“Mulavhelesi Wavhuḓi Vhukuma Na Khonani I Funwaho”

JOHN (JACK) BARR, we a vha e muraḓo wa Tshigwada tshi Langaho tsha Ṱhanzi dza Yehova, o fhedza buḓo ḽawe ḽa vhutshilo ha kha ḽifhasi nga Mugivhela nga matsheloni a ḽa 4 December, 2010. O vha e na miṅwaha ya 97. O ṱaluswa sa muthu we a vha e “mulavhelesi wavhuḓi vhukuma na khonani i funwaho.”

Wahashu Jack Barr o bebelwa Aberdeen, ngei Scotland, nahone ndi ene lupedzi kha vhana vhahawe vhararu. Khotsi awe na mme awe vho vha vhe vhaḓodzwa. Musi wahashu Barr a tshi amba nga ha vhutshilo ha muṱa wahawe, kanzhi o vha a tshi amba ngavho nga lufuno, nahone o vha a tshi dzhiela nṱha vhukuma tsumbo i swayeaho ye a i vhetshelwa nga mme awe na khotsi awe vha funwaho.

Musi a tshi thoma u vha miṅwahani yawe ya vhuswa, wahashu Jack o wana zwi tshi mu konḓela vhukuma u amba na vhathu vhane a si vha ḓivhe. Naho zwo ralo, o ita vhuḓidini vhuhulwane u itela u kunda vhushayanungo honoho, nahone ḽiṅwe ḓuvha nga Swondaha nga masiari nga ṅwaha wa 1927 musi e na miṅwaha ya 14, o vhudza khotsi awe uri o vha o no lugela u ṱuwa navho mushumoni wa nnḓu nga nnḓu u yo huwelela. U shumela hawe Yehova lwa miṅwaha minzhi-minzhi zwo thoma nga tshifhinga tshenetsho. U bva nga ḽeneḽo ḓuvha u swika musi a tshi fa, Wahashu Barr o dzula e muhuweleli a fhiseaho wa mafhungo maḓifha.

Khombo khulwane ye mme awe vha ṱoḓa u fa khayo, yo ita uri Jack a humbule nga ho dzikaho nga ha ndivho ya vhutshilo, nahone nga 1929 o ḓiṋekedzela kha Yehova a shumisa tshibuli tsha u thoma tshe tsha bvelela u itela u sumbedza u ḓiṋekedza hawe musi a tshi lovhedzwa nga 1934. Ngauralo, nga 1939 o vha muraḓo wa muṱa wa Bethele ya London, ngei England. Nga zwenezwo, ho mbo ḓi vha u thoma hawe tshumelo ya tshifhinga tsho ḓalaho ye a fhedza miṅwaha ya 71 e khayo.

Nga ḽa 29 October, 1960, Wahashu Barr o vhumba zwine a zwi vhidza uri ndi “vhushaka ho khetheaho vhukuma” musi a tshi vhinga Mildred Willett we a vha e muvulanḓila na murumiwa a fhiseaho wa tshifhinga tshilapfu. Wahashu Barr na mufumakadzi wawe, vho vha vha tshi ḓivhelwa u vha tsumbo yavhuḓi, u vha vhavhingani vho ḓikumedzaho, nahone vho dzula vhe tsumbo yo raloho u swikela musi Mildred a tshi fhedza buḓo ḽawe ḽa vhutshilo ha kha ḽifhasi nga October 2004. Wahashu Barr na mufumakadzi wawe, vho vha vha tshi vhala vhoṱhe tshipiḓa tsha mafhungo a re Bivhilini ḓuvha ḽiṅwe na ḽiṅwe vhutshiloni havho hoṱhe musi vho vhingana.

Kha vhane vha ḓivha Jack Barr, dzina ḽawe ḽi ḓo dzula ḽi tshi vha humbudza muthu we tshifhinga tshoṱhe a vha a tshi ṋea nyeletshedzo i fhaṱaho—a linganyiselaho, wa vhulenda, na we a vha a tshi thea nyeletshedzo yawe Maṅwaloni. O vha e mushumi wa biko na mulavhelesi a humbulelaho na a re na lufuno u katela na u vha khonani i fulufhedzeaho. Phindulo dzawe, nyambo dzawe na thabelo dzawe zwo vha zwi tshi dzumbulula uri o vha e muthu ane a funa mafhungo-ngoho na we a vha e na vhushaka ha tsini-tsini na Yehova.

Naho ri tshi ṱulutshelwa u vhona Wahashu Barr a funwaho, ri a takala nae samusi o wana tshifhiwa tsha u sa tsha fa—ndugelo ye a vha o i lavhelela nahone a tshi anzela u amba nga hayo. Ndi dzanga ḽe a vha a tshi dzula o ḽi lavhelela.—1 Vha-Kor. 15:53, 54. *

[Ṱhaluso i re magumoni a siaṱari]