Naa Ni Tendela Yehova A Tshi Vha Mukovhe Waṋu?
Naa Ni Tendela Yehova A Tshi Vha Mukovhe Waṋu?
“Tsha phanḓa ṱoḓani muvhuso wa Mudzimu na u luga hawe; hezwo zwoṱhe zwi ḓo vha zwiné na ingiwa ngazwo’.”—MAT. 6:33.
1, 2. (a) “Isiraele wa Mudzimu” o bulwaho kha Vha-Galata 6:16 u imela vhafhio? (b) “Tshakha [dza] fumi na mbili dza Isiraele” dzo bulwaho kha Mateo 19:28 dzi imela vhafhio?
MUSI ni tshi pfa dzina ḽine ḽa ri Isiraele Bivhilini, ni humbula mini? Naa ni humbula nga ha Yakobo murwa wa Isaka we a irwa ḽeneḽi dzina ḽa Isiraele? Kana ni humbula nga ha vhaḓuhulu vhawe, vhane vha vha lushaka lwa Isiraele lwa kale? Kana ni humbula nga ha Isiraele wa muya? Nga lwa pfanyisedzo musi hu tshi ambiwa nga ha Isiraele hu vha hu tshi khou ambiwa nga ha “Isiraele wa Mudzimu,” vha 144 000 vho ḓodzwaho nga muya mukhethwa u itela uri vha vhe mahosi na vhotshifhe ngei ṱaḓulu. (Vha-Gal. 6:16; Ndzumb. 7:4; 21:12) Fhedzi ṱhogomelani nḓila yo khetheaho ine tshaka dza fumi na mbili dza Isiraele dza ambiwa ngayo ine ya wanala kha Mateo 19:28.
2 Yesu o ri: “Inwi no ntevhelaho, musi wa u bebwa-hafhu, musi Murwa-muthu a tshi ḓo dzula kha khuluṋoni ya vhurena hawe, na inwi ni ḓo dzula kha khuluṋoni [dza] fumi na mbili na sengisa tshakha [dza] fumi na mbili dza Isiraele.” Kha yeneyi ndimana, “tshakha [dza] fumi na mbili dza Isiraele” ndi vhane vha ḓo haṱulwa nga vhafunziwa vha Yesu vho ḓodzwaho, nahone ndi vhane vha ḓo wana vhutshilo vhu sa fheli kha ḽifhasi ḽa Paradiso. Vha ḓo vhuyelwa nga tshumelo ya vhotshifhe vha 144 000.
3, 4. Ndi tsumbo ifhio yavhuḓi ye ya vhewa nga vhaḓodzwa vha fulufhedzeaho?
3 U fana na vhotshifhe na Vhalevi vha kale, musalauno vhaḓodzwa vha dzhia tshumelo yavho sa ndugelo. (Num. 18:20) Vhaḓodzwa a vha lavheleli u ṋewa shango kana fhethu kha ḽifhasi uri hu vhe ndaka yavho. Nṱhani hazwo, vha lavhelela nga maṱo matswuku u vha mahosi na vhotshifhe ngei ṱaḓulu na Yesu Kristo. Vha ḓo bvela phanḓa na u shumela Yehova, samusi zwo sumbedzwa kha Ndzumbululo 4:10, 11 malugana na vhuimo ha vhaḓodzwa ngei ṱaḓulu.—Hesek. 44:28.
4 Samusi zwino vhe kha ḽifhasi, vhaḓodzwa vha tshila nga nḓila ine ya sumbedza uri Yehova ndi mukovhe wavho. Ndugelo yavho ya u shumela Mudzimu ndi ya ndeme khavho. Vha sumbedza uri vha na lutendo kha tshiṱhavhelo tsha Kristo tsha tshirengululi nahone vha bvela phanḓa vha tshi mu tevhela, nga zwenezwo, vha ‘pfumbisa u vhidzwa havho na u nangiwa havho.’ (2 Pet. 1:10) Zwiimo zwavho na vhukoni havho a zwi fani. Naho zwo ralo, a vha dzhii vhushayanungo havho sa tshiitisi tsha uri vha sa shumese tshumeloni ya Mudzimu. U fhambana na zwenezwo, vha ita uri tshumelo ya Mudzimu i vhe ya ndeme vhutshiloni havho nga u ita zwoṱhe zwine vha nga zwi kona. Nahone vha vhetshela tsumbo yavhuḓi vhane vha vha na fulufhelo ḽa u tshila kha ḽifhasi ḽa paradiso.
