Ndi Ngani Zwi Zwa Ndeme Nga U Rali ‘U Dzula Ro Fhaṱuwa?’

“RI VHUDZE zwiné ra ḓo ḓivha ngazwo’ [“tshiga,” NW] zwauri u vhuya hau na vhufhelo ha ḽifhasi zwi tsini.” (Mat. 24:3) Musi Yesu a tshi fhindula yeneyo mbudziso, o ṋea vhafunziwa vhawe tshiga tshi pfalaho, tshi re na zwidodombedzwa zwoṱhe, tshine tsha pfesesea, tshi songo khakheaho, samusi tsho ṅwalwa kha Mateo ndima ya 24, Marko ndima ya 13, na Luka ndima ya 21. O engedza nga uri: “Ni dzule nó fhaṱuwa.”—Mat. 24:42.

Arali tshenetsho tshiga tsho vha tshi tshi tou vha khagala nga yeneyo nḓila, ndi ngani o engedza nga u vha ṋea tsevho? Ṱhogomelani zwiitisi zwivhili zwi tevhelaho. Tsha u thoma, zwithithisi zwi nga kha ḓi ita uri vhaṅwe vha si londe tshiga, zwa ita uri vha si tsha vha na vhushaka na Mudzimu nahone vha si tsha dzula vho fhaṱuwa. Tsha vhuvhili, Mukriste a nga kha ḓi vhona maṅwe masia a tshiga, fhedzi nga nṱhani ha fhethu hune a dzula hone a vhona u nga ene a zwi mu kwami. Nga zwenezwo, a nga kha ḓi ḓivhudza uri “vhuṱungu vhuhulu,” u ḓadzea ha vhuporofita ha Yesu hu kha ḓi vha kule, na uri a zwi athu vha zwa shishi uri ri ‘dzule ro fhaṱuwa.’—Mat. 24:21.

‘A Vho Ngo Sedza Tshithu’

Yesu o humbudza vhatevheli vhawe nga ha vhathu vhe vha tshila misini ya Noaxe. Mushumo wa Noaxe wa u huwelela, u fhaṱwa ha gungwa ḽihulwane, na vhuvemu ha nga tshenetsho tshifhinga zwo vha zwi tshi tou vha khagala. Naho zwo ralo, vhathu vhanzhi ‘a vho ngo sedza tshithu,’ kana a vho ngo zwi londa. (Mat. 24:37-39) Na ṋamusi vhathu vha na mavhonele o raloho. Sa tsumbo, tswayo dzi sumbedzaho luvhilo lune vhareili vha fanela u tshimbila ngalwo dzi tou vha khagala, fhedzi vhathu vhanzhi a vha dzi londi. Kanzhi muvhuso u kombetshedzea u ita dzindunduma zwiṱaraṱani u itela u kombetshedza vhareili uri vha fhungudze luvhilo. Nga nḓila i fanaho, Vhakriste vha nga kha ḓi vhona tshiga tsha uri ri khou tshila maḓuvhani a vhufhelo, fhedzi vha ḓi ita zwithu zwine zwa ḓo vha thithisa. Arielle, muswa a re miṅwahani ya vhufumi wa ngei Afurika Vhukovhela o zwi tshenzhela.

Arielle o vha a tshi takalela u ṱalela mutambo wa handball wa vhafumakadzi kha thelevishini. Musi tshikolo tshe a vha a tshi dzhena khatsho tshi tshi vhumba tshigwada tsha u tamba wonoyo mutambo, u ṱoḓa u u tamba zwo ita uri a si tsha vhona khombo dza lwa muya dzine dza nga vha hone. O ḓiṅwalisela uri a vhe mulindavhunwo. Ho mbo ḓi itea mini? U a ṱalutshedza: “Vhaṅwe vhe vha vha vhe kha tshigwada tshanga vho vha vhe na vhaṱhannga vhane vha daha na u shumisa zwidzidzivhadzi. Vho vha vha tshi nkolela nge nda vha ndi sa fani navho, fhedzi ndo vha ndi tshi humbula uri ndi ḓo kona u sedzana nazwo. Ndi songo vhuya nda zwi lavhelela, nga zwiṱuku nga zwiṱuku wonoyo mutambo wo thoma u tshinya vhushaka hanga na Mudzimu. Ndo vha ndi tshi dzulela u humbula nga handball. Musi ndi miṱanganoni ya Vhukriste Holoni ya Muvhuso, muhumbulo wanga wo vha u tshi vha u mudavhini. Vhumuthu hanga ha Vhukriste na hone ho thoma u shanduka. Mathomoni ndo ndi tshi sokou ḓitambela-vho, fhedzi zwa fhedzisela nga u ṱoḓa u kunda.  Ndo vha ndi tshi ita nḓowe-nḓowe nga maanḓa nga nṱhani ha uri ndo vha ndo no vha na muya wa u ṱaṱisana. Ndo ḓipfa ndo tsikeledzea. Ndo ita na u hangwa dziṅwe khonani nga nṱhani ha mutambo wa handball.

