Naa Ni A Pfesesa Vhuṱanzi Ha Uri Ni Khou Livhiswa Nga Mudzimu?

VHAISIRAELE vhoṱhe u katela na Vhaegipita vho vha vha sa athu vhuya vha vhona zwithu zwo raloho. Musi Vhaisiraele vha tshi pfuluwa ngei Egipita, vho vha vha tshi lindwa nga gole ḽe ḽa vha ḽi hone vhukati havho ḓuvha ḽiṅwe na ḽiṅwe. Vhusiku ḽo vha ḽi tshi vha gole ḽa mulilo. Zwenezwo zwo vha zwi tshi mangadza lungafhani! Fhedzi gole ḽeneḽo ḽo vha ḽi tshi bva ngafhi? Ndivho yaḽo yo vha i ifhio? Nahone zwino nga murahu ha miṅwaha i ṱoḓaho u vha 3 500, ndi mini zwine ra nga zwi guda kha nḓila ye Vhaisiraele vha vha vha tshi dzhia ngayo ‘mulilo na gole ḽo imaho’?—Ek. 14:24.

Ipfi ḽa Mudzimu ḽi dzumbulula muṋe wa gole ḽeneḽo na ndivho yaḽo musi ḽi tshi ri: “Yehova ene o vha ranga phanḓa nga gole ḽo imaho hú masiari; a vha sumbedza nḓila ngaḽo’; hú vhusiku a vha ranga phanḓa nga mulilo wo imaho, wa u vha vhonetshela, uri vha kone u tshimbila masiari na vhusiku.” (Ek. 13:21, 22) Yehova Mudzimu o shumisa mulilo na gole ḽo imaho u itela u livhisa vhathu vhawe musi vha tshi pfuluwa ngei Egipita na musi vhe sogani. Vho vha vha tshi fanela u dzula vho ḓilugisela u itela u ḽi tevhela. Musi mmbi ya Vhaegipita i tshi khou pandamedza vhathu vha Mudzimu u itela u vha vutshela, ḽeneḽo gole ḽo mbo ḓi ima vhukati ha zwenezwo zwigwada zwivhili, nahone ḽa tsireledza Vhaisiraele. (Ek. 14:19, 20) Naho gole ḽo vha ḽi sa sumbedzi nḓila yo tou livhaho, u tevhela vhulivhisi haḽo ho vha hu yone nḓila i yoṱhe ye ya vha i tshi ḓo ita uri Vhaisiraele vha swike Shangoni ḽo Fulufhedziswaho.

U vha hone ha ḽeneḽo gole zwo vha zwi tshi khwaṱhisedza vhathu vha Mudzimu uri Yehova o vha e navho. Ḽo vha ḽi tshi imela Yehova nahone nga zwiṅwe zwifhinga o vha a tshi amba e khaḽo. (Num. 14:14; Ps. 99:7) Zwiṅwe hafhu, gole ḽeneḽo ḽo ṱalula Mushe sa ene we a nangwa nga Yehova uri a range phanḓa lushaka. (Ek. 33:9) Nga hu fanaho, mafhungo o ṅwalwaho a amba uri musi gole ḽi tshi vha hone lwa u fhedza, zwenezwo zwo khwaṱhisedza uri Yoshua o nangwa nga Yehova uri a vhe murangaphanḓa nga murahu ha Mushe. (Doit. 31:14, 15) Vhukuma, uri Vhaisiraele vha kone u pfuluwa nga hu bvelelaho, vho vha vho fanela u pfesesa vhuṱanzi ha uri vha khou livhiswa nga Mudzimu na u tevhela vhulivhisi honoho.

