Naa Ni a Ṱulutshelwa Shango ḽi si na Nyofho?

“Ri khou tshila kha tshiimo tsha ‘u dzula ro fhaṱuwa vhukuma tshifhinga tshoṱhe na . . .u shaya thuso,’ tshine tsha itwa nga . . . khombo ine ya nga vha hone tshifhinga tshiṅwe na tshiṅwe nga mufuda naho u ufhio hu si na tsevho.”

ENEO maipfi, o redzwaho ṅwaha wo fhelaho kha magazini wa Newsweek, a sumbedza maḓipfele a vhathu vhanzhi vhane vha khou tshila kha shango ḽa ṋamusi ḽi re na khakhathi. Yesu Kristo o sumbedza uri eneo maḓipfele a ḓo ṋaṋa tshifhingani tshi ḓaho. O dzula o amba nga tshifhinga tsha musi hu tshi ḓo vha na maṱungu kha dzitshaka ane dzi nga si kone u a fhelisa nahone vhathu vha ḓo vha na nyofho na u lindela zwithu zwine zwa ḓo vha hone kha ḽifhasi. Naho zwo ralo, a ro ngo fanela u ofha kana u pfa ri si na thuso, nga ṅwambo wa uri Yesu o ri: “Zwauralo zwi tshi thoma u vhonala, ni lilale, ni imise dziṱhóho dzaṋu, ngauri tshifhinga tshaṋu tsha u rengululwa tshi khou sendela.”—Luka 21:25-28.

A tshi ṱalusa zwiimo zwine vhathu vhawe vha ḓo tshila khazwo kha ḽifhasi nga murahu ha u tshidzwa, Yehova Mudzimu o ḓivhadza a ri: “Vhathu vhanga vha ḓo dzula hayani ha mulalo, miṱani hu sí na mbilaelo, mavanḓani a u ḓi-takalela.” (Yesaya 32:18) A tshi shumisa muporofita wawe Mixa, Yehova o ri: “Vhoṱhe vha ḓo dzula murunzini wa miṱokola yavho, na murunzini wa mihuyu yavho, hu si vhe na a vha shushedzaho.”—Mixa 4:4.

Tshenetsho tshiimo tsho fhambana vhukuma na vhutshilo ha ṋamusi! A hu nga ḓo vha na khombo dzi sa ḓivhei dzine dza ḓo tshuwisa vhathu. Nṱhani ha u vha hone ha tshiimo tsha u dzula wo fhaṱuwa tshifhinga tshoṱhe na u shaya thuso, hu ḓo vha na tshiimo tsha mulalo na dakalo zwi sa fheli.