‘Ndi Ḓo Kona Hani U Huwelela?’

Shangoni ḽoṱhe, ri na tsumbo dzavhuḓi dza vhahashu vhane vha huwelela nga u fulufhedzea hu sa londwi thaidzo khulwane dza mutakalo dzine vha sedzana nadzo. Sa tsumbo, kha ri ṱhogomele Dalia ane a dzula Vilnius musanda wa Lithuania.

Dalia ndi wahashu wa tshisadzini a re miṅwahani ya vhu-30. U bva tshee a bebwa o vha e na thaidzo ya vhuluvhi. Honoho vhulwadze ho ita uri a si kone u shumisa miraḓo yawe nahone zwa ita uri a si ambe zwavhuḓi. Nga nṱhani ha zwenezwo, ndi miraḓo ya muṱa wa hawe fhedzi ine ya mu pfesesa musi a tshi amba. Dalia u dzula na mme awe Galina vhane vha mu ṱhogomela. Naho vhutshilo ha Dalia vhu na maṱungu na dzimbilaelo, u dzula e na mavhonele avhuḓi. U kona hani u ita zwenezwo?

Galina u a ṱalutshedza: “Nga 1999, ro dalelwa nga muzwala wanga Apolonija. Ro ṱhogomela uri Apolonija a re muṅwe wa Ṱhanzi dza Yehova o vha a tshi pfesesa Bivhili, nahone Dalia o thoma u mu vhudzisa mbudziso nnzhi. Hu sa athu fhela na tshifhinga ho mbo ḓi thomiwa pfunzo ya Bivhili na Dalia. Nga zwiṅwe zwifhinga, ndo vha ndi tshi vha hone u itela uri ndi kone u ḓologela Apolonija zwe Dalia a amba. Naho zwo ralo, ndo zwi ṱhogomela uri zwoṱhe zwe a vha a tshi khou zwi guda zwo mu vhuyedza. Ngauralo, na nṋe nda humbela u gudiswa Bivhili.”

Musi Dalia a tshi thoma u pfesesa ngoho ya Bivhili, ho vha na mbudziso ye ya thoma u mu dina tshifhinga tshoṱhe. O fhedzisela o vhudzisa Apolonija uri: “Muthu o holefhalaho u fana na nṋe a nga kona hani u huwelela?” (Mat. 28:19, 20) Apolonija o mu khuthadza nga uri: “Ni songo ofha. Yehova u ḓo ni thusa.” Ndi ngoho, Yehova u a thusa.

Nga zwenezwo, Dalia u huwelela nga nḓila-ḓe? U huwelela nga nḓila dzo fhamba-fhambanaho. Vhahashu vha tshisadzini vha Vhakriste vha mu thusa u ṅwala marifhi a re na mulaedza wa Bivhili. Dalia u thoma nga u ṱalutshedza vhahashu vha tshisadzini zwine a khou zwi humbula. Nga murahu, vha ṅwala vhurifhi vho vhu thea kha zwe a vha ṱalutshedza zwone. Dalia u dovha a shumisa luṱingothendeleki lwawe u rumela milaedza. Musi mutsho u wavhuḓi, miraḓo ya tshivhidzo i mu isa phakhani na tshiṱaraṱani uri a kone u amba na vhathu.

Dalia na mme awe vho ita mvelaphanḓa ya lwa muya. Nga November 2004, vhuvhili havho vho ḓiṋekedza kha Yehova nga ndovhedzo. Nga September 2008, ho thomiwa tshigwada tsha Lupolish ngei Vilnius. Dalia na mme awe vha ṱanganela henefho samusi hu na ṱhoḓea ya vhahuweleli vha Muvhuso. Dalia u ri: “Nga miṅwe miṅwedzi ndi a vhilaela vhukuma arali ndi songo ya miṱanganoni. Musi ndo no rabela Yehova, nga u ṱavhanya muṅwe muthu tshivhidzoni u nkhumbela uri ndi ye nae vhuḓinḓani.” Wahashu Dalia a funwaho u ḓipfa hani nga vhuimo hawe? O ri: “Vhulwadze hanga ho holefhadza muvhili wanga, fhedzi a ho ngo holefhadza ṱhalukanyo yanga. Ndi a takala nga maanḓa ngauri ndi a kona u amba na vhaṅwe nga ha Yehova!”