Naa Ni Khou Vhonetshela Vhugala Ha Yehova?
Naa Ni Khou Vhonetshela Vhugala Ha Yehova?
“Ri . . . vha vhonetshelwaho nga lupenyo lwa Murena.”—2 VHA-KOR. 3:18.
NI ḒO ARAVHA HANI?
Hu sa londwi uri ri na tshivhi, ri nga ṋea hani Yehova vhugala?
Thabelo dzashu na u vha hone miṱanganoni ya Vhukriste zwi ri thusa hani u vhonetshela vhugala ha Mudzimu?
Ndi mini zwine zwa nga ri thusa uri ri dzule ri tshi ṋea Yehova vhugala?
1, 2. Ndi ngani zwi tshi pfala uri ri nga kona u edzisa pfaneleo dza Yehova?
ROṰHE hu na zwine ra fana ngazwo na vhabebi vhashu. Nga zwenezwo, a zwi mangadzi u pfa muthu a tshi amba na ṅwana wa mutukana a ri, ‘Ni tou fana na khotsi aṋu.’ Ṅwana wa musidzana a nga kha ḓi vhudzwa uri, ‘Ni nkhumbudza mme aṋu.’ Vhana vha anzela u edzisa zwine vha zwi vhona kha vhabebi vhavho. Fhedzi hu pfi mini nga riṋe? Naa ri nga edzisa Yehova, khotsi ashu wa ṱaḓulu? Naho ri sa athu vhuya ra mu vhona, ri nga pfesesa pfaneleo dzawe dzavhuḓi nga u guda Ipfi ḽawe, u ṱhogomela tsiko yawe, na nga u elekanya nga ha Maṅwalo zwihulu-hulu kha zwe Yesu Kristo Murwa wa Mudzimu a zwi amba na u zwi ita. (Yoh. 1:18; Vha-Roma 1:20) Zwi a konadzea uri ri vhonetshele vhugala ha Yehova.
2 Musi Adamu na Eva vha sa athu sikwa, Mudzimu o vha e na vhungoho ha uri vhathu vha ḓo kona u ita zwine a funa, zwine zwa katela u sumbedza pfaneleo dzawe na u mu ḓisela vhugala. (Vhalani Genesi 1:26, 27.) Samusi ro ḓikumedza kha Mudzimu, ri fanela u sumbedza pfaneleo dzawe ngauri ndi ene We a ri sika. Arali ra ita nga u ralo, ri ḓo vha na ndugelo yavhuḓi vhukuma ya u vhonetshela vhugala ha Mudzimu, hu sa londwi mvelele yashu, pfunzo na vhubvo hashu. Ndi ngani? Nga nṱhani ha uri “Mudzimu ha ṱaluli muthu. Atsina kha tshakha dzoṱhe, ané a mu ofha a ita zwo lugaho, u a mu funa.”—Mish. 10:34, 35.
3. Ndi mini zwine Vhakriste vha nga zwi tshenzhela musi vha tshi khou shumela Yehova?
3 Vhakriste vho ḓodzwaho vha vhonetshela vhugala ha Yehova. Muapostola Paulo o hevhedzwaho nga muya o ṅwala uri: “Huno riṋe roṱhe, ri ré vha vhonetshelwaho nga lupenyo lwa Murena, rí so ngó fúkedza zwifhaṱuwo, ri ḓo shandukiswa, ra fana na ene, ra bva kha luṅwe lupenyo ri tshi ya kha luṅwe.” (2 Vha-Kor. 3:18) Musi muporofita Mushe a tshi tsa Thavhani ya Sinai o fara mbaba dzi re na Milayo ya Fumi, tshifhaṱuwo tshawe tsho vha tshi tshi khou penya nga nṱhani ha uri o vha a tshi khou amba na Yehova. (Ek. 34:29, 30) Naho Vhakriste vha sa athu vhuya vha vha na tshenzhelo ya uri zwifhaṱuwo zwavho zwi penye nga yeneyo nḓila, zwi a penya nga dakalo musi vha tshi vhudza vhaṅwe nga ha Yehova, pfaneleo dzawe, na ndivho dzawe dzavhuḓisa malugana na vhathu. U fana na zwivhoni zwa tsimbi zwi penyaho vhukuma zwa misini ya kale, vhaḓodzwa na khonani dzavho dzi re kha ḽifhasi vha vhonetshela vhugala ha Yehova vhutshiloni na vhuḓinḓani havho. (2 Vha-Kor. 4:1) Naa ni khou vhonetshela vhugala ha Yehova nga vhuḓifari haṋu ha u ofha Mudzimu na mushumo une na u ita sa muhuweleli wa Muvhuso wa tshifhinga tshoṱhe?
