Ṱhonifhani Mbingano Samusi I Tshifhiwa Tshi Bvaho Ha Mudzimu
Ṱhonifhani Mbingano Samusi I Tshifhiwa Tshi Bvaho Ha Mudzimu
“Ndi zwine munna a ḓo sia khotsi-awe na mme-awe ngazwo’, a ḓo nambatela musadzi wawe, vha vha ṋama nthihi.”—GEN. 2:24.
1. Ndi ngani ri tshi fanela u ṱhonifha Yehova?
YEHOVA MUDZIMU Muthomi wa mbingano o fanela u ṱhonifhiwa. Sa Musiki washu, Muvhusahoṱhe na Khotsi ashu wa ṱaḓulu, u ṱaluswa nga ho teaho uri ndi Muṋei wa “zwifhiwa zwoṱhe zwavhuḓi na zwoṱhe, zwiné ra ṋewa zwi sí na tshiṱahe.” (Yak. 1:17; Ndzumb. 4:11) Yeneyi ndi nḓila ine a sumbedza ngayo lufuno lwawe luhulwane. (1 Yoh. 4:8) Tshiṅwe na tshiṅwe tshine a ri funza tshone, tshine a ri humbela uri ri tshi ite, na tshe a ri ṋea tshone o zwi itela u ri vhuyedza.—Yes. 48:17.
2. Ndi dzifhio ndaela dze Yehova a dzi ṋea vhavhingani vha u thoma?
2 Bivhili i amba uri mbingano ndi tshiṅwe tsha zwifhiwa “zwavhuḓi” zwi bvaho ha Mudzimu. (Ruthe 1:9; 2:12) Musi a tshi ṱanganya Adamu na Eva vhavhingani vha u thoma, Yehova o ṋea ndaela dzo livhaho dza nḓila ye vha vha vha tshi nga bvelela ngayo. (Vhalani Mateo 19:4-6.) Arali vha vhe vho tevhela vhulivhisi ha Mudzimu vho vha vha tshi ḓo ḓiphina nga dakalo ḽa tshoṱhe. Naho zwo ralo, vho ita vhutsilu ha u sa thetshelesa ndaela dza Mudzimu nahone vho mbo ḓi sedzana na mvelelo dzi vhaisaho vhukuma.—Gen. 3:6-13, 16-19, 23.
3, 4. (a) Vhathu vhanzhi ṋamusi vha khou sumbedza hani uri a vha ṱhonifhi mbingano na Yehova Mudzimu? (b) Ndi tsumbo dzifhio dzine ra ḓo dzi haseledza kha ino thero?
3 Vhathu vhanzhi ṋamusi vha ita zwi fanaho na zwe zwa itwa nga vhavhingani vha u thoma zwa u sa dzhiela nṱha vhulivhisi ha Yehova musi vha tshi ita phetho malugana na mbingano. Vhaṅwe a vha dzhieli nṱha mbingano ngeno vhaṅwe vha tshi lingedza u shandula zwine mbingano ya vha zwone u itela uri i tendelane na mavhonele avho. (Vha-Roma 1:24-32; 2 Tim. 3:1-5) A vha na ndavha na uri mbingano ndi tshifhiwa tshi bvaho ha Mudzimu, nahone vha dovha vha nyadza Yehova Mudzimu ane a vha Muṋei wa tshifhiwa tshenetsho.
4 Nga zwiṅwe zwifhinga, na vhaṅwe vhathu vha Yehova Mudzimu a vha pfesesi nḓila ine a dzhia ngayo mbingano. Vhaṅwe vhavhingani vha Vhakriste vha dzhia phetho ya u sa dzula vhoṱhe, kana u ṱalana hu si na zwiitisi zwa Maṅwalo zwa u ita nga u ralo. Zwenezwi zwi nga iledzwa hani? Vhulivhisi ha Mudzimu vhu re kha Genesi 2:24 vhu nga thusa hani vhavhingani uri vha khwaṱhise mbingano yavho? Nahone vhane vha khou humbula u vhingana vha nga ḓilugiselela nga nḓila-ḓe? Ri ḓo haseledza nga ha mbingano tharu dza zwifhingani zwa Bivhili dzine dza sumbedza uri u ṱhonifha Yehova ndi zwa ndeme u itela u vha na mbingano ya tshoṱhe.
