Ni Ṋea Hani Nyeletshedzo?

Naa no no vhuya na humbelwa u ṋea vhaṅwe nyeletshedzo? Sa tsumbo, naa no no vhuya na vhudziswa mbudziso dzi ngaho: ‘Ndi mini zwine nda fanela u zwi ita? Naa ndi nga ya kha tshenetshi tshimima? Naa ndi fanela u tevhela ḽeneḽi buḓo ḽa mushumo? Naa ndi nga pfana na onoyu muthu u itela u vhingana nae?’

Vhaṅwe vhathu vha nga ni humbela zwi tshi bva mbiluni uri ni vha thuse u dzhia phetho dzine dza nga kwama vhushaka havho na khonani dzavho, muṱa, kana Yehova. Ni ḓo thea ngafhi phindulo yaṋu? Ndi mini zwe na ḓowela u zwi ita musi ni tshi ṋea nyeletshedzo? Hu sa londwi uri mafhungo a hone a a leluwa kana a a konḓa, Mirero 15:28 i ri: “Mbilu ya muvhuya i fhindula yó ranga ya anganya.” Ṱhogomelani nḓila ine maitele a Bivhili maṱanu a tevhelaho a nga ni thusa ngayo musi ni tshi ṋea nyeletshedzo.

1 Pfesesani Vhuimo.

“Mu-ṱavhanyedza-u-fhindula á songó pfa u ita zwa vhutsilu, u ḓo shona.”—MIR. 18:13.

U itela u ṋea nyeletshedzo yavhuḓi, ri fanela u pfesesa zwiimo na mavhonele a muthu ane a khou ṱoḓa thuso. Sa tsumbo: Arali muṅwe muthu a ni rwela luṱingo nahone a ni humbela uri ni mu vhudze nḓila ya khwine ya u ḓa hune na dzula hone, ndi mini zwine na fanela u zwi ḓivha u itela uri ni kone u mu thusa? Zwi tou vha khagala uri ni fanela u thoma na ḓivha hune a vha hone u itela u mu vhudza nḓila ya khwine ine a fanela u i dzhia. Nga lwa pfanyisedzo, u itela u ṋea muthu vhulivhisi ho teaho zwi ṱoḓa uri ni ḓivhe hune a vha hone nga tshenetsho tshifhinga—zwiimo khathihi na mavhonele a onoyo muthu. Zwi nga kha ḓi itea uri hu na zwiimo zwi sa iledzei zwine zwa nga kwama zwine ra ḓo zwi amba. Arali ri sa ḓivhi zwavhuḓi vhuimo vhune onoyo muthu a vha khaho, ri nga kha ḓi mu ṋea nyeletshedzo ine ya nga mu ḓaḓisa tshoṱhe.—Luka 6:39.

Wanani Uri O Ita Ṱhoḓisiso Nngafhani. Zwi nga vha vhuṱali u vhudzisa muthu ane a khou ṱoḓa nyeletshedzo mbudziso dzi ngaho hedzi: “Ndi afhio maitele a Bivhili ane na vhona u nga a a shuma?” “Phetho ine na ḓo i dzhia i na mvelelo dzifhio dzavhuḓi na dzi si dzavhuḓi?” “No no ita ṱhoḓisiso ifhio?” “Ndi nyeletshedzo ifhio ye vhahulwane vha tshivhidzo, vhabebi vhaṋu, kana muthu ane na guda nae Bivhili vha ni ṋea yone?”

Phindulo dzawe dzi nga ni thusa uri ni kone u vhona uri o no ita vhuḓidini vhungafhani u itela u wana phindulo. Zwiṅwe hafhu, musi ri tshi ṋea nyeletshedzo ri fanela u ṱhogomela zwe vhaṅwe vha zwi amba. Ri ḓo dovha ra kona u vhona arali onoyo muthu a tshi ṱoḓa nyeletshedzo ine ya ḓo mu takadza nḓevhe.—2 Tim. 4:3.

  2 Ni Songo Gidimela U Fhindula.

“Muthu nga a ṱavhanye u pfa, a lenge u amba.”—YAK. 1:19.

Zwi nga kha ḓi itea uri ri gidimele u fhindula ri na zwiṱuṱuwedzi zwavhuḓi. Fhedzi naa zwenezwo zwi ḓo vha vhuṱali, zwihuluhulu arali ri tshi khou haseledza mafhungo e ra si a ṱoḓisise? Mirero 29:20 i ri: “Wá vhona munna wa ṱhavha-nyedza-u-amba, U si mu fulufhedze; khwine ndi u fulufhedza tsilu.”

