Mbudziso Dzi Bvaho Ha Vhavhali

Naa zwi a konadzea u ḓivha tshifhinga tsho livhaho tshee Yesu Kristo a ombelwa ngatsho?

Yeneyi mbudziso i vhudziswa nga nṱhani ha phambano i re hone kha mafhungo o hevhedzwaho a lufu lwa Yesu o ṅwalwaho nga muṅwali wa Evangeli Marko na nga muapostola Yohane. Marko o ri: “Huno tsho vha tshi tshikhathi tsha vhuraru [maswole] vha tshi mu vhamba.” (Marko 15:25) U ya nga Yohane, ho vha hu “tshikhathi tsha vhuṱanu-na-vhuthihi” musi Pilato a tshi ṋekedza Yesu kha Vhayuda uri vha mu ombele. (Yoh. 19:14-16) Vhaambeleli vha Bivhili vho ṱalutshedza zwithu zwo fhambanaho vha tshi khou lingedza u tandulula enea mafhungo ane a vhonala u nga a a hanedzana. Naho zwo ralo, a hu na mafhungo o eḓanaho Maṅwaloni ane a ṱalutshedza phambano ya enea mafhungo. Zwiṅwe hafhu, u ṱhogomela nḓila ye vhathu vha vha vha tshi dzhia ngayo tshifhinga misini yeneyo zwi nga ri thusa.

Ḓanani ḽa u thoma ḽa miṅwaha ḽa Tshifhinga tshashu tsho Ḓoweleaho, Vhayuda vho vha vha tshi khethekanya masiari nga awara dza 12, u thoma musi ḽi tshi ṱavha. (Yoh. 11:9) Nga zwenezwo, “tshikhathi tsha vhuraru” tsho vha tshi tshi thoma nga awara ya vhumalo u swika nga ya vhuṱahe nga matsheloni nahone “tshikhathi tsha vhuṱanu na vhuthihi” tsho vha tshi tshi fhela nga masiari. Ndi ngoho uri ḓuvha ḽi ṱavha na u kovhela nga zwifhinga zwi sa fani kha ṅwaha. Nga zwenezwo, vhulapfu ha tshedza tsha ḓuvha vhu a fhambana u ya nga khalaṅwaha. Zwiṅwe hafhu, tshifhinga tsho vha tshi tshi kaliwa nga u sedza hune ḓuvha ḽa vha hone. Ndi ngazwo tshifhinga tsho vha tshi tshi tou anganyelwa. Kanzhi Maṅwalo a Lugerika a Tshikriste a ambela kha zwithu zwe zwa itea nga tshikhathi tsha vhuraru, tsha vhuṱanu na vhuthihi kana tsha vhuṱanu na vhuṋa—zwi sumbedzaho uri ndi tshifhinga tshi songo livhaho. (Mat. 20:3, 5; Mish. 10:3, 9, 30) Tshifhinga tsho vha tshi tshi bulwa nga ho livhaho arali tshi tsha ndeme kha mafhungo ane a khou ambiwa, u fana na musi hu tshi ambiwa nga “tshikhathi tsha vhuṱanu-na-vhuvhili.”—Yoh. 4:52.

Mafhungo a Dzievangeli a a tendelana musi zwi tshi ḓa kha tshifhinga tsha zwiitea zwa ḓuvha ḽa Yesu ḽa u fhedza kha ḽifhasi. Dzenedzo Evangeli vhuṋa hadzo dzi sumbedza uri vhotshifhe na vhanna vhahulwane vho ṱangana musi ḽo no tsha nahone vha isa Yesu ha Muvhusi wa Muroma Pontio Pilato. (Mat. 27:1; Marko 15:1; Luka 22:66; Yoh. 18:28) Mateo, Marko, na Luka vhoṱhe vha amba uri nga tshikhathi tsha vhuṱanu na vhuthihi, musi Yesu o no ombelwa kha danda, swiswi ḽo mbo ḓi tiba shango ḽoṱhe u swika nga “tshikhathi tsha vhuṱanu-na-vhuṋa.”—Mat. 27:45, 46; Marko 15:33, 34; Luka 23:44.

Zwiṅwe zwithu zwa ndeme zwine zwa nga kwama tshifhinga tshee Yesu a ombelwa ngatsho ndi uri u tambudzwa na u rwiwa zwo vha zwi tshi dzhiiwa sa tshipiḓa tsha u ombelwa. Nga zwiṅwe zwifhinga u tambudzwa ho vha ho kalula lwe muthu a vha a tshi nga fa. Musi zwi tshi ḓa kha Yesu, zwi nga vha zwo kalula lwe zwa ṱoḓa uri muṅwe muthu a mu hwalele danda ḽa tshengedzo musi Yesu o no ḽi hwala e eṱhe. (Luka 23:26; Yoh. 19:17) Arali u rwiwa honoho ho vha hu tshi dzhiiwa sa tshipiḓa tsha u ombelwa, ho vha hu tshi ḓo fhela tshifhinga Yesu a sa athu ombelwa kha danda. Nga zwenezwo, vhathu vho fhamba-fhambanaho vha nga bula zwifhinga zwo fhambanaho zwe Yesu a ombelwa ngazwo, zwi tshi ya nga uri vhone vho thoma lini u vhalela tshifhinga.

Muapostola Yohane o ṅwala mafhungo awe mahumi a miṅwaha nga murahu ha vhaṅwe vhaṅwali vha Dzievangeli. Nga zwenezwo, o vhala mafhungo avho. Ndi ngoho uri Yohane o amba nga tshifhinga tshi sa fani na tshee tsha ambiwa nga Marko. Naho zwo ralo, zwenezwi zwi ri ṋea vhuṱanzi vhu pfalaho ha uri Yohane ho ngo ṅwalulula zwe zwa ambiwa nga Marko. Yohane na Marko vho vha vho hevhedzwa nga Mudzimu. Naho hu si na mafhungo o eḓanaho Maṅwaloni ane a ṱalusa yeneyo phambano, ri nga fulufhela mafhungo a Dzievangeli.