Ṱahulelani U Fulufhedzea
5, 6. Ndi zwiimo zwifhio zwe zwa vha zwi tshi nga linga Sakaria na Elisabetha, nahone vho lambedzwa hani nga ṅwambo wa u fulufhedzea?
5 Sakaria na Elisabetha vho ita zwithu zwoṱhe nga nḓila yavhuḓi. Vho vhingana nge vha vha vha tshi fulufhedzea kha Yehova. Sakaria o vha a tshi ita mishumo yawe ya vhutshifhe nga u fulufhedzea, nahone vhuvhili havho vho vha vha tshi tevhedza Mulayo wa Mudzimu nga hune vha nga kona ngaho. Vho vha vhe na zwinzhi zwe vha vha vha tshi nga zwi livhuha. Naho zwo ralo, arali no vha no dalela muḓini wavho ngei Yuda, no vha ni tshi ḓo ṱhogomela uri hu na tshiṅwe tshithu tshe vha vha vhe si natsho. Vho vha vhe si na vhana. Elisabetha o vha e muumba, nahone vhuvhili havho vho vha no aluwa vhukuma.—Luka 1:5-7.
6 Kha ḽa Isiraele ḽa kale u vha na vhana zwo vha zwi tshi dzhielwa nṱha vhukuma, nahone miṱa yo vha i tshi anzela u vha mihulwane. (1 Sam. 1:2, 6, 10; Ps. 128:3, 4) Nga tshenetshiḽa tshifhinga, munna wa Muisiraele o vha a tshi nga ita vhukwila ha u ṱala mufumakadzi wawe arali o vha a sa bebi. Naho zwo ralo, Sakaria o dzula na Elisabetha nga u fulufhedzea. Ene na mufumakadzi wawe a vho ngo ṱoḓa zwiitisi zwi sa pfali zwa u ṱalana. Naho u sa vha na vhana zwo vha ṱungufhadza vhukuma, vho bvela phanḓa vha tshi shumela Yehova nga u fulufhedzea. Yehova o vha lambedza vhukuma musi a tshi ita vhuṱolo ha u ri vha bebe murwa vho no vha vhalala.—Luka 1:8-14.
7. Elisabetha o sumbedza hani u fulufhedzea kha munna wawe?
7 Elisabetha o dovha a zwi sumbedza nga iṅwe nḓila uri u a fulufhedzea. Musi murwa wawe Yohane a tshi bebwa, Sakaria o itwa tshimuma nga ṅwambo wa u timatima zwe zwa ambiwa nga muruṅwa wa Mudzimu. Naho zwo ralo, hu fanela u vha hu na iṅwe nḓila ye Sakaria a kona ngayo u vhudza mufumakadzi wawe uri muruṅwa wa Yehova o vha o mu vhudza uri dzina ḽa ṅwana onoyo ḽi fanela u vha “Yohane.” Vhahura na mashaka vho vha vha tshi ṱoḓa u ira ṅwana onoyo dzina ḽa khotsi awe. Fhedzi Elisabetha o tikedza vhulivhisi ha munna wawe nga u fulufhedzea. O ri: “Aiwa, nga a pfi Yohane.”—Luka 1:59-63.
8, 9. (a) U fulufhedzea zwi khwaṱhisa mbingano nga nḓila-ḓe? (b) Ndi dzifhio dziṅwe nḓila dzo livhaho dzine munna na mufumakadzi vha nga sumbedza ngadzo uri vha a fulufhedzea?
