U Ṋekedza Yehova Zwiṱhavhelo Zwi Bvaho Mbiluni
U Ṋekedza Yehova Zwiṱhavhelo Zwi Bvaho Mbiluni
“Námusi tshi tshi’ni, tshiné na ita, ni shume nga mbilu, ni nge ní shumelaho Mudzimu.”—VHA-KOL. 3:23.
NI NGA FHINDULA HANI?
Ri nga hulisa hani Yehova musi ro farakanea nga mishumo yashu ya ḓuvha ḽiṅwe na ḽiṅwe?
Ndi zwiṱhavhelo zwifhio zwine ra zwi ṋekedza musi ri tshi gwadamela Mudzimu?
Ri nga ṋekedza hani Yehova zwithu zwashu zwi vhonalaho?
1-3. (a) Naa u fa ha Yesu kha danda ḽa tshengedzo zwi amba uri Yehova ha tsha ṱoḓa mufuda naho u ufhio wa tshiṱhavhelo kha riṋe? Ṱalutshedzani. (b) Ndi mbudziso ifhio ine ya vhudziswa malugana na zwiṱhavhelo ṋamusi?
ḒANANI ḽa u thoma ḽa miṅwaha C.E., Yehova o dzumbululela vhathu vhawe uri tshirengululi tsha Yesu tsho fhelisa Mulayo wa Mushe. (Vha-Kol. 2:13, 14) Zwiṱhavhelo zwoṱhe zwe Vhayuda vha zwi ṋekedza lwa miṅwaha ya maḓana zwo vha zwi si tsha ṱoḓea nahone zwo vha zwi si tsha vha zwa ndeme. Mulayo wo vha wo khunyeledza mushumo wawo wa u vha “mudededzi . . . wa u ri isa ha Kristo.”—Vha-Gal. 3:24.
2 Hezwi a zwi ambi uri Vhakriste a vha na dzangalelo kha zwiṱhavhelo. U fhambana na zwenezwo, muapostola Petro o amba nga ha ṱhoḓea ya u ṋekedza “zwidzimu [zwa] lwa muya, zwi takalelwaho nga Mudzimu [na] nga Yesu Kristo.” (1 Pet. 2:5) Zwiṅwe hafhu, muapostola Paulo o zwi bvisela khagala uri masia oṱhe a vhutshilo ha Mukriste o ḓiṋekedzaho a nga kha ḓi dzhiiwa sa “tshidzimu.”—Vha-Roma 12:1.
3 Nga zwenezwo, Mukriste u itela Yehova zwiṱhavhelo nga u mu ṋea kana u ṱutshela zwiṅwe zwithu. U ya nga zwine ra ḓivha uri zwo vha zwi tshi ṱoḓea kha Vhaisiraele, ri nga vha hani na vhungoho ha uri Yehova u ṱanganedza zwiṱhavhelo zwashu ṋamusi?
VHUTSHILONI HA ḒUVHA ḼIṄWE NA ḼIṄWE
4. Ndi mini zwine ra fanela u zwi humbula musi ri tshi ita zwithu ḓuvha ḽiṅwe na ḽiṅwe?
4 Musi ro farakanea nga mishumo ya ḓuvha ḽiṅwe na ḽiṅwe, zwi nga kha ḓi vhonala zwi tshi konḓa u humbula uri zwine ra zwi ita ndi u ṋekedza Yehova tshiṱhavhelo. Mishumo ya hayani, ya tshikoloni, ya u ḓitshidza na u ya mavhengeleni, zwi nga kha ḓi vhonala zwi tshi nga a zwi tshimbidzani na zwithu zwa muya. Naho zwo ralo, arali no ṋekedza vhutshilo haṋu kha Yehova kana ni tshi ṱoḓa u vhu ṋekedza tshifhingani tshi ḓaho, mavhonele ane na vha nao nga ha mishumo ya ḓuvha na ḓuvha ndi a ndeme. Ri Vhakriste tshifhinga tshoṱhe. Ri fanela u shumisa maitele a Maṅwalo masiani oṱhe a vhutshilo hashu. Ndi ngazwo Paulo o ri ṱuṱuwedza uri: “Námusi tshi tshi’ni, tshiné na ita, ni shume nga mbilu, ni nge ní shumelaho Mudzimu, ni sá shumeliho vhathu.”—Vhalani Vha-Kolosa 3:18-24.
5, 6. Ndi mini zwine ra fanela u zwi ṱhogomela malugana na nḓila ine ra ambara ngayo na vhuḓifari hashu?
