Naa Zwa Vhukuma Ni A Takadzwa Nga U Vhala Ipfi Ḽa Mudzimu?

LORRAINE o ri: “Musi ndi tshi thoma u vhala Bivhili tshifhinga tshoṱhe, ndo wana zwi muhwalo zwi sa takadzi na luthihi. Ndo vha ndi sa i pfesesi nahone ndi tshi anzela u ḓiwana ndi tshi khou humbula nga ha zwiṅwe zwithu.”

Vhaṅwe na vhone vha a tenda uri musi vha tshi thoma u vhala Bivhili zwo vha zwi sa vha takadzi. Naho zwo ralo, vho konḓelela ngauri vho vha vha tshi zwi ḓivha uri u vhala Maṅwalo Makhethwa ndi zwone zwo teaho. Marc o ri: “Zwi a leluwa uri muthu a litshe u vhala Bivhili kana u ita ngudo ya muthu nga eṱhe nga ṅwambo wa u tendela u thithiswa nga zwiṅwe zwithu. Ho vha hu tshi ṱoḓea thabelo na vhuḓidini vhuhulwane u itela uri u vhala Bivhili ḓuvha ḽiṅwe na ḽiṅwe zwi vhe tshipiḓa tsha mbekanyo yanga.”

Ni nga ita mini u itela u dzhiela nṱha vhukuma Ipfi ḽa Mudzimu, Bivhili? Ni nga ḓiphina hani nga u i vhala? Ṱhogomelani nyeletshedzo dzi tevhelaho.

Zwipikwa Na Nḓila Ine Na Nga I Vhala Ngayo

Musi ni sa athu vhala Bivhili, thomani nga u rabela na u livhisa ṱhogomelo kha zwine na ḓo zwi vhala. Humbelani Yehova a ni thuse uri ni vhe na mafulufulu musi ni tshi guda Ipfi ḽawe. Mu humbeleni uri a lugiselele muhumbulo waṋu na mbilu yaṋu uri ni kone u pfesesa vhuṱali hawe nga vhuḓalo. (Ps. 119:34) Arali na sa ita nga u ralo ni ḓo vha ni tshi khou guda Bivhili u itela u bva mulanduni nahone ni nga fhelelwa nga dzangalelo ḽa u bvela phanḓa. Lynn o ri: “Nga zwiṅwe zwifhinga musi ndi tshi vhala ndo dzhaya ndi a pfukwa nga maṅwe mafhungo a ndeme. Kanzhi a thi pfesesi mbuno dza ndeme dzine nda khou vhala nga hadzo. Ngauralo, ndi rabela Mudzimu uri a nthuse uri ndi ḓilange nahone zwenezwi zwi ita uri ndi sa ḓiwane ndi tshi khou humbula nga ha zwiṅwe zwithu zwi sa tshimbidzani na zwine nda khou zwi vhala.”

Dzhielani nṱha zwine na khou zwi guda. Ni songo hangwa uri u pfesesa na u shumisa mafhungo-ngoho ane na a guda Bivhilini zwi amba vhutshilo haṋu. Nga zwenezwo, itani vhuḓidini vhuhulwane ha u wana mbuno dzine na nga dzi shumisa vhutshiloni haṋu nahone ni dzi shumise. Chris o ri: “Musi ndi tshi guda Bivhili, ndi ṱoḓa mafhungo ane a ḓo nthusa u ṱalula mavhonele a songo teaho na zwiṱuṱuwedzi zwi si zwavhuḓi zwine nda vha nazwo. Zwi a homolosa u vhona nḓila ine Bivhili na khandiso dzashu nnzhi dza vha ngayo na mafhungo ane a mmbuyedza, naho vhaṅwali vha sa nnḓivhi na luthihi.”

Ḓivhetsheleni zwipikwa zwine zwa swikelelea. Lingedzani u guda zwithu zwiswa nga vhathu vha re Bivhilini. Ni nga wana mafhungo manzhi a takadzaho nga havho arali na sedza bugu Insight on the Holy Scriptures kana Watch Tower Publications Index. Musi ni tshi thoma u ḓivha vhanna na vhafumakadzi vha re Bivhilini sa vhathu vha vhukuma vha re na maḓipfele na vhumuthu vhu sa fani, ni ḓo vhuyelwa vhukuma musi ni tshi guda nga havho.

Ṱoḓani nḓila ntswa dza u ṱalutshedza vhaṅwe zwi re Maṅwaloni. (Mish. 17:2, 3) Sophia o guda e na zwenezwo muhumbuloni. O ri: “Tshipikwa tshanga ndi u guda nḓila ntswa dzine nda ḓo dzi shumisa vhuḓinḓani na nga zwiṅwe zwifhinga u itela uri ndi kone u ṱalutshedza mafhungo-ngoho a Bivhili nga nḓila i pfalaho. Tshiingamo ndi tshishumiswa tshavhuḓi vhukuma tsha u swikelela tshipikwa tshenetsho.”—2 Tim. 2:15.

