Vhashumeli Vha Yehova Vho Takalaho
Vhashumeli Vha Yehova Vho Takalaho
“Vha a takala vhane vha ṱhogomela ṱhoḓea yavho ya muya.”—MATEO 5:3, NW.
1. Dakalo ḽa ngoho ndi mini, nahone ḽi sumbedza mini?
DAKALO ndi dzanga ḽa ndeme kha vhathu vha Yehova. Mupsalme Davida o ḓivhadza a ri: “Vhathu vho takalaho ndi vhane Mudzimu wavho a vha Yehova.” (Psalme ya 144:15, NW) Dakalo ndi maḓipfele a vhuvha ha muthu. Dakalo ḽa vhukuma ḽine ḽa swikelela nga ngomu-ngomu hashu—ḽi bveledzwa nga u ḓivha uri ro fhaṱutshedzwa nga Yehova. (Mirero 10:22) Dakalo ḽo raloho ḽi sumbedza vhushaka hashu ha tsini na Khotsi ashu wa ṱaḓulu na u ḓivha uri ri khou ita zwine a zwi funa. (Psalme ya 112:1; 119:1, 2) Zwi takadzaho ndi uri Yesu o redza zwiitisi zwa ṱahe zwine zwa nga ita uri ri wane dakalo. U ṱolisisa zwenezwi zwiitisi zwa dakalo kha ino thero na i tevhelaho zwi ḓo ri thusa u ṱhogomela nḓila ine ra nga wana ngayo dakalo arali ra shumela Yehova “Mudzimu o takalaho” nga u fulufhedzea.—1 Timotheo 1:11, NW.
U Dzhiela Nṱha Ṱhoḓea Yashu ya Muya
2. Ndi kha tshiitea tshifhio he Yesu a amba nga ha dakalo, nahone maipfi awe a u thoma ndi afhio?
2 Nga 31 C.E., Yesu o ṋekedza iṅwe ya pfunzo dzi ḓivheaho kha ḓivhazwakale. Yeneyo i vhidzwa Pfunzo ya Thavhani ngauri Yesu o i ṋekedza e thavhani tsini na Lwanzhe lwa Galilea. Evangeli ya Mateo i ri: “A [Yesu] tshi vhona magogo a vhathu, a gonya thavha a dzula, vhafunziwa vhawe vha sendela. A aṱama mulomo a vha funza a ri: “Vha a takala vhane vha ṱhogomela ṱhoḓea yavho ya muya, ngauri muvhuso wa ṱaḓulu ndi wa vhenevho.”—Mateo 5:1-3, vhambedzani NW.
3. U ḓiṱukufhadza hashu hu tshimbidzana hani na dakalo ḽashu?
3 Kha pfunzo yawe ya thavhani, Yesu o sumbedza uri muthu u vha o takalaho vhukuma musi a tshi ṱhogomela uri u a ṱoḓa zwiḽiwa zwa muya. Vhakriste vha ḓiṱukufhadzaho, vha zwi ḓivha zwavhuḓi uri vha na tshivhi, ngauralo vha humbela pfarelo kha Yehova nga tshiṱhavhelo tshi rengululaho tsha Kristo. (1 Yohane 1:9) Ngauralo vha wana mulalo wa ngelelo na dakalo ḽa ngoho. “O [takalaho, NW] ndi uyo we a hangwelwa zwivhi, we vhutshinyi hawe ha fukedzwa.”—Psalme ya 32:1; 119:165.
4. (a) Ri nga sumbedza hani u ṱhogomela ṱhoḓea yashu ya muya na ya vhaṅwe? (b) Ndi mini zwine zwa engedza dakalo ḽashu musi ri tshi ṱhogomela ṱhoḓea yashu ya muya?
