Mbudziso Dzi Bvaho Ha Vhavhali

Naa zwi nga itea uri dzema ḽa Mukriste ḽa u sedza zwifanyiso zwi karusaho maḓipfele a zwa vhudzekani ḽi goḓombele lune a nga bviswa tshivhidzoni tsha Vhukriste?

▪ Ee, zwi nga itea. Zwenezwo zwi sumbedza uri ndi zwa ndeme u iledza nga nḓila dzoṱhe zwifanyiso zwi karusaho maḓipfele a zwa vhudzekani, kha dzimagazini, dzimuvi, dzividio na Inthanethe.

Zwifanyiso zwi karusaho maḓipfele a zwa vhudzekani zwi wanala huṅwe na huṅwe. Zwenezwi zwifanyiso zwo ḓala kha Inthanethe zwino u fhira naho hu lini, nahone zwo engedza tshivhalo tsha vhathu vha re na yeneyi thaidzo. Vhaṅwe vhathu, vhaṱuku na vhahulwane vho vhona zwenezwi zwifanyiso kha dziṅwe Web site vha songo ḓiimisela. Vhaṅwe vho dzhena kha dzenedzo Web site nga khole, vha tshi vhona uri a hu na tshine tsha nga vha thivhela nga nṱhani ha uri vha nga kona u vhona zwenezwi zwifanyiso tshiphirini hayani kana mushumoni. Ndi ngani zwenezwi zwi tshi fanela u vhilaedzisa vhukuma Vhakriste?

Ri wana tshiitisi tsha ndeme kha tsevho ya Yesu ine ya ri: “A lavhelesaho musadzi nga u mu emula, o no vha phombwe mbiluni yawe.” (Mat. 5:28) Ndi ngoho uri zwa vhudzekani zwo tea nahone ndi zwithu zwine zwa fanela u takalelwa nga vhavhingani. (Mir. 5:15-19; 1 Vha-Kor. 7:2-5) Fhedzi zwifanyiso zwi karusaho maḓipfele a zwa vhudzekani a zwi tikedzi eneo mavhonele. Nṱhani hazwo, zwi sumbedza u ita zwa vhudzekani zwi si zwa mulayo zwine zwa ḓisa mihumbulo i songo kunaho ye Yesu a sevha nga hayo. Zwi tou vha khagala uri u sedza zwenezwi zwifanyiso zwi lwisana nga ho livhaho na vhulivhisi ha Mudzimu ha uri: “Vhulahani-ha miraḓo  ya fhano shangoni: Vhupombwe, vhuyaḓa, u tambula nyemulo mmbi, na vhutshivha, huné ha vha u shumela Mudzimu u sili.”—Vha-Kol. 3:5.

Mukriste u fanela u ita mini arali a vhona zwifanyiso zwi karusaho maḓipfele a zwa vhudzekani luthihi kana luvhili? Vhuimo hawe vhu nga kha ḓi fana na vhuimo vhu re na khombo he mupsalme Asafu a vha e khaho, o ri: “Hone nṋe, milenzhe yanga yo ṱoḓou khukhulwa, lwayo lwanga lwo ṱoḓou redzemuwa.” Zwi nga konḓa uri Mukriste a vhe na luvalo lwo kunaho na mulalo na Mudzimu arali a tshi ṱalela zwifanyiso zwa vhanna kana vhafumakadzi vha songo ambaraho kana vhathu vha tshi khou ita vhuṱonḓolo. Na Asafu o vha e si na mulalo wa ngelelo. O ri: “Huufha ndi tshi ṱhuphiwa ḓuvha ḽoṱhe, misi yoṱhe ndi vuwa na vhuṱungu hanga.”—Ps. 73:2, 14.

Mukriste ane a vha kha honoho vhuimo vhu si havhuḓi u fanela u fhaṱuwa nahone a ṱoḓe thuso ya lwa muya. Yeneyo thuso i a wanala tshivhidzoni: “Nahó muthu o kanganyedzwa, a vhuya a khakha, inwi ni re vha Muya, wé a ralo mu vhuyedzedzeni nga muya wa u vuḓa; iwe muṋe U tshi ḓi-sedza, uri na iwe U sa ḓo lingwa-vho.” (Vha-Gal. 6:1) Muhulwane muthihi kana vhavhili vha Vhakriste vha nga mu ṋea thuso ine a i ṱoḓa, u katela na ‘thabelo dza lutendo dzine dza ḓo tshidza uyo mulwadze, nahone u ḓo hangwelwa zwivhi zwawe.’ (Yak. 5:13-15) Vhahashu vhe vha ṱoḓa thuso u itela uri vha songo tsha ṱalela zwifanyiso zwi karusaho maḓipfele a zwa vhudzekani vho zwi vhona uri u sendela tsini na Mudzimu zwo vha vhuyedza, u fana na Asafu.—Ps. 73:28.

