Ri Konḓelele Musi Ri Tshi Gidima Kha Mbambe
Ri Konḓelele Musi Ri Tshi Gidima Kha Mbambe
“Ri konḓelele ri tshi [gidima kha mbambe, NW] yo ri fanelaho.”—VHA-HEB. 12:1.
1, 2. Muapostola Paulo o vhambedza vhutshilo ha Mukriste na mini?
ṄWAHA muṅwe na muṅwe hu gidimiwa mbambe nnzhi fhethu hunzhi. Vhane vha ḓivhidza vhomakone vha gidima kha mbambe vhe na tshipikwa tshithihi fhedzi—u kunda. Vhaṅwe vha sokou ḓigidimela vha sa khou ṱoḓa u kunda. Zwine vha zwi ṱoḓa ndi u sokou ṱhaphudza mbambe.
2 Bivhili i vhambedza vhutshilo ha Mukriste na mbambe. Muapostola Paulo o ṱalutshedza Vhakriste ngae vha ngei Korinta yeneyi mbuno musi a tshi vha ṅwalela vhurifhi ha u thoma. O ṅwala uri: “Naa a ni zwi ḓivhi zwauri, vha-ita-mbambe hu gidima vhoṱhe, dzánga ḽa waniwa nga muthihi naa? Gidimani-ha uri ni ḽi wane.”—1 Vha-Kor. 9:24.
3. Ndi ngani Paulo o amba uri hu ḓo kunda mugidimi muthihi fhedzi?
3 Naa Paulo o vha a tshi khou amba uri dzanga ḽeneḽo ḽo vha ḽi tshi ḓo waniwa nga Mukriste muthihi nahone vhaṅwe vha si ḽi wane? Na khathihi! Vhagidimi vhe vha vha vha tshi dzhenela muṱaṱisano vho vha vha tshi ḓiḓowedza na u ḓidina vhukuma u itela uri vha kunde. Paulo o vha a tshi ṱoḓa uri Vhakriste ngae vha ite vhuḓidini vhu fanaho na honoho musi vha tshi ṱoḓa vhutshilo vhu sa fheli. Nga u ita nga u ralo, vho vha vha tshi nga vha na fulufhelo ḽa u wana dzanga ḽa vhutshilo. Ngoho ndi ya uri kha mbambe ya Vhukriste vhoṱhe vhane vha ṱhaphudza mbambe vha ḓo wana ḽeneḽo dzanga.
4. Ndi mini zwine ra fanela u zwi ṱhogomela malugana na mbambe yashu?
4 Eneo ndi maipfi a ṱuṱuwedzaho, fhedzi ndi a ndeme kha vhoṱhe vhane vha vha kha mbambe ya vhutshilo ṋamusi. Ndi ngani? Ndi nga nṱhani ha uri a hu na tshine tsha nga vhambedzwa na dzanga ḽa vhutshilo ha ngei ṱaḓulu, kana kha ḽifhasi ḽa Paradiso. Ndi ngoho uri mbambe yo lapfa nahone i a konḓa; nahone nḓilani hu na zwithivheli, zwithithisi na dziṅwe khombo. (Mat. 7:13, 14) Zwi ṱungufhadzaho ndi uri vhaṅwe vho fhungudza luvhilo, vho neta, kana vho litsha u gidima. Ndi thaidzo na khombo dzifhio dzine ra ṱangana nadzo musi ri kha mbambe ya vhutshilo? Ni nga dzi iledza hani? Ni nga ita mini uri ni kone u ṱhaphudza na u kunda yeneyo mbambe?