8 Vhavhingani ṋamusi vha sedzana na khaedu na zwiṅwe zwiimo zwine zwa vha kula nungo u fana na zwe zwa itea kha Sakaria na Elisabetha. Arali vhavhingani vha sa fulufhedzei, mbingano i nga si bvelele. Zwithu zwi ngaho u tamba nga lufuno, u sedza zwifanyiso zwi karusaho maḓipfele a zwa vhudzekani, vhuṱonḓolo, na zwiṅwe zwi nga ita uri vhathu vha si tsha fulufhelana na luthihi mbinganoni. Nahone arali hu si tsheena u fulufhelana mbinganoni, nga zwiṱuku nga zwiṱuku lufuno lu a fhela. U fulufhedzea zwi fana na mutsheṱo wo tsireledzaho nnḓu, une wa ita uri mavemu na khombo zwi songo dzhena, u itela uri vha re henefho muṱani vha tsireledzee. Nga zwenezwo, musi munna na mufumakadzi vha tshi fulufhedzea vha nga dzula vhoṱhe vho tsireledzea zwine zwa ḓo ita uri vha kone u somolelana zwa haṋwani na u ita uri lufuno lwavho lu engedzee. Vhukuma, u fulufhedzea ndi zwa ndeme.
9 Yehova o vhudza Adamu a ri: “Ndi zwine munna a ḓo sia khotsi-awe na mme-awe ngazwo’, a ḓo nambatela musadzi wawe.” (Gen. 2:24, maḽeḓeretsendama ndi ashu.) Naa zwenezwo zwi amba mini? Zwi amba uri vhushaka he muthu a vha e naho na khonani na mashaka vhu fanela u shanduka. Muthu u fanela u dzhia mufarisi wawe sa a re wa ndeme khae u fhira vhathu vhoṱhe. Khonani na mashaka a vho ngo fanela u ḓa u thoma, ngeno mufarisi a sa londi muṅwe ngae ane a vha muṱa wawe muswa; nahone vhavhingani a vho ngo fanela u tendela vhabebi vha tshi dzhenelela kha phetho dza muṱa wavho kana musi hu na zwine vha sa tendelane khazwo. Zwenezwo zwi amba uri vhavhingani vha fanela u nambatelana. Mudzimu u ṱoḓa vha tshi ita nga u ralo.
10. Ndi mini zwine zwa ḓo thusa vhavhingani uri vha ṱahulele u fulufhedzea?
10 Na kha miṱa ine muṅwe mufarisi a si vhe Ṱhanzi ya Yehova, u fulufhedzea zwi a vhuyedza. Muṅwe wahashu wa tshisadzini we munna wawe a vha e si Ṱhanzi ya Yehova o ri: “Ndi livhuha vhukuma Yehova nge a nngudisa nḓila ine nda fanela u ḓiṱukufhadza ngayo kha munna wanga na uri ndi mu ṱhonifhe nga ho dzikaho. U dzula ndi tshi fulufhedzea zwo ita uri hu fhele miṅwaha ya 47 ndi tshi kha ḓi funiwa na u ṱhonifhiwa.” (1 Vha-Kor. 7:10, 11; 1 Pet. 3:1, 2) Nga zwenezwo, itani vhuḓidini u itela uri mufarisi waṋu a ḓipfe o tsireledzea. Nga zwine na zwi amba na u zwi ita, ṱoḓani nḓila dza u khwaṱhisedza mufarisi waṋu uri ndi ene muthu wa ndeme kha inwi u fhira vhathu vhoṱhe kha ḽifhasi. Ni songo tendela muthu naho e ufhio kana tshithu naho tshi tshini tshi tshi ni fhambanya na mufarisi waṋu. (Vhalani Mirero 5:15-20.) Ron na Jeannette vho no fhedzaho miṅwaha ya 35 vha tshi khou ḓiphina kha mbingano yavho vho ri: “Nga ṅwambo wa uri ri a fulufhedzea musi ri tshi ita zwine Mudzimu a zwi lavhelela kha riṋe, ri na mbingano i takadzaho na i bvelelaho.”
