Naa Ni A Livhuha Zwa Vhukuma Zwe Na Fhaṱutshedzwa Ngazwo?

MUSI vha tshi bviswa nga lwa vhuṱolo vhupulini ha Egipita, Vhaisiraele mathomoni vho vha vho takalela uri vho vhofhololwa u itela u gwadamela Yehova. (Ek. 14:29–15:1, 20, 21) Nga murahu ha zwenezwo, mavhonele avho o mbo ḓi shanduka nga u ṱavhanya. Vho mbo ḓi thoma u gungula nga ṅwambo wa vhuimo he vha vha vhe khaho. Ndi ngani? Nga ṅwambo wa uri vho humbulesa nga ha vhuleme he vha sedzana naho sogani nṱhani ha u humbula nga ha zwe Yehova a vha itela zwone. Vho vhudza Mushe u ri: “No ri bvisela’ni Egipita? No ri ḓisa fhano uri ri fele sogani, hu sí na zwiḽiwa, hu sí na maḓi; ri nengiswa nga hezwi zwiḽiwa zwitete [mana].”—Num. 21:5.

Maḓanani a miṅwaha nga murahu ha zwenezwo, Khosi Davida wa Isiraele ḽa kale o imba a ri: “A vha nṋe, tshe nṋe nda fhulufhedza ndi vhuthu hau; mbilu yanga i takalela u tshidzwa nga Iwe. Ndi imbela Yehova ngauri Mulamuleli wanga ndi Ene.” (Ps. 13:5, 6) Davida ho ngo hangwa zwe Yehova a mu itela zwone nga lufuno na vhuthu. O ita zwo fhambanaho na Vhaisiraele ngauri o fhedza tshifhinga tshilapfu a tshi khou humbula nga hazwo. (Ps. 103:2) Na riṋe Yehova o no ri fhaṱutshedza, nahone zwi ḓo vha vhuṱali u dzhiela nṱha zwe a ri itela zwone. Nga zwenezwo, kha ri ṱhogomele dziṅwe phaṱhutshedzo dza Mudzimu dzine ra ḓiphina ngadzo ṋamusi.

‘U Pfana Na Yehova’

Mupsalme o imba a ri: “Yehova u pfana na vhané vha mu ofha.” (Ps. 25:14) Ndi ndugelo yavhuḓi lungafhani uri vhathu vha songo fhelelaho vha vhe na vhushaka havhuḓi na Yehova! Naho zwo ralo, hu pfi mini arali ra farakanea nga zwithu zwa vhutshilo ha ḓuvha ḽiṅwe na ḽiṅwe lune ra sa tsha fhedza tshifhinga ri tshi khou rabela? Humbulani nga ha zwine zwa ḓo itea kha vhushaka hashu havhuḓi na Yehova. Samusi e Khonani yashu, Yehova u lavhelela uri  ri mu fulufhele nahone ri mu vhudze zwine zwa vha mbiluni dzashu nga thabelo, ri tshi mu somolela zwa haṋwani, u mu vhudza zwine zwa ri ofhisa, zwine ra zwi tama na mbilaelo dzashu. (Mir. 3:5, 6; Vha-Fil. 4:6, 7) Nga zwenezwo, ri fanela u ṱolisisa nḓila ine ra rabela ngayo?

Musi muṅwe muswa wa Ṱhanzi ane a pfi Paul a tshi elekanya nga ha thabelo dzawe o zwi ṱhogomela uri u fanela u khwinisa. * O ri: “Ndo vha ndo no ḓowela u amba maipfi a fanaho musi ndi tshi rabela Yehova.” Musi Paul a tshi ita ṱhoḓisiso nga ha enea mafhungo kha Watch Tower Publications Index, o guda uri hu na thabelo dzi ṱoḓaho u vha 180 dzo ṅwalwaho Bivhilini. Kha dzenedzo thabelo, vhashumeli vha Yehova vha tshifhingani tsho fhiraho vho sumbedza nḓila ye vha vha vha tshi ḓipfa ngayo. Paul o ri: “Nga u elekanya nga ha dzenedzi tsumbo dzi re Maṅwaloni, ndo guda uri ndi fanela u amba nga nḓila yo livhaho musi ndi tshi rabela. Zwenezwi zwo nthusa uri ndi vhudze Yehova zwine zwa vha mbiluni yanga. Zwino ndi takalela u sendela tsini nae nga thabelo.”

