Gudisani Vhaṅwe Uri Vha Fanelee
Gudisani Vhaṅwe Uri Vha Fanelee
“O vuledzaho a funzwa zwoṱhe, u ḓo ḓi tou lingana na mufunzi wawe.”—LUKA 6:40.
1. Tshifhingani tsha vhuḓinḓa hawe ha kha ḽifhasi, Yesu o sia mutheo ufhio?
MUSI a tshi phetha Evangeli yawe, muapostola Yohane o ṅwala uri: “Hu kha ḓi vha na maṅwe mafhungo manzhi a zwe Yesu a ita, zwine—arali zwó ṅwalwa nga u tevhekana hazwo—nṋe nda ri: shango ḽi nga si ṱanganye maṅwalo ane a ḓo ṅwalwa.” (Yoh. 21:25) Zwiṅwe zwe Yesu a zwi khunyeledza nga tshifhinga tshipfufhi tsha vhuḓinḓa hawe ho vha hu u ṱoḓa vhanna, u vha funza na u vha dzudzanya uri vha kone u ranga phanḓa musi a si tsheeho kha ḽifhasi. Musi a tshi humela ṱaḓulu nga 33 C.E., Yesu o sia mutheo wa tshivhidzo tshi swayeaho tshe tsha vha tshi tshi ḓo vha vhathu vha zwigidi nga u ṱavhanya.—Mish. 2:41, 42; 4:4; 6:7.
2, 3. (a) Ndi ngani hu na ṱhoḓea khulwane ya uri vhanna vho lovhedzwaho vha ṱoḓe u swikelela ndugelo tshivhidzoni? (b) Ndi mini zwine ra ḓo zwi haseledza kha ino thero?
2 Samusi hu na vhahuweleli vha Muvhuso vha fhiraho milioni dza sumbe zwivhidzoni zwi fhiraho 100 000 shangoni ḽoṱhe ṋamusi, hu dzula hu na ṱhoḓea ya vhanna vhane vha ḓo ranga phanḓa zwithu zwa muya. Sa tsumbo, hu na ṱhoḓea khulwane ya vhahulwane vha Vhakriste. Vhahashu vhane vha ṱoḓa u swikelela yeneyi ndugelo ya tshumelo vha a khoḓiwa ngauri vha “tama mushumo wo nakaho.”—1 Tim. 3:1.
3 Naho zwo ralo, a zwi sokou itea uri vhanna vha fanelee u vha na ndugelo tshivhidzoni. U funzea kana u vha na tshenzhelo a zwi lugiseleli munna uri a kone u ita wonoyu mushumo. U itela uri munna a vhe na ndugelo tshivhidzoni, u tea uri a fanelee nga lwa muya. U vha na pfaneleo dza muya ndi zwone zwa ndeme u fhira vhukoni hawe kana zwithu zwe a zwi khunyeledza. Vhanna vha re tshivhidzoni vha nga thuswa hani uri vha fanelee? Yesu o ri: “Na o vuledzaho a funzwa zwoṱhe, u ḓo ḓi tou lingana na mufunzi wawe.” (Luka 6:40) Kha ino thero ri ḓo haseledza nga ha dziṅwe nḓila dze Mufunzi ane a vha Makone, Yesu Kristo, a dzi shumisa u itela u thusa vhafunziwa vhawe uri vha fanelee u vha na vhuḓifhinduleli vhuhulwane, nahone ri ḓo vhona uri ndi mini zwine ra zwi guda kha zwe a zwi ita.