Vhuthihi Vhu Khwaṱhisa Mbingano
11, 12. Akwila na Prisila vho shumisana hani (a) hayani, (b) mushumoni wa u ḓitshidza, na (c) vhuḓinḓani ha Vhukriste?
11 Musi muapostola Paulo a tshi amba nga ha Akwila na Prisila khonani dzawe dza tsini-tsini, ho ngo amba nga ha muṅwe a sia muṅwe. Vhenevha vhavhingani vha re na vhuthihi ndi tsumbo yavhuḓi ya zwine Mudzimu a zwi amba musi a tshi ri munna na musadzi vha ḓo vha “ṋama nthihi.” (Gen. 2:24) Vho vha tshi shuma vhoṱhe tshifhinga tshoṱhe, hayani, mushumoni wa u ḓitshidza, na vhuḓinḓani ha Vhukriste. Sa tsumbo, musi Paulo a tshi swika lwa u thoma ngei Korinta, Akwila na Prisila vho mu ramba uri a ḓe a dzule navho muḓini wavho, nahone o fhedza tshifhinga a tshi itela hone mishumo yawe. Nga murahu, musi e ngei Efeso vho shumisa muḓi wavho u itela u farela miṱangano ya tshivhidzo na u shuma vhoṱhe u itela u thusa vhathu vhaswa, vha ngaho sa Apolo uri vha pfesese mafhungo-ngoho nga vhuḓalo. (Mish. 18:2, 18-26) Vhenevha vhavhingani vha fhiseaho vho mbo ḓi ya Roma, he vha dovha vha tenda uri hu shumiswe muḓi wavho u itela u fara miṱangano ya tshivhidzo. Nga murahu, vho mbo ḓi vhuyelela Efeso u itela u khwaṱhisa vhahavho.—Vha-Roma 16:3-5.
12 Akwila na Prisila vho dovha vha fhedza tshifhinga vha tshi khou shumisana na Paulo kha mushumo wavho wo ḓoweleaho wa u luka masila. Na henefha, ri dovha ra wana vhenevha vhavhingani vha tshi khou shumisana vha sa ṱaṱisani kana hu si na khakhathi. (Mish. 18:3) Naho zwo ralo, ri na vhungoho ha uri u fhedza tshifhinga vhe vhavhili vha tshi khou ita mishumo ya Vhukriste zwo ita uri vha dzule vhe na mbingano yo khwaṱhaho. Huṅwe na huṅwe he vha vha vhe hone, ngei Korinta, Efeso, kana Roma, vho vha vha tshi ḓivhelwa u ‘shumisana na Kristo Yesu.’ (Vha-Roma 16:3) Vho shuma vhoṱhe u itela u isa phanḓa mushumo wa u huwelela nga ha Muvhuso hoṱhe he vha shuma hone.
13, 14. (a) Ndi mini zwine zwa nga ita uri hu si vhe na vhuthihi mbinganoni? (b) Ndi zwifhio zwiṅwe zwithu zwine vhavhingani vha nga zwi ita u itela u khwaṱhisa mbofho yavho sa “ṋama nthihi”?
