Kha Ri Takale Roṱhe!

DAKALO ḽi a konḓa u wanala. Kha vhathu vhanzhi u vha na khaseledzo i nyanyulaho zwi nga vhonala zwi si tsha konadzea. Ṋamusi, zwihuluhulu ḓoroboni khulwane, vhathu a vha tshee na dzangalelo kha vhaṅwe nahone vha a ḓifhambanya na vhaṅwe vhathu.

Muṅwe Muphurofesa wa zwa Muhumbulo ane a pfi Alberto Oliverio o ri: “U vha na vhuludu ndi zwithu zwo ḓoweleaho, ndi ngazwo zwi sa mangadzi uri fhethu hu re na zwifhaṱo zwihulwane hu ita uri vhathu vha ḓifhambanye na vhaṅwe. Kha zwiitea zwinzhi, zwi ita uri vhathu vha si tsha londa vhutshilo ha muthu ane vha shuma nae, muhura wavho, kana murengisi ane a shuma vhengeleni ḽa nga tsini.” U ḓifhambanya honoho hu ita uri muthu a tsikeledzee.

Naho zwo ralo, Vhakriste nga riṋe vha na mavhonele o fhambanaho na eneo. Muapostola Paulo o ṅwala uri: “Dzulani nó takala hoṱhe!” (1 Vha-Thes. 5:16) Hu na zwiitisi zwinzhi zwa uri ri dzule ro takala. Ri gwadamela Mudzimu wa Ṱaḓulu-ṱaḓulu, Yehova, ri a pfesesa mulaedza u re Bivhilini wa mafhungo-ngoho; ri na fulufhelo ḽa u tshidzwa na u tshila nga hu sa fheli;  nahone ri nga thusa vhaṅwe uri na vhone vha wane dzenedzo phaṱhutshedzo.—Ps. 106:4, 5; Yer. 15:16; Vha-Roma 12:12.

U takala na vhaṅwe ndi zwiṅwe zwa zwithu zwine zwa sumbedza uri ri Vhakriste vha ngoho. Ndi ngazwo zwi sa mangadzi uri Paulo o ṅwalela Vhafilipi uri: “Ndó takala, na hone ndi takala na inwi noṱhe. Izwo-ha na inwi takalani, ni takale na nṋe.” (Vha-Fil. 2:17, 18) Henefha, nga ndimana mbili fhedzi, Paulo o dovholola uri ri fanela u takala na vhahashu.

Vhakriste vha fanela u ṱhogomela uri vha si ḓifhambanye na vhaṅwe. A hu na muthu ane a ḓifhambanya na vhaṅwe ane a nga takala na vhaṅwe vhatendi ngae. Ngauralo, ri nga tevhela hani khadeledzo ya Paulo ya u ‘takala Murenani’ na vhahashu?—Vha-Fil. 3:1.

Takalani Na Vhatendi Nga Inwi

Musi Paulo a tshi ṅwalela Vhafilipi vhurifhi, zwi vhonala u nga o vha o valelwa Roma nga nṱhani ha u huwelela. (Vha-Fil. 1:7; 4:22) Fhedzi u valelwa hawe a ho ngo ita uri a si tsha fhisea vhuḓinḓani. Nṱhani hazwo, o takalela u shumela Yehova u ya nga he a vha a tshi kona ngaho na u “tou tevhulwa sa thevhula.” (Vha-Fil. 2:17) Mavhonele a Paulo a sumbedza uri dakalo a ḽi bveledzwi nga zwiimo zwine muthu a vha khazwo. Hu sa londwi uri o vha e dzhele, o amba uri: ‘Ndi ḓo dzula ndo takala.’—Vha-Fil. 1:18.

Ndi Paulo we a thoma tshivhidzo tsha Filipi nahone o vha a tshi funa vhahawe vha Filipi. O vha a tshi zwi ḓivha uri u takala na vhaṅwe tshumeloni ya Yehova zwo vha zwi tshi ḓo vha ṱuṱuwedza. Ndi ngazwo o ṅwala uri: “Hone ndi funa ni tshi zwi ḓivha, vharathu, uri zwanga ngeno zwo simesa u bveledza mafhungo-maḓifha phanḓa, Zwo vhuya zwa vhonala thondoni yoṱhe na masiani maṅwe oṱhe zwauri mbofho dzanga ndi dza ha Kristo.” (Vha-Fil. 1:12, 13) U vhudza hawe vhaṅwe yeneyi tshenzhelo zwo vha zwi tshi sumbedza uri u takala na vhahawe. Na Vhafilipi vha fanela u vha vho takala nae. Naho zwo ralo, u takala havho zwo ṱoḓa uri vha si kulee nungo musi vha tshi humbula zwe Paulo a vha a tshi khou ṱangana nazwo. Nṱhani hazwo, vho vha vha tshi fanela u mu edzisa. (Vha-Fil. 1:14; 3:17) Zwiṅwe hafhu, Vhafilipi vho vha vha tshi fanela u bvela phanḓa na u rabelela Paulo na u mu tikedza nga zwe vha vha vha tshi nga kona u zwi ita.—Vha-Fil. 1:19; 4:14-16.

