U Ḓiimisela Tshoṱhe Musi Ri Tshi Shumela Yehova
U Ḓiimisela Tshoṱhe Musi Ri Tshi Shumela Yehova
‘Naho zwi zwifhio zwi re zwa vhugala, elekanyani zwenezwo.’—VHA-FIL. 4:8.
1, 2. Ndi mini zwi itaho uri vhathu vhanzhi shangoni vha vhe na mavhonele a songo teaho nga ha vhutshilo, nahone zwenezwi zwi ita uri hu vhudziswe mbudziso dzifhio?
RI KHOU tshila zwifhingani zwi konḓaho vhukuma u fhira zwoṱhe kha ḓivhazwakale ya vhathu. Vhathu vha si na vhushaka ha tsini na Yehova vha a konḓelwa vhukuma u sedzana na zwenezwi “zwifhinga zwi lemelaho.” (2 Tim. 3:1-5) A hu na muthu ane a nga vha thusa u sedzana na vhuleme havho nga hu bvelelaho. Nga ṅwambo wa uri vha ṱoḓa u takalela vhutshilo, vha nga kha ḓi lingedza u wana nḓila ntswa dza u ḓitakadza u itela uri vha hangwe mbilaelo dzavho vhutshiloni.
2 U itela uri vha kone u sedzana na mitsiko, vhathu vha anzela u ita uri u ḓitakadza zwi ḓe u thoma vhutshiloni havho. Arali Vhakriste vha sa ṱhogomeli, vha nga kha ḓi ḓiwana vha tshi vho thoma u tshilela u ḓitakadza. Ri nga iledza hani zwenezwo? Naa zwenezwo zwi amba uri a ro ngo fanela u vhuya ra ḓitakadza na luthihi? Ri nga linganyisela hani vhukati ha u ḓitakadza na u hwala vhuḓifhinduleli? Ndi afhio maitele a Maṅwalo ane a nga ri livhisa, u itela uri ri vhe na mavhonele o teaho vhutshiloni, na uri ri songo ita zwithu nga nḓila yo kalulaho?
U Ḓiimisela Tshoṱhe Shangoni Ḽi Funesaho U Ḓiphina
3, 4. Maṅwalo a ri thusa hani u dzhia zwithu sa zwi re zwa ndeme?
3 Roṱhe ri a zwi ḓivha uri ḽino shango ḽi dzhia u ‘ḓiphina’ sa zwone zwi re zwa ndeme vhukuma. (2 Tim. 3:4) Nḓila ine ḽa ombedzela ngayo u funesa miḓifho i nga vhea vhushaka hashu na Yehova khomboni. (Mir. 21:17) Nga zwenezwo, hu na tshiitisi tshi pfalaho tsha uri kha marifhi e muapostola Paulo a a ṅwalela Timotheo na Tito a katele na nyeletshedzo ya uri vha dzhie zwithu sa zwa vhugala zwine zwa amba u sa dzhiela zwithu fhasi. U shumisa nyeletshedzo yeneyi zwi ḓo ri thusa uri ri si ṱuṱuwedzwe nga mavhonele a shango a u sa dzhia vhutshilo sa tshithu tsha ndeme.—Vhalani 1 Timotheo 2:1, 2; Tito 2:2-8.
4 Miṅwahani ya maḓana nga phanḓa ha zwenezwo, Salomo o amba uri ndi vhuṱali u ḓiṋea tshifhinga tsha u elekanya nga zwithu zwa ndeme vhutshiloni nṱhani ha u dzulela u humbula nga miḓifho. (Muh. 3:4; 7:2-4) Vhukuma, nga ṅwambo wa uri ri tshila tshifhinga tshipfufhi, ri fanela u shuma nga “maanḓa” u itela uri ri tshidzwe. (Luka 13:24) Uri ri kone u ita nga u ralo, ri fanela u dzula ri tshi humbula nga zwi re zwa “vhugala” kana zwithu zwi re zwa ndeme vhukuma. (Vha-Fil. 4:8, 9) Zwenezwo zwi amba uri ri fanela u dzhia masia oṱhe a vhutshilo hashu ha Vhukriste sa a re a ndeme vhukuma.
