U Fulufhela Tshoṱhe Yehova Zwi Ita Uri Ri Ḓipfe Ro Tsireledzea
U Fulufhela Tshoṱhe Yehova Zwi Ita Uri Ri Ḓipfe Ro Tsireledzea
“Yehova u a mpfa ndi tshi mu vhidzelela.”—PS. 4:3.
1, 2. (a) Davida o sedzana na vhuimo vhufhio vhu si havhuḓi ? (b) Ndi psalme dzifhio dzine ra ḓo dzi haseledza?
KHOSI DAVIDA o vha o no fhedza tshifhinga tshilapfu a tshi khou vhusa ngei Isiraele, fhedzi zwino o vha o no sedzana na vhuimo vhu si havhuḓi. Murwa wawe Abesalomo o vha a tshi khou mu itela tshimbevha nahone o ḓivhea uri a vhe khosi, zwa ita uri Davida a kombetshedzee u pfuluwa Yerusalema. O vha o dovha a fheṱiwa nga khonani yawe ya tsini, nahone zwino ho vha hu si tshe na vhathu vhanzhi vhane a nga vha fulufhela, zwino o vha a tshi khou tshimbila nga milenzhe a tshi khou tswimila ngei Thavhani ya Miṱwari. Zwiṅwe hafhu, Simei ane a vha shaka ḽa Khosi Saulo o vha a tshi khou mu posa nga matombo na u mu dubisela buse ngeno a tshi khou mu sema nga maṱamba.—2 Sam. 15:30, 31; 16:5-14.
2 Naa tshiitea tshenetshi tsho vha tshi tshi ḓo ita uri Davida a vhuye a fe a tshi khou pfa vhuṱungu vhungafho na u ḓipfa o nyadziwa nga nḓila yeneyo? Zwi nga si ralo, ngauri u fulufhela Yehova. Zwenezwi zwi tou vha khagala kha Psalme ya vhuraru ye Davida a i ṅwala malugana na u shavha hawe Abesalomo. O dovha a ṅwala na Psalme ya vhuṋa. Psalme dzenedzi mbili dzi sumbedza uri o vha e na vhungoho ha uri Mudzimu u a pfa na u fhindula thabelo. (Ps. 3:4; 4:3) Dzenedzi psalme dzi a ri khwaṱhisedza uri Yehova u na vhashumeli vhawe vha fulufhedzeaho masiari na vhusiku, nahone u a vha fhaṱutshedza na u vha tikedza khathihi na u ita uri vha ḓipfe vhe na mulalo nahone vho tsireledzea. (Ps. 3:5; 4:8) Nga zwenezwo, kha ri haseledze nga ha psalme dzenedzi ri vhone nḓila ine dza nga ita ngayo uri ri ḓipfe ro tsireledzea na u ita uri ri fulufhele Mudzimu.
Musi ‘Vhanzhi Vha Tshi Ri Vutshela’
3. Davida o vha o sedzana na vhuimo vhufhio samusi zwo sumbedzwa kha Psalme ya 3:1, 2?
3 Muṅwe muḓinḓa o amba uri: “Dzimbilu dza vhoṱhe Vha-Isiraele dzi khou tevhela Abesalomo.” (2 Sam. 15:13) Davida o mangala vhukuma uri Abesalomo o kona hani u ita uri a tikedzwe nga vhathu vhoṱhe, nahone o vhudzisa Yehova a ri: “Yawee, Yehova! Maswina anga o anda hani! Ndi vhanzhi vho mvutshelaho. Ndi vhanzhi vhané vha ṋyamba vha ri: Uyo Muthu Mudzimu ha mu lweli.” (Ps. 3:1, 2) Vhaisiraele vhanzhi vho vha vha tshi humbula u nga Yehova a nga si tsireledze Davida musi a tshi vutshelwa nga Abesalomo na khonani dzawe.