5. Yehova a nga vha hani mukovhe wa Vhakriste vhoṱhe, nahone ndi ngani zwenezwo zwi khaedu?
5 Hu sa londwi uri ri na fulufhelo ḽa u tshila ṱaḓulu kana kha ḽifhasi, ri fanela uri ri ‘ḓihangwe, ri hwale danda ḽashu ḽa tshengedzo ri tevhele Kristo.’ (Mat. 16:24, vhambedzani NW.) Vhathu vha dzimilioni vhane vha lavhelela u tshila kha ḽifhasi ḽa Paradiso vha gwadamela Mudzimu na u tevhela Kristo nga yeneyo nḓila. A vha fushei fhedzi nga u ita tshumelo ṱhukhu musi vha tshi vhona uri vha nga kona u ita zwo engedzeaho. Vhanzhi vho leludza vhutshilo havho nahone vha vha vhavulanḓila. Vhaṅwe vha kona u vula nḓila nga miṅwe miṅwedzi kha ṅwaha. Naho vhaṅwe vha sa koni u vula nḓila, vha a fhisea vhuḓinḓani. Vhenevho vha fana na Maria we a ḓodza Yesu mushonga u nukhelelaho. Yesu o ri: “Zwe a ṋyita ndi mushumo wavhuḓi . . . O ita zwe a kona.” (Marko 14:6-8) Zwi nga kha ḓi sa leluwa u ita zwoṱhe zwine ra nga kona nga nṱhani ha uri ri tshila shangoni ḽi vhuswaho nga Sathane. Naho zwo ralo, ri ḓiṋekedzela nga u fhisea nahone ri fulufhela Yehova. Kha ri haseledze nḓila nṋa dza u ita nga u ralo.
U Ṱoḓa Muvhuso Wa Mudzimu U Thoma
6. (a) Vhathu vha sumbedza hani uri mukovhe wavho ndi vhuno vhutshilo fhedzi? (b) Ndi ngani zwi khwine u vha na mavhonele a fanaho na a Davida?
6 Yesu o funza vhatevheli vhawe uri vha ṱoḓe Muvhuso wa Mudzimu na u luga hawe u thoma. Vhathu vha shango vha vhea madzangalelo a muthu nga eṱhe u thoma sa ‘vhane mukovhe wavho wa vha vhuno vhutshiloni.’ (Vhalani Psalme ya 17:1, 13-15.) Vhanzhi vho lwela u tshila vhutshilo ha maṱhakheni, u vha na miṱa, na u siela vhana vhavho ifa ngeno vha sa londi Musiki wavho. Mukovhe wavho u kha vhuno vhutshilo fhedzi. Kha ḽiṅwe sia, Davida o vha a tshi ṱoḓa u ḓiitela “dzina ḽavhuḓi” kha Yehova, samusi nga murahu murwa wawe o ṱuṱuwedza uri roṱhe ri ite nga u ralo. (Muh. 7:1) U fana na Asafu, Davida o ṱhogomela uri u vha Khonani ya Yehova ndi zwa khwine u fhira u vhea madzangalelo awe phanḓa. O takalela u tshimbila na Mudzimu. Musalauno, Vhakriste vhanzhi vha dzhiela nṱha mishumo ya muya u fhira mishumo ya u ḓitshidza.
