Muṱangano Une Wa Sa Ḓo Vhuya Wa Vuwa Wo Hangwiwa

“MUSI wonoyu muṱangano u tshi fhela, ni ḓo ri, ‘I ngoho hoyu ndi muṱangano wa ṅwaha une wa sa ḓo vhuya wa vuwa wo hangwiwa!’” Musi a tshi amba eneo maipfi Stephen Lett wa Tshigwada tshi Langaho tsha Ṱhanzi dza Yehova o ita uri vha re henefho muṱanganoni vha lavhelele nga maṱo matswuku zwe zwa vha zwi tshi ḓo itea. Vho vha vho kuvhangana kha muṱangano wa vhu-126 wa ṅwaha muṅwe na muṅwe wa Watch Tower Bible and Tract Society of Pennsylvania, we wa farwa nga ḽa 2 October, 2010, Holoni ya Guvhangano ya Ṱhanzi dza Yehova, Ḓoroboni ya Jersey, ngei New Jersey, U.S.A. Ndi zwifhio zwithu zwi swayeaho zwe zwa vha hone kha tshenetshi tshiitea tsha ndeme vhukuma?

Wahashu Lett o vula nga nyambo i fhisaho ye khayo a haseledza nga ha goloi ya ṱaḓulu ya Yehova, ye ya ṱaluswa kha bugu ya Bivhili ya Hesekiele. Yeneyo goloi khulwane ya vhugala i imela ndangulo ya Mudzimu ine ya khou langiwa tshoṱhe nga Yehova. Wahashu Lett o amba uri tshipiḓa tsha ṱaḓulu tsha ndangulo yeneyo tshi na zwivhumbiwa zwa muya, nahone tshi gidima nga luvhilo luhulwane vhukuma—lu fanaho na nḓila ine Yehova a humbula ngayo. Tshipiḓa tsha kha ḽifhasi tsha ndangulo ya Yehova Mudzimu na tshone tshi khou gidima nga luvhilo lu fanaho. Wahashu Lett o amba nga ha zwithu zwi takadzaho zwine zwa khou itea kha tshipiḓa tsha ndangulo ya Mudzimu i re kha ḽifhasi miṅwahani ya zwenezwino.

Sa tsumbo, madavhi manzhi a khou ṱanganywa, nahone zwenezwo zwi ita uri vhahashu vhanzhi vhe vha vha vha tshi shuma Bethele kha eneo mashango vha kone u livhisa ṱhogomelo kha mushumo wa u huwelela. Wahashu Lett o ṱuṱuwedza vha re muṱanganoni wonoyo uri vha dzule vha tshi rabelela Tshigwada tshi Langaho samusi tshi muimeleli wa tshigwada tsha mukoma, uri tshi kone u dzula tshi tshi fulufhedzea, na u ita zwithu nga vhuṱali.—Mat. 24:45-47.

Mivhigo I Ṱuṱuwedzaho Na Khaseledzo Dzi Kwamaho Mbilu

Tab Honsberger, ane a shuma kha Komiti ya Davhi ḽa ngei Haiti o ṋea muvhigo u kwamaho mbilu malugana na zwe zwa itea musi hu tshi vha na mudzinginyo nga ḽa 12 January, 2010, we khawo ha anganyelwa uri ho fa vhathu vha ṱoḓaho u vha 300-000 shangoni ḽeneḽo. O amba uri vhafunzi vho vha vha tshi khou vhudza vhathu uri Mudzimu o ṱarafa vhenevho vhathu nga nṱhani ha u sa vha na lutendo, nahone o tsireledza vhathu vho lugaho. Fhedzi ho vha hu na zwivhotshwa zwinzhi-zwinzhi zwe zwa bva dzhele musi mbondo dzi tshi wa nga nṱhani ha mudzinginyo wonoyo. Vhathu vha ngei Haiti vha khou khuthadzwa nga u guda mafhungo-ngoho malugana na zwine zwa ita uri ri tshile zwifhingani zwi lemelaho nga yeneyi nḓila. Wahashu Honsberger o redza muṅwe wahashu a fulufhedzeaho wa ngei Haiti we a felwa nga mufumakadzi wawe kha khombo yeneyo we a ri: “Ndi kha ḓi lila na ṋamusi. A thi ḓivhi uri ndi ḓo guma lini u lila, fhedzi ndi takadzwa nga u ḓivha uri ndangulo ya Yehova i na lufuno. Ndi na fulufhelo nahone ndo  ḓiimisela u vhudza vhaṅwe uri na vhone vha vhe naḽo.”

