Ni Nga Dzula Hani Ni Tshi Fulufhedzea Shangoni Ḽi Sa Fulufhedzei

U SA fulufhedzea zwi fhethu hoṱhe u fana na muya une ra u fema. Vhathu vha a zwifha, vha a fhura, vha a tswa, a vha badeli zwikolodo nahone vha a ḓikukumusa nga maitele avho a zwa vhufhura kha zwa mabindu. Samusi ri tshi khou tshila nga fhasi ha vhuimo ho raloho, ri anzela u ḓiwana ri kha vhuimo vhune ha linga u fulufhedzea hashu. Ri nga lwisana hani na dzema ḽa u sa fulufhedzea? Kha ri haseledze mbuno tharu dzine dza ḓo ri thusa u ita nga u ralo. Ndi u ofha Yehova, u vha na luvalo lwo ṱambaho, na u fushea.

U Ofha Yehova Nga Nḓila Yo Teaho

Muporofita Yesaya o ṅwala uri: “Ngauri Muvhusi washu ndi Yehova, Mulai washu ndi Yehova, Khosi yashu ndí Yehova.” (Yes. 33:22) U ḓivha uri Yehova ndi muvhusahoṱhe zwi ita uri ri mu ofhe nahone zwenezwo zwi ita uri ri ḓiimisele u lwisana na muya wa u sa fulufhedzea. Mirero 16:6 i ri: “Muthu u kule na zwivhi nga u’ a ofha Yehova.” U ofha Mudzimu nga nḓila yo raloho, a si u mu ofha lwa u mu shavha uri a nga ri pfisa vhuṱungu, fhedzi ndi u vhilaedziswa nga u sa ṱoḓa u mu vhaisa sa Khotsi ashu wa ṱaḓulu a re na dzangalelo ḽihulwane kha zwine ra zwi ita.—1 Pet. 3:12.

Zwe zwa vhuya zwa tshenzhelwa nga vhaṅwe zwi sumbedza mvelelo dzavhuḓi dza u mu ofha nga nḓila yo teaho. Ricardo na mufumakadzi wawe Fernanda, vho bvisa R4 900 kha akhaunthu yavho ya banngani. * Fernanda o mbo ḓi dzhenisa yeneyo tshelede pheseni yawe a songo i vhala. Musi vho no swika hayani nahone vho no badela zwikolodo zwavho, vho mangala vhukuma musi vha tshi vhona uri phese ya Fernanda i kha ḓi vha na tshelede i eḓanaho na ye vha i bvisa banngani. Vho mbo ḓi zwi vhona uri mushumi wa banngani u fanela u vha o vha ṋea tshelede yo engedzeaho i fhiraho ye vha i bvisa. Vho thoma vha lingea uri vha songo i vhuyedzedza samusi vho vha vha tshi kha ḓi vha na zwiṅwe zwikolodo zwinzhi. Musi Ricardo a tshi ṱalutshedza o ri: “Ro rabela Yehova uri a ri ṋee maanḓa a u humisela murahu tshelede yeneyo. Nga ṅwambo wa uri ro vha ri tshi tama u mu takadza u tendelana na khumbelo yawe i re kha Mirero 27:11, ro mbo ḓi humisa tshelede yeneyo.”

Luvalo Lwo Gudiswaho Nga Bivhili

Ri nga gudisa luvalo lwashu nga u guda Bivhili na u lwela u ita zwine ra zwi guda. Nga zwenezwo, samusi ‘Ipfi ḽa Mudzimu ḽi tshithu tshi tshilaho na tshi shumaho,’ ḽi ḓo kwama mihumbulo yashu u katela na mbilu dzashu. Zwenezwi zwi ḓo ri sudzulusela u fulufhedzea kana u “shuma zwavhuḓi kha zwithu zwoṱhe.”—Vha-Heb. 4:12; 13:18.

Ṱhogomelani mafhungo a João. O vha a tshi koloda R35 000. O mbo ḓi pfulutshela kha iṅwe ḓorobo a songo badela tshikolodo tshenetsho. Nga murahu ha miṅwaha ya malo, João o thoma u guda mafhungo-ngoho nahone luvalo lwawe lwo gudiswaho nga Bivhili lwo ita uri a kwamane na onoyo mukolodisi u itela uri a kone u badela tshikolodo tshawe. Nga ṅwambo wa uri João o vha a tshi fanela u ṱunḓela mufumakadzi wawe na vhana vhawe vhaṋa nahone a tshi hola tshelede ṱhukhu, onoyo mukolodisi o tenda uri a badele yeneyo tshelede nga zwiṱuku nga zwiṱuku ṅwedzi muṅwe na muṅwe.

