Elekanyani Nga Ha Zwithu Zwe Yehova A Ni Itela Zwone

NGA MURAHUNYANA ha musi Yesu o no vuswa vhafuni, vhafunziwa vhawe vhavhili vho vha vha tshi khou tshimbila vha tshi bva Yerusalema vha tshi khou ya Emausi. Mafhungo a Evangeli ya Luka a ri: “Ha ri vha tshi khou amba vha tshi khou ṱoḓisana, na ene muṋe Yesu a sendela a tshimbila navho’. Maṱo avho one o vha o farwa, vha si mu ḓivhe.” Nga zwenezwo, Yesu o amba navho a ri: “Naa ndi maipfi-ḓe aya, ané na fhindulana ni tshi khou tshimbila nó ṱungufhala?” Ndi ngani vho vha vho ṱungufhala? Vhafunziwa vho vha vha tshi khou humbula uri nga tshenetsho tshifhinga Vhaisiraele vha ḓo vha vho no vhofhololwa uri vha si tsha vhuswa nga Vhannḓa, fhedzi zwenezwo zwo vha zwi sa athu itea. Nṱhani ha zwenezwo, Yesu o vha o vhulahwa. Vho vha vho ṱungufhala nga ṅwambo wa zwenezwo.—Luka 24:15-21; Mish. 1:6.

Yesu o mbo ḓi thoma u amba na vhafunziwa vhenevho. “A thoma nga Mushe na vhaporofita vhoṱhe a vha ṱalutshedza ané a amba ene kha maṅwalo oṱhe.” Vhukuma, tshifhingani tsha vhuḓinḓa ha Yesu ho vha na zwiitea zwinzhi zwi swayeaho na zwi khwaṱhisaho lutendo! Musi vhafunziwa vho thetshelesa Yesu a tshi khou amba, zwifhaṱuwo zwavho zwo mbo ḓi shanduka vha thoma u vhonala vho takala nṱhani ha u ṱungufhala. Nga murahu nga madekwana eneo, vho ri: “Nandi, mbilu dzashu dzo vha dzi si khou swa naa ngomu hashu, musi a tshi amba na riṋe rí nḓilani, musi a tshi ri vulela maṅwalo?” (Luka 24:27, 32) Ri guda mini kha nḓila ye vhafunziwa vha Yesu vha aravha ngayo?

Mafulufhedziso A Sa Athu Ḓadzea E Ra A Lavhelela A Ri Kwama Hani?

Vhafunziwa vha Yesu vhavhili vhe vha vha vhe nḓilani vha tshi khou ya ngei Emausi vho vha vho ṱungufhala ngauri zwe vha vha vho zwi lavhelela zwo vha zwi sa athu ḓadzea. Vho tshenzhela maipfi a Mirero 13:12 ane a ri: “Tshililelwa-tshilindedzi ndi malwadza-mbilu.” Nga hu fanaho, vhaṅwe vhe vha shumela Yehova lwa mahumi a miṅwaha vho humbula uri “vhuṱungu vhuhulu” ho vha ho fanela u vha ho no swika. (Mat. 24:21; Ndzumb. 7:14) Zwi a pfesesea uri muthu a nga ṱungufhala musi zwithu zwe a zwi lavhelela zwi sa ḓadzei.

Naho zwo ralo, humbulani uri vhenevho vhafunziwa vho dovha vha takala musi Yesu a tshi vha thusa uri vha livhise ṱhogomelo kha  vhuporofita ho no ḓadzeaho—na he ha ḓadzea misini yavho. Ri nga dzula ro takala na u kona u sedzana na vhuimo vhune ha nga ita uri ri kulee nungo nga yeneyo nḓila. Muṅwe muhulwane wa Mukriste ane a pfi Michael a re na tshenzhelo o amba: “Ni songo livhisa ṱhogomelo kha zwithu zwine Yehova a vha a sa athu zwi ita. Nṱhani hazwo, elekanyani nga ha zwithu o no zwi itaho.” Yeneyo ndi nyeletshedzo yavhuḓi vhukuma!

Zwithu Zwo No Itwaho Nga Yehova

Ṱhogomelani zwiṅwe zwithu zwi swayeaho zwe zwa khunyeledzwa nga Yehova. Yesu o ri: “A tendaho nṋe u ḓo shuma-vho mishumo ye nda ita, na i fhiraho iyo u ḓo shuma.” (Yoh. 14:12) Ṋamusi, vhashumeli vha Mudzimu vha khou khunyeledza mishumo mihulwane vhukuma u fhira naho hu lini. Vhathu vha fhiraho milioni dza sumbe vha khou lavhelela uri vha ḓo ponyoka vhuṱungu vhuhulu. Edzani u humbula, a hu athu vhuya ha vha na vhashumeli vhanzhi vha fulufhedzeaho vha Yehova vhane vha khou shuma mashangoni manzhi nga yeneyi nḓila! Vhukuma, samusi Yesu o dzula o amba, Yehova o thusa vhashumeli vhawe u ita ‘mishumo i fhiraho ye ene a i shuma.’

Ndi mini zwiṅwe zwe Yehova a ri itela zwone? O ita uri zwi konadzee uri vhathu vha mbilu dzavhuḓi vha bve shangoni ḽivhi, nahone nga lwa pfanyisedzo vha ye paradisoni ya muya ye a i dzudzanya. (2 Vha-Kor. 12:1-4) Ḓiṋeeni tshifhinga tsha u elekanya nga ha maṅwe masia a paradiso yeneyo ane ra vha nao. Sa tsumbo, sedzani kha laiburari yaṋu kana kha i re Holoni ya Muvhuso. Sedzani kha Watch Tower Publications Index, kana kha Watchtower Library. Thetshelesani ḽitambwa ḽa Bivhili ḽo rekhodiwaho. Humbulani nga ha buthano ḽe na ya khaḽo zwenezwino. Zwiṅwe hafhu, elekanyani nga ha vhukonani vhu fhaṱaho vhune na ḓiphina ngaho na vhahashu vha tshinnani na vha tshisadzini vha Vhakriste. Yehova o vha na mafunda lungafhani nga uri ṋea vhahashu vha re na lufuno na zwiḽiwa zwinzhi zwa muya—zwine zwa vhumba paradiso ya muya!

Mupsalme Davida o ri: “Zwe Iwe Yehova Mudzimu washu wa ri itela ndi zwinzhi, ndi zwa maḓembe na vhuṱali.” (Ps. 40:5) Vhukuma, musi ri tshi elekanya nga ha zwithu zwi mangadzaho zwe Yehova a ri itela zwone na u elekanya nga ha lufuno lwe a ri sumbedza lwone, ri ḓo wana maanḓa maswa a u konḓelela nga u fulufhedzea musi ri tshi shumela Yehova, Khotsi ashu wa ṱaḓulu nga mbilu yoṱhe.—Mat. 24:13.

[Tshifanyiso kha siaṱari 31]

Yesu o thusa vhafunziwa vhawe uri vha elekanye nga ha zwithu zwe Yehova a vha o no vha itela zwone

[Zwifanyiso kha siaṱari 32]

Humbulani nga ha buthano ḽe na ya khaḽo zwenezwino