Ni Songo Tendela Vhulwadze Vhu Tshi Ni Dzhiela Dakalo

EDZANI u ḓivhona ni tshi khou vuwa nga matsheloni fhedzi ni tshi tou tama ngavhe ḓuvha ḽeneḽo ḽo no kovhela nga nṱhani ha uri ni fanela u konḓelela zwiṱhavhi muvhilini na maḓipfeleni. Ni nga ḓipfa u fana na Yobo we a ri: “Khwine ndi u fa!” (Yobo 7:15) Ni fanela u ita mini arali honoho vhuimo ha bvela phanḓa lwa miṅwaha minzhi?

Mefibosete ṅwana wa Yonathani khonani ya Khosi Davida, o sedzana na honoho vhuimo. Musi Mefibosete e na miṅwaha miṱanu, o “wa a holefhala.” (2 Sam. 4:4) U fanela u vha o tsikeledzea maḓipfeleni musi a tshi pomokwa uri o fheṱa khosi nahone zwenezwi zwi nga vha zwo ita uri zwi si mu lelutshele u konḓelela vhuhole hawe. Naho zwo ralo, o bvela phanḓa a tshi vha tsumbo yavhuḓi ya u konḓelela vhulwadze, u rembiwa na u kulea nungo nahone ho ngo tendela yeneyi milingo i tshi mu dzhiela dakalo.—2 Sam. 9:6-10; 16:1-4; 19:24-30.

Muapostola Paulo ndi iṅwe tsumbo. O vhuya a ṅwala nga ha “phaṋa ya u ṱhavha ṋama” ye a vha a tshi fanela u i konḓelela. (2 Vha-Kor. 12:7) Phaṋa kana mupfa we a amba nga hawo u nga kha ḓi vha u vhushayanungo he a vha naho tshifhinga tshilapfu, kana vhathu vhe vha vha vha tshi lwisana na u vha hawe muapostola. Hu sa londwi uri vhuimo ho vha vhu vhufhio, thaidzo yawe yo bvela phanḓa nahone o vha a tshi fanela u sedzana na vhuṱungu ha ṋamani na maḓipfeleni he ha ḓiswa nga yeneyo thaidzo.—2 Vha-Kor. 12:9, 10.

Vhaṅwe vhashumeli vha Mudzimu ṋamusi vha farwa nga malwadze a sa fholi kana u tsikeledzea maḓipfeleni. Musi Magdalena e na miṅwaha ya 18, ho wanala uri u na vhulwadze ha systemic lupus erythematosus, vhune ha ita uri maswole a muvhili a lwe na miṅwe miraḓo ya muvhili. O ri: “Ndo vha ndo tshuwa. Nga u ya ha tshifhinga, vhuimo hanga ho mbo ḓi ṋaṋa nahone ndo mbo ḓi vha na thaidzo dza tsukanyo, zwilonda mulomoni na u zwimba mukulo.” Kha ḽiṅwe sia, Izabela o vha a tshi fanela u lwisana na vhulwadze vhu sa vhonali. O ri: “U bva vhuṱukuni, ndo vha ndi na mutsiko wa maḓipfele. Zwenezwi zwo ita uri ndi tshuwe, ndi vhe na thaidzo ya u fema na zwiṱhavhi thumbuni nahone zwi ita uri ndi dzule ndo neta.”

U Ṱanganedza Vhushayanungo Haṋu

Vhulwadze vhu nga thithisa vhutshilo haṋu. Musi zwenezwo zwi tshi itea, zwi nga thusa u thoma na dzula fhasi na elekanya zwavhuḓi nga ha vhuimo haṋu. Zwi nga konḓa u ṱanganedza vhushayanungo haṋu. Magdalena o ri: “Vhulwadze hanga vhu ṋaṋa nga u ya ha tshifhinga. Kanzhi ndi ḓipfa ndo neta ndi sa ṱoḓi na u vuwa. Samusi vhulwadze hanga vhu tshi shandu-shanduka ndi songo zwi lavhelela, zwi ita uri zwi konḓe u dzudzanya zwithu hu tshee nga phanḓa. Zwine zwa mmbilaedzisa vhukuma ndi uri a thi tsha kona u ita zwe nda vha ndi tshi kona tshumeloni ya Yehova.”