5. Ndi ḽifhio ḽiṅwe sia ḽa vhutshilo hashu ḽine ra fanela u ḽi dzhia sa ḽi re ḽa ndeme vhukuma?
5 Sa tsumbo, vha tshi edzisa Yehova na Yesu, Vhakriste vha dzhiela nṱha vhuḓifhinduleli havho ha u vha vhashumi vha biko. (Yoh. 5:17) Nga ṅwambo wa zwenezwo, vha anzela u khoḓiwa nga uri vha shuma nga u fulufhedzea. Ṱhoho dza miṱa ndi dzone dzine zwihuluhulu dza vhilaelela u vha vhashumi vha biko u itela uri dzi kone u ṱhogomela muṱa. Zwi re zwone ndi uri u sa ṱhogomela muṱa wau siani ḽa zwithu zwi vhonalaho zwi a fana na u “landula lutendo” kana u landula Yehova.—1 Tim. 5:8.
U Takadzwa Nga Vhurabeli Hashu Vhune Ra Vhu Dzhiela Nṱha
6. Ri zwi ḓivha hani uri ri fanela u dzhia u gwadamela Yehova zwi zwa ndeme vhukuma?
6 Yehova u dzhia vhurabeli hashu sa vhu re ha ndeme tshifhinga tshoṱhe. Sa tsumbo, nga fhasi ha Mulayo wa Mushe Vhaisiraele vho sedzana na mvelelo dzi si dzavhuḓi vhukuma musi vha tshi litsha u gwadamela Yehova. (Yosh. 23:12, 13) Ḓanani ḽa u thoma ḽa miṅwaha C.E., vhatevheli vha Kristo vho vha vha tshi fanela u ita vhuḓidini vhuhulwane u itela uri vhurabeli ha ngoho vhu si tshikafhadzwe nga pfunzo na mavhonele o khakheaho. (2 Yoh. 7-11; Ndzumb. 2:14-16) Ṋamusi, Vhakriste vha ngoho vha bvela phanḓa vha tshi dzhia vhurabeli havho sa vhu re ha ndeme vhukuma.—1 Tim. 6:20.
7. Paulo o vha a tshi lugiselela hani vhuḓinḓa?
7 Vhuḓinḓa hashu ha tsimu vhu ri ḓisela dakalo. Naho zwo ralo, u itela uri ri dzule ro takala vhuḓinḓani ri fanela u vhu dzhia vhu ha ndeme na u lugiselela zwavhuḓi musi ri sa athu ya vhuḓinḓani. Paulo o amba uri o vha a tshi dzhia vhathu vhane a vha funza sa vha re vha ndeme. O ṅwala u ri: “Vhoṱhe nda vha tevhela kha zwoṱhe, uri hoṱhe hu vhe na vhané nda vha tshidza. Zwoṱhe hone ndi zwi itela mafhungo-maḓifha, uri ndi vhe-vho na mukovhe khao’.” (1 Vha-Kor. 9:22, 23) Paulo o vha a tshi takalela u thusa vhathu uri vha ḓivhe Yehova, nahone o vha a tshi thoma a humbula nga ho dzikaho nga ha nḓila ine a ḓo thusa ngayo muthetshelesi wawe muṅwe na muṅwe u ya nga ṱhoḓea dzawe. Nga zwenezwo, o kona u vha ṱuṱuwedza na u vha thusa uri vha vhe na ndugelo ya u shumela Yehova.
8. (a) Ri fanela u vha na mavhonele afhio nga ha vhathu vhane ra vha funza vhuḓinḓani? (b) U fara pfunzo ya Bivhili zwi nga ita hani uri ri takalele vhuḓinḓa?
8 Paulo o vha a tshi dzhia hani vhuḓinḓa sa vhu re ha ndeme? O vha o ḓiimisela u ‘shumela’ Yehova na vhane vha ḓo thetshelesa mulaedza wa mafhungo-ngoho. (Vha-Roma 12:11; 1 Vha-Kor. 9:19) Musi ri tshi funza vhathu Ipfi ḽa Mudzimu—khamusi kha Pfunzo ya Bivhili ya hayani, muṱanganoni wa Vhukriste, kana Vhurabelini ha Muṱa—naa ri a zwi ṱhogomela uri ri na vhuḓifhinduleli kha vhane ra khou vha funza? Khamusi ri vhona u nga u fara pfunzo ya Bivhili tshifhinga tshoṱhe ndi muhwalo une ra sa u ṱoḓe. Ndi ngoho uri u itela u fara pfunzo tshifhinga tshoṱhe zwi ṱoḓa uri ri ṋekedze tshifhinga tshashu u itela u kona u thusa vhagudiswa, nahone tshifhinga tshenetsho ro vha ri tshi nga tshi fhedza ri tshi khou ita mishumo yashu. Fhedzi u ṋekedza tshifhinga tshashu zwi tshimbidzana zwavhuḓi na maipfi a Yesu ane a ri: “Mashudu a muṋei a fhira a muṋeiwa.” (Mish. 20:35) U gudisa vhaṅwe nḓila ine ya ḓo ita uri vha tshidzwe zwi ḓo ita uri ri takale vhukuma u fhira musi ri tshi khou ita mushumo naho u ufhio.