A Vho Ngo Tsha Dzhia Vhuṱanzi Honoho Vhu Ha Ndeme

Musi Vhaisiraele vha tshi vhona ḽeneḽo gole lwa u thoma, khamusi vho akhamala vhukuma. Naho zwo ralo, zwi ṱungufhadzaho ndi uri ḽeneḽo gole ḽi akhamadzaho ḽe vha vha vha tshi ḽi vhona tshifhinga tshoṱhe a ḽo ngo ita uri Vhaisiraele vha dzule vha tshi fulufhela Yehova. Vho shandukela vhulivhisi ha Mudzimu zwifhinga zwo vhalaho. Musi mmbi ya Vhaegipita i tshi vha pandamedza, a vho ngo sumbedza uri vha fulufhela maanḓa a Yehova a u tshidza. Nṱhani hazwo, vho pomoka Mushe mushumeli wa Mudzimu uri o vha bvisa Egipita u itela uri vha vhulahwe. (Ek. 14:10-12) Musi vho no tshidzwa ngei Lwanzheni Lutswuku, vho thoma u gungulela Mushe, Aroni na Yehova nga ṅwambo wa u humbula uri a vha na zwiḽiwa na maḓi. (Ek. 15:22-24; 16:1-3; 17:1-3, 7) Nga murahu ha zwenezwo, hu sa athu fhela na vhege nngana vho tsikeledza Aroni uri a vha itele ṋamana ya musuku. Edzani u humbula zwenezwo! Kha tshiṅwe tshipiḓa tsha gammba ye vha vha vhe khayo, Vhaisiraele vho vhona mulilo na gole ḽo imaho—zwe zwa vha zwi vhuṱanzi vhuhulwane vhukuma ha uri Mudzimu o vha bvisa Egipita, nahone vha sa athu swika na kule vho mbo ḓi thoma u gwadamela mudzimu wa tshifanyiso tshi sa tshili, vha tshi ri: “Hee Isiraele, mudzimu wau ngoyu we wa U bvisa Egipita.” Yeneyo ndi “mihoyo mihulu” lungafhani ine ya sumbedza u sa ṱhonifha!—Ek. 32:4; Neh. 9:18.

Vhushandukwa ha Vhaisiraele ho sumbedza uri vho vha vha sa ṱhonifhi vhulivhisi ha Yehova. Vhuleme honoho ho itiswa nga ṅwambo wa u sa pfesesa havho uri Yehova o vha a tshi khou vha  livhisa na uri vho vha vha tshi fanela u tevhela vhulivhisi hawe. Vho vhona gole, fhedzi vho vha vho no hangwa uri ḽi imela uri Yehova ndi ene ane a khou vha livhisa. Naho zwe Vhaisiraele vha zwi ita zwo “ṱungufhadza [Yehova] Mukhethwa wa Isiraele,” o vha sumbedza tshilidzi nga u dzula a tshi khou vha livhisa nga gole u swika musi vha tshi dzhena Shangoni ḽo Fulufhedziswaho.—Ps. 78:40-42, 52-54; Neh. 9:19.

Vhonani Vhuṱanzi Ha U Livhiswa Nga Mudzimu Ṋamusi

Nga hu fanaho misini yashu, Yehova ha athu vhuya a litsha vhathu vhawe vha si na tshine tsha vha livhisa. U fana na musi a songo lavhelela uri Vhaisiraele vha tou ḓiṱoḓela nḓila ya u dzhena shangoni ḽo fulufhedziswaho, na riṋe ṋamusi a ro ngo lavhelelwa uri ri ḓiṱoḓele nḓila ine ya ḓo ri livhisa shangoni ḽiswa ḽo fulufhedziswaho. Yesu Kristo ndi ene Murangaphanḓa wa tshivhidzo o vhewaho. (Mat. 23:10; Vha-Ef. 5:23) O ṋea maṅwe maanḓa tshigwada tsha mukoma a fulufhedzeaho tshine tsha vhumbwa nga Vhakriste vha fulufhedzeaho vho ḓodzwaho nga muya. Tshenetsho tshigwada tsha mukoma na tshone tshi vhea vhalavhelesi tshivhidzoni tsha Vhukriste.—Mat. 24:45-47; Tito 1:5-9.

Ri nga tshi ṱalula hani tshenetshi tshigwada tsha mukoma a fulufhedzeaho? Ṱhogomelani nḓila ye Yesu a ṱalutshedza ngayo musi a tshi amba nga hatsho: “Mukoma a fulufhedzeaho wa vhuṱali ndi tshithu tshihulu. Muṋe wawe u mu vhea uri a vhuse vhalanda vhawe a vha ṋee mikovhe yavho nga tshifhinga tshazwo. Mashudu, mukoma uyo, arali muṋe wawe a tshi ḓa a mu wana a tshi ralo.”—Luka 12:42, 43.