4, 5. (a) Ndi mini zwe Davida a vha e na vhungoho nazwo? (b) Ndi mini tshi swayeaho kha maipfi ane a ri: “Ndi Iwe U imisaho ṱhóho yanga”?
4 Fhedzi Davida o ḓipfa o tsireledzea ngauri o vha a tshi fulufhela tshoṱhe Mudzimu. O imba a ri: “Tendá Iwe Yehova Ú tshiṱangu tshi mpilelaho thungo dzoṱhe. Ndi pika Iwe; ndi Iwe U imisaho ṱhóho yanga.” (Ps. 3:3) Davida o vha e na vhungoho ha uri Yehova u ḓo mu tsireledza u fana na musi tshiṱangu tshi tshi tsireledza swole. Ndi ngoho uri khosi ye ya vha yo no vha mulala yo vha i tshi khou shavha, yo fukedza ṱhoho nahone yo kotamela fhasi nga ṅwambo wa u niwa nga ṱhoni. Fhedzi wa Ṱaḓulu ṱaḓulu o vha a tshi ḓo shandula vhuimo he Davida a vha o sedzana naho nahone a mu hulisa. Yehova o vha a tshi ḓo ita uri a dovhe a ime, a songo tsha dzula o kotamisa ṱhoho yawe na u ita uri i dzule yo ima. Davida o vhidzelela Mudzimu e na vhungoho ha uri u ḓo mu aravha. Naa ni a sumbedza uri ni fulufhela tshoṱhe Yehova nga nḓila yo raloho?
5 Musi a tshi ri: “Ndi Iwe U imisaho ṱhóho yanga,” Davida o vha a tshi khou sumbedza uri u a ṱhogomela uri Yehova ndi ene ane a ḓo mu thusa. Kha Today’s English Version ndimana yeneyi i vhalea nga heyi nḓila: “Tendá Iwe, MURENA wanga, u tshi dzula u tshiṱangu tshanga tshi mpilelaho khomboni dzoṱhe. U ita uri ndi kunde na uri ndi vhe na tshivhindi.” Malugana na maipfi ane a ri: “Ndi Iwe U imisaho ṱhóho yanga,” iṅwe ndaedzi yo ri: “Musi Mudzimu a tshi imisa . . . ‘ṱhoho’ ya muthu, U ṋea muthu onoyo fulufhelo na u ita uri a ḓipfe o tsireledzea.” Samusi o vha o tekulwa vhuhosini ha Isiraele, Davida o vha e na tshiitisi tshi pfalaho tsha u ḓipfa o kulea nungo. Naho zwo ralo, musi Mudzimu a tshi ‘imisa ṱhoho yawe’ o vha tshi ḓo dovha a vha na tshivhindi na u ḓipfa o tsireledzea nahone a tshi fulufhela tshoṱhe Mudzimu.
‘Yehova U Ḓo Mpfa’
6. Ndi ngani Davida o amba uri Yehova o pfa thabelo yawe e ngei thavhani yawe khethwa?
6 Samusi o vha a tshi fulufhela Yehova nahone a tshi ḓipfa o tsireledzea, Davida o bvela phanḓa a ri: “Ndo ṱavhela Yehova mukosi, a mpfa é thavhani khethwa yawe.” (Ps. 3:4) Mbulungelo ya mulanga ine ya imela u vha hone ha Mudzimu yo vha yo dzhiiwa ya iswa ngei Thavhani ya Tsioni samusi Davida o vha o laedza uri hu itwe nga u ralo. (Vhalani 2 Samuele 15:23-25.) Nga zwenezwo, zwo vha zwo tea uri Davida a ambe uri Yehova o pfa thabelo yawe e thavhani yawe khethwa.