5 Zwithu zwine Mukriste a zwi ita ḓuvha ḽiṅwe na ḽiṅwe a si tshipiḓa tsha tshumelo khethwa. Naho zwo ralo, zwa uri Paulo u ri ṱuṱuwedza u shuma ‘nga mbilu ri tshi nga vha shumelaho Mudzimu’ zwi ita uri ri ṱoḓe u elekanya nga ha matshilele ashu. Nga zwenezwo, ri nga i shumisa hani yeneyi nyeletshedzo? Naa ri ḓifara na u ambara nga nḓila yo fanelaho zwifhinga zwoṱhe? Musi ro farakanea nga mishumo ya ḓuvha ḽiṅwe na ḽiṅwe, naa ri nga shona u ḓiamba uri ri Ṱhanzi dza Yehova nga nṱhani ha nḓila ine ra ḓifara ngayo kana ine ra ambara ngayo? A zwo ngo vhuya zwa fanela u tou ralo! Vhathu vha Yehova vha nga si ṱoḓe u ita tshithu naho tshi tshini tshine tsha ḓisela dzina ḽa Mudzimu samba.—Yes. 43:10; 2 Vha-Kor. 6:3, 4, 9.
6 Kha ri ṱolisise nḓila ine u ṱoḓa u shuma ‘nga mbilu yoṱhe ri tshi nga vha shumelaho Mudzimu’ zwa kwama ngayo masia o fhamba-fhambanaho a vhutshilo hashu. Musi ri tshi ita nga u ralo, ri fanela u humbula uri zwiṱhavhelo zwoṱhe zwe Vhaisiraele vha zwi ṋekedza Yehova zwo vha zwi tshi fanela u vha zwi zwa khwine-khwine.—Ek. 23:19.
NḒILA INE VHUTSHILO HAṊU HA KWAMEA NGAYO
7. Zwi amba mini u ḓiṋekedza kha Mudzimu?
7 Ndi ngoho uri musi ni tshi ḓiṋekedza kha Yehova, no dzhia yeneyo phetho ni sa vhuyi na timatima. Nga maṅwe maipfi, no amba uri Yehova u ḓo ḓa u thoma kha tshiṅwe na tshiṅwe tshine na tshi ita vhutshiloni haṋu. (Vhalani Vha-Heberu 10:7.) Yeneyo ndi phetho yavhuḓi. Zwi tou vha khagala uri no no zwi vhona uri musi ni tshi ṱoḓa u ita zwine Yehova a funa zwi tshi itwa na u lwela u shuma u tendelana nazwo, hu vha na mvelelo dzavhuḓi. (Yes. 48:17, 18) Vhathu vha Mudzimu ndi vhakhethwa nahone vho takala ngauri vha sumbedza pfaneleo dza Muthu ane a vha laya.—Lev. 11:44; 1 Tim. 1:11.
8. Ndi zwa ndeme lungafhani u ḓivha uri Yehova o vha a tshi dzhia zwiṱhavhelo zwa tshifhingani tsha kale zwi zwikhethwa?
8 Zwiṱhavhelo zwe Vhaisiraele vha zwi itela Yehova zwo vha zwi tshi dzhiiwa zwi zwikhethwa. (Lev. 6:25; 7:1) Ipfi ḽa Luheberu ḽo ṱalutshedzelwaho nga u ri “vhukhethwa” ḽi na muhumbulo wa u fhambanyisa kana u vha wa Mudzimu fhedzi. U itela uri zwiṱhavhelo zwashu zwi ṱanganedzwe nga Yehova, zwi fanela u fhambana na u sa tshikafhadzwa nga ṱhuṱhuwedzo ya shango. A ro ngo fanela u funa zwithu naho zwi zwifhio zwine Yehova a zwi vhenga. (Vhalani 1 Yohane 2:15-17.) Zwi tou vha khagala uri zwenezwi zwi amba uri ri fanela u iledza u ḓikonanya na u ṱanganela kha zwithu zwine zwa nga ita uri Mudzimu a vhone ri na tshika. (Yes. 2:4; Ndzumb. 18:4) Zwenezwi zwi dovha zwa amba uri a ro ngo fanela u tendela maṱo ashu a tshi sedza zwithu zwi songo kunaho kana vhuḓifari vhu si havhuḓi na u humbula nga hazwo.—Vha-Kol. 3:5, 6.