RI ṰOḒA U VHONETSHELA VHUGALA HA YEHOVA
4, 5. (a) Ndi vhuleme vhufhio vhune ra sedzana naho u fana na zwe zwa itea kha Paulo? (b) Tshivhi tshi ri kwama nga nḓila-ḓe?
4 Sa vhashumeli vha Yehova, ri ṱoḓa u hulisa na u ṋea vhugala Musiki washu kha zwoṱhe zwine ra zwi ita. Naho zwo ralo, a si kanzhi hune ra ita zwine ra ṱoḓa u zwi ita. Paulo na ene o sedzana na vhuleme ho raloho. (Vhalani Vha-Roma 7:21-25.) Musi a tshi ṱalutshedza zwi itaho uri zwi ri konḓele, Paulo o ṅwala uri: “Vho tshinya vhoṱhe, vhoṱhe vho ṱáhela vhurena ha Mudzimu.” (Vha-Roma 3:23) Vhukuma, nga nṱhani ha tshivhi tshe vha tshi mamela kha Adamu, vhathu vhoṱhe vho vha phuli dza ‘tshivhi tshine tsha vhusa.’—Vha-Roma 5:12; 6:12.
5 Tshivhi ndi mini? Ndi tshithu tshiṅwe na tshiṅwe tshi sa tshimbidzani na zwine Yehova a vha zwone, nḓila dzawe, zwilinganyo zwawe na zwine a zwi funa. Tshivhi tshi tshinyadza vhushaka ha muthu na Mudzimu. Tshi ita uri ri si kone u vhonetshela vhugala ha Mudzimu nga nḓila i fanaho na musi muzwimi a sa koni u livhisa zwavhuḓi musevhe wawe. Ri nga ita tshivhi nga khole, kana ri songo ḓiimisela. (Num. 15:27-31) Tshivhi tsho tou goḓombela kha vhathu nahone tshi ita uri vha si vhe na vhushaka na Musiki wavho. (Ps. 51:5; Yes. 59:2; Vha-Kol. 1:21) Nga zwenezwo, vhathu vhanzhi vha tshila nga nḓila ine ya ita uri vha si vhe na vhushaka havhuḓi na Yehova, zwine zwa ita uri vha si kone u vhonetshela vhugala ha Mudzimu. A zwi timatimisi uri tshivhi tshi kwama vhathu vhoṱhe nga nḓila khulwane.
6. Hu sa londwi uri ri na tshivhi, ri nga ṋea hani Mudzimu vhugala?
6 Naho ri na tshivhi, Yehova ndi ‘Mudzimu ane a ṋea fulufhelo.’ (Vha-Roma 15:13) O ri ṋea tshiṱhavhelo tshi rengululaho tsha Yesu Kristo tshine tsha nga fhelisa tshivhi. Nga u vha na lutendo kha tshiṱhavhelo tshenetsho, a ri tsha vha phuli dza tshivhi kana vhane vha “shumela zwivhi,” fhedzi ri a kona u vhonetshela vhugala ha Yehova. (Vha-Roma 5:19; 6:6; Yoh. 3:16) U vha na vhushaka honovhu vhu ṱanganedzeaho phanḓa ha Mudzimu zwi ita uri Yehova a ri fhaṱutshedze zwino, na tshifhingani tshi ḓaho nga u vha vhathu vho fhelelaho vhane vha ḓo tshila nga hu sa fheli. Naho ri tshi kha ḓi vha na tshivhi, ri na ndugelo khulwane lungafhani ya uri Mudzimu u ri dzhia sa vhathu vhane vha nga vhonetshela vhugala hawe!
