Mbudziso dzi Bvaho ha Vhavhali

Ndi ngani Yesu o vuswaho vhafuni o vhudza Thoma uri a mu kwame ngeno o hana Maria Magdalena a tshi ita nga u ralo mathomoni?

Dziṅwe ṱhalutshedzelo dza kale dza Bivhili dzi na muhumbulo wa uri Yesu o vhudza Maria Magdalena uri a sa mu kwame. Sa tsumbo, King James Version i ṱalutshedzela maipfi a Yesu nga u ri: “U songo nkwama, ngauri a thi athu u gonya nda ya ha Khotsi-anga.” (Yohane 20:17) Naho zwo ralo, u ya nga ḽiiti ḽa Lugerika lwa u thoma, ḽine kanzhi ḽa ṱalutshedzelwa nga uri “kwama” ḽi amba “u nambatela, u gogoḓela, u ḓitika, u farelela, kana u omelela.” Zwi tou pfala uri Yesu o vha a sa khou hana Maria Magdalena a tshi mu kwama, samusi o tendela vhafumakadzi vhe vha vha vhe mavhiḓani vha tshi “fara milenzhe yawe.”—Mateo 28:9.

Vhunzhi ha ṱhalutshedzelo dza zwenezwino, u fana na New World Translation of the Holy Scriptures, The New Jerusalem Bible, na The New English Bible, dzi ri thusa u pfesesa zwavhuḓi zwine maipfi a Yesu ane a ri: “U songo nkwama” a amba zwone zwa vhukuma. Ndi ngani Yesu o vha a tshi nga amba nga u ralo kha Maria Magdalena we a vha e tsini nae vhukuma?—Luka 8:1-3.

Zwi vhonala uri Maria Magdalena o a vha tshi khou humbula uri Yesu o vha e tsini na u gonya ṱaḓulu. A tshi sudzuluselwa nga lutamo lwawe lwa u ṱoḓa u vha na Murena wawe, a nambatela Yesu uri a sa ṱuwe. U itela u mu khwaṱhisedza uri a tshi athu u vha tshifhinga tshawe tsha u ṱuwa, Yesu o vhudza Maria uri a mu litshedze nahone a ye u ḓivhadza vhafunziwa vhawe mafhungo a u vuswa hawe.—Yohane 20:17.

Nyambedzano vhukati ha Yesu na Thoma yo vha yo fhambana vhukuma na yeneyo. Musi Yesu a tshi bvelela kha vhaṅwe vha vhafunziwa vhawe, Thoma o vha e siho. Nga murahu, Thoma o sumbedza u timatima u vuswa ha Yesu, a ita na u amba uri arali a sa thoma a kwama mbonzhe dza Yesu dza zwibigiri na u longa tshanḓa kha lurumbu lwa Yesu lwe lwa rungwa nga pfumo a nga si tende uri o vuswa. Nga murahu ha maḓuvha a malo, Yesu o dovha a bvelela kha vhafunziwa vhawe. Nga tshino tshifhinga, Thoma o vha e hone, nahone Yesu a mu vhudza uri a kwame he a vha o vhaisala hone.—Yohane 20:24-27.

Ngauralo, kha mafhungo a Maria Magdalena, Yesu o vha a tshi khou lingedza u khakhulula mavhonele o khakheaho a u mu thivhela uri a sa ṱuwe; kha mafhungo a Thoma, Yesu o vha a tshi khou thusa muṅwe muthu uri a sa timatime. Kha zwenezwo zwiitea zwoṱhe, Yesu o vha e na zwiitisi zwavhuḓi zwa u ita nga nḓila ye a ita ngayo zwithu.