Ri Fanela U Konḓelela Uri Ri Kunde
5. Ndi zwifhio zwe Paulo a zwi amba nga ha mbambe samusi zwo ṅwalwa kha Vha-Heberu 12:1?
5 Kha vhuṅwe vhurifhi he a vhu ṅwalela Vhakriste vha Vhaheberu vha ngei Yerusalema na Yudea, Paulo o dovha a amba nga maṅwe masia a mbambe na mitambo ya miṱaṱisano. (Vhalani Vha-Heberu 12:1.) O bula uri ndi ngani ri tshi fanela u dzhenela mbambe, na zwine ra fanela u zwi ita arali ri tshi ṱoḓa u kunda. Musi ri sa athu ṱolisisa nyeletshedzo ya Paulo yo hevhedzwaho ye a i ṅwalela Vhakriste vha Vhaheberu u itela u vhona zwine ra nga zwi guda, kha ri ṱhogomele zwe zwa ṱuṱuwedza Paulo u ṅwala honoho vhurifhi na zwe a vha a tshi khou lingedza u ṱuṱuwedza vhavhali vhawe u zwi ita.
6. Vharangaphanḓa vha vhurereli vho tsikeledza Vhakriste nga nḓila-ḓe?
6 Vhakriste vha ḓanani ḽa u thoma ḽa miṅwaha, zwihuluhulu vhe vha vha vha tshi dzula Yerusalema na Yudea, vho vha vho sedzana na milingo na thaidzo nnzhi. Vho vha vho tsikeledzwa vhukuma nga vharangaphanḓa vha vhurereli vha Vhayuda, vhe vha vha vhe na ṱhuṱhuwedzo khulwane kha vhathu. Ho vha ho no fhela miṅwaha ya mahumi mararu musi vhenevha vharangaphanḓa vha tshi pomoka Yesu Kristo nga uri u lwa na muvhuso na u ita uri a vhulahwe sa mutshinyi. Nahone vho vha vho ḓiimisela u bvela phanḓa vha tshi mu pikisa. Kha bugu ya Mishumo, ri vhala mafhungo manzhi a u shushedzwa na u vutshelwa ha Vhakriste, u bva musi hu tshi vha na zwiitea zwa vhuṱolo nga Pentekoste ya 33 C.E. Zwenezwi zwo konḓisela vhutshilo vhe vha vha vha tshi fulufhedzea.—Mish. 4:1-3; 5:17, 18; 6:8-12; 7:59; 8:1, 3.
7. Vhakriste vhe Paulo a vha ṅwalela vho vha vho sedzana na zwiimo zwifhio zwi lemelaho?
7 Zwiṅwe hafhu vhenevho Vhakriste vho tshila musi maitele a Tshiyuda a tsini na u fheliswa. Yesu o vha o vha vhudza nga ha ndozwo ye ya vha i tshi ḓo ḓela lushaka lwa Vhayuda lu sa fulufhedzei. O dovha a vhudza vhatevheli vhawe nga zwe zwa vha zwi tshi ḓo itea musi hu sa athu swika vhufhelo, na zwine vha fanela u zwi ita uri vha ponyoke. (Vhalani Luka 21:20-22.) Ngauralo, vho vha vha tshi ḓo ita mini? Yesu o vha sevha a ri: “Ḓi-thanyeleni, uri dzimbilu dzaṋu dzi sa ḓo lemedzwa nga vhupangwa na nga u nwesa na nga u vhilaelela vhutshilo vhuno, ḓuvha heḽo ḽa vhilula u ni ḓela.”—Luka 21:34.