7. Ndi ngani Davida a songo vha na nyofho?
7 Samusi o vha e na vhungoho ha uri Mudzimu u ḓo pfa thabelo yawe, Davida ho ngo ḓipfa e na nyofho. Nṱhani hazwo, o imba a ri: “Nda lala, nda eḓela khofhe; nda dovha nda fhaṱuwa ndó kuvhatedzwa nga Yehova.” (Ps. 3:5) Davida o vha a sa ofhi u eḓela vhusiku, naho vhusiku vhu tshi anzela u vha tshifhinga tshi re na khombo khulwane ya u vutshelwa nga maswina. O vha a tshi zwi ḓivha uri u ḓo vuwa, ngauri zwe a vhuya a zwi tshenzhela zwo ita uri a kone u fulufhela tshoṱhe uri Mudzimu u ḓo mu tikedza. Na riṋe ri nga fulufhela tshoṱhe uri Mudzimu u ḓo ri tikedza arali ra tevhela “nḓila dza Yehova” nahone ra si vhuye ra mu ṱutshela.—Vhalani 2 Samuele 22:21, 22.
8. Psalme ya 27:1-4 i sumbedza hani uri Davida o vha a tshi fulufhela Mudzimu?
8 U fulufhela tshoṱhe ha Davida uri Mudzimu u ḓo mu tsireledza zwi vhonala kha iṅwe ya dzipsalme dzawe yo hevhedzwaho ine ya ri: “Yehova ndi tshedza tshanga, ndi Mutshidzi wanga; ndi tsha ḓi ofha nnyi?—Yehova ndi Ene dzhavhelo ḽa vhutshilo hanga; ndi tsha ḓi tshenuwa nnyi? . . . Naho nda tangiwa nga mmbi yoṱhe, mbilu yanga a i nga ofhi. . . . Tshiné nda tshi humbela ha Yehova ndi tshithihi tshiné nda tshi lila: ndi u dzula nḓuni ya Yehova maḓuvha oṱhe a vhutshilo hanga, na u vhona madzanga a Yehova, na u linda pfamo yawe.” (Ps. 27:1-4) Arali ni tshi ḓipfa nga nḓila i fanaho nahone zwiimo zwaṋu zwi tshi ni tendela, ni ḓo ita vhungoho ha uri ni vha hone miṱanganoni na vhagwadameli vha Yehova tshifhinga tshoṱhe.—Vha-Heb. 10:23-25.
9, 10. Hu sa londwi maipfi a re kha Psalme ya 3:6, 7, ndi ngani ni tshi nga amba uri Davida o vha a sa ṱoḓi u ḓilifhedzela?
9 Naho Davida o itelwa tshimbevha nga Abesalomo nahone vhaṅwe vhathu vhanzhi vha songo fulufhedzea khae, o imba a ri: “Thi ofhi tshithu, nahó ndó tangiwa ndó lalelwa nga mmbi dzi na ḓana. Takuwa, Yehova! Mudzimu wanga, ndwele! Maswina anga oṱhe wo a rwa zwifhaṱuwo, vhavhi wo vha kula maṋo.”—Ps. 3:6, 7.
10 Davida o vha a sa ṱoḓi u ḓilifhedzela. Arali maswina awe a vhe o ‘rwiwa zwifhaṱuwo,’ o vha tshi ḓo vha o rwiwa nga Mudzimu. Khosi Davida o vha e na kopi ya Mulayo ye a ḓiṅwalela yone nahone o vha a tshi zwi ḓivha uri kha mulayo wonoyo Yehova o ri: “U lifhedza na u ḓo tevhedza zwi kha Nṋe.” (Doit. 17:14, 15, 18; 32:35) Mudzimu ndi ene ane a nga dovha a ‘kula maṋo a vhavhi.’ U vha kula maṋo zwi amba u vha fhedza maanḓa uri vha si kone u huvhadza muṅwe muthu. Yehova u a ḓivha uri vhathu vhavhi ndi vhafhio ngauri “u vhona zwi re mbiluni.” (1 Sam. 16:7) Zwi ri takadza vhukuma u ḓivha uri Mudzimu u ri ṋea lutendo na maanḓa u itela uri ri dzule ro khwaṱha musi ri tshi lwa na Sathane, muvhi muhulwane ane hu si kale a ḓo poswa mugodini a fana na ndau i vhombaho fhedzi i si na maṋo yo tewaho nga u fheliswa fhedzi!—1 Pet. 5:8, 9; Ndzumb. 20:1, 2, 7-10.
