‘Ndi Takalela Vhugudisi he Nda vhu Wana’
‘Ndi Takalela Vhugudisi he Nda vhu Wana’
KAZUNA ane a vha muswa o vha o mangala musi mudededzi wawe a tshi amba uri u fanela u dzhenela muṱaṱisano wa tshipitshi tsha Luisimane. Muṱaṱisano wo vha u tshi tea u dzhenelwa nga zwikolo zwoṱhe zwa murole wa nṱha zwi re tshiṱangadzimeni tshihulwane tsha ngei Dzhapani devhula ha Hokkaido, fhedzi tshikolo tsha hawe tsho vha tshi sa athu vhuya tsha khetha mugudiswa uri a dzhenele wonoyo muṱaṱisano. Nga ḓuvha ḽa muṱaṱisano, Kazuna o vha o tshuwa nga ṅwambo wa uri o vha a tshi fanela u ṱaṱisana na vhaṅwe vhagudiswa vha ṱoḓaho u vha 50. O ṋaṋa u tshuwa musi a tshi vhona vhahaṱuli vhavhili vhane Luisimane lwa vha luambo lwavho lwa ḓamuni.
Vhe vha kunda vho ḓivhadzwa, nahone ho thomiwa nga we a wana pfufho ya fhasi. Mafheleloni vha tshi vhidza dzina ḽa Kazuna kha pfufho ya u thoma, o vha o mangala. Ene na mudededzi wawe, we a vha o dzula tsini nae, vha sedzana vho mangala. A tshi kha ḓi vha o mangala, Kazuna a ya tshiṱeidzhini nahone a ṱanganedza tshiphuga tshawe tsha pfufho ya u thoma!
Kazuna o ṱalusa o takala a ri: “Hezwi zwo konadzea fhedzi nga ṅwambo wa vhugudisi he nda vhu wana ndanguloni ya Yehova kha Tshikolo tsha Vhuḓinḓa ha lwa Ṱaḓulu. Ndo takala vhukuma nge nda wana honoho vhugudisi.” Tshenetsho tshikolo tshe Kazuna a ṱanganela khatsho u bva a tshee muṱuku, ndi tshiṅwe tsha miṱangano ya Ṱhanzi dza Yehova. Musi a tshi khou lugisela muṱaṱisano, Kazuna o livhisa ṱhogomelo zwihuluhulu kha u shumisa khudzaipfi, u amba nga u fhisea na nga mafulufulu, u dzinginyisa muvhili, u sedza vhathetshelesi, na kha maṅwe mafhungo ane a funzwa Tshikoloni tsha Vhuḓinḓa ha lwa Ṱaḓulu.
Ri ni ramba uri ni ḓe ni vhone tshenetsho tshikolo, tshine tsha farwa vhege iṅwe na iṅwe Holoni ya Muvhuso ya Ṱhanzi dza Yehova. Uri ni ḓivhonele nga aṋu maṱo nḓila ine vhaṱuku na vhahulwane vha vhuyelwa ngayo. Muthu muṅwe na muṅwe u a tendelwa kha wonoyo muṱangano. U itela u wana mafhungo o engedzeaho nga ha tshikolo tshi re tsini na ha haṋu, ri ni humbela uri ni kwame Ṱhanzi dza Yehova dza hune na dzula hone.