4 U ṱhogomela hashu ṱhoḓea yashu ya muya zwi ri sudzulusela u vhala Bivhili ḓuvha ḽiṅwe na ḽiṅwe, u ḽa zwiḽiwa zwa muya zwi ṋewaho “nga tshikhathi tshazwo” zwi bvaho kha “mukoma a fulufhedzeaho na wa vhuṱali,” na u vha hone miṱanganoni ya Vhukriste misi yoṱhe. (Mateo 24:45; Psalme ya 1:1, 2; 119:111; Vha-Heberu 10:25) U funa vhahura zwi ita uri ri ṱhogomele ṱhoḓea dza vhaṅwe dza zwithu zwa muya nahone zwi ri ṱuṱuwedzela u huwelela na u funza mafhungo maḓifha a Muvhuso nga u fhisea. (Marko 13:10; Vha-Roma 1:14-16) U vhudza vhaṅwe mafhungo-ngoho a Bivhili zwi ri ḓisela dakalo. (Mishumo 20:20, 35) Dakalo ḽashu ḽi a hula musi ri tshi elekanya nga ha fulufhelo ḽavhuḓi ḽa Muvhuso na phaṱutshedzo dzine wonoyo Muvhuso wa ḓo dzi bveledza. Kha Vhakriste vha “sambi ḽiṱuku” ḽa vho ḓodzwaho, fulufhelo ḽa Muvhuso zwi amba u tshila lini na lini ṱaḓulu vhe tshipiḓa tsha Muvhuso wa Kristo. (Luka 12:32; 1 Vha-Korinta 15:50, 54) Kha vha “dziṅwe nngu,” zwi amba vhutshilo vhu sa fheli paradisoni kha ḽifhasi nga fhasi ha wonoyo Muvhuso.—Yohane 10:16; Psalme ya 37:11; Mateo 25:34, 46.
Nḓila ine Vho Ṱungufhalaho vha nga Takala Ngayo
5. (a) Mubulo une wa ri “vho ṱungufhalaho” u amba mini? (b) Vhenevho vho ṱungufhalaho vha nga khuthadzwa hani?
5 Maipfi a tevhelaho a ambaho nga dakalo e a ambiwa nga Yesu a vhonala a tshi hanedzana. O ri: “[Vha a takala, NW] vho ṱungufhalaho, ngauri vhane vha ḓo fhumudzwa ndi vhenevho.” (Mateo 5:4) Muthu a nga ṱungufhala a dovha a takala hani nga tshifhinga tshithihi? U itela u pfesesa zwe Yesu a zwi amba, ri fanela u ṱolisisa uri ndi u ṱungufhala hufhio he a vha a tshi khou amba ngaho. Mufunziwa Yakobo u ṱalutshedza uri vhuimo hashu ha tshivhi vhu fanela u ri ita uri ri ṱungufhale. O ṅwala a ri: “Ṱambani zwanḓa, vha-ita-zwivhi; kupulani mbilu, inwi vha dzimbilu mbili! Ipfani vhusiwana ni ṱungufhale ni lile! Maseo aṋu nga a shanduke a vhe vhuṱungu, dakalo ḽi vhe u kotamela fhasi. Ḓi-ṱukufhadzeni phanḓa ha Murena, ndi hone a tshi ḓo ni hulisa.” (Yakobo 4:8-10) Vhane nga ngoho vha ṱungufhadzwa nga vhuimo havho ha tshivhi vha khuthadzwa musi vha tshi guda uri vha nga hangwelwa zwivhi zwavho nga u sumbedza lutendo kha tshiṱhavhelo tshi rengululaho tsha Kristo na u sumbedza u rembuluwa ha ngoho nga u ita zwi funwaho nga Yehova. (Yohane 3:16; 2 Vha-Korinta 7:9, 10) Ngauralo vha nga vha na vhushaka havhuḓi na Yehova na u vha na fulufhelo ḽa u tshila tshoṱhe vha tshi mu shumela na u mu renda. Zwenezwi zwi nga vha ḓisela dakalo ḽa ngoho.—Vha-Roma 4:7, 8.