Mark Sanderson, ane zwino a vha muraḓo wa muṱa wa Bethele ya Brooklyn o ṋea muvhigo nga ha Philippines. O vhuya a vha muraḓo wa Komiti ya Davhi ya henefho nahone o takalela vhukuma u amba nga ha nyengedzeo ya vhahuweleli vha Muvhuso ye ya itea lwa 32 nga u tou tevhekana kha ḽeneḽo shango, na nḓila ye pfunzo dza Bivhili dza vha nnzhi ngayo u fhira mbalo ya vhahuweleli. O amba nga ha wahashu ane a pfi Miguel we ha vhulahwa muḓuhulu wawe. Miguel o ita zwoṱhe zwe a vha a tshi nga kona u itela uri muvhulahi onoyo a fariwe na u valelwa dzhele. Nga murahu musi a tshi khou huwelela dzhele, Miguel o ṱangana na onoyo muvhulahi. Naho Miguel o vha o tshuwa, o amba nae o dzika nga vhulenda. O fheleledza o guda na onoyo munna we a takalela mafhungo-ngoho a guma a tshi vho funa Yehova. Zwino o no lovhedzwa. Miguel ndi khonani yawe ya tsini nahone u khou lingedza u ita uri onoyo murathu wawe muswa a bve dzhele nga u ṱavhanya. *

Mark Noumair mugudisi wa kha Muhasho wa Zwikolo zwa Lwa Ṱaḓulu, ndi ene we a tevhela kha mbekanyamushumo yeneyo a tshi khou ita khaseledzo ine ya livhisa ṱhogomelo kha vhubvo ha ane a khou haseledzwa nae. O haseledza na vhavhingani vhararu—Alex na Sarah Reinmueller, David na Krista Schafer, na Robert na Ketra Ciranko. Alex Reinmueller, ane a thusa kha Komiti ya Vhagandisi, o amba nga ha nḓila ye a ita ngayo uri mafhungo ngoho a vhe awe musi a tshi kha ḓi vulanḓila ngei Canada e na miṅwaha ya 15, nahone zwifhinga zwinzhi a tshi shuma e eṱhe. Musi a tshi vhudziswa nga ha zwe zwa mu kwama vhukuma Bethele, Wahashu Reinmueller o amba nga ha vhahashu vhararu vha fulufhedzeaho, nahone a sumbedza nḓila ye muṅwe na muṅwe wavho a mu thusa ngayo uri a aluwe nga lwa muya. Mufumakadzi wawe Sarah, o amba nga ha vhukonani hawe na muṅwe wahashu wa tshisadzini we a konḓelela mahumi a miṅwaha e dzhele dza China nga nṱhani ha lutendo lwawe. Sarah o amba uri o guda u ḓitika nga Yehova nga thabelo.

David Schafer, ane a thusa kha Komiti ya U Funza, o khoḓa mme awe nge vha vha vhe na lutendo lwo khwaṱhaho nahone o amba nga vhakomana vhawe vhe vha vha vha tshi shuma u rema miri na vhe vha mu thusa uri a kone u vha muvulanḓila wa u thusa musi a tshee muswa. Mufumakadzi wawe Krista, o amba nga lufuno nga ha nḓila ye miraḓo ya vhaaluwa ya muṱa wa Bethele ya mu ṱuṱuwedza ngayo nge ya sumbedza u vha vhathu vha “fulufhedzeaho kha zwithu zwiṱuku,” u fana na nḓila ye Yesu a eletshedza ngayo.—Luka 16:10.