“Inwi Ndo Ni Vhudza Nda Ri: Ni Khonani Dzanga”
4. Yesu o vha hani khonani ya vhukuma kha vhafunziwa vhawe?
4 Yesu o vha a tshi dzhia vhafunziwa vhawe sa khonani dzawe, hu si sa vhathu vha fhasi. O vha a tshi fhedza tshifhinga navho, a tshi vha fulufhela na u vha ‘vhudza zwoṱhe zwe a zwi pfa nga Khotsi awe.’ (Vhalani Yohane 15:15.) Edzani u humbula uri vho vha vho takala lungafhani musi Yesu a tshi vha fhindula musi vha tshi ri: “Ri vhudze zwiné ra ḓo ḓivha ngazwo’ zwauri u vhuya hau na vhufhelo ha ḽifhasi zwi tsini.” (Mat. 24:3, 4) O ita na u somolela vhatevheli vhawe zwa haṋwani. Sa tsumbo, nga vhusiku he a ambululwa ngaho, Yesu o ṱuwa na Petro, Yakobo na Yohane tsimuni ya Getsemane, he a rabela zwi tshi bva mbiluni. Vhenevho vhaapostola vhararu vha nga vha vha songo pfa thabelo ya Yesu, fhedzi vha fanela u vha vho pfesesa uri tshenetsho tsho vha tshi tshifhinga tsha ndeme. (Marko 14:33-38) Zwiṅwe hafhu, humbulani nḓila ye u shandukiswa ha nga vha ho kwama ngayo vhenevho vhaapostola vhararu. (Marko 9:2-8; 2 Pet. 1:16-18) Vhukonani ha tsini-tsini he Yesu a vhu vhumba na vhafunziwa vhawe ho vha hu mutheo samusi nga murahu vho hwala vhuḓifhinduleli vhuhulwane.
5. Ndi dzifhio dziṅwe nḓila dzine vhahulwane vha Vhakriste vha nga thusa ngadzo vhaṅwe?
5 U fana na Yesu, vhahulwane vha Vhakriste ṋamusi vha vhumba vhukonani na u thusa vhaṅwe. Vha ṱahulela vhukonani ha tsini na vhatendi ngavho nga u vha sumbedza dzangalelo. Naho vhahulwane vha tshi pfesesa uri ndi zwa ndeme uri vha vhulunge zwiphiri, a vha na tshidzumbe. Vhahulwane vha fulufhela vhahavho nahone vha vha vhudza ngoho ya Maṅwalo ye vha i guda. Vhahulwane a vha nyadzi mushumeli ane a kha ḓi vha muswa. Nṱhani hazwo, vha mu dzhia sa muthu wa muya a re na vhukoni, ane a khou itela tshivhidzo tshumelo ya ndeme.
“Ndo Ni Sumbedza Nḓila”
6, 7. Ṱalusani tsumbo ye Yesu a i vhetshela vhafunziwa vhawe na nḓila ye vha kwamea ngayo.
6 Naho vhafunziwa vha Yesu vho vha vha tshi dzhiela nṱha zwithu zwa muya, nga zwiṅwe zwifhinga mahumbulele avho o vha a tshi ṱuṱuwedzwa nga vhubvo na mvelele yavho. (Mat. 19:9, 10; Luka 9:46-48; Yoh. 4:27) Naho zwo ralo, Yesu ho ngo sasaladza kana u sinyutshela vhafunziwa vhawe. Ho ngo vha lemedza nga uri vha ite zwithu zwi sa pfali kana u vha vhudza uri vha ite zwithu zwine ene a si zwi ite. Nṱhani hazwo, Yesu o vha vhetshela tsumbo.—Vhalani Yohane 13:15.
7 Yesu o vhetshela vhafunziwa vhawe tsumbo ifhio? (1 Pet. 2:21) O leludza vhutshilo hawe u itela uri a kone u shumela vhaṅwe o vhofholowa. (Luka 9:58) Yesu o vha a tshi linganyisela zwithu nahone tshifhinga tshoṱhe o vha a tshi thea pfunzo dzawe kha Maṅwalo. (Yoh. 5:19; 17:14, 17) O vha a tshi ambea nae nahone e na vhuthu. O vha a tshi ṱuṱuwedzwa nga lufuno kha zwoṱhe zwe a zwi ita. (Mat. 19:13-15; Yoh. 15:12) Tsumbo ya Yesu yo ṱuṱuwedza vhaapostola vhawe. Sa tsumbo, Yakobo o vha a sa ofhi lufu, fhedzi o shumela Mudzimu nga u fulufhedzea u swika a tshi vhulahwa. (Mish. 12:1, 2) Yohane o tevhela ṋayo dza Yesu nga u fulufhedzea lwa miṅwaha i fhiraho 60.—Ndzumb. 1:1, 2, 9.
