Naa Ni A Zwi Humbula?

Naa no takalela u vhala thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:

Salomo ndi tsumbo i sevhaho nga muhumbulo ufhio?

Mudzimu o shumisa Khosi Salomo nahone a mu fhaṱutshedza. Naho zwo ralo, tshifhingani tsha vhuvhusi hawe, Salomo o litsha u tevhela nyeletshedzo ya Mudzimu. O vhinga ṅwananyana wa Farao wa muhedeni na vhaṅwe vhafumakadzi vhanzhi-vhanzhi, nahone nga zwiṱuku nga zwiṱuku o tendela vhafumakadzi vha vhahedeni vha tshi ita uri a gwadamele midzimu ya mazwifhi. Ri fanela u iledza u vha na mavhonele na nḓowelo dzo khakheaho zwine zwa nga dzhena nga zwiṱuku nga zwiṱuku. (Doit. 7:1-4; 17:17; 1 Dzikh. 11:4-8)—12/15, masiaṱari 10-12.

Ndi ngani ri tshi fanela u tshila nga zwilinganyo zwa Bivhili?

Vhathu vhane vha tshila nga zwilinganyo zwa Bivhili vha na luvalo lwo kunaho nahone vha na miṱa yo khwaṱhaho. (Ps. 19:8, 11) Vhane vha nyadza zwilinganyo zwa Bivhili kanzhi vha vhaisa vhaṅwe maḓipfele.—1/1, masiaṱari 8, 9.

Ndi ngani Vhakriste vha tshi lovhedzwa nahone ndi mini zwine vha zwi ita uri vha fanelee?

Vhakriste vha fanela u lovhedzwa u itela uri vha vhe na vhushaka havhuḓi na Mudzimu. (1 Pet. 3:21) Nga thabelo ya tshiphirini, ri ḓiṋekedza kha Yehova ri tshi ana uri ri ḓo ita zwine a funa vhutshiloni hashu hoṱhe. Musi ro no ita yeneyo thabelo ya tshiphirini ya u ḓiṋekedza, ri zwi sumbedza khagala nga u lovhedzwa.—4/1, masiaṱari 16, 17.

Ndi mini zwine zwa sumbedza uri u bva ḓanani ḽa u thoma ḽa miṅwaha u ya phanḓa, ho vha hu na Vhakriste vho ḓodzwaho vha ngoho kha ḽifhasi?

Kha tshifanyiso tsha Yesu tsha “mavhele” na “mufhunga,” “mbeu yavhuḓi” i imela “vhana vha muvhuso.” (Mat. 13:24-30, 38) Mufhunga wo vha u tshi ḓo mela vhukati ha mavhele u swika nga tshifhinga tsha khaṋo. Nga zwenezwo, naho ri sa nga koni u amba nga ho livhaho uri mavhele a fanyisela vhafhio, vhenevho vhathu vho ḓi dzula vhe hone u swika misini yashu.—1/15, siaṱari 7.

Ndi nnyi we a rumela “ṋaledzi” ye ya livhisa vha vhuṱali?

Ndi we a vha a tshi ṱoḓa uri ṅwana Yesu a vhulahwe—Sathane Diabolo. Sathane u ṱuṱuwedza mazwifhi, vhuvemu, na mabulayo. Ndi ngazwo Yesu o mu vhidza uri ndi “ene muzwifhi, ndi ene khotsi ya vhadzia-u-zwifha,” nahone “ndi ene mu-ponda-vhathu tsha kale na kale.” (Yoh. 8:44)—4/1, siaṱari 29.

Ri nga ita mini uri ri kone u kunda vhutshivha?

Zwithu zwi tevhelaho zwi nga ri thusa: Lwelani u vha na lufuno, konanani na vhathu vhane vha ofha Mudzimu, itani zwivhuya, “takalani na vha takalaho.” (Vha-Roma 12:15)—2/15, masiaṱari 16-17.

Hanna we a bulwa kha mafhungo a Evangeli a tsengo ya Yesu ndi nnyi?

Tshifhingani tsha tsengo ya Yesu, Hanna o ṱaluswa sa ‘tshifhe muhulu.’ (Luka 3:2) O shuma sa tshifhe muhulu u bva nga 6 kana 7 C.E. u swika hu ṱoḓaho u vha nga 15 C.E., musi a tshi bviswa kha honoho vhuimo, fhedzi o bvela phanḓa e na maanḓa kha ḽa Isiraele.—4/1, siaṱari 9.

Ndi maitele afhio ane ra fanela u a humbula musi ri tshi ṋea nyeletshedzo?

Pfesesani vhuimo. Ni songo gidimela u fhindula. Ḓiṱukufhadzeni, ni shumise Ipfi ḽa Mudzimu. Arali zwi tshi konadzea, shumisani laiburari ya lwa ṱaḓulu. Iledzani u dzhiela vhaṅwe phetho.—3/15, masiaṱari 7-9.

Yesu o ṱuṱuwedza vhathetshelesi vhawe uri vha tshimbile zwikhala zwivhili. (Mat. 5:41) Zwenezwo zwi amba mini?

Nga tshenetsho tshifhinga kha ḽa Isiraele, Vharoma vho vha vha tshi kombetshedza vhathu u ita mushumo. Musi Yesu a tshi ṱuṱuwedza vhathetshelesi vhawe uri vha tshimbile zwikhala zwivhili, o vha a tshi khou amba uri vho vha vha tshi fanela u ita tshumelo dzine vhavhusi vha vha humbela uri vha dzi ite vho vhofholowa.—4/1, siaṱari 9.