8. Ndi mini zwe zwa vha zwi tshi nga ita uri vhaṅwe Vhakriste vha fhungudze luvhilo kana vha netiswe nga mbambe?
8 Musi Paulo a tshi ṅwalela Vhaheberu vhurifhi, ho vha ho no fhela miṅwaha i ṱoḓaho u vha 30 u bva tshee Yesu a ṋea yeneyo tsevho. U fhira ha tshifhinga zwo kwama hani vhenevho Vhakriste? Vhaṅwe vho tendela u kundwa nga mitsiko na zwithithisi zwa vhutshilo ha ḓuvha ḽiṅwe na ḽiṅwe lwe vha si ite mvelaphanḓa ya muya ye ya vha i tshi ḓo vha khwaṱhisa. (Vha-Heb. 5:11-14) Vhaṅwe vho vhona uri vhutshilo vhu ḓo vha khwine arali vha sokou tevhela zwe zwa vha zwi tshi khou itwa nga vhunzhi ha Vhayuda vho vha tangaho. Vha nga kha ḓi vha vho humbula uri vhenevho Vhayuda a vho ngo laṱa tshoṱhe Mudzimu nga nṱhani ha uri vho vha vha tshi kha ḓi tevhela miṅwe Milayo. Vhaṅwe Vhakriste vho ṱuṱuwedzwa kana u shushedzwa nga vhaṅwe tshivhidzoni vhe vha vha vha tshi fhisetshela Mulayo wa Mushe na sialala. Ndi zwifhio zwe Paulo a vha a tshi nga zwi amba u itela u thusa vhahawe vha Vhakriste uri vha dzule vho fhaṱuwa muyani na u konḓelela kha mbambe?
9, 10. (a) Ndi afhio maipfi a ṱuṱuwedzaho ane ra a wana mafheleloni a ndima ya vhufumi ya bugu ya Vhaheberu? (b) Ndi ngani Paulo o ṅwala nga ha mishumo ya u fulufhedzea ya ṱhanzi dza kale?
9 Zwi a takadza u vhona nḓila ye Paulo a lwela ngayo u khwaṱhisa Vhakriste vha Vhaheberu, a tshi shumiswa nga muya mukhethwa. Kha ndima ya vhufumi ya vhurifhi hawe, Paulo o sumbedza uri Mulayo wo vha u “murunzi fhedzi wa madzanga a tsha ḓi ḓo ḓa” nahone o sumbedza zwavhuḓi uri tshiṱhavhelo tshi rengululaho tsha Kristo tsho vha tshi tsha ndeme. Mafheleloni a yeneyo ndima, Paulo o ṱuṱuwedza vhavhali vhawe uri: “Hu funa ní sa fheli mbilu, uri ni tshi ita zwiné Mudzimu a zwi funa ni fhiwe zwe a amba nga mbavhalelo a ri: Hú si kale hu ḓo ḓa we a pfi u ḓo ḓa, ha nga lengi.”—Vha-Heb. 10:1, 36, 37.
10 Kha Vhaheberu ndima ya 11, Paulo a ṱalutshedza nga vhutsila zwine u vha na lutendo lwa vhukuma kha Mudzimu zwa vha zwone. Nahone o zwi sumbedza nga tsumbo dza kale dza vhanna na vhafumakadzi vha re na lutendo. Ndi ngani Paulo o litsha u amba nga mafhungo a mbambe a vho amba nga a lutendo? Onoyo muapostola o vha a tshi zwi ḓivha uri vhagwadameli ngae vho vha vha tshi fanela u ḓivha uri lutendo lu ṱoḓa uri muthu a vhe na tshivhindi nahone a konḓelele. Tsumbo yavhuḓi vhukuma ya vhashumeli vha Yehova vha fulufhedzeaho vha kale yo vha i tshi ḓo khwaṱhisa Vhaheberu uri vha kone u sedzana na milingo na thaidzo. Nga zwenezwo, musi a tshi fhedza u amba nga mishumo ya lutendo ya vhenevho vhathu vha fulufhedzeaho vha tshifhingani tsho fhiraho, Paulo o vha a tshi nga amba uri: “Nge ra vha na gole ḽoṱhe ḽingafha ḽa dziṱhanzi dzo ri tangaho, kha ri laṱe muhwalo woṱhe na zwivhi zwi ṱavhanyaho u ri tanga, ri konḓelele ri tshi [gidima mbambe, NW] yo ri fanelaho.”—Vha-Heb. 12:1.
