Ivhani Na Mavhonele Avhuḓi Musi Ni Na Vhuleme Mbinganoni

“Huno vho dzeaho ndi a vha laya, hone é si nṋe, é Murena.”—1 VHA-KOR. 7:10.

NI NGA ṰALUTSHEDZA HANI?

Ndi nga muhumbulo ufhio hune ha ambiwa uri Mudzimu o vhofhekanya vhafarisi vha mbingano?

Vhahulwane vha nga thusa hani Vhakriste vha re na vhuleme mbinganoni?

Ri fanela u dzhia hani mbingano?

1. Vhakriste vha dzhia hani mbingano, nahone ndi ngani?

 MUSI Vhakriste vha tshi dzhenela mbingano vha ita muano phanḓa ha Mudzimu—nahone muano wonoyo ndi wa ndeme vhukuma. (Muh. 5:4-6) Samusi e Muthomi wa mbingano, Yehova o ‘vhofhekanya’ vhathu vha re mbinganoni. (Marko 10:9) Phanḓa ha Mudzimu vha dzula vho vhofhekanywa hu sa londwi milayo i re hone ine ya nyadzisa mbingano. Vhashumeli vha Yehova vha fanela u dzhia mbingano sa ndugiselelo ine ya vha vhofha hu sa londwi uri vho vha vhe vhashumeli vhawe musi vha tshi dzhenela mbingano kana vhe si vhashumeli vhawe.

2. Ndi mbudziso dzifhio dzine dza ḓo haseledzwa kha ino thero?

² Mbingano i bvelelaho i nga ḓisa dakalo ḽihulwane. Fhedzi hu nga itwa mini arali hu na vhuleme mbinganoni? Naa mbingano i re na vhuleme i nga khwaṱhiswa? Ndi mini zwine zwa nga thusa vhavhingani vha si na mulalo mbinganoni yavho?

NAA I ḒO TAKADZA KANA I NGA SI TAKADZE?

3, 4. Hu nga itea mini arali muthu a ita phetho ya vhutsilu musi a tshi khetha mufarisi wa mbingano?

³ Musi mbingano ya Vhakriste i tshi bvelela, i ḓisa dakalo nahone i hulisa Yehova. Musi i sa bveleli zwi pfisa vhuṱungu vhuhulu. Mukriste a siho mbinganoni ane a khou humbula nga ha u i dzhenela, u kha vhuimo havhuḓi ha u ita zwithu nga nḓila yo teaho nga u tevhedza nyeletshedzo dza Mudzimu. Kha ḽiṅwe sia, muthu ane a ita phetho dza vhutsilu musi a tshi khetha mufarisi a nga pfa vhuṱungu vhuhulwane na u sa fushea. Sa tsumbo, vhaṅwe vhaswa vha thoma u ita zwa u funana musi vha sa athu lugela u hwala vhuḓifhinduleli ha u vha mbinganoni. Vhaṅwe vhathu vha wana mufarisi ane vha nga vhingana nae kha Inthanethe nahone vha ṱavhanya vha dzhenela mbingano ine vha fheleledza vha songo takala tshoṱhe khayo. Vhaṅwe vha ita tshivhi tshihulwane musi vha tshee vho fulufhedzisana u vhingana, fhedzi vha ḓi bvela phanḓa na mbingano,  nahone zwenezwo zwi ita uri vha thome mbingano yavho vha sa ṱhonifhani.

⁴ Vhaṅwe Vhakriste a vha vhingi kana u vhingwa “Murenani” nahone vha anzela u sedzana na mvelelo dzi vhavhaho dza u vha na mufarisi ane a si vhe mushumeli wa Yehova. (1 Vha-Kor. 7:39) Arali ni kha vhuimo honovhu, rabelani Mudzimu ni humbele uri a ni hangwele na uri a ni thuse. Ha nga ḓo ita uri ni si sedzane na mvelelo dza vhukhakhi haṋu ha tshifhingani tsho fhiraho, fhedzi u a thusa vhathu vho rembuluwaho uri vha kone u sedzana na milingo. (Ps. 130:1-4) Itani vhuḓidini ha u ṱoḓa u mu takadza zwino na nga hu sa fheli, ngauri “u takalela Yehova ndi one maanḓa aṋu.”—Neh. 8:10.