7. Ndi ifhio phaṱhutshedzo ye muṅwe wahashu a i wana nge a ṱoḓa Muvhuso u thoma?
7 Ṱhogomelani Jean-Claude wa ngei Riphabuliki ya Afurika Vhukati. Ndi muhulwane wa tshivhidzo o vhingaho ane a vha na vhana vhararu. Zwi a konḓa u wana mushumo kha ḽeneḽo shango, nahone vhunzhi ha vhathu vha nga ita tshiṅwe na tshiṅwe u itela uri vha songo fhelelwa nga mushumo. Ḽiṅwe ḓuvha mulanguli wawe o mu vhudza uri u fanela u thoma u shuma vhusiku—u thoma nga 6:30 nga madekwana ḓuvha ḽiṅwe na ḽiṅwe. Jean-Claude o ṱalutshedza mulanguli wawe uri nga nnḓa ha u tikedza muṱa wawe nga zwithu zwi vhonalaho, o vha a tshi fanela u vha ṱhogomela nga lwa muya. O dovha a mu ṱalutshedza uri u na vhuḓifhinduleli ha u thusa tshivhidzo. Mulanguli wawe o ri mini? O ri: “Arali na vha na mashudu na wana mushumo, ni fanela u hangwa zwithu zwoṱhe, u katela na mufumakadzi waṋu, vhana vhaṋu na thaidzo dzaṋu. Ni fanela u ṋekedzela vhutshilo haṋu kha mushumo waṋu fhedzi. Ni fanela u nanga vhukati ha mushumo na vhurereli haṋu.” Inwi no vha ni tshi ḓo ita mini? Jean-Claude o mbo ḓi humbula uri arali mushumo wa fhela, Mudzimu u ḓo mu ṱhogomela. O vha a tshi ḓo vha na mushumo munzhi tshumeloni ya Mudzimu, nahone Yehova o vha a tshi ḓo mu thusa u ṱhogomela ṱhoḓea dza muṱa wawe. Nga zwenezwo, nga vhege i tevhelaho o mbo ḓi ya miṱanganoni ya vhukati ha vhege. Nga murahu ha zwenezwo, o ḓilugisela u ya mushumoni e si na vhuṱanzi ha uri u kha ḓi vha na mushumo. Nga tshenetsho tshifhinga o mbo ḓi rwelwa luṱingo, a vhudzwa uri mulanguli wawe o pandelwa nahone ene ho ngo pandelwa.
8, 9. Ri nga edzisa hani vhotshifhe na Vhalevi vhe vha tendela Yehova a tshi vha mukovhe wavho?
8 Vhaṅwe vhe vha vhuya vha ṱoḓa u pandelwa mushumoni vha nga vha vho ḓivhudzisa uri: ‘Ndi ḓo ḓadzisa hani vhuḓifhinduleli hanga ha u vhavhalela muṱa wanga?’ (1 Tim. 5:8) Hu sa londwi uri no sedzana na khaedu i fanaho kana hai, zwi nga kha ḓi itea uri zwe na vhuya na ṱangana nazwo zwi a ni khwaṱhisedza uri a ni nga ḓo vhuya na kulea nungo arali Mudzimu e mukovhe waṋu nahone ni tshi dzhiela nṱha ndugelo yaṋu ya u mu shumela. Musi Yesu a tshi vhudza vhafunziwa vhawe uri tsha phanḓa vha ṱoḓe muvhuso wa Mudzimu, o vha khwaṱhisedza uri: ‘Hezwo zwiṅwe zwoṱhe’—zwi ngaho zwiḽiwa, zwinwiwa kana zwiambaro—ni ḓo “ingiwa ngazwo’.”—Mat. 6:33.
9 Humbulani nga ha Vhalevi, vhe vha si wane ifa ḽa shango. Samusi tshithu tsha ndeme tshe vha vha vha tshi vhilaela nga hatsho ho vha hu vhurabeli ho kunaho, u itela u wana zwithu zwi vhonalaho vho vha vha tshi ḓitika nga Yehova, we a vha vhudza uri: ‘Mukovhe wau ndi Nṋe.’ (Num. 18:20) Naho ri sa shumi thembeleni sa vhotshifhe na Vhalevi, ri nga edzisa mavhonele avho, u vha na fulufhelo ḽa uri Yehova u ḓo ri ṱhogomela. Samusi ri tshi khou tshila maḓuvhani a tsini-tsini na vhufhelo ndi zwa ndeme u fulufhela uri Mudzimu u na maanḓa a u ri ṱhogomela.—Ndzumb. 13:17.
U Ṱoḓa U Luga Ha Mudzimu U Thoma
10, 11. Vhaṅwe vho fulufhela hani Yehova kha mafhungo a mushumo wa u ḓitshidza? Ṋeani tsumbo.
