Yehova U A Ri Tsireledza Uri Ri Tshidzwe
Yehova U A Ri Tsireledza Uri Ri Tshidzwe
“Na inwi maanḓani a Mudzimu no lindiwa nga lutendo uri ni ḓo wana u tshidzwa ho lugiselwaho u ḓo dzumbululwa tshifhingani tsha vhufhelo.”—1 PET. 1:4, 5.
NI ḒO ARAVHA HANI?
Yehova o ri kokodzela hani vhurabelini ha ngoho?
Ri nga tendela hani Yehova a tshi ri livhisa nga nyeletshedzo yawe?
Yehova u ri ṱuṱuwedza hani?
1, 2. (a) Ri na vhungoho vhufhio ha uri Mudzimu u ḓo ri thusa uri ri dzule ri tshi fulufhedzea? (b) Yehova u ḓivha muṅwe na muṅwe washu lungafhani?
“ANE a ḓo konḓelela u swika vhufheloni ndi ene ane a ḓo tshidzwa.” (Mat. 24:13) Musi Yesu a tshi amba eneo maipfi o zwi bvisela khagala uri u itela uri ri kone u tshidzwa musi Mudzimu a tshi fhelisa shango ḽa Sathane, ri fanela u fulufhedzea u swika vhufheloni. Fhedzi zwenezwi a zwi ambi uri Yehova u lavhelela uri ri konḓelele ri tshi shumisa vhuṱali kana nungo dzashu. Bivhili i ri khwaṱhisedza uri: “Mudzimu hone u a fulufhedzea; ha nga tendi ní tshi lingiwa luné ni sa ḓo lu kona! Tshawe ndi u ri a tshi vhea mulingo, a vhea na tshivhana tshiné na kona u sera ngatsho’.” (1 Vha-Kor. 10:13) Eneo maipfi a amba mini?
2 Yehova u ita vhungoho ha uri a ri lingwi nga nḓila ine ra sa ḓo kona u i konḓelela, nga nṱhani ha uri u ḓivha tshiṅwe na tshiṅwe nga ha riṋe, u katela na khaedu dze ra sedzana nadzo, zwine ra vha zwone, na zwine ra nga kona u zwi konḓelela. Naa Mudzimu u ri ḓivha nga yeneyo nḓila? Ee. Maṅwalo a sumbedza uri Yehova u ḓivha tshiṅwe na tshiṅwe nga ha muṅwe na muṅwe washu. U a ḓivha zwine ra zwi ita ḓuvha na ḓuvha. U a ḓivha na zwi re mihumbuloni na mbiluni dzashu.—Vhalani Psalme ya 139:1-6.
3, 4. (a) Mafhungo a Davida a sumbedza hani uri Yehova u a thetshelesa? (b) Ndi mushumo ufhio wa ndeme une Yehova a khou u ita ṋamusi?
3 Naa Mudzimu u na dzangalelo kha vhathu nga yeneyo nḓila? Mupsalme Davida o vhudzisa Yehova yeneyo mbudziso musi a tshi ri: “Ndi tshi vhona ḽiṱaḓulu ḽau, mishumo ya minwe yau, na dziṋaledzi dze wa dzi vhea, Ndi ri: Muthu u tou vha mini U tshi mu elelwa?” (Ps. 8:3, 4) Khamusi o vhudzisa yeneyo mbudziso nga nṱhani ha zwe a zwi tshenzhela. Naho o vha e murwa muṱuku wa Isai, o vha e “munna a pfanaho na mbilu ya Yehova” nahone o mu dzhia e ‘mirangani e na dzinngu, a mu ita murangaphanḓa’ wa Isiraele. (1 Sam. 13:14; 2 Sam. 7:8) Edzani u humbula nḓila ye Davida a ḓipfa ngayo musi a tshi ṱhogomela uri Musiki wa fhethu hoṱhe u ḓivha zwine a zwi elekanya, naho o vha a tshi sokou vha mulisa zwawe!