Vhonani mafhungo a re Bivhilini nga iṱo ḽa muhumbulo. Vha-Heberu 4:12 i ri: “Ipfi ḽa Mudzimu ndi tshithu tshi tshilaho.” Musi ni tshi vhala Maṅwalo, itani uri mulaedza wa Mudzimu u vhe tshithu tshi tshilaho muhumbuloni waṋu nga u vhona nga iṱo ḽa muhumbulo zwe zwa vha zwi tshi khou vhonwa  nga vhathu vha re Bivhilini. Lingedzani u pfa zwe vha vha vha tshi khou zwi pfa na nḓila ye vha vha vha tshi khou ḓipfa ngayo. Vhambedzani zwe vha zwi tshenzhela na zwe na zwi tshenzhela nga ho livhaho vhutshiloni haṋu. Gudani kha nḓila ye vha aravha ngayo kha zwiimo zwo fhamba-fhambanaho. Zwenezwi zwi ḓo khwinisa nḓila ine na pfesesa ngayo mafhungo a re Bivhilini na u ita uri a nwelele muhumbuloni waṋu.

Ḓiṋeeni tshifhinga tsha u sedza maṅwalo ane a konḓa na nḓila ine a ṱalutshedzwa ngayo u itela uri ni kone u a pfesesa zwavhuḓi. Tshifhinga tshoṱhe ni fanela u ḓiṋea tshifhinga tsho eḓanaho musi ni tshi guda. Khamusi ni nga wana mbudziso dzi vusaho dzangalelo dzine dza ḓo ṱoḓa uri ni ite ṱhoḓisiso yo engedzeaho. Sedzani maipfi a songo ḓoweleaho, ṱhaluso dzi re magumoni a siaṱari nahone ni sedze ndaedzi dzi re Bivhilini. Musi ni tshi pfesesa na u shumisa zwine na khou zwi guda, ni ḓo takalela u guda Ipfi ḽa Mudzimu. Ni ḓo kona u amba u fana na mupsalme we a ri: “Fhungo ḽau [Yehova] ndi ifa ḽanga ḽi sá fheli, ngauri ndi ḽone ḽiné mbilu yanga ya ḓifhelwa ngaḽo’.”—Ps. 119:111.

Ni songo ṱoḓa u ṱavhanya na fhedza musi ni tshi khou vhala. Ḓivhetsheleni tshifhinga tsho eḓanaho tsha u fara ngudo ya muthu nga eṱhe. Ni fanela u dovha na dzudzanya tshifhinga tsha u lugiselela miṱangano ya tshivhidzo. Raquel o ri: “Nga zwiṅwe zwifhinga ndi ḓipfa ndi na mbilaelo lune nda sa kone u fhedza tshifhinga tshilapfu ndi tshi khou ita tshithu tshithihi. Nga zwenezwo, ndi wana uri u sa guda tshifhinga tshilapfu zwi a mmbuyedza. Zwenezwi zwi ita uri ndi vhuyelwe vhukuma musi ndi tshi guda.” Chris o ri: “Musi ndi tshi pfa u nga ndi khou vhala ndo dzhaya, ndi ḓivhona mulandu ngauri a thi vhuyelwi nga tshithu. Zwine nda khou zwi guda zwi anzela u sa kwama mbilu yanga.” Nga zwenezwo, ḓiṋeeni tshifhinga tsho eḓanaho musi ni tshi guda.

Ivhani na lutamo lwa u ṱoḓa u ḓivha Ipfi ḽa Mudzimu. Muapostola Petro o ri: “Ni nge vhushie vhu tsha ḓi bva u bebwa u̗ tama mukhaha u pfadzaho u songo vangaho, uri ni aluwe ngawo’, ni vhuye ni tshidzwe.” (1 Pet. 2:2) Vhushie a ho ngo fanela u tou ṱahulela lutamo lwa u ṱoḓa mikando. Ndi zwa nzulele uri vhushie vhu ṱoḓe mikando. Fhedzi Maṅwalo a eletshedza uri ri fanela u vha na lutamo lwa u ṱoḓa u ḓivha zwi re Ipfini ḽa Mudzimu. Arali na nga vhala siaṱari ḽithihi fhedzi Bivhilini ḓuvha ḽiṅwe na ḽiṅwe, hu sa athu fhela tshifhinga tshilapfu ni ḓo vha ni tshi vho tama u vhala zwo engedzeaho. Zwe u thomani zwa vha zwi tshi vhonala u nga zwi a konḓa, zwi ḓo vha zwi tshi vho takadza.

Elekanyani nga ndimana dzi re Maṅwaloni. Ni a vhuyelwa vhukuma musi ni tshi elekanya nga zwine na zwi vhala. Zwenezwi zwi ḓo ni thusa uri ni kone u ṱumanya thero dza Bivhili dze na ita ṱhoḓisiso nga hadzo. Hu sa athu fhela tshifhinga tshilapfu,  ni ḓo vha na vhuṱali ha lwa muya vhune ha ḓo ni vhuyedza vhukuma.—Ps. 19:14; Mir. 3:3.