8. Ndi tsumbo ifhio ine vhahulwane vha i vhetshela vhaṱhannga na vhaṅwe tshivhidzoni?
8 Vhahulwane vhane vha ḓikumedza, u ḓiṱukufhadza na vha re na lufuno vha vhetshela vhaṱhannga tsumbo. (1 Pet. 5:2, 3) Zwiṅwe hafhu, vhahulwane vhane vha vha tsumbo kha u vha na lutendo, u funza, matshilele a Vhukriste na kha vhuḓinḓa, vha a fushea ngauri vha a zwi ḓivha uri vhaṅwe vha nga edzisa lutendo lwavho.—Vha-Heb. 13:7.
‘Musi O No Vha Laya, Yesu O Vha Ruma’
9. Ri zwi ḓivha hani uri Yesu o gudisa vhafunziwa vhawe u ita mushumo wa u huwelela?
9 Musi o no ita vhuḓinḓa hawe nga u fhisea hu ṱoḓaho u vha miṅwaha mivhili, Yesu o ṱanḓavhudza mushumo wa u huwelela nga u rumela vhaapostola vhawe vha 12 uri vha ye u huwelela. Naho zwo ralo, o thoma nga u vha ṋea ndaela. (Mat. 10:5-14) Musi a sa athu kanzwa gogo ḽa vhathu nga lwa vhuṱolo, Yesu o vhudza vhafunziwa vhawe nḓila ye a vha a tshi ṱoḓa u dzudzanya ngayo vhathu u itela u vha ṋea zwiḽiwa. (Luka 9:12-17) Nga zwenezwo, zwi tou vha khagala uri Yesu o gudisa vhafunziwa vhawe nga u vha ṋea vhulivhisi vhu pfalaho na ho livhaho. Enea maitele a u funza khathihi na ṱhuṱhuwedzo ya muya mukhethwa nga murahu zwo thusa vhaapostola uri vha kone u dzudzanya mushumo muhulwane wa u huwelela we wa itwa nga 33 C.E. na nga murahu.
10, 11. Vhanna vhaswa ngohoni vha nga dzula vha tshi gudiswa nga nḓila dzifhio?
10 Ṋamusi, ndayo ya lwa muya i thoma musi munna a tshi ṱanganedza pfunzo ya Bivhili. Ri nga kha ḓi fanela u mu thusa uri a kone u vhala zwavhuḓi. Ri nga bvela phanḓa na u mu thusa musi ri tshi mu farela pfunzo ya Bivhili. Musi a tshi thoma u ya miṱanganoni ya Vhukriste tshifhinga tshoṱhe, u ḓo bvela phanḓa na u gudiswa u swika a tshi ṱanganela Tshikoloni Tsha Vhuḓinḓa ha lwa Ṱaḓulu, a tshi vha muhuweleli a songo lovhedzwaho, na zwiṅwe-vho. Musi o no lovhedzwa, honoho u gudiswa hu nga katela zwithu zwi fanaho na u thusa u ṱhogomela Holo ya Muvhuso. Nga u ya ha tshifhinga, wahashu a nga thusiwa uri a kone u vhona uri ndi mini zwine a fanela u zwi ita uri a fanelee u vha mushumeli.