‘Gole Ḽa Dziṱhanzi’
11. U elekanya nga ha ‘gole ḽa dziṱhanzi’ zwi nga ri kwama hani?
11 ‘Gole ḽihulu ḽa dziṱhanzi’ a si vhathu vho sokou ḓiimelaho kana vhaṱaleli, u fana na vhaṱaleli vho ḓaho u vhona mbambe kana tshigwada tshine vha tshi funa tshi tshi kunda. Nṱhani hazwo, na vhone vha ṱanganela kha mbambe. Vho gidima nga nḓila i bvelelaho nahone vha ṱhaphudza yeneyo mbambe. Tsumbo yavho i nga ṱuṱuwedza vhaṅwe uri vha bvele phanḓa vha tshi gidima kha mbambe. Edzani u humbula uri mugidimi o vha a tshi ḓo ḓipfa hani arali a tshi ḓivha uri o tangwa nga vhaṱaleli vhe vha vha vhe vhomakone kha zwa u gidima. Zwi tou vha khagala uri o vha a tshi ḓo gidima vhukuma. Ṱhanzi dza tshifhingani tsha kale dzo vha dzi tshi nga ṋea vhuṱanzi ha uri yeneyo mbambe ya lwa pfanyisedzo, naho i tshi konḓa yo vha i tshi nga ṱhaphudzea. Nga zwenezwo, musi Vhakriste vha Vhaheberu vha ḓanani ḽa u thoma ḽa miṅwaha vha tshi elekanya nga tsumbo ya ‘gole ḽa dziṱhanzi,’ vho vha vha tshi nga ṱuṱuwedzea na ‘u konḓelela musi vha tshi gidima kha mbambe’—na riṋe ri nga ṱuṱuwedzea ṋamusi.
12. Tsumbo dze dza ambiwa nga Paulo dzi ri vhuyedza hani?
12 Vhathu vhanzhi vha fulufhedzeaho vhe Paulo a amba nga havho vho sedzana na zwiimo zwi fanaho na zwashu. Sa tsumbo, Noaxe o tshila musi hu sa athu fheliswa shango ḽa nga phanḓa ha Maḓi Mahulu. Ri khou tshila tsini na vhufhelo ha ano maitele a zwithu. Abrahamu na Sara vho vhudzwa uri vha ṱutshele haya havho u itela vhurabeli ha ngoho na u lindela mafulufhedziso a Yehova a tshi ḓadzea. Na riṋe ri ṱuṱuwedzwa uri ri ḓikumedze u itela uri ri takalelwe nga Yehova na u wana phaṱhutshedzo. Mushe o tshimbila sogani a tshi ya Shangoni ḽo Fulufhedziswaho. Na riṋe ri khou tshimbila kha ano maitele ane a ḓo fheliswa, ri nḓilani ya u ya shangoni ḽiswa ḽo fulufhedziswaho. Zwithu zwe vhenevha vhathu vha ṱangana nazwo, u bvelela havho na u kundwa havho, nungo dzavho na vhushayanungo havho, ndi zwithu zwine zwa nga ri vhuyedza vhukuma.—Vha-Roma 15:4; 1 Vha-Kor. 10:11.
Ndi Mini Zwe Zwa Ita Uri Vha Bvelele?