13 Vhukuma, u vha na vhuthihi musi ri tshi ita zwithu na u vha na zwipikwa zwi fanaho zwi khwaṱhisa mbingano. (Muh. 4:9, 10) Zwi ṱungufhadzaho ndi uri musalauno vhavhingani vhanzhi a vha fhedzi tshifhinga tshinzhi vhe vhavhili. Vha fhedza tshifhinga tshilapfu vhe mishumoni yavho yo fhambanaho. Vhaṅwe vha fhedza tshifhinga tshilapfu vhe nḓilani ya u ya mushumoni wa u ḓitshidza kana vha pfulutshela kha maṅwe mashango vhe vhoṱhe u itela u shuma vha tshi rumela tshelede hayani. Na musi vhe hayani, vhaṅwe vhavhingani a vha fhedzi tshifhinga vhe vhavhili nga ṅwambo wa u ṱalela thelevishini, u ita miṅwe mishumo, u tamba mitambo, mitambo ya vidio kana Inthanethe. Naa zwo tou ralo na muṱani waṋu? Arali zwo ralo, naa ni nga shandula zwiimo zwaṋu u itela uri ni fhedze tshifhinga tshinzhi ni vhavhili? Ndi ngani ni sa iti noṱhe mishumo yo ḓoweleaho i ngaho sa u lugiselela zwiḽiwa, u ṱanzwa zwigoḓelo, kana u shuma ngadeni? Naa ni nga thusana u itela u ṱhogomela vhana vha vhoiwe kana u thusa vhabebi vha vhoiwe vha vhalala?
14 Tsha ndeme vhukuma, tshifhinga tshoṱhe itani zwithu zwi tshimbidzanaho na u gwadamela Yehova ni vhavhili. U haseledza ndimana ya ḓuvha ni vhavhili na u ṱanganela noṱhe kha vhurabeli ha muṱa zwi ni ṋea tshibuli tshavhuḓi tsha u ita uri muṱa wa vhoiwe u dzule u na mahumbulele na zwipikwa zwi fanaho. Dovhani ni shume noṱhe na tsimuni. Arali zwi tshi konadzea, lingedzani u vula nḓila noṱhe, naho arali zwiimo zwa vhoiwe zwi tshi ni tendela uri ni kone u vula nḓila ṅwedzi muthihi fhedzi kana ṅwaha woṱhe. (Vhalani 1 Vha-Korinta 15:58.) Wahashu wa tshisadzini we a vula nḓila na munna wawe o ri: “Vhuḓinḓa ho vha vhu iṅwe nḓila ye ra vha ri tshi nga kona u fhedza tshifhinga ri vhavhili nahone ra kona na u amba. Nga ṅwambo wa uri ro vha ri na tshipikwa tshi fanaho tsha u thusa vhathu vhe ra ṱangana navho vhuḓinḓani, ndo vha ndi tshi vhona uri ri na vhuthihi. Ndo ḓipfa ndi tsini-tsini nae, hu si sa munna wanga fhedzi, fhedzi o vha a tshi dovha a vha khonani yavhuḓi vhukuma.” Musi ni tshi khou shuma noṱhe u itela u swikelela zwipikwa zwavhuḓi, zwithu zwine zwa ḓa u thoma vhutshiloni haṋu, zwine na vha na dzangalelo khazwo, na zwe na ḓowela u zwi ita, nga zwiṱuku nga zwiṱuku zwi ḓo fana na zwa mufarisi waṋu, nahone vhuimo ha vhoiwe vhu ḓo fana na ha Akwila na Prisila vhe vha vha vha tshi humbula, vha tshi ḓipfa na u ḓifara sa “ṋama nthihi.”