Robert Ciranko, ane a thusa kha Komiti ya Vhuṅwaleli, o amba nga ha vhomakhulu wawe mubeba khotsi na mubeba mme, vhe vha vha vha tshi bva ngei Hungary nahone vhe Vhakriste vho ḓodzwaho. Musi a tshe muṱuku, o takala vhukuma musi a tshi ya mabuthanoni mahulwane nga vho-1950  he a guda hone uri ndangulo ya Yehova yo vha i khulwane vhukuma u fhira tshivhidzo tsha hawe. Mufumakadzi wawe Ketra, o amba nga ha nḓila ye a guda ngayo u fulufhedzea musi e tshivhidzoni he vhathu vhanzhi kha tshenetsho tshivhidzo vha vha vhagunei nahone hu na dziṅwe thaidzo. O konḓelela nahone mafheleloni a avhelwa u yo vha muvulanḓila o khetheaho kha tshiṅwe tshivhidzo tshe tsha vha tshi na vhuthihi he ha mu kwama mbilu.

Ho mbo ḓi tevhela Manfred Tonak we a ṋea muvhigo nga ha Ethiopia. Shango ḽeneḽi ḽi a ambiwa Bivhilini, nahone zwino ḽo fhaṱutshedzwa nga vhahuweleli vha mafhungo maḓifha vha fhiraho 9 000. Vhunzhi havho vha dzula ḓoroboni khulwane ya Addis Ababa kana tsini nayo. Hu na ṱhoḓea khulwane ya vhahuweleli fhethu hu re kule na ḓorobo. U itela u piringulula honoho vhuleme ho rambiwa Ṱhanzi dza Vhaetiopia dzi dzulaho kha maṅwe mashango uri dzi ḓe u dala henefho u itela uri dzi huwelele zwipiḓani zwi re kule na ḓorobo shangoni ḽeneḽo. Ho ḓa Ṱhanzi nnzhi, dza ṱuṱuwedza Ṱhanzi dza henefho nahone vha wana vhathu vhanzhi vhe vha thetshelesa mulaedza.

Tshipiḓa tshi swayeaho vhukuma kha mbekanyo mushumo yeneyo ndi nyambo ya mutevheṱhaḓu nga ha Ṱhanzi dza Yehova dza ngei Russia na nndwa dzavho na vha mulayoni. Aulis Bergdahl wa Komiti ya Davhi ngei Russia o amba nga ha ḓivhazwakale ya u tovholwa ha Ṱhanzi ngei Russia zwihulu-hulu ngei Moscow. Philip Brumley ane a shuma kha Muhasho wa zwa Mulayo davhini ḽa United States o amba nga ha zwiitea zwi nyanyulaho zwa miṅwedzini ya zwenezwino musi European Court of Human Rights (ECHR) i tshi thetshelesa milandu ya ṱahe ye Ṱhanzi dza pomokwa yone. Khothe yo wana uri milandu yeneyo yoṱhe ya ṱahe yo vha i sa ḓadzi mudzio, nahone kha milandu yo vhalaho khothe yo ita na vhuḓidini ho engedzeaho u itela u sumbedza uri zwe vha pomokwa zwo vha zwi si zwone. Naho vho vha vha tshe vho lindela tsheo ya Khothe, Wahashu Brumley o amba e na fulufhelo nga ha nḓila ye tsheo yeneyo ya vha i tshi ḓo kwama ngayo milandu ya kha maṅwe mashango.

Musi ho no ḓivhadzwa nga ha enea mafhungo a takadzaho vhukuma, Wahashu Lett o ita nḓivhadzo ya uri ECHR yo vhona zwo tea uri hu thetsheleswe mulandu we wa fhedza tshifhinga tshilapfu wa muthelo une wa katela muvhuso wa Fura na Ṱhanzi dza Yehova. Yeneyi Khothe ine ya ṱhonifhiwa vhukuma i tenda u thetshelesa milandu i si gathi fhedzi ine ya ḓiswa khayo. U swika zwino ECHR yo no thetshelesa milandu ya 39 ine ya katela Ṱhanzi dza Yehova, nahone vho kunda ya 37 kha yeneyo. Wahashu Lett o ṱuṱuwedza vhathu vhoṱhe vha Mudzimu uri vha dzule vha tshi rabela Yehova Mudzimu nga ha mafhungo eneo.

