“Zwino Ndo Holefhala Fhedzi A Si Zwa Tshoṱhe!”

Muanetsheli ndi Sara van der Monde

Kanzhi vhathu vha mmbudza uri: “Sara ni ṅwethuwa zwavhuḓi. Ndi ngani ni tshi dzula no takala nga u rali?” Ndi vha vhudza uri ndi na fulufhelo ḽo khetheaho. Ndi nga ḽi ṱalusa nga maipfi a tevhelaho: “Zwino ndo holefhala, fhedzi a si zwa tshoṱhe!”

NDO bebwa nga 1974 ngei Fura, ḓoroboni ya Paris. Mme anga vho vha na thaidzo musi vha tshi mmbeba, nga murahu ha tumbulwa uri ndo holefhala vhuluvhi. Ndo vha ndi sa koni u shumisa zwanḓa na milenzhe nahone ndo vha ndi sa koni u amba zwavhuḓi. Ndo dovha nda vha na vhulwadze ha tshifakhole na maṅwe malwadze.

Musi ndi na miṅwaha mivhili, muṱa wa hashu wo pfulutshela Australia, ḓoroboni ya Melbourne. Nga murahu ha miṅwaha mivhili, Khotsi anga vho mbo ḓi ṱutshela nṋe na Mme anga. Lwa u tou thoma nga tshenetsho tshifhinga, nda ḓipfa ndi tsini na Mudzimu. Mme anga, vhane vha vha muṅwe wa Ṱhanzi dza Yehova, vho vha vha tshi ṱuwa na nṋe tshifhinga tshoṱhe miṱanganoni ya Vhukriste, ndi he nda guda uri Mudzimu u a mpfuna nahone u a nṱhogomela. U ḓivha zwenezwo kathihi na nḓila ye Mme anga vha vha vha tshi mpfuna na u nkhwaṱhisedza ngayo, zwo nthusa uri ndi ḓipfe ndo tsireledzea, hu sa londwi vhuimo hashu ho shandukaho.

Mme anga vho dovha vha mpfunza u rabela Yehova. Ndo wana u rabela zwi tshi leluwa u fhira u amba. Musi ndi tshi rabela a zwi vhuyi zwa ṱoḓa uri ndi tou bula maipfi, fhedzi ndi pfa zwine nda zwi amba mbiluni. Nga nṱhani ha uri zwine nda amba zwi a konḓa u pfesesea, ndi wana khwaṱhisedzo nga u ḓivha uri Yehova u pfesesa zwoṱhe, hu sa londwi uri ndi zwi ambela mbiluni kana ndi amba nga ipfi ḽi sa pfali zwavhuḓi.—Ps. 65:2.

U Konḓelela Thaidzo

Musi ndi na miṅwaha miṱanu, vhulwadze hanga ha u holefhala vhuluvhi ho vha ho no hulela lwe ha ṱoḓea thonga dza tsimbi u itela u nthusa uri ndi kone u tshimbila. Ndo vha ndi tshi thengaila musi ndi tshi tshimbila! Musi ndi na miṅwaha ya 11, ndo vha ndi si tsha kona u tshimbila na luthihi. Nga murahu ndo vha ndi sa koni u gonya na u tsa mmbeteni arali nda sa tou thuswa nga mutshini wa muḓagasi we wa vha u tshi ntakulela kha tshidulo tshanga tsha vhaholefhali, tshe nda vha ndi tshi kona u tshi tshimbidza nga gere ya hone.

Ndi nga tenda uri nga zwiṅwe zwifhinga vhuholefhali hanga ho vha vhu tshi nkula nungo. Fhedzi ndi humbula kuambele kwashu kwa muṱa: “U songo vhilaela nga zwithu zwine wa si kone u zwi shandula. Ita zwine wa zwi kona.” Zwenezwi zwo ita uri ndi kone u namela bere,  tshikepe, tshikwekwete, u gammba na u reila goloi fhethu hu songo ḓalaho dzigoloi. Ndo sumbedza vhukoni hanga nga u pennda, u runga, u luka zwithu zwa u adza mmbeteni, u runga zwithu zwa u khavhisa na u vhumba zwithu nga vumba.

Nga nṱhani ha vhuholefhali hanga, vhaṅwe vho amba uri a thi na vhukoni ha u ita phetho ya u gwadamela Mudzimu. Musi ndi na miṅwaha ya 18, mudededzi wanga o nṱuṱuwedza uri ndi ṱuwe hayani uri zwi mmbofholole kha vhurereli ha mme anga. O dovha a amba uri a nga nthusa u wana fhethu hune nda nga dzula hone. Naho zwo ralo, ndo mu vhudza uri ndi nga si vhuye nda ṱutshela lutendo lwanga na uri ndi ḓo ṱuwa hayani musi ndi tshi vho kona u ḓiṱhogomela.

Nga murahunyana ndo no amba na mudededzi wanga, ndo lovhedzwa nda vha muṅwe wa Ṱhanzi dza Yehova. Miṅwaha mivhili nga murahu ha zwenezwo, nda mbo ḓi pfulutshela fuletheni ṱhukhu. Henefha ndi takalela thikhedzo ine nda i wana nahone ndi kona u ḓiitela phetho.

U Ambiswa Ndi Songo Zwi Lavhelela

Musi miṅwaha i tshi khou ḓi ṱanḓulukana, ndo sedzana na miṅwe milingo ya lutendo. Ḽiṅwe ḓuvha ndo tshenuwa vhukuma musi muṅwe muṱhannga o holefhalaho, we nda vha ndi tshi dzhena nae tshikolo a tshi nnyambisa. Mathomoni zwo ntsengenedza. U fana na vhasidzana vhanzhi, ndi a tama u vha na mufarisi. Naho zwo ralo, samusi vhuvhili hashu ro vha ri vhaholefhali, ho vha hu si na khwaṱhisedzo ya uri ri ḓo takala mbinganoni. Zwiṅwe hafhu, muṱhannga onoyo o vha e si wa lutendo luthihi na nṋe. Zwine ra zwi tenda, mishumo yashu, na zwipikwa zwashu zwo vha zwo fhambana tshoṱhe. Ngauralo-ha, ro vha ri tshi ḓo tshilisana hani? Zwiṅwe hafhu, ndo vha ndo ḓiimisela u thetshelesa vhulivhisi ha Mudzimu vhu pfalaho ha u vhingwa Murenani fhedzi. (1 Vha-Kor. 7:39) Nga zwenezwo, nda mbo ḓi hana nga vhulenda khumbelo ya muṱhannga onoyo.

Na ṋamusi ndi a zwi ḓivha uri ndo ita phetho yavhuḓi. A thi timatimi na luthihi uri ndi ḓo takala shangoni ḽiswa ḽo fulufhedziswaho ḽa Mudzimu. (Ps. 145:16; 2 Pet. 3:13) Zwa zwino ndo ḓiimisela u dzula ndi tshi fulufhedzea kha Yehova na u ṱanganedza vhuimo hanga ha zwino.

Ndi ṱulutshela ḓuvha ḽine nda si tsha ḓo dzula tshiduloni tshanga tsha vhaholefhali nahone nda gidima sa ntsamavhuvhu. Nga tshenetsho tshifhinga ndi ḓo lidza mifhululu nda ri: “Ndo vha ndo holefhala, fhedzi zwino ndi na mutakalo wavhuḓi​—nga hu sa fheli!”