10 Yesu o dovha a ṱuṱuwedza vhafunziwa vhawe uri ‘tsha phanḓa vha ṱoḓe u luga ha Mudzimu.’ (Mat. 6:33) Zwenezwi zwi amba uri ri fanela u vhea tshilinganyo tsha Yehova tsha zwo lugaho na zwi songo lugaho u thoma, ra litsha u tevhedza mavhonele a vhathu. (Vhalani Yesaya 55:8, 9.) Ni nga kha ḓi zwi humbula uri tshifhingani tsho fhiraho, vhathu vhanzhi vho vha vha tshi ṱavha fola kana u ḽi rengisa, vha tshi gudisa vhaṅwe u lwa, u bveledza kana u rengisa zwiṱhavhane. Musi vho no guda mafhungo-ngoho, vhanzhi vho khetha u ṱoḓa muṅwe mushumo u itela uri vha fanelee u lovhedzwa.—Yes. 2:4; 2 Vha-Kor. 7:1; Vha-Gal. 5:14.
11 Andrew ndi iṅwe tsumbo. Musi ene na mufumakadzi wawe vha tshi guda nga ha Yehova, vho ita phetho ya u mu shumela. Andrew o vha a tshi ḓirwa khana nga mushumo wawe, fhedzi o u litsha. Ndi ngani? Ngauri o vha a tshi shuma kha dzangano ḽine ḽa dzhia sia kha zwa politiki nahone o vha o ḓiimisela u vhea u luga ha Mudzimu u thoma. Musi a tshi litsha mushumo, o vha a tshi tou vha na tshelede ye a vha a tshi ḓo tshila ngayo miṅwedzi i si gathi fhedzi, naho o vha e na vhana vhavhili. U ya nga mavhonele a muthu, zwo vha zwi tshi vhonala u nga ha tshee na “ifa.” O ṱoḓa mushumo, a tshi fulufhela Mudzimu. Zwino ene na muṱa wawe vha nga tenda uri tshanḓa tsha Yehova a si tshipfufhi. (Yes. 59:1) Nga nṱhani ha uri vho leludza vhutshilo havho, Andrew na mufumakadzi wawe vho vha na ndugelo ya u vha tshumeloni ya tshifhinga tsho ḓalaho. Andrew o amba uri: “Fhedzi ho vha hu na zwifhinga zwe ra vha ri tshi vhilaela nga tshelede, nnḓu, mutakalo na vhulala. Yehova o dzula a tshi ri tikedza. . . . Ri nga amba uri u shumela Yehova ndi vhuḓidini vhune ha vhuyedza vhukuma.” *—Muh. 12:13.
12. Ndi mini zwine zwa ṱoḓea u itela u vhea zwilinganyo zwa Mudzimu u thoma? Ṋeani tsumbo dza hune na dzula hone.
12 Yesu o vhudza vhafunziwa vhawe a ri: “Arali ni na lutendo lu ngaho thoro ya lunonya ni nga amba na thavha iyi na ri: Ṱuwa afha U sendele fhaḽa! ya ṱuwa, na kona zwoṱhe.” (Mat. 17:20) Naa no vha ni tshi nga kona u vhea zwilinganyo zwa Mudzimu u thoma arali u ita nga u ralo zwo vha zwi tshi nga ita uri zwithu zwi konḓe? Arali ni tshi timatima, ambani na miṅwe miraḓo ya tshivhidzo. Zwi ḓo ni homolosa muyani u thetshelesa tshenzhelo dzavho.
U Livhuha Ndugiselelo Dza Yehova Dza Muya
13. Musi ri tshi fhisetshela tshumelo ya Yehova ndi mini zwine ra nga zwi lavhelela kha ndugiselelo dza lwa muya?
13 Arali ni tshi dzhiela nṱha ndugelo yaṋu ya u shumela Yehova, ni nga vha na vhungoho ha uri u ḓo ṱhogomela ṱhoḓea dzaṋu dza lwa muya na dza ṋama, samusi o ṱhogomela Vhalevi. Humbulani nga ha Davida. Naho o vha e bakoni, o vha a tshi lavhelela uri Mudzimu a mu tikedze. Na riṋe ri nga ḓitika nga Yehova musi ri tshi vhona uri a hu tshee na zwine ra nga ita. Humbulani uri musi Asafu a tshi ya “fhethu hukhethwa ha Mudzimu,” o pfesesa zwe zwa vha zwi tshi khou mu tsikeledza. (Ps. 73:17) Na riṋe ri fanela u ya kha Mudzimu, ene Tshisima tsha zwiḽiwa zwashu zwa muya. Nga zwenezwo, ri sumbedza uri ri a takalela ndugelo yashu ya u shumela Mudzimu hu sa londwi zwiimo zwashu. Nga u ita zwenezwo ri vha ri tshi khou tendela Yehova a tshi vha mukovhe washu.