4 Zwi a mangadza vhukuma musi ri tshi elekanya nga ha dzangalelo ḽine Yehova a vha naḽo kha riṋe ṋamusi. U khou kuvhanganya “madzanga a dzoṱhe dzitshakha” uri a ḓe vhurabelini ha ngoho, nahone u thusa vhashumeli vhawe uri vha dzule vha tshi fulufhedzea. (Hag. 2:7) U itela uri ri kone u pfesesa khwine nḓila ine Yehova a ri thusa ngayo uri ri dzule ri tshi fulufhedzea, kha ri haseledze nḓila ine a kokodza ngayo vhathu uri vha ḓe vhurabelini ha ngoho.
MUDZIMU U A RI KOKODZA
5. Yehova u kokodzela hani vhathu kha Murwa wawe? Fanyisani.
5 Yesu o ri: “Haho’ a konaho u ḓa ha nṋe, arali Khotsi o nthumaho á sa mu kokodzi.” (Yoh. 6:44) Eneo maipfi a sumbedza uri u itela uri ri vhe vhafunziwa vha Kristo, ri fanela u thuswa nga Mudzimu. Yehova u kokodzela hani vhane vha nga dzinngu kha Murwa wawe? Nga u huwelelwa ha mafhungo-maḓifha na nga muya mukhethwa. Sa tsumbo, musi Paulo na khonani dzawe dza vharumiwa vhe ngei Filipi, vho ṱangana na mufumakadzi ane a pfi Lidia nahone vha thoma u mu vhudza mafhungo-maḓifha. Mafhungo o hevhedzwaho a ri: “Murena a mu vula mbilu, a pfa zwe Paulo a vha a tshi amba.” I ngoho, Mudzimu o mu ṋea muya wawe u itela u mu thusa uri a pfesese wonoyo mulaedza, nahone ene na muṱa wawe vha lovhedzwa.—Mish. 16:13-15.
6. Roṱhe ro kokodzelwa hani vhurabelini ha ngoho nga Mudzimu?
6 Naa zwenezwo zwo itea kha Lidia fhedzi? Na khathihi. Arali ni Mukriste o ḓiṋekedzaho, na inwi no kokodzelwa vhurabelini ha ngoho nga Mudzimu. Samusi Khotsi ashu wa ṱaḓulu o vhona tshiṅwe tshithu tsha ndeme mbiluni ya Lidia, na kha inwi o vhona tshiṅwe tshithu tshavhuḓi. Musi ni tshi thoma u pfa mafhungo-ngoho, Yehova o ni thusa uri ni a pfesese nga muya mukhethwa. (1 Vha-Kor. 2:11, 12) Musi ni tshi lwela u shumisa zwe na zwi guda, o fhaṱutshedza vhuḓidini haṋu ha u ita zwine a funa zwi tshi itwa. O takala musi ni tshi ṋekedza vhutshilo haṋu khae. Vhukuma, tshee na thoma u tshimbila nḓilani ya vhutshilo, Yehova o ni dededza.
7. Ri zwi ḓivha hani uri Mudzimu u ḓo ri thusa uri ri dzule ri tshi fulufhedzea?
7 Samusi Yehova o no ḓi ri thusa uri ri thome u tshimbila nae, u ḓo bvela phanḓa a tshi ri thusa uri ri dzule ri tshi fulufhedzea. U a zwi ḓivha uri samusi ri songo ḓa nga roṱhe ngohoni, ri nga si kone u dzula ngohoni nga roṱhe. Musi a tshi ṅwalela Vhakriste vho ḓodzwaho, muapostola Petro o ri: “Na inwi maanḓani a Mudzimu no lindiwa nga lutendo uri ni ḓo wana u tshidzwa ho lugiselwaho u ḓo dzumbululwa tshifhingani tsha vhufhelo.” (1 Pet. 1:4, 5) Ndi ngani maitele a eneo maipfi a tshi shuma kha Vhakriste vhoṱhe, nahone ndi ngani ri tshi fanela u vha na dzangalelo khao ṋamusi? Ndi nga ṅwambo wa uri roṱhe ri ṱoḓa thuso ya Mudzimu uri ri dzule ri tshi fulufhedzea khae.