9, 10. (a) Naa u ḓiimisela tshoṱhe musi ri tshi shumela Yehova zwi amba uri ri nga si kone u vha na tshifhinga tsha u ḓigeḓa na u ḓiphina na vhaṅwe? Ṱalutshedzani. (b) Ndi mini zwine zwa ḓo thusa muhulwane uri a ṱuṱuwedze vhaṅwe uri vha ḓipfe vho vhofholowa u amba nae?
9 U ḓiimisela tshoṱhe musi ri tshi shumela Mudzimu a zwi ambi uri a ro ngo fanela u vha na tshifhinga tsha u ḓigeḓa na u ḓiphina na vhaṅwe vhathu. Yesu o ri vhetshela tsumbo yavhuḓi nga u ḓiṋea tshifhinga tsha u funza, tsha u awela, khathihi na tsha u vhumba vhukonani ha tsini na vhaṅwe. (Luka 5:27-29; Yoh. 12:1, 2) U ḓiimisela tshoṱhe musi ri tshi shumela Yehova a zwi ambi uri mbonalo yashu i fanela u vha ya u sa sumbedza vhukonani kana ya u sa sea na vhaṅwe. Arali Yesu a vhe e muthu a re na vhuhali na a si na vhukonani, o vha a sa ḓo kona u kunga vhathu. Vhana na vhone vho vha vha tshi ḓipfa vho vhofholowa musi vhe nae. (Marko 10:13-16) Ri nga vha hani na mavhonele a u linganyisela u fana na Yesu?
10 Musi a tshi amba nga ha muṅwe muhulwane, muṅwe wahashu wa tshinnani o ri, “O ḓivhetshela zwilinganyo zwa nṱha, fhedzi ha lavheleli uri vhaṅwe vha ite zwithu sa vhathu vho fhelelaho.” Naa hu nga ambiwa zwi fanaho na nga inwi? Zwo tea uri ni lavhelele zwo linganyiselwaho kha vhaṅwe. Sa tsumbo, vhana vha aravha zwavhuḓi musi vhabebi vha tshi vha vhetshela zwipikwa zwi pfalaho nahone vha vha thusa uri vha zwi swikelele. Nga hu fanaho, vhahulwane vha nga kha ḓi ṱuṱuwedza vhathu vho fhamba-fhambanaho tshivhidzoni uri vha ite mvelaphanḓa nga lwa muya nga u themendela khavho nga ho livhaho zwine vha nga zwi ita u itela u swikelela zwenezwo. Zwiṅwe hafhu, musi muhulwane e na mavhonele o linganyiselwaho nga ha ene muṋe, u ḓo kona u ṱuṱuwedza vhaṅwe nahone vha ḓo wana zwi tshi leluwa u amba nae. (Vha-Roma 12:3) Wahashu wa tshisadzini o ri: “A thi zwi funi musi muhulwane a tshi dzhia mafhungo maṅwe na maṅwe sa miswaswo. Naho zwo ralo, arali e muthu ane a dzula a sa sei, zwi a konḓa vhukuma u amba nae.” Muṅwe wahashu wa tshisadzini ene o ri u vhona u nga vhaṅwe vhahulwane zwi “a konḓa vhukuma u amba navho ngauri a vha vhuyi vha sea na vhaṅwe na luthihi.” Vhahulwane vha nga si ṱoḓe uri vhatendi ngavho vha ḓipfe vha songo takala musi vha tshi gwadamela Yehova, “Mudzimu [o takalaho, NW.]”—1 Tim. 1:11.