11 Musi muhulwane a tshi ṋea wahashu o lovhedzwaho mushumo, u a mu ṱalutshedza maitele a ndangulo nahone u mu ṋea vhulivhisi vhu ṱoḓeaho. Wahashu ane a khou gudiswa u fanela u pfesesa zwine zwa lavhelelwa khae. Arali a tshi konḓelwa u ita zwe a humbelwa uri a zwi ite, muhulwane a re na lufuno ha ṱavhanyi u phetha nga u ri ha fanelei. Nṱhani hazwo, nga vhuthu onoyo muhulwane u fanela u mu sumbedza zwithu zwine a fanela u shumela khazwo na u vusulusa zwine a fanela u zwi ita na maitele a hone. Vhahulwane vha a takala musi vha tshi vhona vhanna vha tshi aravha nga nḓila yavhuḓi kha vhuḓidini honoho nahone vha vha na dakalo ḽine ḽa ḓiswa nga u shumela vhaṅwe.—Mish. 20:35.
“Wa Vhuṱali U Pfa Vhaeledzi”
12. Ndi mini zwe zwa ita uri nyeletshedzo ya Yesu i shume?
12 Yesu o gudisa vhafunziwa vhawe nga u vha ṋea nyeletshedzo ye ya vha i tshi fanela ṱhoḓea dzavho. Sa tsumbo, o kaidza Yakobo na Yohane nge vha ṱoḓa uri mulilo u bvaho ṱaḓulu u ḓele Vhasamaria vhe vha si mu ṱanganedze. (Luka 9:52-55) Musi mme a Yakobo na Yohane vha tshi ḓa kha Yesu u vha humbelela vhuimo ha nṱha Muvhusoni, Yesu o amba na vhenevho murathu na mukomana a ri: “Há vha u dzula tsini hanga thungo ya tsha u ḽa na tsha monde, a si zwiné nṋe nda kona u ni fha; ndi zwa avho vhe khotsi-anga a dzula ó vha lugisela.” (Mat. 20:20-23) Zwifhinga zwoṱhe Yesu o vha a tshi ṋea nyeletshedzo i pfalaho, i shumaho na yo thewaho kha maitele a Mudzimu. O funza vhafunziwa vhawe uri vha elekanye nga ha eneo maitele. (Mat. 17:24-27) Yesu o vha a tshi pfesesa vhushayanungo ha vhatevheli vhawe nahone o vha a songo lavhelela uri vha vhe vho fhelelaho. O vha a tshi ṱuṱuwedzwa nga lufuno lwa vhukuma musi a tshi vha eletshedza.—Yoh. 13:1.
13, 14. (a) Ndi vhafhio vhane vha ṱoḓa u eletshedzwa? (b) Ṋeani tsumbo dza nyeletshedzo ine muhulwane a nga i ṋea muthu ane a sa khou ita mvelaphanḓa ya muya.
13 Munna muṅwe na muṅwe ane a ṱoḓa u fanelea u hwala vhuḓifhinduleli tshivhidzoni tsha Vhukriste nga zwiṅwe zwifhinga u a ṱoḓa nyeletshedzo ya Maṅwalo. Mirero 12:15 i ri: “Wa vhuṱali u pfa vhaeledzi.” Muṅwe wa hashu wa tshinnani ane a kha ḓi vha muswa o ri: “Khaedu yanga khulwanesa ndi u sedzana na u sa fhelela hanga. Nyeletshedzo ya muhulwane yo nnyita uri ndi vhe na mavhonele o teaho.”
14 Arali vhahulwane vha ṱhogomela uri vhuḓifari vhu si havhuḓi vhu thithisa mvelaphanḓa ya munna ya lwa muya, vha a mu khakhulula nga vhulenda. (Vha-Gal. 6:1) Nga zwiṅwe zwifhinga hu ṱoḓea nyeletshedzo nga nṱhani ha nḓowelo ine muthu a vha nayo. Sa tsumbo, arali wahashu a tshi vhonala a tshi ḓivhavhalela, muhulwane a nga kha ḓi vhona zwi tshi nga thusa u mu sumbedza uri Yesu o vha e muhuweleli a fhiseaho wa Muvhuso we a laedza vhatevheli vhawe uri vha ite vhafunziwa. (Mat. 28:19, 20; Luka 8:1) Arali wahashu a tshi vhonala e na vhuhovheleli, muhulwane a nga kha ḓi mu sumbedza nḓila ye Yesu a thusa ngayo vhafunziwa Vhawe u vhona khombo dza u ṱoḓa maimo. (Luka 22:24-27) Muhulwane a nga ita mini arali wahashu e na nḓowelo ya u sa hangwela? A nga haseledza nae tshifanyiso tsha muḓinḓa we a si hangwele mulandu muṱuku naho ene o hangwelwa mulandu wawe muhulwane. (Mat. 18:21-35) Musi hu tshi ṱoḓea nyeletshedzo, ndi zwavhuḓi uri vhahulwane vha i ṋee nga u ṱavhanya.—Vhalani Mirero 27:9.