“Mulweli Ndi Yehova”
11. Ndi ngani ri tshi fanela u rabelela vhatendi nga riṋe?
11 Davida o zwi ṱhogomela uri ndi Yehova fhedzi we a vha a tshi nga mu vhofholola samusi o vha a tshi ṱoḓa u vhofhololwa nga maṱo matswuku. Fhedzi onoyo mupsalme o vha a sa humbuleli ene muṋe fhedzi. O vha a tshi humbulela na vhathu vhoṱhe vhe Yehova a vha a tshi vha funa. Davida o phetha mafhungo awe o hevhedzwaho nga nḓila yo teaho musi a tshi ṅwala uri: “Mulweli ndi Yehova! Phaṱhutshedzo yau kha i ḓe kha vhathu vhau.” (Ps. 3:8) I ngoho, Davida o vha e na thaidzo khulwane vhukuma, fhedzi nṱhani hazwo o humbula nga ha vhathu vha Yehova vhoṱhe nahone o vha e na vhungoho ha uri Mudzimu u ḓo vha fhaṱutshedza. Naa na riṋe a ro ngo fanela u dzula ri tshi humbula nga vhatendi nga riṋe? Ri fanela u vha humbula musi ri tshi rabela, ri humbele Yehova uri a vha ṋee muya mukhethwa wawe u itela u vha thusa uri vha vhe na tshivhindi na u ḓipfa vho tsireledzea musi vha tshi huwelela mafhungo maḓifha.—Vha-Ef. 6:17-20.
12, 13. Ho itea mini kha Abesalomo, nahone Davida o aravha hani?
12 Abesalomo o fa nga nḓila i shonisaho nahone zwenezwo ndi tsevho kha vhathu vhoṱhe vhane vha tambudza vhaṅwe, zwihuluhulu vhane vha tambudza vhaḓodzwa vha Mudzimu, vha ngaho sa Davida. (Vhalani Mirero 3:31-35.) Ho mbo ḓi vuwa nndwa nahone Abesalomo na mmbi yawe vha kundwa. Abesalomo o vha a tshi khou shavha o ṋamela mbongola-mbiḓana musi mavhudzi awe a manaka-naka a tshi fashwa nga davhi ḽa muri muhulu. O sala o ṋembelela henefho fhedzi a tshi kha ḓi tshila, hu si na zwe a vha a tshi nga zwi ita u swikela musi Yoaba a tshi ḓa a mu posa nga mapfumo mararu a mu runga kha mbilu.—2 Sam. 18:6-17.
13 Naa Davida o takala musi a tshi pfa zwe zwa itea kha murwa wawe? Na luthihi. Nṱhani hazwo, o mbo ḓi ṱungufhala a lila a ri: “Abesalomo, ṅwana wanga! Ṅwana wanga Abesalomo! Ngavhe hu fe nṋe vhudzuloni hau! Abesalomo, ṅwana wanga! Ṅwana wanga Abesalomo!” (2 Sam. 18:24–19:1) Zwe zwa ambiwa nga Yoaba ndi zwone fhedzi zwe zwa ita uri Davida a ḓipfe e khwine. Abesalomo o fa nga nḓila i ṱungufhadzaho vhukuma, nahone o ḓivhangela khombo khulwane nge a vha na vhuhovheleli ha tseḓa he ha ita uri a lwe na khotsi awe—muḓodzwa wa Yehova.—2 Sam. 19:2-9; Mir. 12:21; 24:21, 22.