13. Ndi khaedu dzifhio dze Noaxe a ṱangana nadzo, nahone ndi mini zwe zwa ita uri a kone u sedzana nadzo?
13 Ndi mini zwe zwa ita uri vhashumeli vha Yehova vha konḓelele na u kunda kha mbambe? Ṱhogomelani zwe Paulo a zwi ṅwala nga ha Noaxe. (Vhalani Vha-Heberu 11:7.) “Maḓi mahulu kha shango heḽi, [e a vha a tshi] ḓo fhedza ṋama yoṱhe” ho vha hu zwithu zwe Noaxe a vha a ‘sa athu zwi vhona.’ (Gen. 6:17) Ho vha hu zwithu zwi sa athu vhuya zwa itea. Naho zwo ralo, Noaxe ho ngo zwi dzhia sa zwithu zwi sa konadzei kana zwi sa itei. Ndi ngani zwo ralo? Ndi ngauri o vha a tshi tenda uri zwoṱhe zwine Yehova a amba, u ḓo zwi ita. Noaxe o vha a sa zwi dzhii zwi tshi konḓa u ita zwe a vha o humbelwa zwone. Nṱhani hazwo, o “tevhedza he a laiwa ngaho’.” (Gen. 6:22) Musi ri tshi ṱhogomela zwoṱhe zwe Noaxe a vha a tshi fanela u zwi ita—u fhaṱa gugwa, u kuvhanganya zwipuka, u hwala zwiḽiwa a tshi zwi isa gungwani u itela zwipuka na vhathu, u huwelela mulaedza wa tsevho, na u ita uri muṱa wawe u dzule wo khwaṱha nga lwa muya—zwo vha zwi sa leluwi u “tevhedza he a laiwa ngaho.” Naho zwo ralo, lutendo na u konḓelela zwa Noaxe zwo ita uri a tshidzwe nahone a fhaṱutshedzwe na muṱa wawe.
14. Abrahamu na Sara vho konḓelela milingo ifhio, nahone ri guda mini kha zwenezwo?
14 Abrahamu na Sara na vhone vho bulwa kha mutevhe wa Paulo wa ‘gole ḽa ṱhanzi dzo ri tangaho.’ Vho ṱutshela vhutshilo havho ho ḓoweleaho ngei Uri, nahone vho vha vha sa ḓivhi uri vhumatshelo ho vha farela mini. Vho vha tsumbo dzavhuḓi dza u vha na lutendo lwo khwaṱhaho nahone vho thetshelesa na musi zwithu zwi tshi khou konḓa. Nga nṱhani ha uri Abrahamu o vha o ḓiimisela u ḓidzima zwiṅwe zwithu u itela vhurabeli ha ngoho, zwo vha zwo tea uri a vhidzwe “khotsi-a vhoṱhe vha tendaho.” (Vha-Roma 4:11) Paulo ho ngo ambesa nga ha Abrahamu nga nṱhani ha uri vhavhali vhawe vho vha vha tshi ḓivha nga ha vhutshilo ha Abrahamu. Naho zwo ralo, ri guda zwithu zwa ndeme kha zwe Paulo a zwi amba: “Vhenevho vhoṱhe [u katela Abrahamu na muṱa wawe] vho fa vhó tenda, vhá songo ṱanganedza zwe vha vhavhalelwa; vho zwi vhona zwí kule vha zwi takalela, vha bula vha ri: ri vhafhiri, ri vhatsinda shangoni ḽino.” (Vha-Heb. 11:13) Zwi tou vha khagala uri lutendo lwavho na vhushaka havho na Mudzimu zwo vha thusa uri vha kone u konḓelela musi vha tshi gidima kha yeneyi mbambe.
15. Ndi mini zwe zwa ṱuṱuwedza Mushe u tshila nga nḓila ye a tshila ngayo?
15 Mushe ndi muṅwe a re tsumbo kha ‘gole ḽa dziṱhanzi’ ḽa vhashumeli vha Yehova. Mushe o ṱutshela lupfumo na maimo, “a ḓi-nangela u ṱhuphea na vhathu vha Mudzimu.” Ndi mini zwe zwa mu ṱuṱuwedza u ita nga u ralo? Paulo o fhindula a ri: “Ó lavhelesa malamba ané a ḓo a wana. . . . A pika Uyo a sa vhonwiho, a nga u khou mu vhona.” (Vhalani Vha-Heberu 11:24-27.) Mushe ho ngo fhurwa nga u ṱoḓa “u ḓi-phiṋa nga zwivhi vhutshiloni vhuno.” Mudzimu na mafulufhedziso awe zwo vha zwi zwa vhukuma kha Mushe, ndi ngazwo o vha e na tshivhindi tshihulwane nahone o konḓelela. O ita vhuḓidini ha u ranga phanḓa Vhaisiraele uri vha bve Egipita vha ye Shangoni ḽo Fulufhedziswaho.