9. Nḓila ine Mukriste a fara ngayo vhaṅwe ndi ya ndeme lungafhani, nahone ndi ngani?
9 Paulo o ṱuṱuwedza vhatendi ngae uri: “Ni si hangwe u itana nga zwivhuya na u ṋeana; ndi zwone zwidzimu zwiné Mudzimu a zwi takalela.” (Vha-Heb. 13:16) Nga zwenezwo, u vha muthu wavhuḓi kana u itela vhaṅwe vhathu zwithu zwavhuḓi ndi zwithu zwine Yehova a zwi dzhia sa zwiṱhavhelo zwine zwa ṱanganedzea khae. U funa vhaṅwe zwi ṱalula Vhakriste vha ngoho.—Yoh. 13:34, 35; Vha-Kol. 1:10.
ZWIṰHAVHELO ZWA VHURABELI
10, 11. Yehova u dzhia hani vhuḓinḓa hashu ha Vhukriste na vhurabeli, nahone zwenezwi zwi ri kwama nga nḓila-ḓe?
10 Iṅwe nḓila i re khagala ine Vhakriste vha itela ngayo vhaṅwe zwithu zwavhuḓi ndi nga u ‘amba fhungo ḽa fulufhelo.’ Naa ni shumisa tshibuli tshiṅwe na tshiṅwe u itela u ṱanziela? Paulo o amba uri “tshidzimu tshashu tsha thendo ya maḓuvha, ndi amba zwiaṋwiwa zwa milomo i ambaho dzina ḽawe [Mudzimu]” ndi mushumo wa ndeme wa Vhakriste. (Vha-Heb. 10:23; 13:15; Hos. 14:3) Ri a vhuyelwa vhukuma nga u elekanya nga tshifhinga tshine ra tshi fhedza ri tshi khou huwelela mafhungo-maḓifha a Muvhuso, nahone nyambo dza Miṱangano ya Tshumelo dzo itelwa u ri thusa uri ri elekanye nga ho dzikaho nga ha enea mafhungo. Naho zwo ralo, samusi tshumelo yashu ya tsimu na u ṱanziela lu songo dzudzanywaho zwi “tshidzimu . . . tsha thendo,” nahone zwi tshipiḓa tsha vhurabeli hashu, tshenetshi tshiṱhavhelo tshi fanela u vha tsha khwine-khwine. Naho zwiimo zwi sa fani, tshifhinga tshine ra tshi fhedza ri tshi khou huwelela mafhungo-maḓifha tshi anzela u sumbedza nḓila ine ra dzhiela ngayo nṱha zwithu zwa muya.
11 Tshifhinga tshoṱhe Vhakriste vha fhedza tshifhinga vha tshi khou guda vhe vhoṱhe kana vhe tshigwada. Yehova u ṱoḓa ri tshi ita nga u ralo. Ndi ngoho uri a ri tsha tevhedza milayo ya Sabatha kana u fara nyendo dza u ya vhuṱamboni ngei Yerusalema. Fhedzi honoho vhuṱambo vhu na nḓila ine ha fana ngayo na zwiṅwe zwithu vhutshiloni ha Vhakriste. Mudzimu u kha ḓi lavhelela uri ri litshe mishumo i si ya ndeme u itela uri ri kone u guda Ipfi ḽawe, u rabela na u ya miṱanganoni ya Vhukriste. Ṱhoho dza miṱa ya Vhakriste dzi ranga phanḓa vhurabeli ha muṱa. (1 Vha-Thes. 5:17; Vha-Heb. 10:24, 25) Ri nga ḓivhudzisa mbudziso i tevhelaho malugana na mishumo yashu ya lwa muya: ‘Naa ndi nga khwinisa vhurabeli hanga?’
12. (a) U fhiswa ha zwioro vhurabelini ha kale zwi nga vhambedzwa na mini ṋamusi? (b) U vhambedzwa honohu hu fanela u kwama hani thabelo dzashu?
12 Khosi Davida o imbela Yehova a ri: “Thabelo yanga nga i nge zwioro phanḓa hau.” (Ps. 141:2) Thomani ni humbule nga ha thabelo dzaṋu—uri ni rabela lungana na uri ni rabelela zwithu-ḓe. Bugu ya Ndzumbululo i fanyisa “thabelo dza vhakhethwa” na zwioro nga muhumbulo wa uri thabelo dzine Yehova a dzi ṱanganedza dzi fana na munukhelelo wa zwioro. (Ndzumb. 5:8) Kha ḽa Isiraele ḽa kale, zwioro zwe zwa vha zwi tshi fhiswa aletareni ya Yehova tshifhinga tshoṱhe zwo vha zwi tshi fanela u lugiselelwa nga vhuronwane. Yehova o vha a tshi zwi ṱanganedza arali fhedzi ho tevhelwa vhulivhisi he a vhu ṋea. (Ek. 30:34-37; Lev. 10:1, 2) Na thabelo dzashu arali dza itwa nga nḓila i fanaho, ri nga vha na vhungoho ha uri Yehova u ḓo dzi ṱanganedza.