U VHONETSHELA VHUGALA HA MUDZIMU
7. Ndi mini zwine ra fanela u zwi ṱhogomela nga ha riṋe vhane u itela uri ri kone u vhonetshela vhugala ha Mudzimu?
7 U itela uri ri kone u vhonetshela vhugala ha Mudzimu nga nḓila yo teaho, ri fanela u ḓiṱolisisa nga u fulufhedzea na u ṱhogomela uri ri na tshivhi. (2 Koron. 6:36) Ri fanela u ḓivha zwavhuḓi vhushayanungo hashu ha u sendamela kha tshivhi u itela uri ri kone u vhu langa, nahone zwi ḓo ri thusa u ita mvelaphanḓa ya u vhonetshela vhugala ha Mudzimu zwa vhukuma. Sa tsumbo, arali ro wela tshikwekweni tshi shonisaho tsha u ṱalela zwifanyiso zwi karusaho maḓipfele a zwa vhudzekani, ri fanela u ṱhogomela uri ri ṱoḓa thuso ya lwa muya, na u dzhia vhukando ha u i wana. (Yak. 5:14, 15) U ita nga u ralo ndi vhukando ha u thoma u itela u tshila nga nḓila ine ya hulisa Mudzimu. Sa vhashumeli vha Yehova, ri fanela u bvela phanḓa ri tshi ḓiṱolisisa u itela u vhona arali ri tshi khou swikelela zwilinganyo zwawe zwo lugaho. (Mir. 28:18; 1 Vha-Kor. 10:12) Ri fanela u dzula ri tshi lwisana na vhushayanungo hashu hoṱhe ha u sendamela kha tshivhi u itela uri ri kone u vhonetshela vhugala ha Mudzimu.
8. Naho ri songo fhelela, ndi mini zwine ra fanela u zwi ita?
8 Yesu ndi ene muthu muthihi fhedzi we a tshila a vhuya a fa a tshi kha ḓi takadza Mudzimu nahone a tshi kha ḓi vhonetshela vhugala hawe. Naho ri songo fhelela u fana nae, ri fanela u lwela u edzisa tsumbo yawe, nahone ro tea u i edzisa. (1 Pet. 2:21) Yehova u ṱhogomela vhuḓidini vhune ra vhu ita u katela na mvelaphanḓa yashu, nahone u fhaṱutshedza vhuḓidini hashu ha u mu ḓisela vhugala.
9. Bivhili i nga thusa hani Vhakriste vhane vha ṱoḓa u tshila u tendelana na zwilinganyo zwa Mudzimu?
9 Bivhili i nga ri thusa u pfesesa nḓila ine ra nga vhonetshela ngayo vhugala ha Mudzimu. U guda Maṅwalo nga ho dzikaho na u elekanya nga ha zwine ra zwi guda ndi zwa ndeme. (Ps. 1:1-3) U vhala Maṅwalo ḓuvha ḽiṅwe na ḽiṅwe zwi ḓo ri thusa u ita mvelaphanḓa. (Vhalani Yakobo 1:22-25.) U vha na nḓivho ya Bivhili ndi wone mutheo wa lutendo lwashu nahone zwi khwaṱhisa nḓila ye ra ḓiimisela ngayo u iledza u ita tshivhi tshihulwane u itela u takadza Yehova.—Ps. 119:11, 47, 48.
10. Thabelo i nga ri thusa hani u shumela Yehova nga vhuḓalo?
10 U itela u vhonetshela vhugala ha Mudzimu, ri fanela u ‘konḓelela thabeloni.’ (Vha-Roma 12:12) Ri nga kona u rabela uri Yehova a ri thuse ri mu shumele nga nḓila i ṱanganedzeaho, nahone ri fanela u ita nga u ralo. Musi ri tshi rabela, ri nga humbela muya wawe mukhethwa, u vha na lutendo lwo engedzeaho, u vha na maanḓa a u lwisana na milingo, na uri ri kone u ‘tshea fhungo ḽa ngoho ri sa kombamisi.’ (2 Tim. 2:15; Mat. 6:13; Luka 11:13; 17:5) Samusi ṅwana a tshi ḓitika nga khotsi awe, na riṋe ri fanela u ḓitika nga Yehova, Khotsi ashu wa ṱaḓulu. Arali ra mu humbela uri a ri thuse u mu shumela nga vhuḓalo, ri nga vha na vhungoho ha uri u ḓo ri thusa. Ri songo vhuya ra pfa u nga ri muhwalo khae. Nṱhani hazwo, musi ri tshi rabela ri fanela u mu renda, u mu livhuha, u humbela vhulivhisi hawe zwihulu-hulu musi ri milingoni, na u mu humbela uri a ri thuse u mu shumela nga nḓila ine ya ḓo ḓisela dzina ḽawe ḽikhethwa vhugala.—Ps. 86:12; Yak. 1:5-7.