6. Vhaṅwe vhathu vha ṱungufhala nga muhumbulo ufhio, nahone vha khuthadzwa hani?
6 Maipfi a Yesu a nga katela vho ṱungufhadzwaho nga ṅwambo wa zwiimo zwi ṋengisaho zwo ḓalaho kha ḽifhasi. Yesu o shumisa zwo ambiwaho nga hae kha vhuporofita ha Yesaya 61:1, 2, ine ya ri: “Muya wa Yehova Muṋe wa vhoṱhe u kha Nṋe, ngauri Yehova o nḓolisa, uri vhatshinyali ndi vha ḓivhadze mafhungo-maḓifha, o nthuma uri ndi phuphe dzimbilu dzo pwashakanywaho, . . . uri ndi fhumudze vhoṱhe vha lilaho.” Wonoyo u dovha wa vha mushumo wa Vhakriste vho ḓodzwaho vhane vha kha ḓi vha kha ḽifhasi, vhane vha u ita u itela u thusa “vha dziṅwe nngu” vhane vha vha khonani dzavho. Vhoṱhe vha ṱanganela kha mushumo wa pfanyisedzo wa u swaya ‘vhanna vho ṱungufhalelaho vhuṱudzi hoṱhe vhune ha khou itwa vha tshi zwi vhona [Yerusalema ha vhugunei, hune ha fanyisela ḽa Vhudzhagane].’ (Hesekiele 9:4) Vhenevho vho ṱungufhalaho vha khuthadzwa nga “mafhungo maḓifha a Muvhuso.” (Mateo 24:14) Vha takalela u ḓivha uri hu si kale maitele mavhi a zwithu a Sathane a ḓo dzhielwa vhudzulo nga shango ḽiswa ḽa u luga ḽa Yehova.
Vha a Takala vha re na Vhulenda
7. U vha na “vhulenda” a zwi ambi mini?
7 Yesu o bvela phanḓa kha Pfunzo yawe ya Thavhani a ri: “Vha a takala vha re na vhulenda, ngauri vhané shango ḽa ḓo vha ifa ḽavho ndi vhenevho.” (Mateo 5:5, vhambedzani NW.) Tshiṅwe tshifhinga muthu a re na vhulenda u dzhiiwa sa muthu a re na vhushayanungo. Fhedzi, a zwo ngo tou ralo. Muṅwe mugudi wa Bivhili o ṱalutshedza zwine ipfi ḽo ṱalutshedzelwaho nga uri “vhulenda ḽa amba zwone,” a ri: “Tshithu tsha ndeme tshine tsha ṱalula muthu wa [vhulenda] ndi uri u a kona u ḓilanga. A si u vuḓa hune muthu a shaya na maanḓa, vhutsilu, kana u fhumulesa. Zwi amba u kona u ḓilanga.” Musi Yesu a tshi amba nga ha ene muṋe o ri: “Ndo vuḓa, ndi mudzia-u-ḓi-ṱukufhadza mbiluni.” (Mateo 11:29) Naho zwo ralo, Yesu o vha e na tshivhindi kha u lwela maitele a u luga.—Mateo 21:12, 13; 23:13-33.
8. Vhulenda vhu tshimbidzana na mini, nahone ndi ngani ri tshi tea u vha na yeneyo pfaneleo kha vhushaka hashu na vhaṅwe?
8 U vha na vhulenda zwi tshimbidzana na u kona u ḓilanga. Vhukuma, vhulenda na u ḓilanga zwo ambiwa zwoṱhe nga muapostola Paulo musi a tshi amba nga ha “zwiaṋwiwa zwa muya.” (Vha-Galata 5:22, 23) Vhulenda vhu fanela u ṱahulelwa hu tshi shumiswa muya mukhethwa. Ndi pfaneleo ya Vhukriste ine ya bveledza mulalo vhukati ha vha sa tendiho na vha re tshivhidzoni. Paulo o ṅwala a ri: “Ambarani-ha dzimbilu-tshilidzi, na u vuḓa, na u ḓi-ita vhaṱuku, na vhulenda, na u sa fhela mbilu. Ni nge no takulanaho, ni khathutshelane arali muṅwe e na tshiné a sola muṅwe.”—Vha-Kolosa 3:12, 13.
9. (a) Ndi ngani u vha hashu na vhulenda zwi sa fheleli kha vhushaka hashu na vhaṅwe vhathu fhedzi? (b) “Shango ḽi ḓo vha ifa ḽa vho vuḓaho” nga nḓila-ḓe?