Davida U Dovha A Sumbedza Uri U Fulufhela Mudzimu
14. Ndi mini zwine zwa nga ambiwa nga nḓila ye Psalme ya vhuṋa ya ṅwalwa ngayo?
14 Psalme ya vhuṋa i a fana na ya vhuraru, ngauri dzoṱhe dzi amba nga ha thabelo ya Davida i bvaho mbiluni ine ya ṋea vhuṱanzi ha uri o vha a tshi fulufhela tshoṱhe Yehova. (Ps. 3:4; 4:3) Zwi nga itea uri musi Davida a tshi ṅwala psalme yeneyi ya vhuṋa o vha a tshi khou itela u sumbedza uri u ḓipfa o vhofholowa na u livhuha Mudzimu samusi maano a Abesalomo a songo bvelela. Kana khamusi o ṅwala a tshi khou humbula nga ha Vhalevi. Hu sa londwi uri zwi re zwone ndi zwifhio, u elekanya nga ha psalme yeneyi zwi nga khwaṱhisa nḓila ine ra fulufhela ngayo Yehova.
15. Ndi ngani ri tshi nga rabela Yehova nga Murwa wawe ri na vhungoho ha uri u ḓo ri pfa?
15 Davida o dovha a sumbedza uri u fulufhela tshoṱhe Mudzimu na u vha na vhungoho ha uri Mudzimu u ḓo pfa na u fhindula thabelo yawe. O imba a ri: “Mpfe ndi tshi vhidzelela, Mudzimu Mulamuleli wanga. Wo ḓi ndamulela ndó khakhelwa. Nkhathutshele U pfe thabelo yanga.” (Ps. 4:1) Na riṋe ri nga ḓipfa nga hu fanaho arali ri tshi ita zwo lugaho. Samusi ri tshi ṱhogomela uri “Mudzimu” o lugaho u a fhaṱutshedza vhathu vhawe vho lugaho, musi ri tshi mu rabela kha mutheo wa tshiṱhavhelo tshi rengululaho tsha Murwa wawe Yesu ri nga vha na vhungoho ha uri u ḓo ri pfa. (Yoh. 3:16, 36) Zwenezwi zwi ri ṋea mulalo vhukuma!
16. Ndi mini zwe zwa vha zwi tshi nga ita uri Davida a kulee nungo?
16 Nga zwiṅwe zwifhinga ri nga kha ḓi sedzana na zwiimo zwine zwa ri kula nungo zwine zwa nga ita uri ri ḓipfe ri songo tsireledzea. Zwenezwi zwi nga vha zwo itea kha Davida lwa tshifhinganyana ngauri o imba a ri: “Hee inwi Vhanna vhahashu, dzina ḽanga ḽi ḓo ḓi tshinywa u swika lini? Naa ni ḓo ḓi funa zwitshele na tevhela mazwifhi?” (Ps. 4:2) Zwi tou vha khagala uri maipfi ane a ri “vhanna vhahashu” nga u tou angaredza a khou ambela kha vhathu nga muhumbulo une wa sa takadze. Maswina a Davida o vha a tshi funa “zwitshele.” Musi i tshi ṱalutshedza ndimana yeneyi New International Version i ri: “Ni ḓo funa zwithu zwi si na mushumo na midzimu i sili u swika lini?” Naho ra nga kulea nungo nga ṅwambo wa zwine zwa itwa nga vhaṅwe, kha ri bvele phanḓa ri tshi rabela zwi tshi bva mbiluni nahone ri sumbedze uri ri fulufhela tshoṱhe Mudzimu muthihi fhedzi wa ngoho.
17. Ṱalutshedzani nḓila ine ra nga ita zwithu u tendelana na zwi re kha Psalme ya 4:3.
17 Zwauri Davida o vha a tshi fulufhela Mudzimu zwi tou vha khagala kha maipfi awe ane a ri: “Naa a ni vhoni zwauri Yehova o ḓinangela muvhuya? Yehova u a mpfa ndi tshi mu vhidzelela.” (Ps. 4:3) U itela uri muthu a dzule a tshi fulufhedzea kha Yehova, hu ṱoḓea uri a vhe na tshivhindi na uri a fulufhele tshoṱhe khae. Sa tsumbo, muṱa wa Vhakriste u fanela u vha na tshivhindi na u fulufhela tshoṱhe Yehova musi muṅwe wa shaka ḽavho ḽi sa rembuluwi a tshi bviswa tshivhidzoni. Mudzimu u hulisa vhane vha fulufhedzea khae na nḓila dzawe. Zwiṅwe hafhu, u fulufhedzea na u fulufhela tshoṱhe Yehova zwi ita uri vhathu vhawe vha takale.—Ps. 84:11, 12.