Zbigniew u ri: “Musi miṅwaha i tshi khou ḓi  ya, vhulwadze ha marambo vhu fhedza nungo dzanga dzoṱhe nahone vhu ita uri zwinungo zwanga zwi si tsha shuma zwavhuḓi. Nga zwiṅwe zwifhinga musi zwo no tou ṋaṋa a thi koni na u ita mishumo i leluwaho vhukuma. Zwenezwo zwi ita uri ndi ḓipfe ndi si na mushumo.”

Miṅwahani yo fhiraho ho wanala uri Barbara u na bundu ḽine ḽa khou kukumuwa kha vhuluvhi. U ri: “Nga u ṱavhanya ho mbo ḓi vha na tshanduko muvhilini wanga. Ndi a kulea nungo, ndi dzulela u farwa nga ṱhoho nahone ndi na thaidzo ya u sa kona u livhisa ṱhogomelo kha tshithu tshithihi. Nga nṱhani ha vhushayanungo hanga vhuswa, ndo tea uri ndi ṱolisise vhutshilo hanga.”

Vhenevha vhathu vhoṱhe ndi vhashumeli vha Yehova vho ḓiṋekedzaho. Ndi zwa ndeme khavho u ita zwine a zwi funa. Vha fulufhela tshoṱhe Mudzimu nahone vha a vhuyelwa nga thikhedzo yawe.—Mir. 3:5, 6.

Yehova U Thusa Nga Nḓila-ḓe?

Ri fanela u iledza u humbula uri maṱungu ane ra vha nao a ḓiswa nga nṱhani ha u sa takalelwa nga Mudzimu. (Zwililo 3:33) Humbulani zwe Yobo a ṱangana nazwo hu sa londwi uri o vha e “muvhuya, [e] wa u luga.” (Yobo 1:8) Mudzimu ha lingi vhathu nga vhuvhi. (Yak. 1:13) Malwadze oṱhe—a sa fholi na a maḓipfele—o ḓiswa nga mulandu wa vhabebi vhashu vha u thoma, Adamu na Eva.—Vha-Roma 5:12.

Naho zwo ralo, Yehova na Yesu vha nga si litshe u thusa vhavhuya. (Ps. 34:15) Zwifhingani zwi konḓaho ri a kona u vhona uri Mudzimu ndi ‘vhukhudo hashu na thavha yashu.’ (Ps. 91:2) Nga zwenezwo, musi ri vhuimoni vhune zwa si leluwe u vhu tandulula, ndi mini zwine zwa nga ri thusa uri ri dzule ro takala?

Thabelo: Ni tshi edzisa tsumbo ya vhashumeli vha Mudzimu vha fulufhedzeaho vha tshifhingani tsha kale, ni nga laṱela mihwalo yaṋu kha Khotsi ashu wa ṱaḓulu nga thabelo. (Ps. 55:22) Musi ni tshi ita zwenezwo, ni ḓo wana “mulalo wa Mudzimu a fhiraho u ṱalukanya hoṱhe.” Wonoyo mulalo ‘u ḓo vhulunga mbilu dzaṋu na mihumbulo yaṋu.’ (Vha-Fil. 4:6, 7) Magdalena u kona u sedzana na vhulwadze hawe vhu vhavhaho nga u ḓitika nga Mudzimu nga thabelo. U ri: “U rabela Yehova zwi nnyita uri ndi ḓipfe ndi khwine nahone zwi nnḓisela dakalo. Zwino ndi  vho kona u pfesesa uri zwi amba mini u ḓitika nga Mudzimu ḓuvha ḽiṅwe na ḽiṅwe.”—2 Vha-Kor. 1:3, 4.

Yehova a nga fhindula thabelo nga u ni khwaṱhisa nga muya wawe mukhethwa, Ipfi ḽawe na nga vhurathu na vhukomana ha Vhukriste. Ni songo lavhelela uri Mudzimu u ḓo ni fhodza nga lwa vhuṱolo. Fhedzi ni nga lavhelela uri a ni ṋee vhuṱali na nungo dzi ṱoḓeaho u itela uri ni kone u sedzana na vhuṱungu vhuṅwe na vhuṅwe. (Mir. 2:7) A nga ni khwaṱhisa, a ni ṋea “u hulesa ha maanḓa.”—2 Vha-Kor. 4:7.