U ṊEA NA U ṰANGANEDZA
13, 14. (a) Epafrodito na tshivhidzo tsha Filipi vho itela Paulo tshumelo ifhio, nahone onoyo muapostola o ḓipfa hani? (b) Ri nga edzisa hani tsumbo ya Epafrodito na ya Vhafilipi?
13 Tshelede ine ya ṋeelwa u itela u tikedza mushumo wa shango ḽoṱhe i nga fanyiswa na tshiṱhavhelo, hu sa londwi uri ri ṋeela nga tshelede nnzhi kana ṱhukhu. (Marko 12:41-44) Ḓanani ḽa u thoma ḽa miṅwaha C.E., tshivhidzo tsha ngei Filipi tsho rumela Epafrodito ngei Roma u itela u ṱhogomela ṱhoḓea dza Paulo dza lwa ṋama. Zwi tou vha khagala uri onoyo muḓinḓa wa Vhafilipi o ya tshivhidzoni tshenetsho o fara tshelede. Ho vha hu si lwa u thoma Vhafilipi vha tshi sumbedza Paulo mafunda. Nga nṱhani ha vhuthu havho, vho vha vha tshi ṱoḓa uri Paulo a kone u fhedza tshifhinga tsho engedzeaho vhuḓinḓani a sa vhilaeli nga tshelede. Paulo o ḓipfa hani nga tshenetsho tshifhiwa? O amba uri ndi “tshidzimu tshi tamisaho, tshi takadzaho Mudzimu.” (Vhalani Vha-Filipi 4:15-19.) Paulo o livhuha vhuthu ha Vhafilipi zwi tshi bva mbiluni, nahone zwenezwo zwo takadza na Yehova.
14 Na ṋamusi, Yehova u a dzhiela nṱha vhukuma miṋeelo ya mushumo wa shango ḽoṱhe. Zwiṅwe hafhu, u fulufhedzisa uri arali ra bvela phanḓa ri tshi vhea zwithu zwine zwa tshimbidzana na Muvhuso u thoma vhutshiloni hashu, ene u ḓo ṱhogomela zwishaiwa zwashu zwoṱhe, zwa ṋama na zwa muya.—Mat. 6:33; Luka 6:38.
SUMBEDZANI URI NI A LIVHUHA
15. Ndi zwifhio zwiṅwe zwithu zwine zwa ita uri ni livhuhe Yehova?
15 Ḓuvha ḽi nga vhuya ḽa kovhela ri tshi kha ḓi bula zwiitisi zwine ra vha nazwo zwa u livhuha Yehova. Ndi ngoho uri ri fanela u livhuha tshifhiwa tsha vhutshilo ḓuvha na ḓuvha. Yehova u ri ṋea zwithu zwoṱhe zwine ra zwi ṱoḓa u itela uri ri kone u tshila—zwiḽiwa, zwiambaro, vhudzulo na muya une ra u fema. Zwiṅwe hafhu, lutendo lwashu lwo thewaho kha nḓivho yo teaho lu ri ṋea fulufhelo. Zwo tea uri ri gwadamele Yehova na u mu ṋea zwiṱhavhelo zwa thendo nga nṱhani ha zwine a vha zwone na zwe a ri itela zwone.—Vhalani Ndzumbululo 4:11.
16. Ri fanela u ḓipfa hani nga tshiṱhavhelo tsha Kristo tshi rengululaho?
16 Samusi ro zwi vhona theroni yo fhiraho, tshifhiwa tsho khetheaho vhukuma tshe Mudzimu a tshi ṋea vhathu ndi tshiṱhavhelo tsha Kristo tshi rengululaho. Wonoyu ndi musumbedzo muhulwane vhukuma wa lufuno lwa Mudzimu. (1 Yoh. 4:10) Ri nga sumbedza hani nga ho teaho uri ri livhuha tshenetshi tshifhiwa? Paulo o ri: “Ngauri ri kombetshedzwa nga lufuno lwa Kristo; tshee ra elekanya zwauri: Muthihi ó fela vhoṱhe, . . . Huno ene ó fela vhoṱhe, ndi uri vha tshilaho vha si tsha ḓi-tshilela, vha tshilele we a vha fela a dovha a vuselwa vhone.” (2 Vha-Kor. 5:14, 15) Nga maṅwe maipfi, Paulo o vha a tshi khou amba uri arali ri tshi livhuha tshilidzi tsha Mudzimu, ri ḓo shumisa vhutshilo hashu u itela u hulisa Ene na Murwa Wawe. Ri sumbedza uri ri funa na u livhuha Mudzimu na Kristo nga u vha thetshelesa, nga u ṱoḓa u huwelela na u ita vhafunziwa.—1 Tim. 2:3, 4; 1 Yoh. 5:3.