Ḓiṋeeni tshifhinga tsha u ita vhungoho ha uri zwine na ṱoḓa u zwi amba zwi tshimbidzana na vhuṱali ha Mudzimu. Ḓivhudziseni uri, ‘Naa mahumbulele anga o ṱuṱuwedzwa nga mahumbulele na “muya wa shango”?’ (1 Vha-Kor. 2:12, 13) Humbulani uri u sokou vha na zwiṱuṱuwedzi zwavhuḓi fhedzi zwi nga si thuse. Musi muapostola Petro o no pfa nga ha vhuimo vhu konḓaho he Yesu a vha o sedzana naho, o mu eletshedza uri: “Murena ḓi-londe uri vha si U ite zwe wa amba.” Ndi mini zwine ra nga zwi guda kha zwe Petro a zwi amba? Ri guda uri arali ra sa ṱhogomela, na muthu o lugaho a nga ṱuṱuwedza mihumbulo ‘ya vhathu, hu si ya Mudzimu.’ (Mat. 16:21-23) Ndi zwa ndeme vhukuma uri ri humbule musi ri sa athu amba! Zwi re zwone ndi uri tshenzhelo ine ra vha nayo i nga si vhambedzwe na vhuṱali ha Mudzimu!—Yobo 38:1-4; Mir. 11:2.

3 Ḓiṱukufhadzeni, Ni Shumise Ipfi Ḽa Mudzimu.

“A thi iti tshithu nga nṋe muṋe; zwiné nda amba ndi zwe Khotsi a mpfunzedza.”—YOH. 8:28.

Naa ni ḓo ri, “Arali ho vha hu nṋe, ndo vha ndi tshi ḓo . . . ”? Naho arali phindulo i tshi tou vha khagala, zwi ḓo vha zwavhuḓi uri ni gude kha tsumbo ya Yesu ya u ḓiṱukufhadza. O vha e na vhuṱali na tshenzhelo khulwane u fhira muthu naho e ufhio; fhedzi o ri: “Nṋe a tho ngo amba zwi bvaho kha nṋe; Khotsi . . . ndi ene o ndayaho zwiné nda amba na zwiné nda bula.” (Yoh. 12:49, 50) Tshifhinga tshoṱhe, zwe Yesu a zwi funza na nyeletshedzo yawe zwo vha zwo thewa kha zwine Khotsi awe a zwi funa.

Sa tsumbo, kha Luka 22:49 ri vhala uri vhafunziwa vha Yesu vho mu vhudzisa arali zwo tea uri vha lwe musi a tshi farwa. Muṅwe mufunziwa o shumisa banga. Ṱhogomelani mafhungo ane a tshimbidzana na eneo kha Mateo 26:52-54. Na kha zwiimo zwo raloho Yesu o fhedza tshifhinga a tshi khou lingedza u sumbedza onoyo mufunziwa zwine Yehova a zwi funa. Samusi o vha a tshi ḓivha maitele a re kha Genesi 9:6 na vhuporofita vhu re kha Psalme ya 22 na Yesaya 53, Yesu o kona u ṋea vhulivhisi ha vhuṱali vhune a zwi timatimisi uri ho tshidza vhathu nahone ha takadza Yehova.

  4 Shumisani Laiburari Yaṋu Ya Lwa Ṱaḓulu.

“Mukoma a fulufhedzeaho na wa vhuṱali ndi nnyi, we muṋe wawe a mu kumedza vhalanda vhawe uri a vha fhe zwiḽiwa nga tshikhathi tshazwo.”—MAT. 24:45.

Yesu o vhea tshigwada tsha mukoma a fulufhedzeaho tshine tsha ri ṋea zwiḽiwa zwa muya zwa ndeme. Musi ni tshi ṋea nyeletshedzo na vhulivhisi nga ha mafhungo a ndeme, zwi nga vha zwavhuḓi uri ni ite ṱhoḓisiso khandisoni dzo thewaho Bivhilini.

Watch Tower Publications Index na Watchtower Library * dzi na mafhungo manzhi a pfalaho ane ra nga a wana nga hu leluwaho. Zwi ḓo vha zwo khakhea vhukuma u sa shumisa eneo mafhungo! Hu na zwiṱoho na thero nnzhi dzine dza nga thusa muthu ane a ṱoḓa nyeletshedzo. Naa ni na vhutsila ha u thusa vhaṅwe uri vha ṱolisise maitele a Bivhili na u elekanya nga ha Ipfi ḽa Mudzimu? Samusi mapa u tshi nga thusa muthu uri a vhone hune a vha hone, na u mu livhisa hune a ya, zwishumiswa zwa u ita ṱhoḓisiso zwi nga mu thusa uri a vhone hune a vha hone na zwine a nga zwi ita uri a dzule e nḓilani i yaho vhutshiloni.