U Ḓipfa Wo Fushea

Muapostola Paulo o ṅwala uri: “Hone ḽí bindu ḽihulu u ofha Mudzimu arali hú na u ḓi-takalela. . . . Arali rí na zwa u ḽa na zwa u fuka nga ri zwi takalele.” (1 Tim. 6:6-8) U dzhiela nṱha yeneyi nyeletshedzo ya vhuṱali ya u fushea nga zwine ra vha nazwo zwi ḓo ri thusa uri ri si fashwe nga zwikwekwe zwa u tevhedza maitele a u sa fulufhedzea kha zwa mabindu, kana u ḓiwana ro no dzhena kha  maitele a zwa mabindu a soliseaho a u ṱoḓa u pfuma nga u ṱavhanya. (Mir. 28:20) U tevhela nyeletshedzo ya Paulo zwi ḓo ri thusa u vhea Muvhuso wa Mudzimu u thoma, ri na vhungoho ha uri u ḓo ṱhogomela zwishaiwa zwashu.—Mat. 6:25-34.

Naho zwo ralo, ri fanela u ṱhogomela uri “vhufhura ha lupfumo,” vhu si vhuye ha ita uri ri wele khomboni ya u vha na vhupangwa na tseḓa. (Mat. 13:22) Humbulani zwe zwa itea kha mafhungo a Akani. O zwi vhona musi Vhaisiraele vha tshi pfuka Mulambo wa Yorodane nga lwa vhuṱolo. Naho zwo ralo, o vha na tseḓa nahone a tendela lutamo lwawe lu tshi mu ṱuṱuwedza uri a tswe tsimbi tseṱha na musuku na nguvho i ḓuraho kha thundu yo thubwaho muḓini wa Yeriko. Nyito yeneyo yo ita uri a fe. (Yosh. 7:1, 20-26) Ndi ngazwo maḓanani a miṅwaha nga murahu Yesu o sevha a ri: “Fhaṱuwani, ni thanyele vhuvhuḓu hoṱhe, ngauri muthu ha tshili nga zwiné a vha nazwo’ zwa vha zwinzhi.”—Luka 12:15.

Fulufhedzeani Mushumoni

Zwino kha ri haseledze vhuṅwe vhuimo vhune ha nga ri linga uri ri sa dzule ri tshi fhulufhedzea kha zwithu zwoṱhe. U fulufhedzea mishumoni yashu zwi katela na u sa ‘ngalangadza thundu’ naho zwi tshi nga vha zwo ḓowelea uri vhathu vhanzhi vha ita nga u ralo. (Tito 2:9, 10) Jurandir ane a shuma sa muimeleli wa muvhuso o vha a tshi fulufhedzea musi a tshi vhiga tshelede ye a i shumisa kha nyendo dza mushumoni wawe. Naho zwo ralo, vhashumisani nae, vho vha vha tshi ṅwalisa uri vho shumisa tshelede nnzhi u fhira ye vha shumisa yone. Vho vha vha tshi ita zwenezwo ngauri muhulwane wa muhasho wavho o vha a tshi ṱuṱuwedza vhashumi uri vha si fulufhedzee. Zwi re zwone ndi uri onoyo muhulwane o kaidza Jurandir nga ha u fulufhedzea hawe nahone a si tsha mu rumela kha nyendo dza mushumo. Nga murahu ha tshifhinga ho mbo ḓi ṱolisiswa nḓila ye tshelede ya vha i tshi khou shumiswa ngayo, nahone Jurandir o khoḓiwa nga ṅwambo wa u fulufhedzea hawe. Nahone zwenezwo zwo ita uri a fhedzisele o ṋewa vhuimo ha nṱha.

André ane a shuma u rengisa, o vhudzwa nga mutholi wawe uri a rengise nga mutengo u re kavhili. Onoyo wahashu wa tshinnani o rabela uri a vhe na tshivhindi tsha u tevhela maitele a Bivhili. (Ps. 145:18-20) O dovha a lingedza u ṱalutshedza mutholi wawe uri ndi ngani o vha a sa ḓo kona u rengisa nga mutengo u re kavhili—fhedzi a zwo ngo mu thusa nga tshithu. Ngauralo, André o mbo ḓi ita phetho ya u litsha mushumo wonoyo we wa vha u tshi mu holela zwavhuḓi. Naho zwo ralo, nga murahu ha ṅwaha mutholi wawe o mbo ḓi mu vhidza uri a dovhe a ḓe a shume, a mu khwaṱhisedza uri vharengi vho vha vha si tsha badeliswa mutengo u re kavhili. André o mbo ḓi ṋewa vhuimo ha u vha mulanguli.

Badelani Zwikolodo

Muapostola Paulo o eletshedza Vhakriste a ri: “Ni songo vha na mulandu we na ḽa wa muthu.”  (Vha-Roma 13:8) Khamusi ri nga kha ḓi vhuyafhedza u sa badela tshikolodo ri tshi khou humbula uri muthu we ra koloda khae u na tshelede nnzhi nahone ha i ṱoḓi. Naho zwo ralo, Bivhili i ri sevha uri: “Muvhi ndi uyo ané a ri u pamba a si tsha vhuisa.”—Ps. 37:21.