MUSI MBINGANO I KHOMBONI

5. Ndi mahumbulele afhio ane ra fanela u a iledza musi ri songo takala mbinganoni?

⁵ Arali vhaṅwe vha songo takala mbinganoni yavho vha nga kha ḓi ḓivhudzisa uri: ‘Naa hu na ṱhoḓea ya uri ndi dzule kha yeneyi mbingano i sa takadzi? Ngavhe zwi tshi konadzea u humela murahu, ndo vha ndi tshi nga vhingana na muṅwe muthu!’ Vha nga kha ḓi humbula nga ha u fhelisa mbingano—‘u itela uri vha dovhe vha vhofholowe! Ndi ngani ndi sa ṱali? Naho ṱhalano yanga i sa tendelani na zwi re Maṅwaloni, ndi ngani ndi sa tou fhambana nae, nda dovha nda ḓiphina nga vhutshilo?’ Nṱhani ha u vha na mahumbulele o raloho kana u lora uri ngavhe a ite mini, Mukriste u fanela u ita vhuḓidini ha u khwinisa vhuimo nga u ṱoḓa nyeletshedzo ya Mudzimu na u i tevhedza.

6. Ṱalutshedzani zwe Yesu a zwi amba kha Mateo 19:9.

⁶ Arali Mukriste a nga ṱala, zwi nga kha ḓi itea uri a vhe a songo vhofholowa u ya nga Maṅwalo uri a dovhe a dzhenele mbingano. Yesu ori: “Ané a vhuya a ṱala musadzi wawe nga tshiṅwe [tshiitisi] arali hú si vhupombwe, a dzea muṅwe, u ita vhupombwe.” (Mat. 19:9) Musi hu tshi ambiwa nga “vhupombwe”, zwi katela vhuṱonḓolo na zwiṅwe zwivhi zwihulwane zwa malugana na zwa vhudzekani. Ndi zwa ndeme u thoma wa rabela arali u tshi humbula u ṱala mufarisi wau, musi hu si na we a ḓifara luvhi nga zwa vhudzekani.

7. Vhaṅwe vhathu vha nga humbula mini arali mbingano ya Vhakriste ya fa?

⁷ Musi mbingano i tshi fa, zwi nga kha ḓi sumbedza uri muthu ha na vhushaka havhuḓi na Mudzimu. Muapostola Paulo o vhudzisa heyi mbudziso ya ndeme: “Arali muthu á sa koni u vhusa vha nnḓu yawe, tshivhidzo tsha Mudzimu u ḓo tshi vhavhalela hani?” (1 Tim. 3:5) Zwi re zwone ndi uri arali vhathu vhavhili vha tshi ḓiamba uri ndi Vhakriste, nahone mbingano yavho ya fa, vhaṅwe vhathu vha nga kha ḓi humbula uri vhenevho vhathu a vha iti zwine vha zwi funza.—Vha-Roma 2:21-24.

8. Hu vha ho khakhea mini musi Vhakriste vha tshi ita phetho ya u ṱalana?

⁸ Musi vhavhingani vho lovhedzwaho vha tshi khou ṱoḓa u fhandekana kana u ṱalana hu si ha Maṅwalo, hu fanela u vha hu na zwo  khakheaho zwa vhukuma kha vhushaka havho na Mudzimu. Vhathu vhenevho vhavhili kana muṅwe wavho u vha a sa khou tevhedza maitele a re Maṅwaloni. Arali vha tshi ‘fulufhedza Mudzimu nga mbilu yoṱhe’ vha nga si vhe na tshiitisi tsha u humbula uri vha nga si kone u ita vhuḓidini ha u tsireledza mbingano yavho.—Vhalani Mirero 3:5, 6.

9. Vhaṅwe Vhakriste vho lambedzwa hani nga vhuḓidini havho ha u sa fhela mbilu mbinganoni?

⁹ Mbingano nnzhi dze dza vhonala u nga dzi ḓo fa, nga u ya ha tshifhinga dzo fheleledza dzo bvelela. Vhakriste vhane vha iledza u laṱela thaula musi vhe mbinganoni i konḓaho vha a lambedzwa vhukuma. Ṱhogomelani uri hu nga itea mini musi muṅwe mufarisi a si mushumeli wa Yehova. Muapostola Petro o ṅwala uri: “Hu ḓi nga vhasadzi nga vha pfe vhanna vhavho, uri naho vhaṅwe fhungo vhá sa ḽi tendi vha wanale nga kutshilele kwa vhasadzi, vhá songo vhuya vhá ambiwa navho’; Vhó sokou vhona kutshilele kwaṋu kwa u ofha u vha na vhuyaḓa.” (1 Pet. 3:1, 2) Vhukuma, nga nṱhani ha vhuḓifari havhuḓi ha mufarisi wawe, mufarisi a si mutendi a nga ṱanganedza mafhungo-ngoho! Vhakriste vhane vha tsireledza mbingano dzavho vha hulisa Mudzimu, nahone zwenezwo zwi nga ḓisa phaṱhutshedzo kha munna, mufumakadzi na vhana.