U THIVHELWA URI RI SONGO FARA NḒILA YO KHAKHEAHO
8. Ndi ngani ri tshi fanela u ḓilonda uri ri sa fare nḓila yo khakheaho?
8 Thaidzo dza vhutshilo na u sa fhelela hashu zwi nga ita uri ri si tsha vhona zwithu nga nḓila ine Yehova a zwi vhona ngayo nahone zwa ri vhea khomboni ya u fara nḓila yo khakheaho ri sa zwi ṱhogomeli. (Vhalani Vha-Galata 6:1.) Ri wana tsumbo ya zwenezwi kha zwe zwa itea vhutshiloni ha Davida.
9, 10. Yehova o thivhela hani Davida uri a songo fara nḓila yo khakheaho, nahone riṋe U ri tsireledza hani ṋamusi?
9 Musi Davida a tshi tovholwa nga Khosi Saulo a re na vivho, o ḓifara nahone ho ngo ṱoḓa u ḓilifhedzela. (1 Sam. 24:2-7) Fhedzi nga u ṱavhanya nga murahu ha zwenezwo, Davida ho ngo kona u ḓifara. O vha a tshi khou ṱoḓela vhanna vhawe zwiḽiwa na maḓi, nahone nga ṱhonifho a ya u humbela thuso kha Muisiraele ngae ane a pfi Nabali. Musi Nabali a tshi fhindula nga lunyadzo, Davida o sinyuwa nahone a ṱoḓa u lifhedza Nabali na vhanna vhoṱhe vha nnḓu yawe, a sa pfesesi uri u vhulaha vhathu vha si na mulandu zwi ḓo ita uri a vhe na mulandu wa malofha phanḓa ha Mudzimu. Fhedzi Abigaili mufumakadzi wa Nabali o thivhela Davida uri a sa ite honoho vhukhakhi vhuhulwane. A tshi ṱhogomela uri Yehova o shumisa Abigaili u mu tsireledza, Davida o ri: “Nga hu rendiwe Yehova we a U ruma wa ṱangana na nṋe ṋamusi. Nga hu rendiwe vhuṱali hau; hu rendiwe henewe, ngauri ṋamusi wo ndzivhela ndi si ovhe mulandu wa malofha nga u’ nda ḓi-lwela.”—1 Sam. 25:9-13, 21, 22, 32, 33.
10 Ndi mini zwine ra nga zwi guda kha enea mafhungo? Yehova o shumisa Abigaili u thivhela Davida uri a songo ita vhukhakhi. U ita zwi fanaho na kha riṋe ṋamusi. Vhukuma, a ro ngo fanela u lavhelela uri Mudzimu u ḓo rumela muthu uri a ri thuse tshifhinga tshiṅwe na tshiṅwe musi ri tshi ṱoḓa u ita vhukhakhi kana u humbula uri ri fanela u ḓivha nga ho livhaho zwine Mudzimu a ḓo zwi ita kha vhuṅwe vhuimo kana zwine a ḓo zwi tendela zwi tshi itea u itela u ḓadzisa ndivho yawe. (Muh. 11:5) Naho zwo ralo, ri nga fulufhela uri misi yoṱhe Yehova u a ḓivha zwiimo zwashu nahone u ḓo ri thusa uri ri dzule ri tshi fulufhedzea khae. U ri khwaṱhisedza uri: “Ndi ḓo U funza nda U sumbedza nḓila iné wa pfi U i fare; ndi ḓo U dededza nga maṱo anga.” (Ps. 32:8) Yehova u ri ṋea hani nyeletshedzo? Ri nga vhuyelwa hani ngayo? Nahone ndi ngani ri tshi nga vha na vhungoho ha uri Yehova u khou livhisa vhathu vhawe ṋamusi? Ṱhogomelani nḓila ine dzenedzi mbudziso dza fhindulwa ngayo buguni ya Ndzumbululo.