9 Naho zwo ralo, a ri faneli u vha na vhulenda kha vhathu nga riṋe fhedzi. Nga u ḓiṱukufhadza nga u tou ḓifunela kha vhuvhusahoṱhe ha Yehova, ri vha ri tshi khou sumbedza uri ri na vhulenda. Tsumbo khulwane vhukuma kha ḽeneḽi sia ndi Yesu Kristo, we musi a tshi kha ḓi vha kha ḽifhasi a sumbedza u vha na vhulenda nahone a ḓiṱukufhadzela u ita zwi funwaho nga Khotsi. (Yohane 5:19, 30) Tshithu tshihulwane na tsha u thoma tshee Yesu a tshi wana sa ifa ndi ḽifhasi, ngauri ndi Muvhusi waḽo. (Psalme ya 2:6-8; Daniele 7:13, 14) U ṱanganela kha ḽeneḽo ifa na vha 144 000 vhane vha vha “maḽaifa,” vho ṋangwaho kha “vhathu” uri vha vhe ‘mahosi a u ḓo vhusa shango.’ (Vha-Roma 8:17; Ndzumbululo 5:9, 10; 14:1, 3, 4; Daniele 7:27) Kristo na vhane vha ḓo vhusa nae vha ḓo vhusa vhathu vha dzimilioni vha ngaho dzinngu vha vhanna na vha vhasadzi vhane vhuporofita ha psalme ha ḓo ḓadzea khavho: “Shango ḽi ḓo vha ifa ḽa vho vuḓaho; ndi vhone vha u ḓo takalela muḓalo wa mulalo.”—Psalme ya 37:11; Mateo 25:33, 34, 46.
Vha a Takala, Vhané u Tama u Luga ha nga Nḓala
10. Vhathu vhane vha vha na ‘nḓala na ḓora ḽa u luga’ vha nga fushwa hani?
10 Yesu o amba nga ha ḽiṅwe dakalo musi e thavhani ya Galilea: “[Vha a takala, NW] vhané u tama u luga, ha nga nḓala na ḓora, ngauri vhane vha ḓo fushwa ndi vhenevho.” (Mateo 5:6) Kha Vhakriste, Yehova o vha vhetshela zwilinganyo zwa u luga. Nga zwenezwo, vhane vha vha na nḓala na ḓora ḽa u luga vha vha vha tshi khou ṱoḓa vhulivhisi ha Mudzimu. Vhenevho vha a ḓivha zwavhuḓi nga ha vhuvhi havho na u sa fhelela havho nahone vha lwela uri vha ṱanganedzwe nga Yehova. Vha a takala vhukuma musi vha tshi guda Ipfini ḽa Mudzimu uri arali vha rembuluwa nahone vha ṱoḓa u hangwelwa kha mutheo wa tshiṱhavhelo tshi rengululaho tsha Kristo, vha ḓo vha vha ṱanganedzwaho nga Mudzimu!—Mishumo 2:38; 10:43; 13:38, 39; Vha-Roma 5:19.
11, 12. (a) Vhakriste vho ḓodzwaho vha swikelela hani kha u pfi vho luga? (b) Khonani dza vho ḓodzwaho dzi fushwa hani kha ḓora ḽadzo ḽa u ṱoḓa u vha vho lugaho?
11 Yesu o ri vhenevho vha ḓo vha vho takalaho ngauri “vha ḓo fushwa.” (Mateo 5:6) Vhakriste vho ḓodzwaho vho vhidzwaho uri ‘vha vhuse sa mahosi’ na Kristo ngei ṱaḓulu, vha vhidzwa ‘vho lugaho vhane vha tewa nga u wana vhutshilo.’ (Vha-Roma 5:1, 9, 16-18) Yehova u vha dzhia sa vhana vhawe vha muya. Vha mbo ḓi vha maḽaifa na Kristo, vha vhidzwa uri vha ḓe vha vhe mahosi na vhotshifhe kha hulumeni wa Muvhuso wa ṱaḓulu.—Yohane 3:3; 1 Petro 2:9.
12 Khonani dza vho ḓodzwaho a dzi athu u vhidzwa vho lugaho vhane vha tea u wana vhutshilo. Naho zwo ralo, vha dzhiiwa sa vho lugaho nga Yehova nga ṅwambo wa u vha havho na lutendo kha malofha a Kristo o shululwaho. (Yakobo 2:22-25; Ndzumbululo 7:9, 10) Vha vhalelwa kha vho lugaho sa khonani dza Yehova vhane vha ḓo phuluswa “maṱunguni mahulu.” (Ndzumbululo 7:14) U vha havho na ḓora ḽa u luga hu ḓo fushwa musi vha tshi vha tshipiḓa tsha ḽifhasi ḽiswa nga fhasi ha “maṱaḓulu maswa” “zwine u luga ha fhaṱa khazwo.”—2 Petro 3:13; Psalme ya 37:29.