U Hwala Vhuḓifhinduleli Tshivhidzoni
11. Zwi amba mini u “lila vhulavhelesi” tshivhidzoni?
11 Musi Paulo a tshi ṱuṱuwedza vhanna uri vha swikelele u hwala vhuḓifhinduleli vhuhulwane tshivhidzoni, o vha a sa khou vha ṱuṱuwedza uri vha vhe na vhuhovheleli. Nṱhani hazwo, o ṅwala uri: “Muthu ané a lila vhulavhelesi, o tama mushumo wo nakaho.” (1 Tim. 3:1, 4, maḽeḓeretsendama ndi ashu.) U “lila vhulavhelesi” zwi amba uri vhanna vha Vhakriste vha fanela u ḓiimisela u ṱahulela pfaneleo dza lwa muya dzi ṱoḓeaho u itela u shumela vhaṅwe. Arali wahashu wa tshinnani o no fhedza ṅwaha o lovhedzwa, nahone a tshi swikelela pfaneleo dza Maṅwalo dza u vha mushumeli dzo bulwaho kha 1 Timotheo 3:8-13, a nga themendelwa uri a vhewe sa mushumeli. Ṱhogomelani uri ndimana ya vhumalo i amba nga ho livhaho uri: “Na vhashumeli vha vhaṅwe vha ḓi ralo-vho,” vha ḓiimisele tshoṱhe musi vha tshi shumela Yehova. (Maḽeḓeretsendama ndi ashu.)
12, 13. Ṱalutshedzani dziṅwe nḓila dzine vhahashu vha tshinnani vhaswa vha nga ḓiimisela tshoṱhe ngadzo musi vha tshi shumela Yehova.
12 Naa ni wahashu wa tshinnani o lovhedzwaho a re miṅwahani yawe ya u fhedza ya vhufumi o ḓiimiselaho tshoṱhe u shumela Yehova? Hu na nḓila dzo fhamba-fhambanaho dzine na nga sumbedza ngadzo uri ni ṱoḓa u hwala vhuḓifhinduleli ho engedzeaho. Iṅwe nḓila ndi u ṱanganela vhuḓinḓani nga ho engedzeaho. Naa ni muṅwe wa vhane vha takalela u shuma na vhathu vha miṅwaha yo fhamba-fhambanaho tshumeloni ya tsimu? Naa ni khou lingedza u wana muthu ane na nga guda nae Bivhili? Musi ni tshi tevhedza nyeletshedzo dzine dza ṋekedzwa miṱanganoni ya Vhukriste malugana na u fara pfunzo ya Bivhili, ni ḓo khwinisa vhutsila haṋu ha u gudisa vhaṅwe. Zwiṅwe hafhu, ni ḓo guda u pfela vhuṱungu muthu ane a khou guda nḓila dza Yehova. Musi mugudiswa waṋu a tshi vhona ṱhoḓea ya u ita dziṅwe tshanduko, a ni nga ḓo mu fhelela mbilu nahone ni ḓo shumisa vhuṱali musi ni tshi mu thusa uri a shumise maitele a Bivhili.
13 Vhoiwe vhahashu vha tshinnani vhaswa, ni nga tikedza vhahashu vha vhalala nga u vha thusa nga hune zwa nga konadzea ngaho. Ni nga ita na u sumbedza dzangalelo kha u ita uri Holo ya vhoiwe ya Muvhuso i dzule yo kuna. Musi ni tshi ṱoḓa u thusa nga hune na nga kona ngaho, zwi ḓo ṋea vhuṱanzi ha uri no ḓiimisela tshoṱhe vhuḓinḓani haṋu. Ni nga guda u ṱhogomela ṱhoḓea dza tshivhidzo tsha haṋu nga u fulufhedzea u fana na Timotheo.—Vhalani Vha-Filipi 2:19-22.
14. Vhahashu vha tshinnani vhaswa vha nga “lingululwa” hani u itela u vhona arali vha tshi nga kona u shumela tshivhidzo?
14 Vhahulwane vha fanela u zwi dzhia zwi zwa ndeme u shumisa vhahashu vha tshinnani vhaswa vhane vha khou lwela u “shavha dzinyemulo dza hana” nga ṅwambo wa uri vha ṱoḓa u “tovhola u luga, na lutendo na lufuno na mulalo,” na dziṅwe pfaneleo dzavhuḓi. (2 Tim. 2:22) Nga u vha ṋea mishumo ine vha nga i ita tshivhidzoni, vha ḓo vha vha tshi khou ‘thoma u vha lingulula’ u itela u vhona arali vha tshi nga kona u hwala vhuḓifhinduleli, zwine zwa ḓo ita “uri u bvelela ha[vho] phanḓa hu vhoniwe nga vhoṱhe.”—1 Tim. 3:10; 4:15.
U Sumbedza U Ḓiimisela Tshivhidzoni Na Muṱani
15. U ya nga zwi re kha 1 Timotheo 5:1, 2, nḓila ine ra dzhia ngayo vhaṅwe vhathu i sumbedza hani uri ro ḓiimisela tshoṱhe kha u shumela Yehova?