10, 11. Ndi vhuleme vhufhio vhu songo lavhelelwaho vhune ha nga kha ḓi vha hone mbinganoni, fhedzi Mukriste u fanela u vha na vhungoho ha mini?

¹⁰ Nga nṱhani ha u ṱoḓa u takadza Yehova, Vhakriste vhanzhi vha siho mbinganoni vha khetha u vhingana fhedzi na vhatendi ngavho vho ḓiṋekedzaho. Naho zwo ralo, vhuimo vhu nga kha ḓi shanduka vha songo zwi lavhelela. Sa tsumbo, nga zwiṅwe zwifhinga mufarisi a nga thoma u vha na vhuleme vhuhulwane ha u tsikeledzea maḓipfele. Kana khamusi musi ho no fhela tshifhinga vho vhingana, muṅwe mufarisi a nga fhola muyani. Sa tsumbo: Linda, * Mukriste a fhiseaho na mme o ḓikumedzaho o sokou lavhelesa hu si na zwine a nga zwi ita musi munna wawe a tshi ita zwithu zwi sa tendelani na Maṅwalo zwe zwa ita uri a fheleledze o bviswa tshivhidzoni. Mukriste ane a vha kha vhuimo vhu fanaho na honovhu a nga fhelelwa nga fulufhelo ḽa uri mbingano yawe i ḓo dovha ya luga. U fanela u ita mini?

¹¹ Ni nga kha ḓi ḓivhudzisa uri: ‘Naa ndi fanela u lingedza u dzula mbinganoni yeneyi hu sa londwi zwine zwa nga itea?’ A hu na muthu ane a nga kona kana ane a fanela u ni itela phetho kha eneo mafhungo. Naho zwo ralo, hu na zwiitisi zwavhuḓi zwa u sa laṱela thaula musi ri mbinganoni i konḓaho. Munna kana mufumakadzi ane a ofha Mudzimu ane a konḓelela mbinganoni i konḓaho, nga nṱhani ha luvalo lwawe lu sa mu tendeliho u ṱutshela mufarisi wawe wa mbingano, ndi wa ndeme vhukuma kha Mudzimu. (Vhalani 1 Petro 2:19, 20.) Yehova u ḓo shumisa Ipfi ḽawe na muya wawe u itela u thusa Vhakriste vhane vha ita vhuḓidini vhuhulwane u itela u khwaṱhisa mbingano yavho i re khomboni.

VHO ḒIIMISELA U NI THUSA

12. Vhahulwane vha ḓo ri dzhia hani musi ri tshi humbela thuso yavho?

¹² Arali no sedzana na vhuleme mbinganoni, ni songo timatima u humbela thuso ya lwa muya kha Vhakriste vho vhibvaho. Vhahulwane ndi vhalisa vha sambi, nahone vha ḓo takalela u ni livhisa nga nyeletshedzo yo hevhedzwaho i re Maṅwaloni. (Mish. 20:28; Yak. 5:14, 15) Ni songo phetha nga uri mufarisi waṋu a nga si tsha ṱhonifhiwa nga vhahulwane arali na humbela thuso nahone  na haseledza vhuleme ha vhoiwe ha mbingano navho. Vha ḓo ni funa nga ho engedzeaho musi vha tshi vhona uri ni khou ita vhuḓidini vhuhulwane ha u takadza Mudzimu.

13. Ndi nyeletshedzo ifhio ine ya wanala kha 1 Vha-Korinta 7:10-16?

¹³ Musi vhahulwane vha tshi humbelwa u thusa muthu ane mufarisi wawe a si vhe mushumeli wa Yehova, vha fanela u shumisa nyeletshedzo i fanaho na ya Paulo we a ṅwala uri: “Huno vho dzeaho ndi a vha laya, hone é si nṋe, é Murena, uri musadzi a songo fhandakana na munna wawe. Arali ó fhandakana nae’ a dzule á so ngo dzewa a pfumedzane na munna wawe. Hu nga munna a songo ṱala musadzi wawe . . . Ngauri U ḓivha’ni, iwe musadzi, arali wa ḓo tshidza munna? U ḓivha’ni, iwe munna, arali wa ḓo tshidza musadzi?” (1 Vha-Kor. 7:10-16) Ndi phaṱhutshedzo khulwane vhukuma musi mufarisi a si mutendi a tshi fheleledza o ṱanganedza vhurabeli ha ngoho.