Tendelani U Livhiswa Nga Lwa Muya
15. Ndi ngani u ṱahulela vhumuya zwi zwa ndeme u itela u vha na mbingano i bvelelaho? Ṱalutshedzani.
15 Yesu o vha a tshi zwi ḓivha uri ndi zwa ndeme uri Mudzimu a vhe wa u thoma mbinganoni. O zwi vhona musi Yehova a tshi ita mbingano ya u thoma. O vhona nḓila ye Adamu na Eva vha vha vho takala ngayo musi vha tshi kha ḓi tevhela vhulivhisi ha Mudzimu, nahone o vhona nḓila ye vha pfa ngayo vhuṱungu musi vha tshi landula vhulivhisi hawe. Nga zwenezwo, musi Yesu a tshi funza vhaṅwe o dovha a amba nga ha ndaela ya Khotsi awe i re kha Genesi 2:24. O dovha a ri: “Zwo vhofhekanywaho nga Mudzimu muthu a songo zwi fhandakanya.” (Mat. 19:6) Nga zwenezwo, u ṱhonifha Yehova nga ho dzikaho zwi kha ḓi vha zwa ndeme vhukuma u itela uri ni vhe na mbingano i takadzaho na i bvelelaho. Malugana na zwenezwi, Yosefa na Maria vhabebi vha Yesu vho ri vhetshela tsumbo i swayeaho vhukuma.
16. Yosefa na Maria vho sumbedza hani uri vha dzhiela nṱha zwithu zwa muya muṱani wavho?
16 Yosefa o vha e na vhuthu nahone a tshi ṱhonifha Maria. Musi a tshi pfa lwa u thoma uri Maria o vha e muthu wa thovhela, o shumisana nae nga khathutshelo, na musi muruṅwa wa Mudzimu a sa athu mu ṱalutshedza zwe zwa itea kha Maria. (Mat. 1:18-20) Sa vhavhingani, vho thetshelesa ndaela ya Muvhusi nahone vho dovha vha tevhedza Mulayo wa Mushe. (Luka 2:1-5, 21, 22) Naho vhanna vho vha vhe vhone fhedzi vhe vha vha vha tshi fanela u ya vhuṱamboni ngei Yerusalema, Yosefa na Maria u katela na miraḓo ya muṱa wavho vho vha vha tshi ya henefho ṅwaha muṅwe na muṅwe. (Doit. 16:16; Luka 2:41) Vhenevha vhavhingani vha ofhaho Mudzimu vho vha vha tshi zwi sumbedza nga nḓila yeneyi na nga dziṅwe nḓila uri vha lwela u takadza Yehova na u ṱhonifha zwithu zwa muya nga ho dzikaho. Ndi ngazwo Yehova o vha khetha uri vha ṱhogomele Murwa wawe mathomoni a vhutshilo hawe ha kha ḽifhasi.
17, 18. (a) Vhavhingani vha nga vhea hani zwithu zwa muya u thoma muṱani wavho? (b) Zwenezwi zwi ḓo vha vhuyedza nga nḓila-ḓe?
17 Naa muṱa waṋu u livhiswa nga zwithu zwa muya? Sa tsumbo, musi ni tshi ita phetho dza ndeme, naa ni thoma nga u ita ṱhoḓisiso ya maitele a Bivhili, u rabela nga ha mafhungo eneo, nahone na kona u humbela nyeletshedzo kha vhaṅwe Vhakriste vho vhibvaho? Kana naa ni livhiswa nga maḓipfele aṋu, kana a vha muṱa waṋu kana a dzikhonani musi ni tshi piringulula vhuleme? Naa ni a lwela u shumisa nyeletshedzo dzi shumaho dzo gandiswaho nga mukoma a fulufhedzeaho dza mbingano na vhutshilo ha muṱa? Kana naa ni ḓiwana ni tshi khou sokou tevhela miṅwe mikhuvha kana nyeletshedzo dzo ḓoweleaho dza ḽino shango? Naa ni a rabela na u guda ni vhavhili, u ḓivhetshela zwipikwa zwa muya na u amba nga ha zwine zwa ḓa u thoma vhutshiloni ha vhoiwe?
18 Musi Ray a tshi amba nga ha miṅwaha ya 50 ye vha i fhedza vhe mbinganoni i takadzaho o ri: “ A ri athu vhuya ra vha na vhuleme he ha ri kunda, ngauri ri dzhia Yehova sa tshipiḓa tshashu tsha ‘ludzi lwó swaledzwaho.’” (Vhalani Muhuweleli 4:12.) Danny na Trina na vhone vha tendelana na zwenezwo. Vho ri: “Samusi ri tshi khou shumela Yehova roṱhe, mbingano yashu yo khwaṱha vhukuma.” Vho no fhedza miṅwaha i fhiraho 34 vho takala mbinganoni. Arali na dzula ni tshi vhea Yehova u thoma mbinganoni ya vhoiwe, u ḓo ni thusa uri ni bvelele nahone u ḓo ni fhaṱutshedza vhukuma.—Ps. 127:1.