Muṱani: Muṱa u re na lufuno na u pfelaho vhuṱungu u nga ni thusa uri ni kone u konḓelela vhulwadze. Naho zwo ralo, humbulani uri vhathu vhane vha ni funa na vhone vha a pfa vhuṱungu. Na vhone vha nga kha ḓi vha vho kulea nungo u fana na inwi. Fhedzi vha a ni tikedza naho zwi tshi konḓa. U rabela noṱhe zwi ḓo ita uri ni rudze mbilu.—Mir. 14:30.

Barbara o amba zwi tevhelaho nga vhananyana vhawe na vhaṅwe vhahashu vha tshisadzini vhaswa vha re tshivhidzoni: “Vha a ntikedza vhuḓinḓani. U fhisea havho zwi a nṱuṱuwedza.” Zbigniew u dzhiela nṱha thikhedzo ya mufumakadzi wawe. “U ita mishumo minzhi ya hayani. U dovha a nthusa musi ndi tshi ambara nahone kanzhi u mpfarela bege musi ri tshi ya miṱanganoni ya Vhukriste na vhuḓinḓani.”

Vhatendi nga riṋe: Musi ri na vhatendi nga riṋe ri a ṱuṱuwedzea na u fhembeledzwa. Fhedzi ni nga ita mini arali ni sa koni u ya miṱanganoni nga nṱhani ha vhulwadze? Magdalena u ri: “Vhahashu vha rekhoda miṱangano uri ndi kone u vhuyelwa. Vhatendi nga nṋe vha anzela u nthwela luṱingo u itela u vhona zwine vha nga nthusa ngazwo. Vha dovha vha nṅwalela marifhi a nṱuṱuwedzaho. U ḓivha uri vha a nkhumbula nahone vha a vhilaela nga mutakalo wanga zwi nthusa uri ndi kone u konḓelela.”

Izabela a re na mutsiko wa maḓipfele u ri: “Tshivhidzoni ndi na ‘vhokhotsi’ na ‘vhomme’ vhanzhi vhane vha nthetshelesa na u lingedza u mpfesesa. Musi ndi tshivhidzoni ndi ḓipfa ndi hayani—henefha ndi hune nda wana mulalo na dakalo.”

Zwi ḓo vha zwavhuḓi uri vhathu vhe vha sedzana na milingo yo fhamba-fhambanaho vha si ḓifhambanye na vhaṅwe. Nṱhani hazwo, vha fanela u dzhiela nṱha u ṱanganela na tshivhidzo.  (Mir. 18:1) Nga zwenezwo, vha ṱuṱuwedza vhaṅwe nga nḓila khulwane. Mathomoni zwi nga kha ḓi ni konḓela u vhudza vhahaṋu zwine na zwi ṱoḓa. Fhedzi vhatendi nga inwi vha ḓo takala musi ni tshi amba navho no vhofholowa. Zwi ḓo ita uri vha sumbedze “lufuno lwa u funa vharathu lu só ngo tou ṱumetshedzwaho.” (1 Pet. 1:22) Zwi nga vha zwavhuḓi uri ni vha vhudze arali ni tshi ṱoḓa tshinamelwa tsha u ya miṱanganoni, ni tshi ṱoḓa u shuma navho vhuḓinḓani, kana ni tshi ṱoḓa muthu ane na nga mu somolela zwa haṋwani. Ndi ngoho uri a ro ngo fanela u vha kombetshedza u ri itela zwithu, fhedzi ri fanela u livhuha thuso yavho.

Ivhani na mavhonele avhuḓi: Zwi bva kha inwi muṋe uri ni kone u dzula no takala hu sa londwi uri no sedzana na vhulwadze vhu sa fholi. U dzula no ṱungufhala kana ni songo takala zwi nga ita uri ni vhe na mavhonele a si avhuḓi. Bivhili i ri: “Mbilu ya munna i mu tika vhuhoṱani; mbilu ya vunḓea i kha ḓi ḓo hwalwa nga nnyi-ha?”—Mir. 18:14.