18. U tendelana na zwi re kha Psalme ya 4:4, ri fanela u ita mini arali muṅwe muthu a amba kana u ita zwithu zwine zwa ri sinyusa?
18 Ri fanela u ita mini arali muṅwe muthu a amba kana u ita zwithu zwine zwa ri sinyusa? Ri nga dzula ro takala arali ra ita zwo ambiwaho nga Davida musi a tshi ri: “Sinyuwani zwaṋu; hone, ni tshi ralo, ni sóngo tshinya. Ni ’dzou amba na dzimbilu dzaṋu ni vhulaloni ni fhumule.” (Ps. 4:4) Arali zwo no ḓi itea uri ri si farwe zwavhuḓi kana ha sa ambiwe na riṋe zwavhuḓi, ri songo ita tshivhi nga u ṱoḓa u ḓilifhedzela. (Vha-Roma 12:17-19) Ri nga rabela nga ha mafhungo eneo tshiphirini musi ri vhulaloni. Arali ra nga rabela nga mafhungo eneo, ri nga shandula mavhonele ashu nahone ra sudzulusea uri ri hangwele nga lufuno. (1 Pet. 4:8) Malugana na mafhungo enea, ri dovha ra ṱhogomela nyeletshedzo ya muapostola Paulo, khamusi yo thewaho kha Psalme ya 4:4 ine ya ri: “Sinyuwani, hone, ni tshi ralo ni songo tshinya. Ḓuvha ḽi songo vhuya ḽa kovhela ni tshee nó sinyuwa. Na hone ni songo ṋea vhudzulo Diabolo mudzia-tshisolo.”—Vha-Ef. 4:26, 27.
19. Psalme ya 4:5 i nga ri thusa hani malugana na vhurabeli hashu?
19 Musi a tshi ombedzela ṱhoḓea ya u fulufhela Mudzimu, Davida o imba a ri: “Ṋekedzani zwidzimu zwavhuḓi, ni fulufhele Yehova.” (Ps. 4:5) Zwidzimu zwe Vhaisiraele vha vha vha tshi zwi ṋekedza Yehova zwo vha zwi tshi vha zwa ndeme fhedzi arali vho vha vhe na zwiṱuṱuwedzi zwavhuḓi. (Yes. 1:11-17) U itela uri Mudzimu a ṱanganedze vhurabeli hashu, na riṋe ri fanela u vha ri na zwiṱuṱuwedzi zwavhuḓi nahone ri tshi mu fulufhela tshoṱhe.—Vhalani Mirero 3:5, 6; Vha-Heberu 13:15, 16.
20. Mubulo une wa ri ‘tshedza tsha tshifhaṱuwo tsha Yehova’ u ambela kha mini?
20 Davida o bvela phanḓa a tshi ri: “Ndi vhanzhi vhané vha ri: Ndi nnyi ane a ḓo ri vhonisa zwivhuya? Yehova, ri lavhelese tshifhaṱuwo tshau tshó tsha!” (Ps. 4:6) ‘Tshedza tsha tshifhaṱuwo tsha Yehova’ tshi ambela kha u takalelwa nga Mudzimu. (Ps. 89:15) Nga zwenezwo, musi Davida a tshi rabela a ri: “Ri lavhelese tshifhaṱuwo tshau tshó tsha,” o vha a tshi khou amba uri ‘ri ṱanganedze.’ Nga ṅwambo wa uri ri fulufhela Yehova, u a ri ṱanganedza nahone ri a takala vhukuma musi ri tshi ita zwine a zwi funa.