NYELETSHEDZO I A RI TSIRELEDZA
11. Yehova u ḓivha lungafhani zwine zwa itea zwivhidzoni zwa vhathu vhawe?
11 Bononi ḽo ṅwalwaho kha Ndzumbululo ndima ya vhuvhili na ya vhuraru, Yesu Kristo o ṋewaho vhugala u ṱolisisa zwivhidzo zwa sumbe zwa Asia Minor. Ḽeneḽo bono ḽi sumbedza uri Kristo ha vhoni zwithu nga u tou angaredza fhedzi, fhedzi u vhona vhuimo hoṱhe. Kha zwiṅwe zwiitea, o ita na u bula vhathu nga madzina, nahone a vha khoḓa na u vha eletshedza hune zwa ṱoḓea. Zwenezwi zwi sumbedza mini? Kha u ḓadzea ha ḽeneḽo bono, zwivhidzo zwa sumbe zwi imela Vhakriste vho ḓodzwaho vha nga murahu ha 1914, nahone nyeletshedzo ye ya ṋewa zwivhidzo zwa sumbe i shuma kha zwivhidzo zwoṱhe zwa vhathu vha Mudzimu ḽifhasini ḽoṱhe ṋamusi. Ngauralo, zwi a pfala u phetha nga uri Yehova u livhisa vhathu vhawe a tshi shumisa Murwa wawe. Ri nga vhuyelwa hani nga honoho vhulivhisi?
12. Ri nga tendela hani uri Yehova a ri dededze?
12 Iṅwe nḓila ine ra vhuyelwa ngayo nga vhulivhisi ha Yehova ha lufuno ndi nga pfunzo ya muthu nga eṱhe. Yehova u ri ṋea nyeletshedzo i bvaho Maṅwaloni a tshi shumisa khandiso dza tshigwada tsha mukoma a fulufhedzeaho na wa vhuṱali. (Mat. 24:45) Naho zwo ralo, u itela uri ri kone u vhuyelwa nga yeneyo nyeletshedzo, ri fanela u ḓiṋea tshifhinga tsha u guda na u shumisa zwine ra zwi guda. Pfunzo ya muthu nga eṱhe ndi iṅwe nḓila ine Yehova a ri ‘lisa ngayo uri ri si khukhulwe.’ (Yuda 24) Naa no no vhuya na vhala zwiṅwe zwithu khandisoni dzashu zwine zwa nga zwo ṅwalelwa inwi nga ho livhaho? Ṱanganedzani yeneyo nyeletshedzo sa i bvaho ha Yehova. Samusi khonani i tshi nga ni humbudza zwiṅwe zwithu, Yehova a nga shumisa muya wawe u thusa inwi khathihi na vhaṅwe vhathu u ṱhogomela uri hu na zwiṅwe zwithu kha vhuḓifari kana vhumuthu ha vhoiwe zwine na fanela u zwi khakhulula. Musi ri tshi ṱanganedza vhulivhisi ha muya mukhethwa, ri vha ri tshi khou tenda uri Yehova a ri dededze. (Vhalani Psalme ya 139:23, 24.) Kha ri ṱolisise nḓila ine ra guda ngayo.