Naho zwo ralo, muapostola Paulo o amba uri vhaṅwe vhe vha ita zwivhi a vho ngo rembuluwa “kha vhutshinyi havho na kha vhupombwe na kha u silinga he vha ita.” * (2 Vha-Kor. 12:21) Malugana na ipfi ḽa Lugerika ḽo ṱalutshedzelwaho nga uri “vhutshinyi,” Muphurofesa Marvin R. Vincent o ṅwala uri ḽi na “muhumbulo wa u sa kuna na u nengisa.” Ngoho i vhavhaho ndi uri zwiṅwe zwifanyiso zwi karusaho maḓipfele a zwa vhudzekani a zwi sumbedzi munna na mufumakadzi vha songo ambaraho vha tshi khou ita vhuṱonḓolo fhedzi, fhedzi zwi dovha zwa sumbedza vhusawana (vhathu vha mbeu i fanaho vha tshi khou ita zwa vhudzekani), u ita zwa vhudzekani sa tshigwada, u ita zwa vhudzekani na tshipuka, zwifanyiso zwi karusaho maḓipfele a zwa vhudzekani zwi katelaho vhana, u tzhipiwa nga tshigwada, u tambudza vhafumakadzi, u itwa phuli ya zwa vhudzekani, kana u farwa nga tshiṱuhu. Vhaṅwe misini ya Paulo vho vha vho “swifhalelwa kha u elekanya” nahone “vhó no rindila vha ḓi-ṅaledzela kha vhuyaḓa, vha vha vhaiti vha zwa dzitshikha dzoṱhe lwa u tou kalula.”—Vha-Ef. 4:18, 19.

Paulo o amba nga ha “vhuyaḓa” kha Vha-Galata 5:19. Muṅwe mugudiswa wa ngei Britain o ṱhogomela uri “ḽeneḽi ipfi ḽi nga vha ḽi tshi ambela zwihuluhulu kha nyemulo dzoṱhe dzi si dza nzulele.” Mukriste a nga si hanedze uri zwithu zwi nyadzisaho zwo bulwaho afho nṱha, maitele a shonisaho a zwifanyiso zwi karusaho maḓipfele a zwa vhudzekani, ndi “nyemulo . . . dzi si dza nzulele” nahone zwi a nengisa. Kha Vha-Galata 5:19-21, Paulo o phetha nga uri ‘vha itaho zwa u ralo’ zwi songo kunaho “a vha nga ḽi vhufa ha vhuhosini ha Mudzimu.” Nga zwenezwo, arali muthu a vha na dzema ḽo goḓombelaho ḽa u ṱalela zwifanyiso zwi karusaho maḓipfele a zwa vhudzekani zwi nengisaho na zwi nyadzisaho, khamusi lwa tshifhinga tshilapfu a sa rembuluwi, ho ngo tea u vha tshivhidzoni tsha Vhukriste. U fanela u bviswa tshivhidzoni u itela uri tshi dzule tsho kuna.—1 Vha-Kor. 5:5, 11.

Ndi zwavhuḓi u ḓivha uri vhaṅwe vhe vha wela kha enea maitele a nengisaho a u ṱalela zwenezwi zwifanyiso vho amba na vhahulwane nahone vha wana thuso ya lwa muya ine ya ṱoḓea u itela u ita tshanduko dzi ṱoḓeaho. Yesu o vhudza Vhakriste vha muḓini wa kale wa Saradesi uri: “Ú khwaṱhise vho salaho, vha ṱoḓaho u fa! . . . Dovha u elelwa kuṱanganedzele kwau na uri wo pfa hani, Ú farese, Ú shanduke. Hone zwino wá sa fhaṱuwa, . . . na tshikhathi tshiné nda ḓo U ḓela ngatsho’ U si tshi ḓivhe.” (Ndzumb. 3:2, 3) Zwi a konadzea u rembuluwa na u tshidzwa muliloni.—Yuda 22, 23.

Naho zwo ralo, ndi zwa ndeme vhukuma uri muṅwe na muṅwe washu a ḓiimisele uri a si vhuye a sendela tsini na zwenezwo zwifanyiso zwi re na khombo. Vhukuma, kha ri iledze mifuda yoṱhe ya zwifanyiso zwi karusaho maḓipfele a zwa vhudzekani!

[Ṱhaluso i re magumoni a siaṱari]

[Maipfi o ṱumbulwaho kha siaṱari 30]

Mukriste ane a ita zwithu zwivhi u fanela u fhaṱuwa nahone a ṱoḓe thuso ya lwa muya