“Zwiḽiwa Nga Tshikhathi Tshazwo”

Iṅwe phaṱhutshedzo ye Yehova a ri ṋea yone ndi zwithu zwine ra zwi guda Maṅwaloni. Samusi ri na zwiḽiwa zwinzhi zwa muya, ri na tshiitisi tsha u ‘fhululedza nga uri mbilu dzi khou ḓi-phiṋa.’ (Yes. 65:13, 14) Naho zwo ralo, ri fanela u dzula ro fhaṱuwa u itela uri ri si tendele ṱhuṱhuwedzo i si yavhuḓi i tshi ita uri ri si tsha fhisetshela mafhungo-ngoho. Sa tsumbo, u thetshelesa mazwifhi a vhagunei zwi nga ita uri ri sa dzhiele nṱha zwithu zwa muya, “zwiḽiwa nga tshikhathi tshazwo” zwe Yehova a ri ṋea zwone a tshi shumisa “mukoma a fulufhedzeaho na wa vhuṱali.”—Mat 24:45-47.

André, we a shumela Yehova miṅwaha minzhi o vhuya a vha na tshenzhelo i si yavhuḓi ya u kheluswa nga mahumbulele a vhagunei. O vha a tshi vhona u nga u tou sedzanyana kha Web site ya vhagunei a zwi na khombo. O ri: “Mathomoni ndo kungiwa nga mafhungo a vhagunei e a vha a tshi vhonala u nga ndi mafhungo-ngoho. Musi ndi tshi ṱolisisa nga vhuronwane zwe vha zwi amba ndo humbula uri ndi na zwiitisi zwi pfalaho zwa u litsha ndangulo ya Yehova. Fhedzi nga murahu musi ndi tshi ita dziṅwe ṱhoḓisiso nga ha zwine vhagunei vha zwi hanedza nga ha Ṱhanzi dza Yehova, ndo zwi ṱhogomela uri ndo vha ndi tshi khou fhurwa nga pfunzo dza mazwifhi. Vho vha vha tshi shanda mafhungo nahone vha dzhia zwenezwo sa vhuṱanzi ho khwaṱhaho vhune vha vha naho ha u pikisa pfunzo dzashu. Nga zwenezwo, ndo mbo ḓi phetha nga uri ndi fanela u dovha nda thoma u vhala khandiso dzashu na u ya miṱanganoni. Nga murahu ndo thoma u zwi vhona uri ndo vha ndi tshi khou xelelwa vhukuma.” Zwi takadzaho ndi uri André o fhedza o vhuyelela tshivhidzoni.

‘Vhahashu Vha Shangoni Ḽoṱhe’

U vha na vhahashu vhane vha vha na lufuno na vhuthihi ndi phaṱhutshedzo i bvaho ha Yehova. (Ps. 133:1) Muapostola Paulo e na tshiitisi tshi pfalaho o ṅwala uri: “Funani vha haṋu.” (1 Pet. 2:17) U vha tshipiḓa tsha vhahashu vha Vhakriste, zwi ita uri ri ḓiphine nga u tikedzwa nga lwa muya nga vhokhotsi, vhomme,  vharathu, vhakomana na dzikhaladzi, vhane vha vha na lutendo lu fanaho na lwashu.—Marko 10:29, 30.

Hu sa londwi zwenezwo, nga zwiṅwe zwifhinga ri nga kha ḓi sa pfana na vhahashu. Sa tsumbo, zwi a leluwa uri ri ḓiwane ri tshi sinyuswa nga vhushayanungo ha muṅwe muthu nahone ra thoma u mu sasaladza. Arali zwenezwo zwa itea, naa zwi ḓo vha zwi si zwavhuḓi uri ri humbule uri Yehova u funa vhashumeli vhawe hu sa londwi vhushayanungo havho? Zwiṅwe hafhu, “arali ri tshi ri: A ri na zwivhi, ri a ḓi-fhura, a hu na mafhungo-ngoho kha riṋe.” (1 Yoh. 1:8) Naa a ro ngo fanela u lwela uri ‘ri nge vho takulanaho na vha khathutshelanaho’?—Vha-Kol. 3:13.