Richard Morlan, ane a vha mugudisi kha Tshikolo tsha Vhahulwane vha Tshivhidzo ndi ene we a ṋea muvhigo wa u fhedza. O amba nga mafulufulu nga ha tshikolo tsha vhahulwane na nḓila ye vhahulwane vhe vha ya khatsho vha sumbedza ngayo u livhuha zwi tshi bva mbiluni.

 Dziṅwe Nyambo Dza Miraḓo Ya Tshigwada tshi Langaho

Guy Pierce wa Tshigwada tshi Langaho o ṋekedza nyambo i kwamaho mbilu ye ya livhisa ṱhogomelo kha ndimana ya ṅwaha ya 2011 ine ya ri, ‘Khudani nga dzina ḽa Yehova.’ (Tsef. 3:12) O amba uri naho tshi tshifhinga tshi takadzaho nga nḓila dzo fhamba-fhambanaho kha vhathu vha Yehova, tshi dovha tsha vha tshifhinga tsha ndeme tsha u humbula nga ho dzikaho. Ḓuvha ḽihulu ḽa Yehova ḽi tsini; fhedzi vhathu vha kha ḓi bvela phanḓa vha tshi ṱoḓa vhukhudo kha vhurereli ha mazwifhi, kha madzangano a zwa politiki, kha lupfumo lwa zwithu zwi vhonalaho, kha u sa livhisa ṱhogomelo kha zwine zwa khou itea zwa vhukuma, na zwiṅwe-vho. U itela uri ri wane vhukhudo ha vhukuma ri fanela u vhidzelela dzina ḽa Yehova, zwine zwa katela u mu ḓivha, u mu ṱhonifha nga ho dzikaho, u fulufhela Muthu onoyo ane a vhidzwa nga ḽeneḽo dzina, na u mu funa nga zwoṱhe zwine ra vha nazwo.

David Splane wa Tshigwada tshi Langaho ndi ene we a tevhela na khaseledzo i itaho uri muthu a humbule nga ho dzikaho, i re na tshiṱoho tshine tsha ri “Naa No No Dzhena Vhuaweloni Ha Mudzimu?” O amba uri vhuawelo ha Mudzimu a zwi ambi uri ha khou shuma, samusi Yehova na Murwa wawe vha tshi “kha ḓi shuma” nga ḽeneḽi ḓuvha ḽa vhuawelo ha pfanyisedzo u itela uri ndivho ya Mudzimu malugana na zwithu zwe a zwi sika kha ḽifhasi i ḓadzee nga hu bvelelaho. (Yoh. 5:17) Nga zwenezwo, ri nga dzhena hani vhuaweloni ha Mudzimu? Nga u litsha u ita zwivhi na mishumo ya tseḓa. Ri fanela u sumbedza lutendo na u dzula ri tshi humbula nga ha ndivho ya Mudzimu nahone ri ite zwoṱhe zwine ra nga kona u itela u shela mulenzhe kha ndivho yeneyo. Nga zwiṅwe zwifhinga hu nga kha ḓi vha na khaedu yo khetheaho, fhedzi ri fanela u ṱanganedza ndayo na u shumisana na ndangulo ya Yehova. Wahashu Splane o ṱuṱuwedza vhathetshelesi uri vha ite zwoṱhe zwine vha nga kona u itela u dzhena vhuaweloni ha Mudzimu.