Naho zwo ralo, tshigwada tsha mukoma ndi tshi “fulufhedzeaho,” nahone tshi nga si vhuye tsha fheṱa kana u landula Yehova, Yesu, mafhungo-ngoho a Bivhili, kana vhathu vha Mudzimu. Samusi tshi na “vhuṱali,” tshigwada tshenetshi tsha mukoma tshi dzhia phetho dzo teaho musi tshi tshi livhisa mushumo wa ndeme vhukuma wa u huwelela “mafhungo-maḓifha aya a muvhuso” na wa u “it[a] vhathu vhoṱhe vhafunziwa.” (Mat. 24:14; 28:19, 20) Tshigwada tsha mukoma tshi ṋea zwiḽiwa zwa muya zwi ḓifhaho na zwi fushaho “nga tshikhathi tshazwo.” Zwauri Yehova u takalela vhathu vhawe zwi vhonala nga nḓila ine a vha fhaṱutshedza ngayo nga nyengedzeo ya vhagwadameli vha ngoho, nga u vha livhisa musi vha tshi ita phetho dza ndeme vhukuma, nga u ita uri vha pfesese mafhungo-ngoho a Bivhili, nga u vha tsireledza kha maswina ane a ṱoḓa u vha fhelisa, na nga u vha ṋea mulalo wa ngelelo.—Yes. 54:17; Vha-Fil. 4:7.

Tendani U Livhiswa Nga Mudzimu

Ri nga sumbedza hani uri ri a takalela u livhiswa nga Mudzimu? Muapostola Paulo o ri: “Ipfani vha-ranga-phanḓa vhaṋu ni vha tevhele.” (Vha-Heb. 13:17) U ita zwenezwo a zwi leluwi tshifhinga tshoṱhe. Sa tsumbo: Humbulani arali no vha ni Muisiraele misini ya Mushe. Edzani u humbula arali no vha no no fhedza tshifhinga tshilapfu ni tshi khou tshimbila, nahone gole ḽa sokou ima. Ḽi ḓo fhedza tshifhinga tshingafhani ḽo ima henefho? Naa ḽi ḓo fhedza ḓuvha? Vhege? Kana miṅwedzi yo vhalaho? Ni thoma u ḓivhudzisa uri, ‘Naa zwi ḓo vha vhuṱali u pakulula thundu yanga yoṱhe?’ Khamusi na thoma nga u pakulula zwithu zwine na anzela u zwi shumisa. Fhedzi nga murahu ha maḓuvha a si gathi ni tshi khou sedza tshiṅwe tshithu ni sa tshi wani, nga u dinalea na pakulula zwithu zwoṱhe. Fhedzi ni tshi tou fhedza u pakulula, ni vhona gole ḽi tshi khou takuwa—nahone ni fanela u dovha na paka! Zwenezwo zwo vha zwi sa ḓo ni takadza na luthihi. Naho zwo ralo, Vhaisiraele vho vha vha tshi fanela u “takuwa” nga u ṱavhanya.—Num. 9:17-22.

Nga zwenezwo, ri aravha hani musi ri tshi wana vhulivhisi vhu bvaho ha Mudzimu? Naa ri lingedza u vhu shumisa nga u ṱavhanya? Kana ri bvela phanḓa ri tshi ita zwithu nga nḓila ye ra zwi ḓowela ngayo? Naa ro ḓowelana na nyeletshedzo dza zwenezwino, dzi fanaho na dzine dza amba nga ha u fara pfunzo ya Bivhili, u huwelela kha vhane vha amba luambo lusili, u vha na vhurabeli ha muṱa tshifhinga tshoṱhe, u shumisana na Komiti ya Vhulamukanyi ha Vhuongelo, na u ḓifara nga nḓila yo teaho musi ri maguvhanganoni? Ri dovha ra sumbedza u takalela vhulivhisi ha Mudzimu nga u ṱanganedza ndayo. Musi ri tshi fanela u ita phetho dza ndeme vhukuma, a ro ngo fanela u fulufhela vhuṱali hashu, fhedzi ri fanela u shumisa vhulivhisi ha Yehova na ndangulo yawe. U fana na musi ṅwana a tshi ṱoḓa tsireledzo i bvaho kha vhabebi  musi hu na maḓumbu, na riṋe ri ṱoḓa tsireledzo kha ndangulo ya Yehova musi ro sedzana na vhuleme vhu fanaho na maḓumbu.

