Mbudziso Dzi Bvaho Ha Vhavhali

Madimoni a ḓo vha e ngafhi tshifhingani tsha Miṅwaha ya Tshigidi ya Vhuvhusi ha Kristo?

Bivhili a i fhinduli yeneyo phindulo nga ho livhaho. Naho zwo ralo, ri nga swikelela phetho yo teaho malugana na uri madimoni a ḓo vha e ngafhi tshifhingani tsha Miṅwaha ya Tshigidi ya Vhuvhusi ha Kristo.

Musi a tshi amba nga ha zwine zwa ḓo itea mathomoni na mafheleloni a yeneyo miṅwaha ya Tshigidi, muapostola Yohane u ri: “Nda vhona muruṅwa a tshi tsa a tshi bva ṱaḓulu e na khoṋo ya mugodi na ngeḓane khulu tshanḓani tshawe. A fara ḽiḽa ḽigwena, ḽiṋowa ḽa kale na kale, ene Diabolo ene Sathane a mu hunga uri a fhedze miṅwaha ya ḽikhu̗lu ó pfalwo. A mu posa mugodini, a hoṋa, a shatela a vhea lufayo kha tshivalo; hu uri a si tsha ḓo khakhisa dzitshakha, hu vhuye hu vulee miṅwaha ya ḽikhu̗lu. Yó no fhela iyo u ḓo dovha a vhofhololwa a ita tshifhinga tshiṱuku.” (Ndzumbululo 20:1-3) Dzenedzi ndimana dzi amba fhedzi nga ha u poselwa ha Sathane mugodini na u vhofhololwa hawe nga murahu ha tshifhinga tshiṱuku. Naho madimoni a songo ambiwa, zwi tou pfala uri musi muruṅwa a re na khoṋololo ya mugodini ane a vha Yesu Kristo o ṋewaho vhugala a tshi posela Diabolo mugodini, u ḓo dovha a posela na madimoni henefho.—Ndzumbululo 9:11.

Musi a tshi vha Khosi ngei ṱaḓulu nga 1914, Yesu Kristo o mbo ḓi dzhia vhukando he ha konḓela Sathane na madimoni awe. Ndzumbululo 12:7-9 i ri: “Ha vuwa nndwa ngei ṱaḓulu: Mikaele na vharuṅwa vhawe vha tshi lwa na ḽiḽa ḽigweṋa. Ḽiḽa ḽigweṋa ḽi tshi farisana na vharuṅwa vhaḽo u lwa. Vhone vha si zwi kone, hu si tsha wanala na huné vha nga ima hone ngei ṱaḓulu. Ha shakulwa ḽiḽa ḽigweṋa ḽihulu, ḽiṋowa ḽa kale na kale ḽine ḽa pfi Diabolo, ene Saṱhane, muxedzi wa shango ḽoṱhe, ḽa poswa kha ḽifhasi, na vharuṅwa vhaḽo vha poswa henefho-vho.” U bva tsheetsho, Sathane na madimoni awe vho vha vho poselwa kha ḽifhasi. Ngauralo ri nga amba zwo tea uri musi Yesu Kristo a tshi vhofha Sathane u itela u vhofholola ḽifhasi kha ṱhuṱhuwedzo ya muvhi, u ḓo ita zwi fanaho na kha madimoni awe.

Dovhani ni ṱhogomele vhuporofita ha u thoma ha Bivhili. Ri a vhala: “Ndi [Yehova] vhea vhuswina vhukati ha iwe [Sathane] na musadzi [Ndangulo ya Yehova ya ṱaḓulu], vhukati ha mbeu yau [Sathane] na mbeu yawe [Yesu Kristo]; mbeu yawe i ḓo U pwasha ṱhóho, iwe wa ḓo i luma tshirethe.” (Genesi 3:15) U pwashiwa ha ṱhoho ya ṋowa zwi katela u poselwa ha Sathane mugodini Miṅwaha ya Tshigidi ya Vhuvhusi ha Kristo. Vhuporofita vhu bvela phanḓa nga u amba uri hu ḓo vha na vhuswina vhukati ha Ane a khou pwasha ṱhoho na mbeu ya Sathane. Yeneyi mbeu kana dzangano, ḽi katela vharuṅwa vhavhi, kana madimoni. Ngauralo zwi a pfala u phetha nga uri musi Yesu a tshi posela Sathane mugodini, u ḓo dovha a posela madimoni henefho mugodini. Mbuno ya uri mimuya mivhi yo sumbedza u ofha dindi i sumbedza uri i a ḓivha nga ha u poselwa mugodini hu sa iledzei hune ha khou ḓa.—Luka 8:31.