“Zwithu zwo ṋaṋa musi tshigwada tshe ra vha ri tshi khou tamba natsho tshi tshi ṋewa phenalithi. Ndo vha ndo lindela u thivha yeneyo bola. Ndi songo vhuya nda zwi ṱhogomela, ndo rabela Yehova uri a nthuse u i thivha! Tshenetshi tshiitea tsho nnyita uri ndi vhone nḓila ye vhushaka hanga na Mudzimu ha vha ho no tshinyala ngayo. Ndo ita mini uri ndi dovhe ndi vhe naho?

“Ndo vha ndo no vhona DVD ya Young People Ask—What Will I Do With My Life? * Ndo dovha nda i ṱalela ndo tou ḓiimisela. Na nṋe ndo vha ndi vhuimoni vhu konḓaho u fana na André, muṱhannga a re kha ḽeneḽo ḽitambwa. Ndo ṱhogomela zwe muhulwane a eletshedza André u zwi ita—u vhala na u elekanya nga luṅwalo lwa Vha-Filipi 3:8. Ndo mbo ḓi dzhia phetho na zwenezwo. Ndo mbo ḓi litsha u tamba handball.

“Zwenezwo zwo mmbofholola vhukuma! A tho ngo tsha vha na muya wa u ṱaṱisana na mutsiko. Ndo ḓipfa ndo takala nahone ndi tsini na khonani dzanga dza Vhakriste. Mishumo ya lwa muya yo dovha ya vha ya ndeme kha nṋe. Ndo kona u thetshelesa miṱanganoni ya tshivhidzo nahone nda dovha nda i takalela. Ndo khwinisa vhuḓinḓa hanga. Zwino ndi anzela u dzhia vhuvulanḓila ha u thusa.”

Arali hu na tshithithisi tshine tsha ita uri ni si londe tshiga tshe Yesu a ri ṋea tshone, dzhiani vhukando u fana na Arielle. Ni nga kha ḓi lingedza zwithu zwi tevhelaho. Shumisani Watch Tower Publications Index, ye ya vhidzwa uri ndi mapa wa zwithu zwo dzumbiwaho. Henefho ni ḓo wana ndaedzi dza nyeletshedzo dzi pfalaho na mivhigo ya nḓila ye vhaṅwe vhahashu vha sedzana na milingo ngayo. Arali na lugiselela zwavhuḓi na u ṅwala notsi musi ni miṱanganoni ya Vhukriste ni ḓo vhuyelwa vhukuma. Vhaṅwe vho thuswa nga u dzulela phanḓa holoni. Arali hu tshi fanela uri vhathetshelesi vha ṱanganele, lingedzani u fhindula mathomoni. Zwiṅwe hafhu, dzulani no fhaṱuwa muyani nga u vhambedza zwiitea zwi re kha mafhungo na masia a tshiga na zwiṅwe zwithu zwine zwa ṱalula ‘maḓuvha a vhufhelo.’—2 Tim. 3:1-5; 2 Pet. 3:3, 4; Ndzumb. 6:1-8.

“Dzulani-ha Nó Lindela”

Tshiga tsha maḓuvha a vhufhelo tshi vhonala “mashangoni oṱhe.” (Mat. 24:7, 14) Vhathu vhanzhi vha dzula fhethu hune ha vha na malwadze, nḓala, midzinginyo, na zwiṅwe zwiitea zwe zwa ambiwa hu tshee nga phanḓa. Zwo fhambanaho na zwenezwo, hu na vhathu vhanzhi vhane vha tshila nga mulalo. Arali ni sa athu tshenzhela ḽiṅwe sia ḽa tshiga, ni songo phetha nga uri vhuṱungu vhuhulu vhe tshee kule! Zwenezwo zwi nga vha vhutsilu.