Dzulani Ni Tshi Ṱhonifha Tshifhiwa Tsha Mudzimu
19. Ndi ngani Mudzimu o ṋea vhathu tshifhiwa tsha mbingano?
19 Vhathu vhanzhi ṋamusi vha ṱoḓesa u ḓitakadza. Fhedzi mushumeli wa Yehova ha na mavhonele o raloho. U a zwi ḓivha uri Mudzimu o ṋea vhathu mbingano sa tshifhiwa u itela uri ndivho Yawe i bvele phanḓa. (Gen. 1:26-28) Arali Adamu na Eva vha vhe vho ṱhonifha tshenetsho tshifhiwa, shango ḽoṱhe ḽo vha ḽi tshi ḓo vha ḽi paradiso yo ḓalaho nga vhathu vhavhuya vho takalaho vhane vha shumela Mudzimu.
20, 21. (a) Ndi ngani ri songo fanela u hangwa uri mbingano ndi khethwa? (b) Ndi tshifhio tshifhiwa tshine ra ḓo guda nga hatsho vhege i ḓaho?
20 Zwa ndeme vhukuma ndi uri vhashumeli vha Mudzimu vha dzhia mbingano sa tshibuli tsha u renda Yehova. (Vhalani 1 Vha-Korinta 10:31.) Samusi ro zwi vhona, u fulufhedzea, u vha na vhuthihi, na u vha vhathu vha muya ndi pfaneleo dza Mudzimu dzine dza khwaṱhisa mbingano. Nga zwenezwo, hu sa londwi uri ri khou lugiselela mbingano, u i khwaṱhisa, kana ri khou lingedza u i tsireledza, ri fanela u sa hangwa uri mbingano ndi ndugiselelo khethwa ya Mudzimu. U dzula ri tshi humbula nga ha mafhungo eneo zwi ḓo ri sudzulusela u ita zwoṱhe zwine ra nga kona uri ri ite phetho dza mbingano dzo thewaho kha Ipfi ḽa Mudzimu. Musi ri tshi ita nga u ralo ri ḓo vha ri khou sumbedza u ṱhonifha tshifhiwa tsha mbingano, khathihi na Yehova Mudzimu ane a vha Muṋei wa tshifhiwa tshenetsho.
21 Vhukuma, Yehova ho ngo ri ṋea tshifhiwa tsha mbingano fhedzi; nahone mbingano a si yone nḓila i yoṱhe ine ya ri ḓisela dakalo vhutshiloni. Kha thero i tevhelaho, ri ḓo haseledza nga ha tshiṅwe tshifhiwa tshavhuḓi vhukuma tshi bvaho ha Mudzimu—tshine tsha vha tshifhiwa tsha u sa vha mbinganoni.
Ni Ḓo Aravha Hani?
• U fulufhedzea zwi fanela u ṱuṱuwedza hani Vhakriste vha re mbinganoni?
• Ndi ngani u shuma ni vhavhili nga vhuthihi zwi tshi khwaṱhisa mbingano?
• Ndi dzifhio dziṅwe nḓila dzine vhavhingani vha nga tendela ngadzo u livhiswa nga Mudzimu?
• Ri nga sumbedza hani uri ri a ṱhonifha Yehova, Muthomi wa mbingano?
[Mbudziso dza Pfunzo]
[Zwifanyiso kha siaṱari 15]
Musi vhavhingani vha tshi shuma vhoṱhe, vha dzula vhe na vhuthihi