14, 15. Ri fanela u ita mini musi tshedza tshi tshi vhonetshela kha maṅwe maṅwalo, nahone ndi ngani?
14 Ni ḓipfa hani musi Yehova, Tshisima tsha zwiḽiwa zwa muya tshine tsha ri vhonetshela, a tshi vhonetshela “mativha a zwiphiri a Mudzimu” ane a wanala Bivhilini? (1 Vha-Kor. 2:10-13) Ri na tsumbo yavhuḓi vhukuma ya nḓila ye muapostola Petro a aravha ngayo musi Yesu a tshi vhudza vhathetshelesi Vhawe uri: “Arali ná sa ḽa muvhili wa Murwa-muthu, na nwa malofha awe, ni nga si vhe na vhutshilo kha inwi.” Nge vhafunziwa vhanzhi vha si pfesese uri Yesu o vha a tshi khou tou fanyisa, vho ri: “Mafhungo aya a a tshuwisa; ndi nnyi ane a nga a thetshelesa?” Vha mbo ḓi “humela murahu, vha si tsha tshimbila nae’.” Petro o ri: “Murena, ri ḓo ṱuwa ra ya ha nnyi? Huufha Ú na maipfi a vhutshilo vhu sa fheli.”—Yoh. 6:53, 60, 66, 68.
15 Petro ho ngo pfesesa nga vhuḓalo zwe Yesu a zwi amba malugana na u ḽa ṋama Yawe na u nwa malofha Awe. Fhedzi onoyo muapostola o ḓitika nga Mudzimu u itela u vhonetshelwa nga lwa muya. Musi tshedza tsha lwa muya tshi tshi vhonetshela kha maṅwe mafhungo, naa ni a lingedza u pfesesa zwiitisi zwa Maṅwalo zwa tshanduko yeneyo? (Mir. 4:18) Vhaberea vha ḓanani ḽa u thoma ḽa miṅwaha vho ṱanganedza mafhungo-ngoho “vhó takala, vha vhala maṅwalo misi yoṱhe, vha tshi ṱoḓa huné a pfana na zwiné vha zwi pfa.” (Mish. 17:11) U edzisa Vhaberea zwi ḓo ita uri ni livhuhe vhukuma ndugelo yaṋu ya u shumela Yehova, zwine zwa ita uri a vhe mukovhe waṋu.
U Vhinga Murenani Fhedzi
16. Mudzimu a nga vha hani mukovhe waṋu malugana na ndaela i re kha 1 Vha-Korinta 7:39?
16 Ḽiṅwe sia ḽine khaḽo Vhakriste vha fanela u dzula vha tshi elekanya nga ha ndivho dza Mudzimu ndi nga u tevhela nyeletshedzo ya Bivhili ya u vhinga “Murenani” fhedzi. (1 Vha-Kor. 7:39) U itela uri vha tevhele yeneyi nyeletshedzo ya Mudzimu, vhanzhi vho khetha u sa vha mbinganoni. Vhathu vho raloho Mudzimu u a vha ṱanganedza. Davida o ita mini musi a tshi ḓipfa e na vhuludu hu si na we a vha a tshi nga mu thusa? O ri: “Tshililo tshanga ndi tshi shulula phanḓa ha Yehova, ndi mu vhudza zwe nda khakhedzwa ngazwo.’ Muya wanga u tshi vhó ṋoka.” (Ps. 142:1-3) Na muporofita Yeremia we a shumela Mudzimu nga u fulufhedzea lwa mahumi a miṅwaha e siho mbinganoni a nga vha o vha na maḓipfele a fanaho. Ni nga vhala nga ha tsumbo yawe kha ndima ya 8 ya bugu Ipfi ḽe Mudzimu A Ri Ṋea Ḽone A Tshi Shumisa Yeremia.