Sa tsumbo, edzani u humbula nga zwe Yesu a zwi amba hu tshee nga phanḓa malugana na “dzinḓala na malwadze.” (Luka 21:11) Tsha u thoma, ho ngo amba uri zwenezwi zwithu zwi ḓo itea fhethu hoṱhe nga tshifhinga tshithihi kana nga nḓila dzi fanaho. Nṱhani hazwo, o amba uri zwi ḓo itea “afho na afho.” Ngauralo, ri nga si lavhelele zwiitea zwi fanaho fhethu hoṱhe nga tshifhinga tshithihi. Tsha vhuvhili, musi Yesu a tshi tou fhedza u amba uri hu ḓo vha na dzinḓala, o amba uri vhaṅwe vhatevheli vhawe vha fanela u fhaṱutshela uri vha si ḽese: “Ḓi-thanyeleni, uri dzimbilu dzaṋu dzi sa ḓo lemedzwa nga vhupangwa.” (Luka 21:34)  Nga zwenezwo, Vhakriste vhoṱhe a vho ngo fanela u lavhelela uri vha ḓo tshenzhela sia ḽiṅwe na ḽiṅwe ḽa tshiga. Nṱhani hazwo, Yesu o ri: “Arali ni tshi vhona izwo zwi tshi vho vha hone, ni ḓivhe zwauri muvhuso wa Mudzimu u tsini.” (Luka 21:31) Vhudavhidzano ha musalauno vhu ri ita uri ri kone u vhona masia oṱhe a tshiga, hu sa londwi zwine ra zwi tshenzhela hune ra dzula hone.

Zwiṅwe hafhu, humbulani uri Yehova o no vhea “ḓuvha na tshikhathi” tsha uri vhuṱungu vhuhulu vhu thome. (Mat. 24:36) Nḓila ine zwiitea zwa kha ḽifhasi zwa tevhekana ngayo i nga si shandule ḽeneḽo ḓuvha.

Yesu o khadeledza Vhakriste fhethu hoṱhe uri: “Dzulani-ha nó lindela.” (Mat. 24:44) Ri fanela u dzula ro lindela tshifhinga tshoṱhe. Ndi ngoho uri ri nga si ite mishumo ya lwa ṱaḓulu ḓuvha ḽoṱhe nahone ḓuvha ḽiṅwe na ḽiṅwe. Nga nnḓa ha zwenezwo, a hu na ane a ḓivha uri u ḓo vha a tshi khou ita mini musi vhuṱungu vhuhulu vhu tshi thoma. Vhaṅwe vha nga kha ḓi vha vha tshi khou shuma tsimuni kana vha tshi khou ita mishumo ya hayani. (Mat. 24:40, 41) Ngauralo-ha, ndi mini zwine ra nga zwi ita u itela uri ri dzule ro lindela?

Emmanuel, Victorine na vhananyana vhavho vha rathi vha dzula huṅwe fhethu Afurika hune vha si vhone nga vhuḓalo zwiitea zwine zwa swaya tshiga. Ngauralo, vho ita phetho ya u haseledza nga zwithu zwa muya ḓuvha ḽiṅwe na ḽiṅwe u itela u vha thusa uri vha dzule vho lindela. Emmanuel u a ṱalutshedza: “Zwo vha zwi tshi konḓa u wana tshifhinga tshee vhoṱhe vha vha vha tshi wanala ngatsho. Mafheleloni ro khetha iri ya vhurathi u swika nga hafu u bva kha iri ya vhurathi nga matsheloni. Musi ro no haseledza ndimana ya ḓuvha, ri lugiselela phara dzi si gathi dza khandiso dzi vhalwaho pfunzoni ya tshivhidzo vhukati ha vhege.” Naa yeneyi mbekanyo yo vha thusa uri vha dzule vho fhaṱuwa? Yo vha thusa vhukuma! Emmanuel ndi mudzudzanyi wa tshigwada tsha vhahulwane tshivhidzoni. Kanzhi Victorine u shuma sa muvulanḓila a thusaho nahone o thusa vhathu vhanzhi uri vha ṱanganedze mafhungo-ngoho. Vhananyana vhavho vha khou ita mvelaphanḓa yavhuḓi ya lwa muya.

Yesu u ri ṋea heyi tsevho: “Lavhelani ni karuwe.” (Marko 13:33) Ni songo tendela zwithithisi zwi tshi ita uri ni si dzule no tsha nga lwa muya. Nṱhani hazwo, dzhielani nṱha nyeletshedzo yavhuḓi i re khandisoni dzashu na miṱanganoni ya tshivhidzo, samusi Arielle o zwi ita. U fana na muṱa wa Emmanuel, lingedzani u ita tshiṅwe tshithu ḓuvha ḽiṅwe na ḽiṅwe u itela uri ni dzule no lindela nahone no “fhaṱuwa.”

[Ṱhaluso i re magumoni a siaṱari]

[Tshifanyiso kha siaṱari 4]

U haseledza nga zwithu zwa muya ḓuvha ḽiṅwe na ḽiṅwe zwi thusa Emmanuel na muṱa wawe u ‘dzula vho fhaṱuwa’