16. Ndi ngani Mushe a songo ṅala nge a si tendelwe u dzhena Shangoni ḽo Fulufhedziswaho?
16 U fana na Abrahamu, Mushe ho ngo vhona mafulufhedziso a Mudzimu a tshi ḓadzea misini yawe. Musi Vhaisiraele vho no ḓilugisela u dzhena Shangoni ḽo Fulufhedziswaho, Mushe o vhudzwa uri: “Shango ḽine nda ḓó ḽi ṋea Vha-Isiraele U ḓo ḽi vhona ḽi phanḓa hau; hone, u dzhena a U nga dzheni.” Zwenezwo zwo itiswa ngauri ene na Aroni vho sinyuswa nga vhathu vha mashandukwa, nahone ‘maḓini a tshikhuna, vho laṱa Mudzimu vhe vhukati ha Vha-Isiraele.’ (Doit. 32:51, 52) Naa Mushe o ṅala nahone a sinyuwa? Hai. O ḓivhadza vhenevho vhathu nga ha phaṱhutshedzo nahone a phetha nga haya maipfi: “U wa mashudu, Isiraele, a huna ane a nga iwe, Lushaka lwe lwa tshidzwa nga Yehova. Tshiṱangu tshau ndi Ene Mupileli, Pfumo ḽe ḽa U lwela vhurena.”—Doit. 33:29.
Zwine Ra Zwi Guda
17, 18. (a) Musi ri tshi khou gidima kha mbambe yashu ya vhutshilo, ndi mini zwine ra nga zwi guda kha ‘gole ḽa dziṱhanzi’? (b) Ndi mini zwine ra ḓo zwi haseledza theroni i tevhelaho?
17 Musi ri tshi ṱolisisa vhutshilo ha vhaṅwe vhathu vhane vha vhumba ḽeneḽi ‘gole ḽa dziṱhanzi ḽo ri tangaho,’ zwi tou vha khagala uri u itela uri ri kone u gidima u swikela ri tshi fhedza kha yeneyi mbambe, ri fanela u vha na lutendo lwo khwaṱhaho kha Mudzimu na mafulufhedziso awe. (Vha-Heb. 11:6) Ri fanela u sumbedza lutendo kha masia oṱhe a vhutshilo hashu. U fhambana na vhathu vha si na lutendo, vhashumeli vha Yehova vha kona u fulufhela zwithu zwi sa athu itea. Ri kona u vhona “uyo a sa vhonwiho” nahone ra konḓelela u gidima kha mbambe.—2 Vha-Kor. 5:7.
18 Mbambe ya Vhukriste a i leluwi. Naho zwo ralo, zwi a konadzea uri ri ṱhaphudze yeneyi mbambe nga hu bvelelaho. Theroni i tevhelaho ri ḓo haseledza nga ha iṅwe thuso ine ra nga i wana.
Naa Ni Nga Ṱalutshedza?
• Ndi ngani Paulo o ṅwala mafhungo manzhi nga ha ṱhanzi dzi fulufhedzeaho dza kale?
• U elekanya nga ha ‘gole ḽa ṱhanzi dzo ri tangaho’ zwi ri ṱuṱuwedza hani uri ri konḓelele u gidima kha mbambe?
• Ndi mini zwe na zwi guda kha ṱhanzi dzi fulufhedzeaho sa Noaxe, Abrahamu, Sara na Mushe?
[Mbudziso dza Pfunzo]
[Tshifanyiso kha siaṱari 19]
Abrahamu na Sara vho vha vho ḓiimisela u ṱutshela vhutshilo havhuḓi shangoni ḽa Uri
