Naa Ni A Zwi Humbula?

Naa no takalela u vhala thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:

• Ndi zwifhio zwithu zwiraru zwa ndeme zwine zwa nga ri thusa u iledza u sa fulufhedzea naho hu hufhio?

Ndi (1) U ofha Mudzimu nga nḓila yo teaho. (1 Pet. 3:12) (2) U ṱahulela u vha na luvalo lwo gudiswaho nga Bivhili. (3) U shuma nga maanḓa u itela u ḓipfa wo fushea.—4/15, masiaṱari 6-7.

• Ri zwi ḓivha hani uri u ḓiimisela tshoṱhe musi ri tshi shumela Yehova a zwi ambi u sa vha na vhukonani na u sa sea na vhaṅwe kana u iledza tshoṱhe u ḓiphina na vhaṅwe?

Kha ri ṱhogomele tsumbo ya Yesu. O ḓiphina nga zwiḽiwa na vhaṅwe vhathu. Ri a zwi ḓivha uri o vha e muthu ane a vha na vhukonani na ane a sea na vhaṅwe. Vhaṅwe vhathu, u katela na vhana vhaṱuku vho kona u sendela tsini nae na u ḓipfa vho vhofholowa musi vhe nae.—4/15, siaṱari 10.

• “Tshipfumelelo” tsho ambiwaho kha Yobo 33:24 ndi mini, nahone Yobo o vhuyelwa hani ngatsho?

Ipfi tshipfumelelo ḽi amba u fukedza. Kha Yobo tshipfumelelo tshi nga vha tsho vha tshi tshiṱhavhelo tsha tshifuwo, tshe a vha a tshi nga tshi ṱanganedza u itela u hangwela Yobo vhukhakhi hawe. Zwi tou vha khagala uri Yehova o ṱanganedza tshipfumelelo tsha Yobo, zwe zwa ita uri a hangwelwe zwivhi nahone zwa ita uri Yehova a mu fhodze na u mu lambedza. (Yobo 1:5; 42:12-17)—7/1, siaṱari 11.

• Muṱwari u re kha Vharoma ndima ya 11 wo vha u tshi fanyisela mini?

Muṱwari wo vha u tshi fanyisela tshiṅwe tshipiḓa tsha mbeu ya Isiraele wa lwa muya. Yehova u imelwa nga mudzi wa muṱwari wonoyo wa pfanyisedzo ngeno tsinde ḽi tshi imela Yesu. Musi Vhayuda vhanzhi vha lwa ṋama vha tshi landula Yesu, Vhannḓa vhe vha vha vhatendi vho kona u ṱumetshedzwa khawo, nga zwenezwo vho bveledza tshivhalo tsho fhelelaho tsha tshipiḓa tsha iṅwe mbeu ya Abrahamu.—5/15, masiaṱari 22-25.

• Ri zwi ḓivha hani uri Gehenna a si fhethu hune vhathu vha shengedzwa nga mulilo?

Mahumbulele a u fhisa vhathu vha tshi kha ḓi tshila a nengisa Yehova. (Yer. 7:31) Zwiṅwe hafhu, enea mahumbulele a u shengedza vhafu a lwisana na vhumuthu ha lufuno ha Mudzimu na zwine Bivhili ya zwi funza zwa uri vho faho “a vha na tshine vha tshi ḓivha.” (Muh. 9:5, 10)—7/1, siaṱari 15.

• Yehova u aravha hani vha “dzimbilu dzo vunḓekanaho” na vha “mimuya yo huvhalaho”? (Ps. 34:18)

U fana na mubebi ane a takula na u khuthadza ṅwana o tsikeledzeaho, Yehova u tsini na vhagwadameli vhawe vhane vha mu lilela uri a vha thuse. U lwela u vha khuthadza na u fhembeledza mbilu dzavho dzo vunḓekanaho na mimuya yavho yo huvhalaho. A nga vha ṋea vhuṱali na nungo dzi ṱoḓeaho u itela u sedzana na milingo. (2 Vha-Kor. 4:7; Yak. 1:5)—7/1, siaṱari 23.

• Arali Yesu muthu o fhelelaho a vhe na vhana, naa vho vha vha tshi ḓo vha tshipiḓa tsha tshirengululi?

Hai. Naho Yesu o vha a tshi nga vha na vhaḓuhulu vha dzibilioni vho fhelelaho, vho vha vha sa ḓo vha tshipiḓa tsha tshirengululi. Vhutshilo ha Yesu ho fhelelaho ndi hone fhedzi he ha vha vhu tshi eḓana na ha Adamu we a vha o fhelela. (1 Tim. 2:6)—6/15, siaṱari 13.

• Vhakriste vha nga sumbedza hani uri vha dzhia tsevho malugana na vhafunzi vha u zwifha i re kha Mishumo 20:29, 30 sa i re ya ndeme?

A vha ṱanganedzi vhafunzi vha u zwifha mahayani avho kana u vha lumelisa. (Vha-Roma 16:17; 2 Yoh. 9-11) Vhakriste vha iledza khandiso dza vhagunei, mbekanyamushumo dzine vhagunei vha funza khadzo, na u sedza zwine vha zwi funza kha Inthanethe.—7/15, masiaṱari 15-16.

• Ndi tshifhio tshiitisi tsha ndeme tsha u konana na vhatendi nga riṋe, samusi zwi sumbedzwa kha Luka 10:40-42?

A ri konani na vhatendi nga riṋe u itela u zwiḽiwa fhedzi, fhedzi ri konana navho u itela u ṱuṱuwedzana na u khwaṱhisana nga lwa muya. (Vha-Roma 1:11, 12) Na zwiḽiwa zwi sa ri tshithu zwi nga ita uri tshenetsho tshiitea tshi takadze.—7/1, masiaṱari 29, 30.