‘Zwe Ra Zwi Vhulunga

‘Ndo Vha Ndi Tshi Nga Mphwe Vhukati Ha Mavhele’

Musi muhuweleli wa tshifhinga tsho ḓalaho ane a pfi Charlotte White a tshi swika Louisville ngei Kentucky, kha ḽa U.S.A., a tshi khou kokodza phuthumennde yawe i re na malinga, zwo mu dzhenisela maṱo.

HO VHA hu nga 1908, musi Wahashu wa tshisadzini White a tshi kokodza maṱo a vhathu vha henefho ḓoroboni nga tshishumiswa tshiswa—Gariki ya Dzibugu. O ri: “Zwo ita uri vhathu vha ambe nahone ndo vha ndi tshi nga mphwe vhukati ha mavhele.”

Vhagudi vha Bivhili, samusi Ṱhanzi dza Yehova dzo vha dzi tshi vhidzwa nga u ralo tshifhingani tsho fhiraho, vho vhona uri zwo vha zwi tshi ṱoḓea uri vha huwelele mafhungo-ngoho a ndeme ane vha a wana musi vha tshi guda Maṅwalo nga u fhisea. Vhanzhi vho wana nḓivho ya Bivhili nga u shumisa mutevhe wa bugu dzi re na tshiṱoho tshine tsha ri Millennial Dawn, (ye nga murahu ya vhidzwa Studies in the Scriptures). Vhenevho Vhakriste vhe vha vha vho ḓiimisela u ya kule na tsini—dziḓoroboni, miḓanani na mahayani—vho vha vha tshi phaḓaladza “Thuso Ya Vhagudiswa Vha Bivhili” kha vhaṅwe vhavhali vha fhiseaho, samusi dzenedzo bugu dzo vha dzi tshi vhidzwa nga yeneyi nḓila.

Nga 1908, Wahashu wa tshisadzini White na vhaṅwe vhaḓinḓa vha Muvhuso vha fhiseaho vho tshimbidza dzenedzo volumu dza rathi dzi re na gwati ḽa labi nga $1.65 (U.S.). Nṱhani ha u ṋea ṋemuḓi bugu dza Millennial Dawn nga tshenetsho tshifhinga, vho vha vha tshi ṅwalisa madzina nahone vha vhuya nga murahu musi vhathu vho no hola, u itela u vha tshimbidzela dzone nga mutengo muṱuku. Muṅwe mupikisi o gungulela uri vhathu vho vha vha tshi ṋeela nga tshelede ṱhukhu musi vha tshi ṋewa dzenedzo bugu!

Malinda Keefer u kha ḓi humbula uri o vha a tshi ṅwalisa bugu dza 200 kana 300 nga vhege. Dzangalelo  ḽihulwane ḽe vhathu vha vha vhe naḽo kha bugu dza Millennial Dawn ḽo ita uri hu vhe na thaidzo. Zwenezwi zwo itiswa ngauri volumu ya vhurathi yo vha i na masiaṱari a 740! Tshiingamo tsho amba uri, “bugu dza 50 dzi lemela khilogireme dza 18,” zwe zwa vha zwi tshi ita uri “zwi konḓe u dzi hwala,” zwihuluhulu kha vhahashu vha tshisadzini.

U itela u tandulula yeneyo thaidzo ya u hwala bugu dza Millenial Dawn, Wahashu James Cole o ita gariki ye ya vha i na malinga mavhili ye khayo ha vha hu tshi kurufeliwa phuthumennde. Samusi zwo vha zwi si tsha ṱoḓea uri hu hwalwe mabogisi a lemelaho o ḓalaho nga bugu, mubveledzi wa gariki yeneyo o ri: “A thi tsha ḓilemedza.” O sumbedza vhathetshelesi vhe vha takadzwa vhukuma nga tshenetsho tshishumiswa tshiswa buthanoni ḽa 1908 ḽa Vhagudi vha Bivhili ḽa ngei Cincinnati, kha ḽa Ohio. Thungo dzoṱhe mafheloni a tsimbi yo rambalalaho ho vha ho ṅwalwa uri Dawn-Mobile (Gariki ya Dzibugu), samusi yo vha i tshi hwala volumu dza bugu dza Millennial Dawn. Arali na ḓiḓowedza zwavhuḓi, yeneyo phuthumennde i re na bugu nnzhi-nnzhi yo vha i tshi leluwa u i tshimbidza nga tshanḓa tshithihi. Yo vha i tshi kona u gonyiselwa nṱha na fhasi, nahone malinga ayo a tshi kona u tshimbila na fhethu hu si na tshigonṱiri. Musi muthu o no fhedza u huwelela o vha a tshi peta malinga a gariki nahone a kona u fara phuthumennde nga mukungelo wayo.

Vhahashu vha tshisadzini vha re tshumeloni ya tshifhinga tsho ḓalaho vho vha vha tshi ṋewa Gariki ya Dzibugu mahala. Mutengo wayo wo vha u $2.50 (U.S.). Wahashu wa tshisadzini Keefer o sumbedzwaho afho kha tshifanyiso, o vha e na vhutsila ha u shumisa yeneyi gariki lwe a vha a tshi kona u i kokodza nga tshanḓa tshithihi yo ḓala, kha tshiṅwe tshanḓa o fara mukhwama. Nge a wana vhathu vhanzhi vha re na dzangalelo ḓoroboni i re na maini ngei Pennsylvania, kha ḽa U.S.A., o vha a tshi pfuka buroho luraru kana luṋa nga ḓuvha a tshi isela vhenevho vhathu dzibugu.

Mafheleloni a vho-1980, mufhufhisi wa mabufho o thoma u ita bege i re na malinga ine ya anzela u shumiswa vhukavhamabufho na zwiṱaraṱani zwa ḓorobo khulwane. Fhedzi miṅwahani ya ḓana yo fhiraho, zwi nga vha zwo takadza vhathu vhukuma musi vha tshi vhona Vhagudi vha Bivhili vha fhiseaho vha tshi kokodza Gariki dzavho dza Dzibugu huṅwe na huṅwe, vha tshi hasha mbeu ya mafhungo-ngoho a Bivhili.

[Maipfi o ṱumbulwaho kha siaṱari 32]

Wahashu wa tshisadzini Keefer o vha a tshi pfuka buroho luraru kana luṋa nga ḓuvha a tshi isela vhathu dzibugu

[Maipfi o ṱumbulwaho kha siaṱari 32]

Zwo tandulula thaidzo ya u hwala bugu dza “Millenial Dawn”