Naa Ni A Takalela “Ndugelo Ya U Ṋea Nga Mafunda”?

VHAKRISTE vha u thoma vha ngei Filipi vho vha vha tshi ḓivhelwa u tikedza vhurabeli ho kunaho nga mafunda. Kha vhurifhi ho hevhedzwaho he a vha ṅwalela hone, muapostola Paulo o ri: “Hoṱhe hune nda ni elelwa ndi renda Mudzimu wanga. Thabeloni dzanga dzoṱhe, dziné nda ni rabelela noṱhe, hedzo thabelo hoṱhe nda dzi rabela ndó takala. Ndi takala nga u anana haṋu kha mafhungo-maḓifha, tshee na zwi thoma, u swika na zwino.” (Vha-Fil. 1:3-5) Paulo o humbula zwavhuḓi musi Lidia na vha nnḓu yawe vha tshi lovhedzwa nahone nga mafunda a kombetshedza uri Paulo na khonani dzawe dze a vha a tshi huwelela nadzo vha dzule muḓini wawe.—Mish. 16:14, 15.

Nga murahunyana ha zwenezwo, tshivhidzo tshiswa tsha Filipi tsho rumela Paulo luvhili lwoṱhe zwithu zwa u mu tikedza musi o dzula vhege dzi si gathi na vhaṅwe vhatendi ngae ngei Thesalonika, hu ṱoḓaho u vha khilomithara dza 160. (Vha-Fil. 4:15, 16) Nga murahu ha miṅwaha i si gathi musi Vhafilipi na vhaṅwe vhahashu vha  Makedonia vhe vhuṱunguni na “ngomu-ngomu ha vhushai havho,” vho pfa nga ha vhushai ha Vhakriste vha Yerusalema vhe vha vha vha tshi khou tovholwa nahone vho vha vha tshi ṱoḓa u vha thusa. Paulo o amba uri vhukuma “vho pfukisa na huné vha kona, vhó tou zwi funa vhone vhaṋe.” Naho zwo ralo, o ṅwala uri: “Vho ri kwengweledza zwinzhi, vha tshi ri humbela tshilidzi [“ndugelo ya u ṋea nga mafunda,” NW].”—2 Vha-Kor. 8:1-4; Vha-Roma 15:26.

Hu ṱoḓaho u vha miṅwaha ya fumi musi Vhafilipi vho no ṱanganedza Vhukriste, vho vha vha tshi kha ḓi sumbedza wonoyo muya wa mafunda. Musi vha tshi pfa uri Paulo o valelwa dzhele ngei Roma, vho rumela Epafrodito uri a ise zwithu kha vhaapostola vhukule ha khilomithara dza 1 287 a tshi khou tshimbila lwanzheni na shangoni ḽo omaho. Zwi tou vha khagala uri Vhafilipi vho vha vha tshi ṱoḓa u tikedza Paulo uri a kone u bvela phanḓa na u khwaṱhisa vhahashu na u huwelela, naho o vha e dzhele.—Vha-Fil. 1:12-14; 2:25-30; 4:18.

Ṋamusi Vhakriste vha ngoho vha zwi dzhia i ndugelo u tikedza mushumo wa u huwelela nga ha Muvhuso na wa u ita vhafunziwa. (Mat. 28:19, 20) Vha tikedza zwithu zwine zwa tshimbidzana na Muvhuso nga u ṋeela nga tshifhinga, nungo na tshelede. Bogisi ḽi re kha enea masiaṱari ḽi sumbedza dziṅwe nḓila dzine na nga tikedza ngadzo wonoyu mushumo we ra u ṋewa nga Mudzimu.

[Bogisi kha masiaṱari 22, 23]

NḒILA DZINE VHAṄWE VHA KHETHA U ṊEELA NGADZO

MIṊEELO YA MUSHUMO WA SHANGO ḼOṰHE

Vhanzhi vha vhetshela thungo, kana u vhekanya tshelede ine vha i longa mabogisini a muṋeelo o ṅwalwaho uri “Mushumo wa Shango Ḽoṱhe.”