Vhukuma, vhane vha ranga phanḓa tshipiḓa tsha ndangulo ya Mudzimu tsha kha ḽifhasi a vho ngo fhelela—na Mushe o vha a songo fhelela. Naho zwo ralo, gole ḽo vha ḽi tshi ṋea vhuṱanzi ha uri o nangwa nga Mudzimu nahone ndi ene a mu takalelaho. Dovhani ni ṱhogomele uri a si Muisiraele muṅwe na muṅwe we a vha a tshi fanela u ita phetho ya uri vha thome u tshimbila. Nṱhani hazwo, vhathu vho vha “vha tshi pfa zwe Yehova a amba, nga Mushe.” (Num. 9:23) Nga zwenezwo, Mushe we Mudzimu a shumisa ene u livhisa vhathu, ndi ene we a vha a tshi vha vhudza uri vha thome u tshimbila.

Ṋamusi, tshenetshi tshigwada tsha mukoma tsha Yehova ndi tshone tshine tsha livhisa vhathu tshifhinga tshiṅwe na tshiṅwe musi vha tshi fanela u tshimbila. Onoyu mukoma u zwi itisa hani? U shumisa thero dza Tshiingamo na Vhuḓinḓa Hashu Ha Muvhuso, khandiso ntswa, na nyambo dza maguvhangano na mabuthano. Ri dovha ra ṋewa vhulivhisi zwivhidzoni hu tshi shumiswa vhalavhelesi vha dalelaho zwivhidzo kana marifhi kana zwikolo zwo lugiselelwaho vhahashu vha tshinnani vha re na vhuḓifhinduleli tshivhidzoni.

Naa ni a pfesesa zwavhuḓi vhuṱanzi ha uri ni khou livhiswa nga Mudzimu? Kha ano maḓuvha a vhufhelo, Yehova u shumisa ndangulo yawe u itela u livhisa riṋe vhathu vhawe kha ḽino shango ḽivhi ḽa Sathane ḽi fanaho na “soga” ḽi re na khombo. Nga ṅwambo wa zwenezwo, ri ḓiphina nga u vha na vhuthihi, lufuno na u tsireledzea.

Musi Vhaisiraele vha tshi dzhena Shangoni ḽo Fulufhedziswaho, Yoshua o ri: “Vhonani, nṋe zwino ndi khou ṱuwa nga nḓila ya zwoṱhe zwa shango ḽino; inwi-ha ni elekanye nga mbilu yoṱhe na nga muya woṱhe zwe Yehova Mudzimu waṋu a ita a tshi vuledza oṱhe Mafhungo avhuḓi e a ni amba ngao’; ha ngo sia na ḽithihi; oṱhe o vulea; a huna ḽe ḽa ṱáhela.” (Yosh. 23:14) Nga hu fanaho, vhathu vha Mudzimu vha musalauno na vhone vha ḓo dzhena shangoni ḽiswa ḽo fulufhedziswaho. Naho zwo ralo, zwauri ri ḓo dzhena kana ri nga si dzhene zwi ḓo ḓitika nga u ḓiṱukufhadzela vhulivhisi ha Mudzimu nga u ḓifunela na nga u vhu tevhela. Nga zwenezwo, u nga ri ri nga bvela phanḓa ri tshi pfesesa vhuṱanzi ha uri ri khou livhiswa nga Yehova.

[Zwifanyiso kha siaṱari 5]

Ri khou livhiswa nga ndangulo ya Mudzimu ṋamusi

Khandiso ntswa mabuthanoni

Tshikolo tsha vhuḓinḓa

U gudiselwa vhuḓinḓa miṱanganoni yashu ya tshivhidzo