“Ri Khou Humbela U Fodiwa!”

Nga murahu ha ḓuvha ḽa vhuvhili ḽa buthano ḽa tshiṱiriki, Josué ane a shuma Bethele ya ngei Mexico, o vha a tshi khou tandula ḓorobo ya Querétaro. Javier na Maru, vhatanduli vha vhavhingani vha bvaho ngei Colombia, vho humbela Josué uri a vha fode. Nga nṱhani ha uri Josué na khonani dzawe dza Dziṱhanzi vho vha vho ambara zwavhuḓi nahone vho pereṱedza betsho dza buthano, vhenevho vhavhingani vho vha vhudzisa arali vha tshi khou bva vhuṱamboni ha u ambara gaweni kana tshiṅwe tshiitea tsho khetheaho. Josué o vha ṱalutshedza uri vha bva buthanoni ḽa Ṱhanzi dza Yehova nahone a vha ramba uri vha vhe hone kha dzulo ḽa Swondaha.

Vhenevho vhavhingani vho mbo ḓi humbula uri vha ḓo shona u ya nga nṱhani ha uri a vha na zwiambaro zwo teaho tshenetsho tshiitea. Naho zwo ralo, Josué o vha ṅwalela dzina ḽawe na nomboro dza luṱingo dza ofisi ya davhi ḽine a shuma khaḽo.

Josué o mangala musi a tshi kwamiwa nga Javier nga murahu ha miṅwedzi miṋa. Vhenevho vhavhingani vho ya buthanoni nahone zwino vho vha vha tshi ṱoḓa uri Ṱhanzi dza Yehova dzi vha dalele Ḓoroboni ya Mexico, he vha vha vha tshi dzula hone nga tshenetsho tshifhinga. Nga u ṱavhanya, ho thomiwa pfunzo ya Bivhili na Javier na Maru nahone vha thoma u ya miṱanganoni. Nga murahu ha miṅwedzi ya fumi, vho vha vho no vha vhahuweleli. Naho vhenevho vhavhingani vho vha vha tshi fanela u pfulutshela ngei Toronto, kha ḽa Canada, vho ita mvelaphanḓa ya lwa muya nahone vha lovhedzwa.

Nga murahu, Josué o wana vhurifhi vhu bvaho kha Javier vhu ṱalutshedzaho zwe zwa mu ṱuṱuwedza uri a ṱanganedze mafhungo-ngoho. “Musi ri sa athu ya buthanoni, nṋe na mufumakadzi wanga ro vha ro no amba nga ha uri ri ṱoḓa u livhiswa nga Mudzimu. Musi ri tshi vhona nḓila yavhuḓi ye na vha no ambara ngayo, ro humbula uri ni nga vha ni tshi bva muṱanganoni wo khetheaho vhukuma. Musi ri buthanoni, ro takadzwa vhukuma nga nḓila ya lufuno ye ra sumbedzwa ngayo hune ra fanela u dzula hone, u thuswa u vula Bivhili, na nga vhuḓifari ha vhe vha vha vhe hone. Zwo vha zwi si zwa ndeme uri ro ambara sa vhatanduli.”

Vhukuma, maipfi a Khosi Salomo wa vhuṱali o vha a vhukuma kha Josué! Salomo o ṅwala uri: “Zwala mbeu yau hú tshee matsheloni; na nga madekwana tshanḓa tshau tshi songo awela. Ngauri a U ḓivhi ine ya ḓo mela; kana hu ḓo mela ino, kana iḽa; khamusi dzoṱhe mbili dzi ḓo mela zwavhuḓi.” (Muh. 11:6) Zwi nga vha zwavhuḓi uri ni zwale mbeu nga u shumisa zwibuli u itela u vhudza vhaṅwe nga ha buthano kana nyambo ya khagala. Yehova a nga ni shumisa u itela u kunga vha re na nḓala na ḓora ḽa vhulivhisi ha lwa muya, u fana Javier and Maru.—Yes. 55:1.

[Tshifanyiso kha siaṱari 32]

U bva kha tsha monde u ya kha tsha u ḽa: Alejandro Voeguelin, Maru Pineda, Alejandro Pineda, Javier Pineda, na Josué Ramírez davhini ḽa Mexico