Mbudziso Dzi Bvaho Ha Vhavhali

Ndi fanela u ita mini arali ndi na mbudziso nga ha zwiṅwe zwithu zwe nda zwi vhala Bivhilini kana arali ndi tshi ṱoḓa nyeletshedzo nga ha thaidzo ya muthu nga eṱhe?

Mirero 2:1-5 i ri khadeledza u “ṱoḓa” nḓivho na ṱhalukanyo u fana na “lupfumo lwe lwa dzumbwa.” Hezwi zwi amba uri ri fanela u ḓiimisela u ita ṱhoḓisiso ya mbudziso dzashu dza Bivhili na u wana thandululo dza thaidzo dzashu. Ri nga zwi itisa hani zwenezwi?

Bugu Vhuyelwani Nga Tshikolo tsha Vhuḓinḓa ha lwa Ṱaḓulu, u bva kha siaṱari 33 u swika kha 38, i amba nga ha “Nḓila Ya U Ita Ṱhoḓisiso” nga zwishumiswa zwe ra ṋewa nga “mukoma a fulufhedzeaho na wa vhuṱali.” (Mat. 24:45) Kha siaṱari 36 hu ambiwa nga nḓila ya u shumisa Watch Tower Publications Index i re na tsumbi dza thero na dza maṅwalo. Zwenezwi zwi ita uri ni kone u ita ṱhoḓisiso nga ipfi ḽi imelaho thero ine na ṱoḓa u i sengulusa kana nga ndimana dza Bivhili, zwine zwa ḓo ni ṋea mutevhe wa ndaedzi dzine na fanela u dzi sedza. Ni songo fhela mbilu musi ni tshi ita ṱhoḓisiso ya iṅwe phindulo yo livhaho kana vhulivhisi vhune na vhu ṱoḓa. Humbulani uri ni khou ṱoḓa “lupfumo lwe lwa dzumbwa,” zwine zwa dzhia tshifhinga na vhuḓidini.

Ndi ngoho uri hu na maṅwe mafhungo na maṅwalo e a si bulwe nga ho livhaho khandisoni dzashu. Naho khamusi ro amba nga ha luṅwalo lwonolwo lwa Bivhili, ri nga kha ḓi vha ri songo fhindula nga ho livhaho mbudziso yaṋu. Zwiṅwe hafhu, maṅwe mafhungo a re Bivhilini a a vha na dzimbudziso ngauri a ho ngo ambiwa mafhungo oṱhe Maṅwaloni. Nga zwenezwo, ri nga si wane phindulo ya mbudziso iṅwe na iṅwe nga u ṱavhanya. Musi zwo ralo, a ro ngo fanela u ṱwa ri tshi khou lingedza u humbula zwithu zwi sa fhindulei kana u ṱaṱa ‘khani dza u ḓiṱoḓela, zwa ri kundisa u fhaṱisana na Mudzimu kha lutendo.’ (1 Tim. 1:4; 2 Tim. 2:23; Tito 3:9) Ofisi ya davhi kana ofisi khulwane a i vhuimoni vhune ya nga fhindula mbudziso dzoṱhe dzine a hu athu ambiwa nga hadzo khandisoni dzashu. Ri nga vha na vhungoho ha uri Bivhili i na mafhungo ane a nga ri livhisa vhutshiloni hashu hoṱhe, fhedzi ya dovha ya si ambe nga ha zwithu zwoṱhe u itela uri ri vhe na lutendo kha Mudzimu a re Muṅwali wayo.—Sedzani masiaṱari 185 u swika kha 187 a bugu Sendelani Tsini na Yehova.

Ni fanela u ita mini arali na ita ṱhoḓisiso fhedzi ni si wane phindulo ya zwithu zwine zwa ni kwama vhutshiloni haṋu? Ḓipfeni no vhofholowa u amba na mutendi nga inwi o vhibvaho kana muṅwe wa vhahulwane vha tshivhidzo. Vha na nḓivho yo dziaho ya Bivhili na tshenzhelo ya matshilele a Vhukriste. Thuso yavho i nga ni vhuyedza vhukuma arali ni na thaidzo kana ni tshi fanela u ita phetho ngauri vha a ni ḓivha nahone ndi vhone vha re tsini na inwi vhane vha pfesesa vhuimo haṋu. Ni songo vhuya na hangwa u rabela Yehova uri a ni thuse kha maṅwe mafhungo o tou livhaho, ni mu humbele uri a livhise mahumbulele aṋu nga muya wawe mukhethwa, ‘ngauri vhuṱali na nḓivho muthu u zwi ṋewa nga Yehova.’—Mir. 2:6; Luka 11:13.