Tshifhinga Tshine Tsha Shumiswa Zwavhuḓi

U guda Bivhili tshifhinga tshoṱhe zwi ṱoḓa vhuḓidini vhuhulwane nahone ni wana phaṱhutshedzo nnzhi. Nḓila ine na pfesesa ngayo Maṅwalo i ḓo khwinisea. (Vha-Heb. 5:12-14) Ṱhalukanyo na vhuṱali zwine na zwi wana Maṅwaloni o hevhedzwaho zwi ḓo ni ḓisela dakalo, u fushea na mulalo. Vhuṱali vhu re Ipfini ḽa Mudzimu ḽo hevhedzwaho ndi “muri wa vhutshilo” kha vhane vha vhu ṱoḓa na u vhu shumisa vhutshiloni havho.—Mir. 3:13-18.

U guda Ipfi ḽa Mudzimu nga ho dzikaho zwi nga ita uri ni vhe na mbilu ya o thanyaho. (Mir. 15:14) Zwenezwo zwi ḓo ni thusa u ṋea vhaṅwe nyeletshedzo yo thewaho nga ho khwaṱhaho Bivhilini. Arali na tendela phetho dzaṋu dzi tshi livhiswa nga zwine na zwi guda Maṅwaloni na kha khandiso dza “mukoma a fulufhedzeaho na wa vhuṱali,” ni ḓo homoloswa na u khwaṱhiswa nga nḓila ine Ipfi ḽa Mudzimu ḽo hevhedzwaho ḽa ḓo ni ṱuṱuwedza ngayo. (Mat. 24:45) Ni ḓo vha na mavhonele o teaho, ni ḓo takalela vhutshilo, nahone ni ḓo vha muthu wa muya. Zwiṅwe hafhu, tshiṅwe na tshiṅwe tshine tsha katela vhushaka haṋu na Mudzimu tshi ḓo bvelela.—Ps. 1:2, 3.

U funa Mudzimu zwi tshi bva mbiluni zwi ḓo ni sudzulusela u vhudza vhaṅwe nga ha zwine na zwi tenda. U ita zwenezwo na zwone zwi a vhuyedza vhukuma. Sophia u khou shumela kha uri a humbule na u shumisa maṅwalo o fhamba-fhambanaho u itela u vusa dzangalelo ḽa vhoṋemuḓi na u ita uri vhuḓinḓa hawe ha Vhukriste vhu bvelele na uri vhu takadze. O ri: “Zwi a takadza vhukuma u vhona nḓila ine vhathu vha aravha ngayo musi vha tshi vhona mafhungo a bvaho Bivhilini.”

Tshithu tshi swayeaho tshine muthu a vhuyelwa ngatsho musi a tshi takalela u vhala Ipfi ḽa Mudzimu ndi u vha na vhushaka ha tsini na Yehova. U guda Bivhili zwi ita uri ni ḓivhe zwilinganyo zwawe, ni pfesese na u dzhiela nṱha lufuno lwawe, mafunda na khaṱulokwayo. A hu na tshithu tshi vhuyedzaho u fhira zwenezwo. Ḓiṋeeni tshifhinga tsha u guda Ipfi ḽa Mudzimu. A zwi timatimisi uri u ita nga u ralo ndi u shumisa tshifhinga zwavhuḓi.—Ps. 19:7-11.

[Bogisi/Zwifanyiso kha siaṱari 5]

ZWIPIKWA NA NḒILA DZA U VHALA IPFI ḼA MUDZIMU

▪ Musi ni sa athu vhala Bivhili, thomani nga u rabela na u livhisa ṱhogomelo kha zwine na ḓo zwi vhala.

▪ Dzhielani nṱha zwine na khou zwi guda.

▪ Ḓivhetsheleni zwipikwa zwine zwa swikelelea.

▪ Ṱoḓani nḓila ntswa dza u ṱalutshedza vhaṅwe zwi re Maṅwaloni.

▪ Vhonani mafhungo a re Bivhilini nga iṱo ḽa muhumbulo.

▪ Ḓiṋeeni tshifhinga tsha u sedza maṅwalo ane a konḓa na nḓila ine a ṱalutshedzwa ngayo u itela uri ni kone u a pfesesa zwavhuḓi.

▪ Ni songo vhala nga u ṱavhanya.

▪ Ivhani na lutamo lwa u ṱoḓa u ḓivha Ipfi ḽa Mudzimu.

▪ Elekanyani nga ndimana dzi re Maṅwaloni.

[Tshifanyiso kha siaṱari 4]

Musi ni tshi khou vhala mafhungo a re Bivhilini, ḓivhoneni nga iṱo ḽa muhumbulo ni kha honoho vhuimo