylvania

Private Bag X2067

Krugersdorp 1740

South Africa

Luṱingo: (011) 761-1000

[Zwifanyiso kha siaṱari 20, 21]

Fhethu ha kale na huswa ha u ṱanganela ha Ṱhanzi dza Yehova

Zambia

Riphabuliki ya Afurika Vhukati