Nga zwenezwo, naa zwi a konadzea uri Ndzumbululo 20:1-3 a yo ngo amba nga ha madimoni  nga ṅwambo wa uri a ḓo fheliswa nga Haramagedo u katela na tshipiḓa tsha mbeu ya Sathane? Bivhili i sumbedza uri zwi vhonala zwi songo ralo. Malugana na u fheliswa ha Sathane, i ri: “Diabolo we a vha xedza a poswa dzivhani ḽa mulilo na tsevhela huné na ḽivhanda na muporofita wa u zwifha vha vha hone, uri vha shengedzwe masiari na vhusiku u swika lini na lini.” (Ndzumbululo 20:10) Ḽivhanda na vhaporofita vha mazwifhi ndi maitele a politiki nahone vha dovha vha vha tshipiḓa tsha ndangulo ya Sathane i vhonalaho. (Ndzumbululo 13:1, 2, 11-14; 16:13, 14) Vhone vha ḓo fheliswa nga Haramagedo, musi Muvhuso wa Mudzimu u tshi ḓo pwasha nahone wa fhelisa mivhuso yoṱhe ya shango. (Daniele 2:44) Bivhili i amba nga ha ‘mulilo u sa dzimi, wo lugiselwaho Diabolo na vharuṅwa vhawe.’ (Mateo 25:41, maḽeḓeretsendama ndi ashu.) Sathane na madimoni awe vha ḓo poselwa “dzivhani ḽa mulilo na tsevhela” u fana na ḽivhanda nahone muporofita wa mazwifhi na ene u ḓo fheliswa tshoṱhe. Arali tshipiḓa tshi sa vhonali tsha mbeu ya Sathane, tshine tsha vha madimoni ane a vha na maanḓa u fhira tshipiḓa tshi vhonalaho tsha mbeu yawe tshi tshi ḓo fheliswa nga Haramagedo, zwi tou pfala uri madimoni o vha a tshi ḓo vha o ambiwa sa o no poselwaho dzivhani ḽa mulilo u katela na ḽivhanda na muporofita wa mazwifhi. U sa ambiwa nga hao kha Ndzumbululo 20:10 zwi sumbedza uri madimoni ha nga ḓo fheliswa nga Haramagedo.

Samusi madimoni a songo ambiwa nga ho livhaho uri a ḓo poselwa mugodini, ndi ngazwo a songo ambiwa nga ho livhaho uri a ḓo vhofhololwa mugodini. Naho zwo ralo a ḓo itwa zwi fanaho na zwine zwa ḓo itwa Diabolo. Musi o no vhofhololwa na Diabolo nahone a tshi khou shumisana nae tshifhingani tsha u lingwa ha vhathu ha u fhedza miṅwahani ya tshigidi, madimoni na one a ḓo poselwa dzivhani ḽa mulilo nahone a ḓo vha o fheliswa tshoṱhe.—Ndzumbululo 20:7-9.

Nga zwenezwo, naho Ndzumbululo 20:1-3 i tshi amba fhedzi nga ha u fariwa na u poselwa mugodini ha Sathane, ri nga phetha nga ho teaho uri na vharuṅwa vhawe na vhone vha ḓo poselwa henefho-vho. Sathane na tshigwada tshawe tsha madimoni a vha nga ḓo tendelwa u dzhenelela kha u ḓadzea ha ndivho dza Mudzimu dza u shandula ḽifhasi uri ḽi vhe paradiso na u vusuluswa ha vhathu uri vha vhe vho fhelelaho Miṅwahani ya Tshigidi ya Vhuvhusi ha Kristo.