Anthony Morris wa Tshigwada tshi Langaho o ṋea nyambo ya u fhedzisa ye ya vha i na tshiṱoho tshine tsha ri “Ndi Mini Zwe Ra Zwi Lindela?” Wahashu Morris o humbudza vhathetshelesi nga ha vhuporofita vhune ha kha ḓi ḓo ḓadzea, zwiitea zwe vhoṱhe vha fulufhedzeaho vha zwi lindela nga maṱo matswuku. Zwiitea zwenezwo zwi katela uri shango ḽi vhe “ḽo lala, hó navhiwa,” na u fheliswa ha vhurereli ha mazwifhi. (1 Vha-Thes. 5:2, 3; Ndzumb. 17:15-17) Wahashu Morris o kaidza a ri ri songo ri, “Haramagedo yo swika,” musi ri tshi vhona zwiitea kha mafhungo zwine zwa sa ḓadzise vhuporofita honoho. O khuthadza vhathetshelesi uri vha vhe na mavhonele a u lindela vho takala, vha sa fheli mbilu samusi zwo ṱaluswa kha Mixa 7:7. Naho zwo ralo, nga tshifhinga tshi fanaho, o ṱuṱuwedza vhoṱhe uri vha “sendele tsini” na Tshigwada tshi Langaho, u fana na maswole ane a khou dzhena nndwani. O ri: “Khwaṱhisani dzimbilu dzaṋu, inwi noṱhe no lavhelesaho Yehova.”—Ps. 31:24.

Musi hu tshi phethiwa, ho vha na nḓivhadzo dzi nyanyulaho vhukuma kha ḓivhazwakale yoṱhe. Geoffrey Jackson wa Tshigwada tshi Langaho o ḓivhadza nga ha Tshiingamo tshi gudwaho tsha Luisimane lu sa konḓi tshine tsha ḓo lingedzwa ṅwaha muthihi fhedzi u itela vhane vha si kone u vhala na u pfesesa zwavhuḓi Luisimane. Stephen Lett o ḓivhadza uri Tshigwada tshi Langaho tshi ḓo dzudzanya nyendo dza vhulisa u itela vhalavhelesi vha tshiṱiriki na vhafumakadzi vhavho ngei United States. O dovha a amba nga ha Tshikolo tsha U Gudisa Vhuḓinḓa tshine tsha vho ḓo vhidzwa Tshikolo tsha Bivhili tsha Vhahashu Vha Tshinnani Vha Songo Vhingaho. O dovha a ḓivhadza nga ha tshiṅwe tshiswa tshine tsha vhidzwa Tshikolo tsha Bivhili tsha Vhavhingani vha Vhakriste. Tshikolo tshenetshi tshi ḓo gudisa vhavhingani zwithu zwo engedzeaho zwine zwa ḓo ita uri vha kone u shumiswa nga ndangulo ya Yehova. Wahashu Lett o dovha a ḓivhadza nga ha Tshikolo tsha Vhalavhelesi Vha Dalelaho Na Vhafumakadzi Vhavho, u katela na Tshikolo tsha Miraḓo ya Komiti ya Davhi Na Vhafumakadzi Vhavho tshine tsha ḓo ṱanḓavhudzwa tsha vha kilasi mbili nga ṅwaha ngei Patterson, nahone vhe vha vhuya vha ya khatsho vha nga dovha vha vhuyelela lwa vhuvhili.

Wahashu John E. Barr a re na miṅwaha ya 97, o no fhedzaho miṅwaha minzhi e muraḓo wa Tshigwada tshi Langaho o phetha mbekanyamushumo yeneyo nga thabelo i kwamaho ya u ḓiṱukufhadza i bvaho mbiluni. * Musi vhathu vha tshi balangana, muṅwe na muṅwe we a vha e henefho o vha na vhungoho ha uri wo vha u muṱangano une wa sa ḓo vhuya wa vuwa wo hangwiwa.

[Ṱhaluso dzi re magumoni a siaṱari]

[Maipfi o ṱumbulwaho kha siaṱari 19]

Vhathetshelesi vhoṱhe vho takalela vhukuma khaseledzo dze dza livhisa ṱhogomelo kha vhubvo ha ane a khou haseledzwa nae

[Maipfi o ṱumbulwaho kha siaṱari 20]

Yehova o fhaṱutshedza mushumo wa u huwelela ngei Ethiopia