Vha a Takala Vhane vha Khathutshela
13, 14. Ndi nḓila dzifhio dzine ra nga sumbedza ngadzo u vha vha khathutshelaho, nahone ri ḓo vhuyelwa nga mini?
13 A tshi bvela phanḓa na Pfunzo yawe ya Thavhani, Yesu o ri: “Vha a takala vhane vha khathutshela, ngauri vhane vha ḓo khathutshelwa ndi vhenevho.” (Mateo 5:7, vhambedzani NW.) U ya nga mulayo, ipfi khathutshelo ḽi pfala ḽi tshi ambela kha u fhungudza tshigwevho hune ha itwa nga muhaṱuli ane a sa gwevhe muthu o khakhaho u ya nga tshigwevho tsho teaho u ya nga mulayo. Naho zwo ralo, samusi ḽo shumiswa Bivhilini, ipfi ḽo ṱalutshedzelwaho nga uri “khathutshela” kanzhi ḽi ambela kha mubulo wa u sumbedza u humbulela ha vhulenda kana u pfela vhuṱungu hune ha homolosa muthu a re na mulandu. Ngauralo, vhane vha khathutshela vha sumbedza uri vha a pfela vhuṱungu. Tshifanyiso tsha Yesu tsha Musamaria tshi ṋea tsumbo yavhuḓi vhukuma ya muthu ane a “pfela vhuṱungu” zwa vhukuma.—Luka 10:29-37.
14 U itela u wana dakalo ḽine ḽa bveledzwa nga u pfela vhuṱungu, ri fanela u ita mishumo mivhuya kha vhane vha shaya. (Vha-Galata 6:10) Yesu o pfela vhuṱungu vhathu vhe a vha vhona. “A vha khathutshela mbilu nge vha nga nngu dzi sí na mulisa; a vha funza mafhungo manzhi.” (Marko 6:34) Yesu o ṱhogomela uri ṱhoḓea ya muya ndi ya ndeme vhukuma kha vhathu. Na riṋe ri nga sumbedza u vha vha pfelaho vhuṱungu nga u ṱanganela na vhaṅwe kha zwithu zwine vha zwi ṱoḓa vhukuma—‘mafhungo maḓifha a Muvhuso.’ (Mateo 24:14) Ri nga dovha ra ṋekedza thuso i shumaho kha vhaaluwa vha Vhakriste, dzitshilikadzi, na kha zwisiwana na u “fhembeledza vha mbilu ṱhukhu.” (1 Vha-Thesalonika 5:14; Mirero 12:25; Yakobo 1:27) Zwenezwi zwi ḓo ita uri ri wane dakalo na u khathutshelwa nga Yehova.—Mishumo 20:35; Yakobo 2:13.
Vha Mbilu dzo Ṱambaho na Vhadzia-mulalo
15. Ri nga vha vha mbilu dzo ṱambaho na vhadzia-mulalo nga nḓila-ḓe?
15 A tshi sumbedza nḓila ya vhurathi na ya vhusumbe ya u wana dakalo, Yesu o ri: “Vha a takala, vha mbilu dzo ṱambaho, ngauri vhane vha ḓo vhona Mudzimu ndi vhenevho. Vha a takala, vhadzia-mulalo, ngauri vhane vha ḓo pfi vhana vha Mudzimu ndi vhenevho.” (Mateo 5:8, 9, vhambedzani NW.) Mbilu yo ṱambaho ndi yo kunaho siani ḽa vhuḓifari muyani na i ḓikumedzelaho tshoṱhe kha Yehova. (1 Koronika 28:9; Psalme ya 86:11) U ya nga luambo lwa u thoma ipfi ḽo ṱalutshedzelwaho nga uri “mudzia-mulalo” nga lwa thevhedzaipfi ḽi amba “muthu ane a ita uri hu vhe na mulalo.” Vhadzia-mulalo vha tshila nga mulalo na Vhakriste ngavho nahone vha lingedza nga nḓila dzoṱhe u vha na mulalo na vhahura vhavho. (Vha-Roma 12:17-21) Vha ‘ṱoḓa mulalo nahone vha u tovhola.’—1 Petro 3:11.