13. Ndi ngani zwi tshi nga vha vhuṱali uri ri ṱolisise nḓila ine ra guda ngayo?
13 U fhedza tshifhinga tsho kalulaho ri tshi khou ḓimvumvusa zwi nga ri dzhiela tshifhinga tshine ra fanela u tshi shumisela pfunzo ya muthu nga eṱhe. Muṅwe wahashu wa tshinnani o ri: “Zwi a leluwa vhukuma u hangwa pfunzo ya muthu nga eṱhe. Vhuḓimvumvusi ho ḓala u fhira naho hu lini nahone a vhu ḓuri. Vhu wanala kha thelevishini, khomphyutha na kha luṱingo. Ho ḓala fhethu hoṱhe.” Arali ri sa ṱhogomeli, ri nga sala ri si na tshifhinga tsha u ita pfunzo ya muthu nga eṱhe. (Vha-Ef. 5:15-17) Zwi nga vha zwavhuḓi arali muṅwe na muṅwe washu a ḓivhudzisa uri: ‘Ndi fhedza tshifhinga tshingafhani ndi tshi khou guda Ipfi ḽa Mudzimu nga ho dzikaho? Naa ndi vhala fhedzi arali ndi na nyambo?’ Arali zwo ralo, zwi nga vha zwavhuḓi uri ri shumise nga vhuṱali madekwana a vhurabeli ha muṱa kana pfunzo ya muthu nga eṱhe uri ri kone u wana vhuṱali vhune Yehova a ri ṋea hone u itela u ri tsireledza uri ri kone u tshidzwa.—Mir. 2:1-5.
U ṰUṰUWEDZWA ZWI RI THUSA U KONḒELELA
14. Maṅwalo a sumbedza hani uri Yehova u a ṱhogomela nḓila ine ra ḓipfa ngayo?
14 Davida o sedzana na zwiimo zwinzhi zwi konḓaho vhutshiloni hawe. (1 Sam. 30:3-6) Maipfi awe o hevhedzwaho a sumbedza uri Yehova o vha a tshi ḓivha nḓila ine a ḓipfa ngayo. (Vhalani Psalme ya 34:18; 56:8.) Na riṋe Mudzimu u a ḓivha nḓila ine ra ḓipfa ngayo. Musi ‘mbilu dzashu dzo vunḓekana’ kana ‘mimuya yashu yo huvhala,’ u a sendela tsini na riṋe. Zwenezwi zwi nga ri khuthadza samusi zwo khuthadza Davida we a imba a ri: “Ndi ḓo imba ndi tshi takalela tshilidzi tshau; ngauri wo vhona vhusiwana hanga; U ḓivha u khakhelwa ha muya wanga.” (Ps. 31:7) Yehova ha ṱhogomeli u tsikeledzea hashu fhedzi, fhedzi u a ri tikedza nga u ri ṋea khuthadzo na ṱhuṱhuwedzo. Iṅwe nḓila ine a ita zwenezwi ngayo ndi nga miṱangano ya Vhukriste.
15. Ndi mini zwine ra nga zwi guda kha tshenzhelo ya Asafu?
15 Ri vhona iṅwe mbuyelo ya u ya miṱanganoni kha zwe zwa tshenzhelwa nga mupsalme Asafu. U dzulela u humbula nga u shayea ha khaṱulokwayo zwo ita uri Asafu a timatime u shumela Mudzimu. Asafu o mbo ḓi kulea nungo. O ṱalusa maḓipfele awe nga heyi nḓila: “Ndi kha ḓi ḽa mbilu, ndi kha ḓi shengela luvaloni.” O ṱoḓa u litsha u shumela Yehova nga nṱhani ha zwenezwo. Ndi mini zwe zwa thusa Asafu uri a dovhe a vhe na mavhonele avhuḓi? O ri: “Nda vhuya nda zwi kona ndi tshi ya fhethu hukhethwa ha Mudzimu.” Musi e henefho vhukati ha vhaṅwe vhane vha gwadamela Yehova, o lulamisa mavhonele awe. O zwi vhona uri vhavhi vha bvelela lwa tshifhinganyana, uri Yehova u ḓo lugisa zwithu. (Ps. 73:2, 13-22) Na riṋe ri nga ḓipfa nga yeneyo nḓila. Mutsiko wa u sedzana na u shayea ha khaṱulokwayo shangoni ḽa Sathane u nga ri kula nungo. U ṱanganela na vhahashu zwi a ri homolosa nahone zwi ri thusa uri ri dzule ri tshi shumela Yehova nga dakalo.