14, 15. Ndi lini hune mufarisi wa Mukriste a nga ita phetho ya u fhandakana, fhedzi ndi ngani zwi zwa ndeme u ṱolisisa vhuimo nga u fulufhedzea na u rabela nga hazwo?

¹⁴ Ndi nga fhasi ha zwiimo zwifhio hune mufumakadzi wa Mukriste a nga “fhandakana” na munna wawe? Vhaṅwe vha ita phetho ya u fhandakana na mufarisi wavho musi a sa vha ṱunḓeli nga khole. Vhaṅwe vho ita nga u ralo nga nṱhani ha u tambudzwa vha tshi rwiwa kana musi a tshi ita uri zwi vha konḓele u shumela Yehova.

¹⁵ U dzula kana u fhandakana nae ndi phetho ine muthu a ḓiitela yone nga eṱhe. Naho zwo ralo, Mukriste u fanela u thoma a rabela nga ha vhuimo honoho na u vhu ṱolisisa nga u fulufhedzea. Sa tsumbo, naa mufarisi a si mutendi ndi ene e eṱhe ane a khou ita uri Mukriste a si kone u shumela Yehova zwavhuḓi, kana Mukriste ndi ene we a litshelela u guda Bivhili, ane a si ye miṱanganoni na tsimuni tshifhinga tshoṱhe?

16. Ndi mini zwine zwa fanela u thivhela Vhakriste uri vha songo ṱavhanya vha ita phetho ya u ṱalana?

¹⁶ U dzhiela nṱha vhushaka hashu na Mudzimu na u livhuha tshifhiwa tshawe tsha mbingano zwi fanela u ita uri ri si ṱavhanye ra ita phetho ya u ṱalana. Samusi ri vhashumeli vha Yehova ri vhilaelela nga maanḓa uri dzina ḽawe ḽi itwe ḽikhethwa. Nga zwenezwo, ri nga si vhuye ra ita tshimbevha tsha u ṱala mufarisi washu ngeno ri tshi khou ṱoḓa u dovha ra vhingana na muṅwe muthu.—Yer. 17:9; Mal. 2:13-16.

17. Ndi nga fhasi ha zwiimo zwifhio hune ha nga ambiwa uri Mudzimu o ṋea vhavhingani vha Vhakriste mulalo?

¹⁷ Mukriste o vhinganaho na muthu a si mutendi u fanela u ita vhuḓidini vhuhulwane ha uri mbingano yawe i bvelele. Naho zwo ralo, ho ngo fanela u ḓivhona mulandu arali a ita vhuḓidini ha u dzula na mufarisi wawe fhedzi mufarisi wawe ha vha ene ane a ṱoḓa u fhandakana nae kana u mu ṱala. Paulo o ṅwala uri: “Huno arali a sí mutendi é ene a ṱalaho, nga hu ṱale ene; zwó ralo, murathu washu kana khaladzi yashu a vhá na mulandu; hone  Mudzimu o ri vhidza lwa uri: Ḽo lala” zwine zwa katela na u ri ṋea mulalo.—1 Vha-Kor. 7:15. *

FULUFHELANI YEHOVA

18. Naho zwi sa konadzei u tsireledza mbingano yaṋu uri i si fhele, hu nga vha na mvelelo dzifhio dzavhuḓi nga nṱhani ha vhuḓidini haṋu?

¹⁸ Musi no sedzana na vhuleme vhuṅwe na vhuṅwe mbinganoni, humbelani tshivhindi kha Yehova nahone ni dzule ni tshi mu fulufhela. (Vhalani Psalme ya 27:14.) Humbulani nga ha Linda we a bulwa afho nṱha. O fheleledza o ṱalana na munna wawe naho o fhedza miṅwaha a tshi khou ita vhuḓidini ha u tsireledza mbingano yawe uri i si fhele. Naa u vhona u nga o ḓifhedzela tshifhinga? O ri: “Na khathihi. Vhuḓidini hanga ho ṋea vhuṱanzi havhuḓi kha vho zwi vhonaho. Ndi na luvalo lwo ṱambaho. Zwi takadzaho vhukuma ndi uri yeneyo miṅwaha yoṱhe yo thusa ṅwananyana wanga uri a ime o khwaṱha ngohoni. O aluwa a vha Ṱhanzi ya Yehova yo ḓiṋekedzaho ine ya fhisea.”