“Tshau Ḓi-ḓowedze”
15. Muṱa u nga thusa hani munna uri a shumele vhaṅwe?
15 Vhahulwane vha ranga phanḓa u funza vhanna uri vha swikelele ndugelo tshivhidzoni, fhedzi vhaṅwe vha nga tikedza vhuḓidini havho. Sa tsumbo, muṱa wa onoyo munna u nga mu thusa uri a fanelee. Nahone arali o no ḓi vha muhulwane, u ḓo vhuyelwa nga thikedzo ya mufumakadzi wawe a re na lufuno na vhana vho ḓikumedzaho. U itela uri a bvelele musi o hwala vhuḓifhinduleli hawe ndi zwa ndeme uri vha ḓiimisele uri a shumiswe tshivhidzoni. U ḓidzima havho zwi a mu takadza nahone vhaṅwe vha a zwi livhuha.—Mir. 15:20; 31:10, 23.
16. (a) Vhuḓifhinduleli vhuhulwane ha uri munna a fanelee vhu ḓitika nga nnyi? (b) Munna a nga swikelela hani ndugelo tshivhidzoni?
16 Naho vhaṅwe vha tshi nga mu thusa na u mu tikedza, vhuḓifhinduleli vhuhulwane ha uri a fanelee ho ḓitika nga ene muṋe. (Vhalani Vha-Galata 6:5.) Ndi ngoho uri a zwi ṱoḓei uri wahashu a vhe mushumeli kana muhulwane u itela uri a kone u thusa vhaṅwe na u ṱanganela nga vhuḓalo vhuḓinḓani. Naho zwo ralo, u ṱoḓa u fanelea u vha na ndugelo tshivhidzoni zwi amba uri munna u fanela u lwela u swikelela pfaneleo dzi re Maṅwaloni. (1 Tim. 3:1-13; Tito 1:5-9; 1 Pet. 5:1-3) Ngauralo, arali munna a tshi ṱoḓa u vha mushumeli kana muhulwane, u fanela u livhisa ṱhogomelo hune a fanela u ita hone mvelaphanḓa ya muya. Zwenezwi zwi amba uri u fanela u vhala Bivhili tshifhinga tshoṱhe, u vha na pfunzo ya muthu nga eṱhe, u elekanya, u rabela zwi tshi bva mbiluni na u fhisetshela vhuḓinḓa ha Vhukriste. Nga yeneyo nḓila, u ḓo kona u shumisa nyeletshedzo ye Paulo a i ṋea Timotheo ine ya ri: “Ḓi-ḓowedze u luvha Mudzimu.”—1 Tim. 4:7.
17, 18. Ndi mini zwine wahashu o lovhedzwaho a nga zwi ita arali e na mbilaelo, u ḓipfa a sa fanelei kana e si na lutamo lwa u swikelela ndugelo tshivhidzoni?
