Zwine Ra Fanela U Zwi Vhala

u ya nga Nyeletshedzo ya Salomo ya Vhuṱali

“ZWA u ṅwala maṅwalo ndi zwinzhi a zwi tumuwi; u ḓi-funza zwinzhi hu netisa muvhili.” (Muhuweleli 12:12) Musi a tshi ṅwala eneo maipfi miṅwahani i ṱoḓaho u vha 3000 yo fhiraho, Salomo Khosi ya vhuṱali wa Isiraele o vha a si khou sasaladza u vhala. Nṱhani hazwo, o vha a tshi khou amba nga ṱhoḓea ya u khetha. Yeneyo khumbudzo yo tea vhukuma ṋamusi, samusi bugu dza u vhala dza zwigidi dzi tshi khou gandiswa ṅwaha muṅwe na muṅwe!

Zwi khagala uri ‘maṅwalo manzhi’ e a vha a tshi khou ambiwa nga Salomo o vha a sa fhaṱi kana u homolosa. Nga zwenezwo, o amba uri u fhedza tshifhinga u tshi khou a vhala zwi “netisa muvhili,” nṱhani ha u vhuyedza muvhali.

Naho zwo ralo, naa Salomo o vha a tshi khou amba uri a huna bugu dzine dza nga ṋea vhulivhisi vhu pfalaho na vhu fulufhedzeaho vhune ha nga vhuyedza muvhali? Hai, nga ṅwambo wa uri o dovha a ṅwala a ri: “Maambiwa a vhaṱali a nga tshikombetshedzi, ndi khokho dze dza ombelwa fhethu huthihi, dzo ḓiswaho nga mulisa muthihi.” (Muhuweleli 12:11) I ngoho, hu na maipfi o ṅwaliwaho ane “a nga tshikombetshedzi,” ane a nga ṋea tshiṱuṱuwedzi tshi vhuyedzaho. A nga ṱuṱuwedzela muthu kha nḓila yo lugaho. Zwiṅwe hafhu, ‘a nga khokho dze dza ombelwa,’ dzine dza nga thusa u khwaṱhisa u ḓiimisela ha muthu na u vha na mvelelo ya tshoṱhe.

Ri nga wana ngafhi eneo maipfi a vhuṱali? U ya nga Salomo, maipfi a ndeme vhukuma kha eneo ndi ane a bva kha Mulisa muthihi, Yehova. (Psalme ya 23:1) Nga zwenezwo, ndi zwavhuḓi uri muthu a vhale bugu yo hevhedzwaho nga Mudzimu—Bivhili. U vhala eneo maipfi o hevhedzwaho tshifhinga tshoṱhe a nga thusa muthu uri a vhe “o nakaho, o nakiselwaho mishumo mivhuya yoṱhe.”—2 Timotheo 3:16, 17.