Ndi Vhuḓidini Vhu Vhuyedzaho Vhukuma!

VHURABELI HA MUṰA na Pfunzo ya Bivhili ndi zwa ndeme arali ni tshi ṱoḓa u alusa vhana “nga u vha laya na u vha kwengweledzela zwa Murena.” (Vha-Ef. 6:4) Naho zwo ralo, arali ni mubebi, ni a zwi ḓivha uri vhana vha a ṱavhanya u fhelelwa nga dzangalelo. Ni nga ita mini u itela uri vha dzule vha tshi thetshelesa? Ṱhogomelani zwe vhaṅwe vhabebi vha zwi ita.

George, wa ngei California, U.S.A., o ri: “Musi vhana vhanga vha tshi kha ḓi vha vhaṱuku, nṋe na mufumakadzi wanga ro vha ri tshi lingedza u ita uri pfunzo ya Bivhili ya muṱa i dzule i tshi takadza. Nga zwiṅwe zwifhinga, ro vha ri tshi ambara sa vhabvumbedzwa vha re Bivhilini nahone ra tamba zwipiḓa zwavho musi ri tshi khou vhala Bugu Yanga ya Mafhungo a Bivhili. Ro vha ri tshi ita na zwishumiswa—zwi ngaho mabanga, dzithonga, mimanngi, na zwiṅwe-vho. Ro vha ri tshi ita na u tamba mutambo wa u vhudzisana mbudziso dzi bvaho Bivhilini dzi leluwaho na dzi konḓaho. Nahone ho vha hu tshi vha na zwifhinga zwine ngazwo ra ita zwithu zwi ngaho u fhaṱa gungwa ḽa Noaxe kana mutalo-mbalo wa u tevhekana ha zwiitea zwi re Bivhilini. Nga zwiṅwe zwifhinga ro vha ri tshi ola zwifanyiso zwine zwa sumbedza vhathu kana mafhungo a re Bivhilini. Zwa zwino, ri khou dzudzanya u ola mafumo oṱhe a muya o ṱaluswaho kha Vha-Efesa 6:11-17, nahone muṅwe na muṅwe washu u ḓo ṱalutshedza zwine tshipiḓa tshiṅwe na tshiṅwe tsha imela zwone. Enea maitele o ri thusa vhukuma uri ri takalele pfunzo yashu ya muṱa.”

Muṅwe mme ane a pfi Debi, wa ngei Michigan, U.S.A., o ri: “Nṋe na munna wanga ro vha ri sa koni u ita uri ṅwananyana washu a takalele pfunzo musi e na miṅwaha miraru. Ḽiṅwe ḓuvha musi ri tshi khou vhalela nṱha mafhungo a Isaka na Rebeka a re kha Bugu Yanga ya Mafhungo a Bivhili, ndo mbo ḓi dzhia mipopi mivhili nahone nda i tambisa sa vhabvumbedzwa vhavhili vhane vha khou ambedzana. O mbo ḓi zwi takalela nahone a thetshelesa mafhungo oṱhe. Miṅwedzini mivhili ye ya tevhela, yeneyo mipopi mivhili yo mbo ḓi shumiswa sa vhabvumbedzwa vho fhamba-fhambanaho vha re Bivhilini. Musi ro no vhala mafhungo eneo, ṅwananyana washu o vha a tshi ṱoḓa zwitambiswa zwi re nḓuni kana zwiṅwe zwithu zwine zwa nga shumiswa u itela u edzisa mafhungo eneo. Zwo vha zwi tshi tou nga mutambo wa u ṱoḓa lupfumo lwo dzumbiwaho! Bogisi ḽa zwienda na riboni tswuku zwo vha zwi tshi imela nnḓu ya Rahaba na thambo tswuku. Ṋowa ya u tambisa yo lapfaho mithara nthihi na hafu yo tandedzwaho kha thanda ya luswielo yo vha i tshi shumiswa sa ṋowa ya tsimbi tswuku ye ha ambiwa nga hayo kha Numeri 21:4-9. Ro vha ri tshi vhea zwitambiswa zwenezwi zwoṱhe kha bege khulwane. Ro takala lungafhani musi ri tshi vhona ṅwananyana washu a tshi dzula kamarani yashu ya u awela nahone a tshi khou tambisa zwitambiswa zwawe zwi re kha ‘bege yawe ya mafhungo a Bivhili.’ Zwi takadza lungafhani u vhona ṅwananyana washu a tshi khou edzisela mafhungo enea nga nḓila yawe yo khetheaho!”

U alusa vhana a zwi leluwi, nahone u itela uri vha vhe na lutamo lwa u shumela Yehova, hu ṱoḓea zwi fhiraho u sokou vha na pfunzo ya u guda vhege iṅwe na iṅwe. Fhedzi vhurabeli ha muṱa na pfunzo ya Bivhili zwi nga vha mutheo wa u vha livhisa nga lwa muya. A zwi timatimisi uri ndi vhuḓidini vhu vhuyedzaho!