17, 18. Vhaṅwe vho engedza zwiṱhavhelo zwavho zwa thendo kha Yehova nga nḓila dzifhio? Ṋeani tsumbo.
17 Naa ni nga kona u khwinisa tshiṱhavhelo tsha thendo tshine na tshi ṋekedza Mudzimu? Musi vho no elekanya nga ha zwithu zwoṱhe zwavhuḓi zwe Yehova a vha itela zwone, vhahashu vhanzhi vho ṱuṱuwedzea u dzudzanya tshifhinga na mishumo yavho u itela uri vha kone u ṱanganela kha mushumo wa u huwelela nga ha Muvhuso kana miṅwe mishumo ya lwa ṱaḓulu. Vhaṅwe vho kona u vula nḓila ṅwedzi muthihi kana yo vhalaho nga ṅwaha, vhaṅwe vho kona u vha vhavulanḓila vha tshifhinga tshoṱhe. Vhaṅwe vho ṱanganela mushumoni wa u fhaṱa Holo dza Muvhuso. Dzenedzi ndi nḓila dzavhuḓi vhukuma dza u sumbedza uri ri a livhuha. Arali ra ita zwenezwi ri na zwiṱuṱuwedzi zwavhuḓi, Mudzimu u ḓo ṱanganedza yeneyi tshumelo khethwa.
18 Vhakriste vhanzhi vho ṱuṱuwedzea u livhuha Yehova. Muṅwe wavho ndi Morena. O ṱoḓa phindulo dza mbudziso dze a vha e nadzo Kerekeni ya Katolika ye a alutshela khayo, na kha pfunzo dza maṱali dza Asia. Fhedzi ho ngo wana phindulo dzi fushaho. Ḓora ḽawe ḽa muya ḽo dzimulwa musi a tshi thoma u guda Bivhili na Ṱhanzi dza Yehova. Morena o takalela phindulo dzi bvaho Maṅwaloni dza mbudziso dzawe, na vhudziki he dzenedzo phindulo dza vhu ḓisa vhutshiloni hawe, lwe a ṱoḓa u livhuha Yehova nga u shumisa nungo dzawe dzoṱhe tshumeloni Yawe. O mbo ḓi vha muvulanḓila wa u thusa nga u ṱavhanya musi o no lovhedzwa, nahone musi zwiimo zwawe zwi tshi mu tendela, o mbo ḓi vha muvulanḓila wa tshifhinga tshoṱhe. Morena u na miṅwaha ya 30 e tshumeloni ya tshifhinga tsho ḓalaho.
19. Ni nga kona hani u engedza zwiṱhavhelo zwine na zwi ṋekedza Yehova?
19 Ndi ngoho uri hu na vhashumeli vhanzhi vha fulufhedzeaho vha Yehova vhane zwiimo zwavho zwa si vha tendele u vha vhavulanḓila. Roṱhe ri nga kona u ṋekedza Yehova zwiṱhavhelo zwine a zwi ṱanganedza hu sa londwi zwine ra nga zwi ita tshumeloni yawe. Musi zwi tshi ḓa kha vhuḓifari hashu, ri fanela u thetshelesa maitele o lugaho nga vhuronwane, ri tshi humbula uri ri imela Yehova tshifhinga tshoṱhe. Nga lutendo, ri fulufhela tshoṱhe uri Mudzimu u ḓo khunyeledza ndivho dzawe. Ri thusa u phaḓaladza mafhungo maḓifha nga u ita mishumo mivhuya. Ri tshi livhuha zwi tshi bva mbiluni zwoṱhe zwe Yehova a ri itela zwone, kha ri bvele phanḓa ri tshi ṋekedza Yehova zwiṱhavhelo.
[Mbudziso Dza Pfunzo]
[Maipfi o ṱumbulwaho kha siaṱari 25]
Naa vhuthu ha Yehova vhu ni ṱuṱuwedza u khwinisa tshiṱhavhelo tshaṋu tsha thendo?
[Tshifanyiso kha siaṱari 23]
Naa ni lwela u shumisa tshibuli tshiṅwe na tshiṅwe u itela u ṱanziela?