Magdalena u ri: “Ndi ita vhuḓidini u itela uri ndi sa livhise ṱhogomelo kha thaidzo dzine nda vha nadzo. Ndi lingedza u takalela maḓuvha ane nda ḓipfa ndi khwine ngao. Ndi a ṱuṱuwedzwa nga u vhala nganea dza vhathu vhe vha dzula vha tshi fulufhedzea hu sa londwi malwadze avho a sa fholi.” Izabela u khwaṱhiswa nga u ḓivha uri Yehova u a mu funa na u mu dzhiela nṱha. O ri: “Ndi a zwi ḓivha uri Yehova u dzhiela nṱha zwine nda zwi ita tshumeloni yawe, nahone ndi na ndivho vhutshiloni. Zwiṅwe hafhu, ndo lavhelela u vha na vhumatshelo vhu takadzaho.”

Zbigniew o ri: “Vhulwadze hanga vhu nngudisa u ḓiṱukufhadza na u thetshelesa. Vhu mpfunza uri ndi vhe na luvhonela na uri ndi hangwele vhaṅwe zwi tshi bva mbiluni. Ndo guda u takalela u shumela Yehova ndi sa ḓipfeli vhuṱungu. Zwi re zwone ndi uri zwo nṱuṱuwedza uri ndi dzule ndi tshi ita mvelaphanḓa ya lwa muya.”

Dzulani ni tshi zwi humbula uri Yehova u a ṱhogomela u konḓelela haṋu. U a ni pfela vhuṱungu musi ni tshi khou lwala nahone u a ni londa. “Ha nga hangwi zwe na shuma na ḓi-netisa lufunoni ni tshi itela dzina ḽawe.” (Vha-Heb. 6:10) Ṱhogomelani fulufhedziso ḽe a ḽi itela vhoṱhe vhane vha mu ofha: “A thi nga U litshi, a thi nga U laṱedzi.”—Vha-Heb. 13:5.

Arali nga zwiṅwe zwifhinga ni tshi ḓipfa no tsikeledzea, livhisani ṱhogomelo kha fulufhelo ḽavhuḓi ḽa u tshila shangoni ḽiswa. Hu si kale hu ḓo ḓa tshifhinga tshine na ḓo vhona phaṱhutshedzo dza Muvhuso wa Mudzimu kha ḽifhasi!

[Bogisi/Zwifanyiso kha masiatari 28, 29]

Vha Bvela Phanḓa Vha Tshi Huwelela Hu Sa Londwi Vhulwadze Vhu Sa Fholi

“A thi tsha kona u ḓitshimbidza, nga zwenezwo mufumakadzi wanga kana vhahashu tshivhidzoni vha ya na nṋe vhuḓinḓani. Ndi rwela ngomani maambele na ndimana dza Bivhili.”—Jerzy wa bofu.

“Nga nnḓa ha u ṱanziela nga luṱingo, ndi ṅwala marifhi nahone ndi anzela u davhidzana na vhathu vha re na dzangalelo. Musi ndi vhuongeloni ndi anzela u vhea Bivhili na khandiso dza Ṱhanzi dza Yehova tsini na mmbete wanga. Zwenezwo zwo ita uri ndi kone u thoma nyambedzano nnzhi dzavhuḓi.”—Magdalena a re na vhulwadze ha “systemic lupus erythematosus.”

“Ndi takalela u ya vhuḓinḓani ha nnḓu nga nnḓu, fhedzi musi ndi tshi vhona uri ndi nga si kone, ndi ṱanziela nga luṱingo.”—Izabela a re na mutsiko wa maḓipfele.

“Ndi takalela u ita nyendo dza u vhuyelela na u thusa vhaṅwe kha pfunzo dzavho dza Bivhili. Musi ndi tshi ḓipfa ndi khwine, ndi takalela u ṱanziela nnḓu nga nnḓu.”—Barbara a re na bundu kha vhuluvhi.

“Ndi hwala bege ya dzimagazini i sa lemeli. Ndi ṱwa tsimuni fhedzi arali zwinungo zwanga zwi vhavhaho zwi tshi ntendela u ita nga u ralo.”—Zbigniew a re na vhulwadze ha marambo.

[Tshifanyiso kha siaṱari 30]

Vhahulwane na vhaṱuku vha nga ṱuṱuwedza vhaṅwe