Naa Ri ḓo Vhuya Ra Ḓiphina nga U Tsireledzea ha Ngoho?
Naa Ri ḓo Vhuya Ra Ḓiphina nga U Tsireledzea ha Ngoho?
VHANA vha takalela u tamba na vhabebi vhavho vha re na lufuno—muṅwe na muṅwe u a takalela u vhona zwithu zwo raloho. Vhana vha ḓipfa vho tsireledzea vhukuma musi vhe na vhabebi vhavho vha vha ṱhogomelaho. Naho zwo ralo, vhaswa vhanzhi a vha fhedzi tshifhinga vhe na vhabebi vhavho. Nṱhani hazwo, vhaṅwe vhana vha dzula vhe na vhuleme ḓuvha ḽiṅwe na ḽiṅwe malugana na uri vha ḓo eḓela ngafhi madekwana. Naa huna fulufhelo kha vhana vho raloho vha si na mahaya na kha vhaṅwe vhane vha ḓipfa vha songo tsireledzea?
Naho hu tshi vhonala hu tshi nga a huna fulufhelo, Ipfi ḽa Mudzimu ḽi ri ṋea fulufhelo. Muporofita Yesaya o dzula o amba uri hu ḓo ḓa ḓuvha ḽine vhathu vhoṱhe vha ḓo dzula vho tsireledzea. O ṅwala a ri: “Vha ḓo fhaṱa dzinnḓu vha dzula khadzo’; vha ḓo sima miṱokola vha ḽa mitshelo yayo. A vha nga fhaṱi ha dzula muṅwe; a vha nga simi ha ḽa muṅwe.”—Yesaya 65:21, 22.
Fhedzi naa ḽeneḽi ndi fulufhelo ḽo khwaṱhaho? Zwi re zwone ndi uri ipfi “fulufhelo” a ḽi sumbedzi uri tshifhinga tshoṱhe zwithu zwi ḓo ḓadzea. Sa tsumbo, kha ḽa Brazil huna mubulo une wa ri “fulufhelo ndi tshone tshithu tsha u fhedzisela u fa,” zwine zwa amba uri vhathu vhanzhi vha dzula vhe na fulufhelo naho hu si na mutheo wo khwaṱhaho une wa sumbedza uri ḽeneḽo fulufhelo ḽi ḓo ḓadzea. Naho zwo ralo, fulufhelo ḽine Mudzimu a tshilaho a ri ṋea ḽone ḽo fhambana. Muapostola Paulo o ṅwala a ri: “Ngauri maṅwalo a amba a ri: “Ané a mu tenda [Mudzimu] ha nga shoni.” (Vha-Roma 10:11) Vhuporofita ha Bivhili ho no ḓadzeaho vhu ri ṋea fulufhelo ḽa uri maṅwe mafulufhedziso oṱhe a Yehova Mudzimu na one a ḓo ḓadzea. Musi eneo mafulufhedziso a tshi ḓadzea, zwiimo zwine zwa ita uri vhana vha dzule zwiṱaraṱani zwi ḓo vha zwi si tsheeho.
Na ṋamusi nyeletshedzo ine ya wanala Bivhilini i nga thusa vhane vha sa vhe na fulufhelo uri vha khwinise vhutshilo havho nahone vha wane u tsireledzea ha ngoho. Zwenezwo zwi nga konadzea hani? Ṱhanzi dza Yehova dza hune na dzula hone dzi nga takalela u ni thusa uri ni wane phindulo ya yeneyi mbudziso.