17 Fhedzi ndi mini zwine munna a fanela u zwi ita arali a sa swikeleli ndugelo nga nṱhani ha mbilaelo kana u ḓipfa a sa fanelei? Zwi nga vha zwavhuḓi arali a elekanya nga zwithu zwinzhi zwine Yehova Mudzimu na Yesu Kristo vha ri itela zwone. Ndi ngoho uri Yehova “u ri hwala nga maḓuvha na maḓuvha.” (Ps. 68:19) Nga zwenezwo, Khotsi ashu wa ṱaḓulu a nga thusa wahashu uri a hwale vhuḓifhinduleli tshivhidzoni. Zwi nga vhuyedza wahashu ane a sa vhe mushumeli kana muhulwane u elekanya nga ha uri hu na ṱhoḓea khulwane ya uri vhanna vho vhibvaho vha ṱanganedze ndugelo dza tshumelo ndanguloni ya Mudzimu. U elekanya nga zwenezwi zwi nga ṱuṱuwedza wahashu uri a ite vhuḓidini ha u kunda maḓipfele a si avhuḓi. A nga humbela muya mukhethwa, a tshi ṱhogomela uri tshiaṋwiwa tshawo tshi katela mulalo na u konḓelela—pfaneleo dzine dza ṱoḓea u itela u kunda mbilaelo kana u ḓipfa u sa fanelei. (Luka 11:13; Vha-Gal. 5:22, 23) Nahone a nga fulufhela uri Yehova u fhaṱutshedza vhoṱhe vhane vha ṱoḓa u fanelea vhe na tshiṱuṱuwedzi tshavhuḓi.
18 Naa zwi nga itea uri u sa tama u swikelela ndugelo tshivhidzoni zwi ite uri munna o lovhedzwaho a sa ite vhuḓidini? Ndi mini zwine zwa nga mu thusa? Muapostola Paulo o ṅwala uri: “Mudzimu ndi ene ané a shuma zwoṱhe kha inwi; hú u zwi funa, hú u shumela u takalelwa nga ene, zwi bva ha ene.” (Vha-Fil. 2:13) Lutamo lwa u shumela vhaṅwe lu bva ha Mudzimu, nahone muya wa Yehova u nga ṋea muthu nungo dza uri a kone u ita tshumelo khethwa. (Vha-Fil. 4:13) Zwiṅwe hafhu, Mukriste a nga rabelela uri Mudzimu a mu ite uri a ite zwo lugaho.—Ps. 25:4, 5.
19. Ndi mini zwine ra zwi khwaṱhisedzwa nga uri hu ḓo vha na “vhalisa vhaṱanu-na-vhavhili . . . na vha-langa-vhathu vhaṱanu-na-vhararu”?
19 Yehova u fhaṱutshedza vhuḓidini vhune ha itwa nga vhahulwane ha u funza vhaṅwe. U fhaṱutshedza vhane vha ṱoḓa u swikelela ndugelo tshivhidzoni. Maṅwalo a ri khwaṱhisedza uri vhukati ha vhathu vha Mudzimu hu ḓo vha na “vhalisa vhaṱanu-na-vhavhili . . . na vha-langa-vhathu vhaṱanu-na-vhararu”—tshivhalo tsha vhanna vha faneleaho—u itela u ranga phanḓa ndanguloni ya Yehova. (Mixa 5:4) Ndi phaṱhutshedzo vhukuma uri vhanna vhanzhi nga u rali vha Vhakriste vha khou gudiswa nahone nga u ḓiṱukufhadza vha ṱoḓa u swikelela ndugelo dza tshumelo u itela u renda Yehova!
Ni Ḓo Aravha Hani?
• Yesu o thusa hani vhafunziwa vhawe uri vha fanelee u hwala vhuḓifhinduleli vhuhulwane?
• Vhahulwane vha nga edzisa Yesu hani musi vha tshi thusa vhanna tshivhidzoni uri vha range phanḓa?
• Muṱa u nga thusa hani munna uri a fanelee?
• Ndi mini zwine munna a nga zwi ita uri a swikelele ndugelo tshivhidzoni?
[Mbudziso Dza Pfunzo]
[Zwifanyiso kha siaṱari 31]
Ndi mini zwine na nga zwi gudisa mugudiswa waṋu wa Bivhili musi a tshi ṱoḓa u ita mvelaphanḓa?
[Tshifanyiso kha siaṱari 32]
Ndi mini zwine vhanna vha nga zwi ita u sumbedza uri vha ṱoḓa u fanelea?