16, 17. (a) Ndi ngani vho ḓodzwaho vha tshi vhidzwa uri ndi “vharwa vha Mudzimu,” nahone vha “vhona Mudzimu” nga nḓila-ḓe? (b) Vha “dziṅwe nngu” vha “vhona Mudzimu” nga nḓila-ḓe? (c) Ndi lini hune vha “dziṅwe nngu” vha ḓo vha “vharwa vha Mudzimu” nga ho fhelelaho, nahone zwenezwo zwi ḓo bvelela hani?
16 Vhadzia-mulalo na vho ṱambaho mbiluni vha fulufhedziswa uri vha ḓo vhidzwa uri “ndi vhone vhana vha Mudzimu” na uri “vha ḓo vhona Mudzimu.” Vhakriste vho ḓodzwaho ndi vhana vho bebwaho nga muya nahone vho dzhiiwa nga Yehova sa “vharwa” musi vha tshi kha ḓi vha kha ḽifhasi. (Vha-Roma 8:14-17) Musi vha tshi vuswa u itela u vha na Kristo ṱaḓulu, vha ḓo shuma phanḓa ha Yehova nahone vha ḓo mu vhona.—1 Yohane 3:1, 2; Ndzumbululo 4:9-11.
17 Vha “dziṅwe nngu” vha shumela Yehova nga fhasi ha Mulisa wa Ndele, Kristo Yesu, ane a vha “Khotsi avho na lini na lini.” (Yohane 10:14, 16; Yesaya 9:6, NW) Vhane vha ḓo kunda u lingwa ha Miṅwaha ya Tshigidi ya Vhuvhusi ha Kristo vha ḓo vha vharwa vha Yehova vha kha ḽifhasi nahone ‘vha ḓo vhofhololwa musi vhana vha Mudzimu vha tshi ya vhugalani.’ (Vha-Roma 8:21; Ndzumbululo 20:7, 9) Musi vho sedza phanḓa kha zwenezwi, vha vhidza Yehova uri ndi Khotsi avho, samusi vho ṋekedza vhutshilo havho khae, na u mu dzhia e Muṋei wa Vhutshilo. (Yesaya 64:8) U fana na Yobo, Mushe wa kale, vha nga kona u “vhona Mudzimu” nga maṱo avho a lutendo. (Yobo 42:5; Vha-Heberu 11:27) Nga ‘maṱo avho a mbilu’ na nga nḓivho yo teaho ya Mudzimu, vha pfesesa pfaneleo dzavhuḓi dza Yehova nahone vha lwela u mu edzisa nga u ita zwine a zwi funa.—Vha-Efesa 1:18; Vha-Roma 1:19, 20; 3 Yohane 11.
18. U ya nga zwiitisi zwa sumbe zwa u takala zwo ambiwaho nga Yesu, ndi vhafhio vhane vha wana dakalo?
18 Ro zwi vhona uri vhane vha ṱhogomela ṱhoḓea yavho ya muya, vho ṱungufhalaho, vha vhulenda, vhane vha vha na nḓala na ḓora ḽa u luga, vha re na khathutshelo, vha mbilu dzo ṱambaho, na vhadzia-mulalo vha wana dakalo ḽa ngoho nga u shumela Yehova. Naho zwo ralo, vhenevho vha dzula vha tshi pikiswa na u tovholwa. Naa zwenezwi zwi a tshinyadza dakalo ḽavho? Yeneyi mbudziso i ḓo haseledzwa theroni i tevhelaho.
Mvusuluso
• Ndi dakalo ḽifhio ḽine ḽa waniwa nga vhane vha ṱhogomela ṱhoḓea yavho ya muya?
• Vho ṱungufhalaho vha khuthadzwa nga nḓila dzifhio?
• Ri sumbedza hani vhulenda?
• Ndi ngani ri tshi fanela u vha vha khathutshelaho, vho ṱambaho mbiluni, na vhadzia-mulalo?
[Mbudziso Dza Pfunzo]
[Tshifanyiso kha siaṱari 10]
“Vha a takala vhane vha ṱhogomela ṱhoḓea yavho ya muya”
[Zwifanyiso kha siaṱari 10]
“Vha a takala vhane vha khathutshela”
[Tshifanyiso kha siaṱari 10]
“Vha a takala vhané u tama u luga, ha nga nḓala na ḓora”