15 U ḓiimisela tshoṱhe musi ri tshi shumela Yehova zwi katela u ṱhonifha vhahashu vha tshinnani na vha tshisadzini. Kha nyeletshedzo ye a i ṋea Timotheo, Paulo o amba nga ha ṱhoḓea ya u ṱhonifha vhaṅwe. (Vhalani 1 Timotheo 5:1, 2.) Ndi zwa ndeme vhukuma u ṱhonifha vhaṅwe, zwihuluhulu musi ri tshi shumisana na vhathu vha mbeu i sa fani na yashu. Ndi zwa ndeme u edzisa tsumbo ya Yobo ya u ṱhonifha vhafumakadzi, zwihuluhulu nḓila ye a ṱhonifha ngayo mufarisi wawe wa mbingano. O ita vhuḓidini ho engedzeaho u itela uri a sa lavhelese muṅwe mufumakadzi nga nḓila ya u mu emula. (Yobo 31:1) U dzhia vhahashu vha tshinnani na vha tshisadzini vhe vha ndeme zwi ḓo ita uri ri si vhaise maḓipfele avho nga u tamba nga lufuno kana u ita zwithu zwine zwa ḓo ita uri wahashu wa tshisadzini kana wa tshinnani a ḓipfe a songo vhofholowa musi e na riṋe. U ṱhonifha vhaṅwe ndi zwa ndeme zwihuluhulu musi vhathu vhavhili vha tshi khou funana vhe na tshipikwa tsha u vhingana. Mukriste ane a dzhia u shumela Yehova sa zwi re zwa ndeme vhukuma a nga si vhuye a tamba nga maḓipfele a muṅwe muthu wa mbeu i sa fani na yawe.—Mir. 12:22.
16. Sumbedzani phambano ine ya vha hone vhukati ha nḓila ine shango ḽa dzhia ngayo vhanna na vhokhotsi na nḓila ine Bivhili ya vha dzhia ngayo.
16 Ri fanela u dovha ra ṱhogomela uri ri dzhiele nṱha vhuḓifhinduleli he ra vhu ṋewa nga Mudzimu miṱani yashu. Shango ḽa Sathane ḽi nyadza vhuḓifhinduleli vhune ha hwalwa nga munna na khotsi muṱani. Vha zwa vhuḓimvumvusi vha takadzwa nga u nyadza ṱhoho dza miṱa na vhokhotsi nga u ita uri vha sokou dzhiiwa sa zwithu zwine ha tambiwa ngazwo. Naho zwo ralo, Maṅwalo a sumbedza uri munna o hwala vhuḓifhinduleli vhuhulwane, nahone a amba uri munna ndi ene “ṱhóho ya musadzi.”—Vha-Ef. 5:23; 1 Vha-Kor. 11:3.
17. Ṱalutshedzani nḓila ine u ṱanganela kha vhurabeli ha muṱa zwa nga sumbedza ngayo uri ro ḓiimisela tshoṱhe u hwala vhuḓifhinduleli hashu.
17 Munna a nga ṱunḓela muṱa wawe. Fhedzi arali a sa livhisi muṱa wawe siani ḽa zwithu zwa muya, u ḓo vha a sa khou sumbedza vhuṱali. (Doit. 6:6, 7) Ndi ngazwo, 1 Timotheo 3:4 i tshi amba uri arali ni ṱhoho ya muṱa nahone ni tshi khou lwela u swikelela ndugelo tshivhidzoni, ni fanela u vha “muthu a konaho u vhusa vha nnḓu yawe zwavhuḓi, ané vhana vhawe vha dzula nga u thetshelesa na lwa vhugala fhedzi.” (Maḽeḓeretsendama ndi ashu.) Malugana na enea mafhungo, ḓivhudziseni uri, ‘Naa ndi na mbekanyo ya u fara vhurabeli ha muṱa tshifhinga tshoṱhe muṱani wanga?’ Vhaṅwe vhafumakadzi vha Vhakriste vha tou luvhelela vhanna vhavho uri vha range phanḓa kha zwithu zwa muya. Munna muṅwe na muṅwe u fanela u ṱolisisa uri u na mavhonele afhio musi zwi tshi ḓa kha u hwala vhuḓifhinduleli. Vhukuma, mufumakadzi wa Mukriste u fanela u tikedza ndugiselelo ya Vhurabeli ha Muṱa na u shumisana na munna wawe u itela uri vhu bvelele.