 Naa ri sumbedza uri ro takala u fana na Paulo? Naa ri a lwela u humbula nga ha zwithu zwavhuḓi kha zwiimo zwine ra ṱangana nazwo vhutshiloni hashu na vhuḓinḓani hashu ha Vhukriste? Musi ri tshi konana na vhahashu, ndi zwavhuḓi u takala nga nṱhani ha mushumo washu wa u huwelela. A ro ngo fanela u lindela uri hu itee zwiṅwe zwithu zwihulwane uri ri kone u takala. Khamusi ro kona u vusa dzangalelo nga maṅwe maambele kana maṅwe mahumbulele musi ri tshi ḓivhadza mulaedza wa Muvhuso. Khamusi ro amba zwavhuḓi na ṋemuḓi nga ha iṅwe ndimana ya Bivhili. Kana khamusi ro ita zwiṅwe zwithu zwavhuḓi zwe zwa ita uri vhathu vha vhone uri ri Ṱhanzi dza Yehova nahone zwenezwo zwa ṋea vhuṱanzi havhuḓi. U amba nga ha dzenedzo tshenzhelo ndi nḓila ya u takala na vhahashu.

Vhunzhi ha vhathu vha Yehova vha khou bvela phanḓa na u ḓikumedzela uri mushumo wa u huwelela u itwe. Vhavulanḓila, vhalavhelesi vha dalelaho, vhashumi vha Bethele, vharumiwa na vhashumeli vha tshaka dzoṱhe vha ṱanganela kha mushumo wa tshifhinga tsho ḓalaho vho takala. Naa ri a takala navho? Ngauralo, kha ri sumbedze u livhuha vhenevha ‘vha shumaho zwa Muvhuso wa Mudzimu.’ (Vha-Kol. 4:11) Musi ri miṱanganoni ya tshivhidzo, kana mabuthanoni a Vhukriste, ri nga vha ṱuṱuwedza vhukuma. Ri nga dovha ra edzisa tsumbo yavho ya u fhisea. Zwiṅwe hafhu, ri nga ḓiṋea “tshifhinga” tsha u thetshelesa tshenzhelo dzavho na u vha fhaṱa nga u vha ṱanganedza mahayani ashu, khamusi na u swiṱula navho.—Vha-Fil. 4:10.

Takalani Na Vha Re Milingoni

U konḓelela u tovholwa na u kunda milingo zwo khwaṱhisa Paulo uri a dzule o ḓiimisela u fulufhedzea kha Yehova. (Vha-Kol. 1:24; Yak. 1:2, 3) Musi a tshi humbula uri vhahawe vha ngei Filipi vho vha vha tshi nga kha ḓi ṱangana na milingo i fanaho nahone vho vha vha tshi ḓo ṱuṱuwedzea vhukuma nga u konḓelela hawe, zwo ita uri a takale navho. Ndi ngazwo o ṅwala uri: “Tshilidzi tshe na fhiwa a si u tenda Kristo fhedzi, no fhiwa na u pfi ni ṱhuphelwe ene, Ni vhe na tshengelo yeneyo ye na i vhona kha nṋe, iné zwino na i pfa zwauri i kha nṋe.”—Vha-Fil. 1:29, 30.

Nga hu fanaho, na ṋamusi Vhakriste vha a pikiswa nga nṱhani ha u huwelela havho. Nga zwiṅwe zwifhinga honohu u pikiswa hu a huvhadza, fhedzi zwifhinga zwinzhi a hu vhonali. Zwi nga kha ḓi itea nga u tou pomokwa nga vhagunei, u tambudzwa nga miraḓo ya muṱa, u holedzwa nga vhashumisani kana vhane ra dzhena navho tshikolo. Yesu o ṋea tsevho ya uri yeneyi milingo i si ri mangadze kana u ri kula nungo. Nṱhani hazwo, i fanela u vha zwiitisi zwa uri ri takale. O ri: “Mashudu, vho-inwi, arali vhathu vha tshi ni sema nge na vha vhangá, vha tshi ni vhénga, vha tshi ni pomoka vhuvhi hoṱhe hú u zwifha. Takalani ni fulufhele ngauri malambá ané na ḓo a fhiwa ngei ṱaḓulu a ḓo vha manzhi.”—Mat. 5:11, 12.

A ro ngo fanela u ofha kana u tshuwa musi ri tshi pfa uri vhahashu vha a tovholwa kha maṅwe mashango. Nṱhani hazwo, ri fanela u takalela u konḓelela havho. Ri nga vha rabelela, ri tshi humbela uri Yehova a vha khwaṱhise lutendo na uri vha kone u konḓelela. (Vha-Fil. 1:3, 4) Naho hu si na zwinzhi zwine ra nga zwi itela vhenevha vhahashu, ri nga thusa vhahashu vha re tshivhidzoni tshashu vho sedzanaho na milingo. Ri nga sumbedza uri ri na dzangalelo khavho nahone ri nga vha tikedza. Ri wana zwibuli zwa u takala navho musi ri tshi vha ramba nga zwiṅwe zwifhinga uri vha ṱanganele na riṋe Vhurabelini hashu ha Muṱa, nga u shuma navho mushumoni wa u huwelela, na u ḓimvumvusa navho.

Ri na zwiitisi zwinzhi zwa u takala roṱhe! Kha ri lwisane na muya wa shango ḽino wa u ḓifhambanya na vhaṅwe nahone ri bvele phanḓa ri tshi takala na vhahashu. Musi ri tshi ita nga u ralo, ri ḓo vha ri sa khou sumbedza lufuno na u ita uri hu vhe na vhuthihi tshivhidzoni fhedzi, fhedzi ri ḓo dovha ra vha ri tshi khou takalela nga vhuḓalo vhushaka ha vharathu na vhakomana vha Vhakriste. (Vha-Fil. 2:1, 2) Vhukuma, “takalani Murenani misi yoṱhe,” ngauri Paulo o dovha a ri khwaṱhisedza a ri: “Ndi dovha nda ri: Takalani!”—Vha-Fil. 4:4.

[Ṱhaluso ya Vhubvo ha Tshifanyiso kha siaṱari 6]

Globe: Courtesy of Replogle Globes