Fhedzi hu pfi mini arali zwiimo zwine na “sokou ṱangana nazwo” zwa ita uri ni si kone u badela tshikolodo tshaṋu? (Muh. 9:11) Francisco o koloda tshelede i linganaho R49 000 kha Alfredo u itela u badela nnḓu. Fhedzi nga ṅwambo wa vhuṅwe vhuleme he ha vha hone kha bindu ḽawe, Francisco ha ngo tsha kona u badela tshikolodo tshawe nga ḓuvha ḽe a vha o fulufhedzisa u badela ngaḽo. O amba na Alfredo nga ha enea mafhungo nahone Alfredo o tenda uri tshelede yeneyo i badelwe nga zwiṱuku nga zwiṱuku.

Iledzani Vhufhura

Humbulani nga ha tsumbo mmbi ya Anania na Safira, vhavhingani vha tshivhidzo tsha Vhukriste tsha ḓanani ḽa u thoma ḽa miṅwaha. Musi vho no rengisa tsimu yavho vho dzumba iṅwe tshelede nahone vha isa iṅwe kha vhaapostola vha amba uri ndi tshelede yoṱhe ye vha i wana. Vho vha vha tshi ṱoḓa u takadza vhathu nga mafunda avho a vhufhura. Naho zwo ralo, Muapostola Petro a tshi thuswa nga muya mukhethwa wa Mudzimu o dzumbulula vhukwila havho nahone Yehova a vha vhulaha.—Mish. 5:1-11.

U fhambana na zwe zwa itwa nga Anania na Safira, vhaṅwali vha Bivhili vho vha vha tshi fulufhedzea. Mushe, o fulufhedzea musi a tshi ṅwala uri u ṱavhanya u fhela mbilu hawe zwo ita uri a si dzhene Shangoni ḽo Fulufhedziswaho. (Num. 20:7-13) Nga hu fanaho, Yona na ene ho ngo dzumba vhushayanungo hawe musi a sa athu ya u huwelela Ninive na nga murahu ha musi o no ya. Nṱhani hazwo, o ṅwala nga hazwo.—Yona 1:1-3; 4:1-3.

Vhukuma, hu ṱoḓea tshivhindi uri muthu a ambe ngoho naho khamusi zwi tshi nga ita uri a xelelwe nga zwiṅwe zwithu, samusi zwo sumbedzwa nga zwe zwa itea tshikoloni kha Nathalia a re na miṅwaha ya 14. Musi o no ṱolisisa zwe a zwi ṅwala mulingoni, o ṱhogomela uri iṅwe ya phindulo dzawe ye mudededzi a mu ṋea maraga dzayo yo vha i si yone. Naho o vha a tshi ḓivha uri u ḓivhadza mudededzi wawe zwo vha zwi tshi ḓo ita uri a wane maraga ṱhukhu, Nathalia ha ngo litsha u vhudza mudededzi wawe. O ri: “Vhabebi vhanga vha dzulela u mpfunza uri ndi fanela u fulufhedzea u itela u takadza Yehova. Ndo vha ndi tshi ḓo vha na luvalo lu songo ṱambaho arali ndo vha ndi songo vhudza mudededzi wanga.” Mudededzi wawe o takalela vhukuma u fulufhedzea ha Nathalia.

U Fulufhedzea—Pfaneleo Ine Ya Hulisa Mudzimu

Giselle musidzanyana a re na miṅwaha ya 17 o doba tshipatshi tshi re na tshelede i eḓanaho R245 na maṅwe maṅwalwa. O ita ndugiselelo na vhalanguli vha tshikolo dza uri hu humiselwe tshenetsho tshipatshi kha muṋe watsho. Nga murahu ha ṅwedzi, muthusi wa mulanguli wa tshikolo o vhala vhurifhi phanḓa ha kilasi ha u khoḓa u fulufhedzea ha Giselle na u khoḓa vha muṱa wa hawe vhe vha mu gudisa zwavhuḓi na u mu gudisa zwa vhurereli. “Zwivhuya” zwawe zwo ita uri Yehova a huliswe.—Mat. 5:14-16.

Zwi ṱoḓa vhuḓidini u itela uri muthu a fulufhedzee samusi ri tshi khou tshila vhukati ha vhathu ‘vha funaho hu tshi naka zwavho fhedzi, vhatami vha mali, vhazuwi, vhadzia u ḓi-ṱongisa, vha sá ili tshithu.’ (2 Tim. 3:2) Naho zwo ralo, u ofha Yehova nga nḓila yo teaho, u vha na luvalo lwo gudiswaho nga Bivhili, na u fushea zwi nga ita uri ri dzule ri tshi fulufhedzea shangoni ḽi sa fulufhedzei. Na riṋe ri fanela u ṱahulela vhukonani ha tsini-tsini na Yehova, a ‘sa ṱaluli.’—Ps. 11:7.

[Ṱhaluso i re magumoni a siaṱari]

[Zwifanyiso kha siaṱari 7]

U ofha Yehova nga nḓila yo teaho zwi ḓo ita uri ri fulufhedzee

[Tshifanyiso kha siaṱari 8]

U fulufhedzea hashu hu ita uri Yehova a huliswe