18. Vhana vha nga guda hani u livhisa ṱhogomelo kha zwithu zwa ndeme?
18 Vhana na vhone vha a khuthadzwa uri vha livhise ṱhogomelo kha zwithu zwi re zwa ndeme vhukuma vhutshiloni. (Muh. 12:1) Zwi ḓo vha zwavhuḓi uri vhana vhaṱuku vha gudiswe u shuma nga maanḓa uri vha ite mishumo ya hayani u tendelana na miṅwaha yavho na vhukoni havho. (Zwililo 3:27) Musi Khosi Davida a tshee muswa, o guda u vha mulisa wavhuḓi. O dovha a guda u vha muimbi na u vha muṅwali wa dzinyimbo—vhutsila he nga murahu ha ita uri a shumele muvhusi wa Isiraele. (1 Sam. 16:11, 12, 18-21) A zwi timatimisi uri musi a tshee muswa, Davida o vha a tshi kona u tamba, fhedzi o dovha a guda vhutsila ha ndeme he nga murahu ha mu thusa u renda Yehova. Vhutsila hawe sa mulisa ho mu thusa uri a si fhele mbilu musi a tshi ranga phanḓa lushaka lwa Isiraele. Vhoiwe vhaswa, ni khou guda vhutsila vhufhio vhune ha ḓo ni vhuyedza—vhutsila vhune ha ḓo ni thusa uri ni kone u shumela Musiki waṋu na u ni lugiselela u hwala vhuḓifhinduleli tshifhingani tshi ḓaho?
Dzulani Ni Na Mavhonele O Linganyiselwaho
19, 20. Ndi mavhonele afhio a u linganyisela e na ḓiimisela u dzula ni nao malugana na vhurabeli haṋu?
19 Roṱhe ri nga lwela u vha na mavhonele o linganyiselwaho nga ha riṋe vhane—a u sa ḓidzhia ri vha ndeme nga ho kalulaho. A ri ṱoḓi u ḓiita ‘vhavhuya nga ho kalulaho.’ (Muh. 7:16) U ita ni tshi seanyana zwi ita uri zwi leluwe u shumisana na vhaṅwe, hu sa londwi uri ndi hayani, mushumoni kana musi ri tshi khou tshilisana na vhahashu vha tshinnani na vha tshisadzini vha Vhakriste. Miraḓo ya muṱa i ḓo lwela u sa sasaladza vhaṅwe tshifhinga tshoṱhe zwine zwa nga ita uri hayani hu vhe fhethu hu sa takadzi na hu si na mulalo. Musi ri tshivhidzoni, roṱhe ri nga guda u vhumba vhukonani na vhaṅwe na u ḓiphina roṱhe nga u ita uri zwine ra zwi amba zwi vhe zwi fhaṱaho na zwi vhuyedzaho tshifhinga tshoṱhe.—2 Vha-Kor. 13:10; Vha-Ef. 4:29.
20 Ri tshila shangoni ḽine ḽa sa dzhie Yehova e wa ndeme u katela na milayo yawe. Vhathu vha Yehova vha ita zwo fhambanaho na zwenezwo nga u lwela u thetshelesa Mudzimu wavho na u dzula vha tshi fulufhedzea khae. Zwi takadza lungafhani u vha tshipiḓa tsha vhahashu vhanzhi-vhanzhi vho ḓiimiselaho tshoṱhe musi vha tshi gwadamela Yehova! U nga ri ri nga ḓiimisela u dzula ri na mavhonele o teaho a u ḓiimisela tshoṱhe vhurabelini hashu.
Ni Ḓo Aravha Hani?
• Ndi ngani ri songo fanela u vha na mavhonele a ḽino shango a u sa dzhia zwithu sa zwi re zwa ndeme?
• Ri nga takala hani na u dzula ro ḓiimisela vhuḓinḓani hashu?
• Mavhonele ashu a u ṱoḓa u hwala vhuḓifhinduleli a sumbedza hani u ḓiimisela kana u sa ḓiimisela hashu?
• Ṱalutshedzani uri ndi ngani u ṱhonifha vhahashu na miraḓo yashu ya muṱa zwi zwa ndeme.
[Mbudziso dza Pfunzo]
[Zwifanyiso kha siaṱari 12]
Munna u fanela u ṱunḓela muṱa wawe siani ḽa zwithu zwi vhonalaho na nga lwa muya