19. Hu nga itea mini arali ra ita vhuḓidini ha u tsireledza mbingano yashu?

¹⁹ Muṅwe mufumakadzi wa Mukriste ane a pfi Marilyn u a takala uri o fulufhela Mudzimu nahone a ita vhuḓidini ho engedzeaho u itela u tsireledza mbingano yawe. O ri: “Ndo vha ndi tshi ṱoḓa u fhandakana na munna wanga ngauri o vha a sa ri ṱunḓeli nahone a tshi vhea vhushaka hanga na Mudzimu khomboni. Fhedzi munna wanga o vha e muhulwane tshivhidzoni musi a sa athu thoma zwa u ita thendelano dza vhutsilu siani ḽa zwa mabindu. O thoma u sa ya miṱanganoni, nahone ro mbo ḓi litsha vhudavhidzano hashu hoṱhe. Musi ḓorobo ya hashu i tshi ṱhaselwa nga vhatherorisi, ndo vha ndo tshuwesa lwe nda wana zwi tshi konḓa u davhidzana na u vhumba vhushaka na vhaṅwe vhathu. Fhedzi ndo mbo ḓi zwi ṱhogomela uri na nṋe ndo khakha. Ro mbo ḓi dovha ra thoma u davhidzana, ra vusulusa pfunzo yashu ya muṱa, na u ya miṱanganoni tshifhinga tshoṱhe. Vhahulwane vho vha vhe na vhulenda nahone vho ri thusa nga maanḓa. Mbingano yashu yo mbo ḓi vusulusea. Nga u ya ha tshifhinga, munna wanga o mbo ḓi dovha a wana ndugelo tshivhidzoni. Ro tshenzhela ngudo i vhavhaho, fhedzi yo vha na mvelelo dzi takadzaho.”

20, 21. Malugana na mbingano, ri fanela u ḓiimisela u ita mini?

²⁰ Hu sa londwi uri ri mbinganoni kana a ri athu i dzhenela, kha ri sumbedze u vha na tshivhindi nahone ri fulufhele Yehova. Arali ro sedzana na vhuleme mbinganoni, ri fanela u lwela u vhu piringulula, nahone a ro ngo fanela u hangwa uri vhathu vhavhili vho vhofhekanywaho mbinganoni a “vha tsha ḓo vha vhavhili, vha ḓo vha ṋama nthihi.” (Mat. 19:6) Nahone kha ri dzule ri tshi humbula uri arali ra konḓelela musi muṅwe mufarisi e si mushumeli wa Yehova hu sa londwi vhuleme he ra sedzana naho, ri nga kha ḓi takalela u vhona mufarisi washu o no ṱanganedza vhurabeli ha ngoho.

²¹ Hu sa londwi zwiimo zwashu, ungari ri nga ḓiimisela u ita zwithu nga nḓila ine ya ḓo ṋea vhuṱanzi havhuḓi kha vhathu vha si Dziṱhanzi vho ri sedzaho. Arali mbingano yashu i khomboni, ri fanela u rabela zwi tshi bva mbiluni, ri ṱolisise zwiṱuṱuwedzi zwashu nga u fulufhedzea, ri ṱolisise Maṅwalo nga vhuronwane nahone ri ṱoḓe thuso ya lwa muya ya vhahulwane. Zwa ndeme vhukuma, kha ri ḓiimisele u takadza Yehova Mudzimu kha zwoṱhe nahone ri sumbedze uri ri a dzhiela nṱha tshifhiwa tshawe tsha mbingano.

[Ṱhaluso dzi re magumoni a siaṱari]

[Mbudziso Dza Pfunzo]

[Maipfi o ṱumbulwaho kha siaṱari 10]

Vhakriste vhane vha si ṱavhanye u fhelelwa nga fulufhelo musi vhe mbinganoni i re na vhuleme vha anzela u lambedzwa nga nḓila yavhuḓi

[Maipfi o ṱumbulwaho kha siaṱari 12]

Dzulani ni tshi fulufhela Yehova na u mu humbela uri a ni ṋee tshivhindi

[Tshifanyiso kha siaṱari 9]

Yehova u fhaṱutshedza vhavhingani vha Vhakriste vhane vha ita vhuḓidini u itela u khwaṱhisa mbingano i re na vhuleme

[Tshifanyiso kha siaṱari 11]

Tshivhidzo tsha Vhukriste tshi nga thusa na u khuthadza nga lwa muya