16. Ri nga vhuyelwa hani nga tsumbo ya Hanna?
16 Fhedzi ni fanela u ita mini arali vhuimo ha tshivhidzoni vhu tshi ita uri zwi konḓe uri ni ye miṱanganoni? Khamusi a ni tshee na ndugelo dza tshumelo nahone ni na ṱhoni, kana hu na wahashu wa tshinnani kana wa tshisadzini we na si vhone zwithu nga nḓila i fanaho. Arali zwo ralo, tsumbo ya Hanna i nga ni thusa. (Vhalani 1 Samuele 1:4-8.) Humbulani uri o vha a tshi tsikeledzwa vhukuma nga Penina muhadzinga wawe. Ṅwaha muṅwe na muṅwe vhuimo ho vha vhu tshi konḓesa musi muṱa u tshi isela Yehova zwiṱhavhelo ngei Silo. Hanna o vha a tshi tsikeledzea lwe ‘a vha a tshi lila, a sa ḽi tshithu.’ Fhedzi ho ngo tendela honoho vhuimo vhu tshi ita uri a si ye u gwadamela Yehova. Yehova o ṱhogomela u fulufhedzea hawe nahone a mu fhaṱutshedza.—1 Sam. 1:11, 20.
17, 18. (a) Ndi nḓila dzifhio dzine ra wana ngadzo khuthadzo miṱanganoni ya tshivhidzo? (b) Ni ḓipfa hani nga ha lufuno lune Yehova a ri sumbedza lwone u itela uri ri tshidzwe?
17 Vhakriste ṋamusi vha na tshiitisi tshi pfalaho tsha u edzisa tsumbo ya Hanna. Ri fanela u ya miṱanganoni tshifhinga tshoṱhe. Samusi roṱhe ro no zwi tshenzhela, miṱangano i a ri ṱuṱuwedza vhukuma. (Vha-Heb. 10:24, 25) Vhukonani ha lufuno ha Vhakriste vhu a ri khuthadza. Ri nga kwamiwa nga zwiṅwe zwine ra zwi pfa kha nyambo kana nga phindulo ya muṅwe. Musi ri tshi haseledza nga phanḓa na nga murahu ha miṱangano, mutendi nga riṋe a nga ri thetshelesa kana a ri khuthadza. (Mir. 15:23; 17:17) Musi ri tshi imbela Yehova, ri ḓipfa ro takala. Ri ṱoḓa khuthadzo ine ya wanala miṱanganoni, hune Yehova a ri tikedza nga “phumudzo dza[we]” na u ri thusa uri ri ḓiimisele u dzula ri tshi fulufhedzea, zwihuluhulu arali ri na “mbilaelo nnzhi.”—Ps. 94:18, 19.
18 Ri a livhuha vhukuma uri Mudzimu u a ri linda uri ri tshidzwe! Lufuno lwa Yehova lu ita uri ri ḓipfe ro tsireledzea u fana na mupsalme Asafu we a imbela Yehova a ri: “Wo fara tshanḓa tshanga tsha u ḽa. U ḓo ndededza nga maano au ané wa a ḓivha.”—Ps. 73:23, 24.
[Mbudziso Dza Pfunzo]
[Tshifanyiso kha siaṱari 28]
Na inwi no kokodzwa nga Yehova
[Tshifanyiso kha siaṱari 30]
Ri a tsireledzea musi ri tshi shumisa nyeletshedzo ya Mudzimu
[Tshifanyiso kha siaṱari 31]
Ṱhuṱhuwedzo ine ra i wana i a ri tikedza