17. Muṅwe wahashu wa tshisadzini a songo vhingwaho o sedzana hani na vhuludu he a vha a tshi ita a tshi vha naho?
17 Muṅwe wahashu wa tshisadzini wa ngei United States o ri: “A si uri ndo ḓivhudza uri ndi nga si vhingwe. Ndi ḓo vhingwa musi ndi tshi wana muthu o teaho. Mme anga vhane vha si vhe Ṱhanzi vho lingedza u nṱuṱuwedza uri ndi vhingwe nga muṅwe na muṅwe ane a ḓo ḓa kha nṋe. Ndo vha vhudzisa arali vho vha vha tshi ḓo hwala vhuḓifhinduleli arali mbingano yanga ya si tshimbile zwavhuḓi. Nga murahu ha tshifhinga, vho vhona uri ndo vha ndi na mushumo wa tshifhinga tshoṱhe nahone ndo vha ndi tshi kona u ḓiṱhogomela nahone ndo takala. Vho mbo ḓi litsha u nṱuṱuwedza.” Onoyu wahashu nga zwiṅwe zwifhinga u a ḓi vha na vhuludu. O dovha a ri: “Ndi lingedza u ita uri Yehova a vhe fulufhelo ḽanga. Ha nndaṱedzi.” Ndi mini zwe zwa mu thusa uri a fulufhele Yehova? O ri: “Thabelo yo nthusa u vhona uri Mudzimu ndi wa vhukuma nahone a thi ndoṱhe. Wa Ṱaḓulu-ṱaḓulu wa fhethu hoṱhe u a nthetshelesa, ndi ḓipfa ndi na tshirunzi nahone ndo takala.” E na fulufhelo ḽa uri “mashudu a muṋei a fhira a muṋeiwa,” o ri: “Ndi lingedza uri ndi thuse vhaṅwe, ndi sa lavheleli uri vha nṋee zwiṅwe zwithu nge nda vha thusa. Ndi vha na dakalo musi ndi tshi humbula uri, ‘Ndi nga ita mini u itela u thusa onoyu muthu?’” (Mish. 20:35) Vhukuma, o tendela Yehova a tshi vha mukovhe wawe, nahone u takalela ndugelo ya u mu shumela.
18. Yehova a nga vha mukovhe waṋu nga muhumbulo ufhio?
18 Hu sa londwi uri ni kha vhuimo vhufhio, ni nga tendela Mudzimu a tshi vha mukovhe waṋu. Musi ni tshi ita nga u ralo, ni ḓo vha muṅwe wa vhathu vhawe vho takalaho. (2 Vha-Kor. 6:16, 17) Zwenezwo zwi ḓo ita uri Yehova a vhe mukovhe waṋu, samusi o vha mukovhe wa vhaṅwe tshifhingani tsho fhiraho. (Vhalani Doiteronomio 32:9, 10.) Samusi lushaka lwa Isiraele lwo vha mukovhe wa Mudzimu vhukati ha dziṅwe tshaka, a nga ni ita uri ni vhe mukovhe wawe na u ni ṱhogomela nga lufuno.—Ps. 17:8.
[Ṱhaluso i re magumoni a siaṱari]
^ phar. 11 Sedzani Awake! ya November 2009, masiaṱari 12-14.
Ni Ḓo Fhindula Hani?
Ni nga tendela hani Yehova a tshi vha mukovhe waṋu
• nga u ṱoḓa Muvhuso wa Mudzimu u thoma na u luga hawe?
• nga u sumbedza uri ni dzhiela nṱha zwiḽiwa zwa muya?
• nga u thetshelesa ndaela ya Mudzimu ya u vhinga kana u vhingwa Murenani fhedzi?
[Mbudziso dza Pfunzo]
[Maipfi o ṱumbulwaho kha siaṱari 13]
Yehova u vha mukovhe washu musi ri tshi ita uri tshumelo yawe i vhe ya ndeme
[Tshifanyiso kha siaṱari 15]
Tsumbo ya Yeremia i a ṱuṱuwedza