Muṅwe muswa ane a pfi Ann o guda nga nḓila i vhavhaho uri u fanela u dzhiela nṱha u konana na Vhakriste. O ita zwi fanaho na zwe zwa itwa nga murwa wa ḽihwarahwara, a re kha tshifanyiso tsha Yesu nga u litsha u ṱanganela tshivhidzoni tsha Vhukriste. Nga murahu, o vhuisa mbilu nahone a vhuyelela ngohoni. (Luka 15:11-24) Ann o guda mini kha tshenzhelo yeneyo? O ri: “Samusi zwino ndo no vhuyelela ndanguloni ya Yehova, ndi dzhiela nṱha vhahashu vhoṱhe vha tshinnani na vha tshisadzini hu sa londwi uri a vho ngo fhelela. Tshifhingani tsho fhiraho ndo vha ndi tshi ṱavhanyedza u vha sasaladza. Fhedzi ndo ḓiimisela u sa tendela tshithu naho tshi tshini tshi tshi ita uri ndi sa wane phaṱhutshedzo dzine nda ḓiphina ngadzo zwino na vhaṅwe vhatendi. A hu na tshithu na tshithihi tshi re shangoni tshine tsha nga ita uri ndi si dzhiele nṱha paradiso yashu ya muya.”

Dzulani Ni Tshi Livhuha Phaṱhutshedzo Dzine Na Vha Nadzo

Fulufhelo ḽine ra vha naḽo ḽa u ri Muvhuso wa Mudzimu ndi wone tshipiringululi tsha vhuleme hoṱhe ha vhathu, ndi ḽa ndeme vhukuma. Musi ri tshi thoma u ḓivha nga ha ḽeneḽi fulufhelo, ro vha ri tshi ḽi dzhiela nṱha vhukuma. Ro ḓipfa u fana na muvhambadzi wa kha tshifanyiso tsha Yesu we a “rengisa thundu yawe yoṱhe,” u itela uri a kone u “renga iḽa nungu ya mutengo muhulu.” (Mat. 13:45, 46) Yesu ho ngo amba uri onoyo muvhambadzi o swika he a si tsha dzhiela nṱha nungu yeneyo. Nga hu fanaho, a ro ngo fanela u vhuya ra dzhiela fhasi fulufhelo ḽashu ḽavhuḓi.—1 Vha-Thes. 5:8; Vha-Heb. 6:19.

Ṱhogomelani tsumbo ya Jean o no fhedzaho miṅwaha ya 60 a tshi khou shumela Yehova. O ri: “U dzula ndi tshi vhudza vhaṅwe nga ha Muvhuso wa Mudzimu zwo nthusa uri ndi dzule ndi tshi humbula nga hawo. Musi ndi tshi vhona vha tshi takadzwa nga zwine vha zwi guda nga ha Muvhuso, ndi a kwamea vhukuma. U vhona tshanduko ine ya itwa nga mugudiswa wa Bivhili musi o no guda mafhungo-ngoho zwi ita uri ndi ḓivhudze uri, ‘Enea ndi mafhungo-ngoho a ndeme ane nda fanela u a ḓivhadza vhaṅwe!’”

Ri na zwiitisi zwi pfalaho zwa u livhuha phaṱhutshedzo nnzhi dza lwa muya dzine ra vha nadzo. Naho ri tshi nga sedzana na milingo i ngaho u pikiswa, malwadze, vhulala, u tsikeledzea maḓipfele, u felwa na vhuleme ha zwa dzitshelede, ri a zwi ḓivha uri ndi zwa tshifhinganyana. Muvhusoni wa Mudzimu ri ḓo ḓiphina nga phaṱhutshedzo dza lwa muya na dza lwa ṋama. Tshengelo naho i ifhio ine ra i konḓelela zwino, i ḓo fheliswa shangoni ḽiswa.—Ndzumb. 21:4.

Zwa zwino, kha ri dzule ri tshi dzhiela nṱha phaṱhutshedzo dza lwa muya dzine ra vha nadzo nahone ri sumbedze u livhuha u fana na mupsalme we a imba a ri: “Zwe Iwe Yehova Mudzimu washu wa ri itela ndi zwinzhi, ndi zwa maḓembe na vhuṱali. A linganaho na Iwe haho’. Ndi tshi ri ndi a zwi bula ndi zwi ambe, ’thi nga fhidzi.”—Ps. 40:5.

[Ṱhaluso i re magumoni a siaṱari]

[Tshifanyiso kha siaṱari 18]

Ro fhaṱutshedzwa nga u vha na vhane vha ri tikedza nga lwa muya musi ro sedzana na milingo