Ṅwedzi muṅwe na muṅwe, zwivhidzo zwi rumela tshelede yeneyi ofisini ya Ṱhanzi dza Yehova ine ya ṱhogomela mashango ane zwa vha khao. Miṋeelo ya u ḓifunela ya tshelede i nga kha ḓi rumelwa nga ho livhaho kha Watch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, kana ofisini ya davhi i ṱhogomelaho shango ḽa vhoiwe. (Miṋeelo ya u ḓifunela yo bulwaho kha zwipiḓa zwi re afho fhasi i nga dovha ya rumelwa ofisini ya davhi i ṱhogomelaho shango ḽa vhoiwe.) Musi ni tshi ṋeela nga tsheke, ni ṅwale uri “Watch Tower Society.” Ri humbela uri ni kwame ofisi ya davhi arali ni tshi ṱoḓa u ṋeela nga dzhuwele kana zwiṅwe zwithu zwa ndeme. Nga murahu, miṋeelo yeneyi i fanela u rumelwa na vhurifhi vhupfufhi vhune ha ṱalutshedza uri zwifhiwa zwenezwo a zwi na mikano.

U ṊEELA HO DZUDZANYWAHO

Nga nnḓa ha zwifhiwa zwi si na mikano zwa tshelede na miṋeelo ya tshelede, hu na maṅwe maitele a u ṋeela u itela u vhuyedza mushumo wa Muvhuso shangoni ḽoṱhe. Maitele eneo a katela:

Ndindakhombo: Watch Tower Bible and Tract Society of South Africa i nga ḓi ṅwaliswa sa ine ya ḓo vhuyelwa kha ndugiselelo ya tshelede ya ndindakhombo ya vhutshilo, kana kha tshelede ya u notha kana ya phesheni.

Akhaunthu Dza Banngani: Akhaunthu dza banngani, zwiḽipi zwa u dipositha, na tshelede ya phesheni zwi nga ṋewa Watch Tower Bible and Tract Society of South Africa, ni tshi kha ḓi tshila kana no no lovha, zwi tshi ya nga ṱhoḓea dza bannga ya henefho.

Mikovhe na Dzi-bond: Mikovhe na dzi-bond zwi nga ṋekedzwa Watch Tower Bible and Tract Society of South Africa, sa zwifhiwa zwi si na mikano.

Zwifhaṱo: Zwifhaṱo zwine zwa rengisea zwi nga ṋeelwa sa zwifhiwa zwi si na mikano kana arali hu nnḓu, hu nga itwa pfano ya uri i si dzhiiwe musi ane a khou dzula henefho a tshi kha ḓi tshila. Ḓivhadzani ofisi ya davhi ya hune na dzula hone ni sa athu ṋeela nga tshifhaṱo naho tshi tshifhio.

Mbofho: Thundu kana tshelede zwi nga ṋewa Watch Tower Bible and Tract Society of South Africa nga u tevhedza ndaela ya mufu i re mulayoni, kana Watch Tower Bible and Tract Society of South Africa i nga kha ḓi ṅwaliswa sa ine ya ḓo wana thundu kana tshelede. Tshelede kana thundu ine ya ṋewa ndangulo ya vhurereli i nga kha ḓi vha na mbuyelo dzavhuḓi kha zwa muthelo.

Arali ni tshi ṱoḓa mafhungo o engedzeaho, ni fanela u kwamana na Accounting Office nga luṱingo kana nga u tou ṅwala vhurifhi kha ḓiresi yo ṅwalwaho afho fhasi kana ni nga kwama ofisi ya davhi ine ya ṱhogomela shango ḽa vhoiwe.

Accounting Office

Watch Tower Bible and Tract Society of South Africa

Private Bag X2067

Krugersdorp

1740

South Africa

Luṱingo: 011 761 1323