21. Ndi mini zwine ra nga vha na vhungoho nazwo musi ri tshi khou ṱanganela nga vhuḓalo kha mushumo wa musalauno wa khaṋo ya lwa muya?
21 Musi a tshi amba nga ha dakalo ḽi bvaho ha Mudzimu ḽine ḽa fhira ḽa musi wa khaṋo, Davida o imbela Yehova a ri: “Nd’iwe U ṋeaho mbilu yanga dakalo ḽi fhiraho ḽa musi kha vhone hó anda mavhele na tuvhu.” (Ps. 4:7) Ri nga vha na vhungoho ha uri ri ḓo takala zwi tshi bva mbiluni arali ra ṱanganela nga vhuḓalo mushumoni wa khaṋo ya lwa muya musalauno. (Luka 10:2) Samusi vha “lushaka” lwa vhaḓodzwa vhe vhone vhane vha khou ranga phanḓa, ri a takala vhukuma samusi tshivhalo tsha “vhakaṋi” tshi tshi dzula tshi tshi khou engedzea. (Yes. 9:2) Naa ni khou ṱanganela nga vhuḓalo kha mushumo wonoyo wa khaṋo?
Dzulani Ni Tshi Fulufhela Tshoṱhe Mudzimu
22. U tendelana na zwi re kha Psalme ya 4:8, ndi mini zwe zwa itea kha Vhaisiraele musi vha tshi thetshelesa Mulayo wa Mudzimu?
22 Davida u phetha psalme yeneyi nga maipfi ane a ri: “Ndi ḓo ḓi lala nda eḓela khofhe ndó rula mbilu, ngauri a ndzudzaho ho khudaho ndi Iwe Yehova.” (Ps. 4:8) Musi Vhaisiraele vha tshi thetshelesa Mulayo wa Yehova, vho vha vhe na mulalo nae, nahone vha tshi ḓipfa vho tsireledzea. Sa tsumbo, misini ya vhuvhusi ha Salomo “ḽa Yuda na ḽa Isiraele ḽo vha ḽo lala.” (1 Dzikh. 4:25) Vho fulufhelaho Mudzimu vho vha vha tshi ḓiphina nga mulalo naho tshakha dza tsini dzo vha dzi maswina avho. Na riṋe ri eḓela ri na mulalo u fana na Davida ngauri Mudzimu u ita uri ri ḓipfe ro tsireledzea.
23. Ndi mini zwine ra ḓo zwi tshenzhela arali ri tshi fulufhela tshoṱhe Mudzimu?
23 Kha ri dzule ri tshi shumela Yehova. U nga ri ri nga vha na fulufhelo musi ri tshi rabela, nahone nga u ralo ri ḓo tshenzhela “mulalo wa Mudzimu, [u] fhiraho u ṱalukanya hoṱhe.” (Vha-Fil. 4:6, 7) Zwenezwo zwi ḓo ri ḓisela dakalo ḽihulwane vhukuma. Nahone ri nga kona u sedza phanḓa kha vhumatshelo ri na fulufhelo arali ra dzula ri tshi fulufhela tshoṱhe Yehova.
Ni Ḓo Aravha Hani?
• Davida o sedzana na thaidzo dzifhio nga ṅwambo wa Abesalomo?
• Psalme ya vhuraru i ita uri ri ḓipfe ro tsireledzea nga nḓila-ḓe?
• Psalme ya vhuṋa i khwaṱhisa u fulufhela hashu Yehova nga nḓila dzifhio?
• Ri vhuyelwa hani nga u fulufhela tshoṱhe Mudzimu?
[Mbudziso dza Pfunzo]
[Tshifanyiso kha siaṱari 29]
Naho o vha a tshi khou shavha Abesalomo, Davida o vha a tshi fulufhela Yehova
[Zwifanyiso kha siaṱari 32]
Naa ni a fulufhela tshoṱhe Yehova?