Vhahulwane vhanzhi vho gudisa vhahuweleli uri vha ṱoḓe thero vha tshi shumisa Index kana Watchtower Library; nga yeneyo nḓila vho thusa vhahashu vha tshinnani na vha tshisadzini uri vha elekanye nga ha Maṅwalo. U thusa vhahuweleli nga yeneyo nḓila a zwi vha thusi uri vha kone u sedzana na mbilaelo dzavho fhedzi, fhedzi zwi dovha zwa ita uri vha ḓowele u ita ṱhoḓisiso na u ḓitika nga ndugiselelo dza Yehova dza lwa muya. Nga yeneyo nḓila, “vha vha na ṱhalukanyo yo ḓowelaho u khethekanya vhuḓi na vhuvhi.”—Vha-Heb. 5:14.

5 Iledzani U Dzhiela Vhaṅwe Phetho.

“Roṱhe nga muthihi ro hwala maputu ashu riṋe vhaṋe.”—VHA-GAL. 6:5.

Mafheleloni, muṅwe na muṅwe u fanela u ḓikhethela nyeletshedzo na vhulivhisi zwine a ḓo zwi tevhela. Yehova o ri ṋea mbofholowo ya u khetha arali ri tshi ṱoḓa u vhuswa nga maitele awe kana hai. (Doit. 30:19, 20) Vhuṅwe vhuimo vhu nga katela maitele a Bivhili o vhalaho, nahone mafheleloni, muthu ane a ṱoḓa nyeletshedzo u fanela ita phetho ene muṋe. Zwi tshi ya nga eneo mafhungo kana nga miṅwaha ya muthu ane a ṱoḓa nyeletshedzo yashu, ri nga kha ḓi ḓivhudzisa uri, ‘Naa zwa vhukuma ndi na maanḓa a u tandulula yeneyi thaidzo?’ Maṅwe mafhungo ndi khwine a tshi vhudzwa vhahulwane vha tshivhidzo, kana arali onoyo muthu e muswa, a tshi vhudzwa vhabebi vhawe.

[Ṱhaluso i re magumoni a siaṱari]

[Bogisi/Tshifanyiso kha siaṱari 8]

Zwine Na Nga Zwi Ita Kha Vhurabeli Ha Muṱa

Zwi nga vha zwavhuḓi uri kha vhurabeli ha muṱa ni ṱoḓisise phindulo dza mbudziso dze na dzi vhudziswa zwenezwino. Ndi thero dzifhio na maitele afhio a Bivhili ane na nga a wana ane a nga thusa muthu we a vhudzisa dzenedzo mbudziso? Sa tsumbo, kha ri ri wahashu wa tshinnani kana wa tshisadzini o ni vhudzisa nga ha u pfana na muthu e na tshilavhelelwa tsha mbingano. Musi ni tshi shumisa Index kana Watchtower Library, thomani nga u sedza tshiṱoho tsho livhaho tshine tsha tshimbidzana na eneo mafhungo. Sa tsumbo, ni nga sedza “Dating” kana “Marriage” kha Index. Nga murahu, ni sedze zwiṱoho zwiṱuku. Musi ni kha tshiṱoho tshihulwane, sedzani tshiṱoho tshiṱuku tshine tsha ri “See also,” tshine tsha nga ni sumbedza tshiṱoho tshine tsha tshimbidzana nga ho livhaho na zwine na khou zwi ṱoḓisisa.

[Bogisi kha siaṱari 9]

Ri livhuha ndugiselelo dza Yehova nga ndangulo yawe nga nṱhani ha uri ri a kona u ṋea na u wana nyeletshedzo yavhuḓi. Muhuweleli 12:11 i ri: “Maambiwa a vhaṱali a nga tshikombetshedzi, ndi khokho dze dza ombelwa fhethu huthihi, dzo ḓiswaho nga mulisa muthihi.” U fana na ‘zwikombetshedzi’—thanda dzine dza shumiswa u livhisa zwifuwo—nyeletshedzo yavhuḓi ya lufuno i livhisa vha mbilu dzavhuḓi fhethu ho teaho. “Khokho dze dza ombelwa” dzi a khwaṱhisa. Nga hu fanaho, nyeletshedzo yavhuḓi i nga ita uri hu vhe na mvelelo dzi khwaṱhisaho. Vhathu vha re na vhuṱali vha takalela u wana maipfi ane a sumbedza vhuṱali ha “mulisa muthihi” wavho, Yehova.

Edzisani Mulisa musi ni tshi ṋea nyeletshedzo. Ndi ndugelo u thetshelesa na u ṋea nyeletshedzo i thusaho musi zwi tshi konadzea! Vhukuma, musi nyeletshedzo yashu yo thewa kha maitele a Bivhili, i ḓo pfala nahone i ḓo vhuyedza.