11. Miṱangano ya tshivhidzo i ri thusa hani u vhonetshela vhugala ha Mudzimu?
11 Mudzimu o ṋea “mukoma a fulufhedzeaho na wa vhuṱali” vhuḓifhinduleli ha u ṱhogomela nngu dzawe dzi funwaho. (Mat. 24:45-47; Ps. 100:3) Tshigwada tsha mukoma tshi na dzangalelo ḽihulwane kha nḓila ine ra vhonetshela ngayo vhugala ha Yehova. Miṱangano yashu i ri thusa u ita tshanduko vhutshiloni hashu na u khwinisa pfaneleo dzashu dza Vhukriste, u fana na musi murungi wa zwiambaro a tshi zwi lugisa uri zwi sedzee khwine. (Vha-Heb. 10:24, 25) Zwi ḓo vha zwavhuḓi uri ri swike nga tshifhinga, ngauri arali ro ḓowela u lenga a ri nga vhuyelwi nga thuso ya lwa muya ine ra i ṱoḓa uri ri kone u ita tshanduko dzi ṱoḓeaho sa vhashumeli vha Yehova.
KHA RI EDZISE MUDZIMU
12. Ri nga edzisa hani Mudzimu?
12 Arali ri tshi ṱoḓa u vhonetshela vhugala ha Yehova, ri fanela u vha “vha-edzisa-Mudzimu.” (Vha-Ef. 5:1) Iṅwe nḓila ya u edzisa Yehova ndi u vha na mavhonele a fanaho na awe malugana na zwithu. U tshila nga nḓila i sa tendelani na mavhonele awe zwi a mu nyadzisa na u ri pfisa vhuṱungu. Samusi shango ḽine ra tshila khaḽo ḽi tshi ṱuṱuwedzwa nga muvhi, Sathane Diabolo, ri fanela u ita vhuḓidini vhuhulwane ha u vhenga zwine Yehova a zwi vhenga na u funa nga ho dzikaho zwine a zwi funa. (Ps. 97:10; 1 Yoh. 5:19) Ri fanela u vha na lutendo lwo khwaṱhaho lwa uri nḓila yo teaho ya u shumela Mudzimu ndi ya u ita zwithu nga nḓila ine ya ḓo ita uri a rendwe.—Vhalani 1 Vha-Korinta 10:31.
13. Ndi ngani ri tshi fanela u vhenga zwivhi, nahone u ita nga u ralo zwi ḓo ri ṱuṱuwedza u ita mini?
13 Samusi Yehova a tshi vhenga zwivhi, na riṋe ri fanela u zwi vhenga. Vhukuma, ri fanela u shavhela kule na vhuvhi nga hune zwa konadzea ngaho, nahone a ro ngo fanela u sendela tsini naho na zwiṱuku-ṱuku. Sa tsumbo, ri fanela u ṱhogomela vhugunei, ngauri tshivhi tshenetsho tshi ita uri ri sa fanelee u ṋea Mudzimu vhugala. (Doit. 13:6-9) Ri songo vhuya ra tenda u vhumba vhushaka na vhagunei kana muṅwe na muṅwe ane a amba uri u Mukriste ngeno a tshi ita zwithu zwine zwa nyadzisa Mudzimu. Ri fanela u sendela kule nae naho e muraḓo wa muṱa. (1 Vha-Kor. 5:11) A ri vhuyelwi nga tshithu musi ri tshi lingedza u pikisana na vhagunei kana vhathu vhane vha sasaladza ndangulo ya Yehova. Ngoho ndi ya uri zwi khombo vhukuma u vhala mafhungo avho, buguni dzavho na kha Inthanethe.—Vhalani Yesaya 5:20; Mateo 7:6.
14. Musi ri tshi khou lwela u vhonetshela vhugala ha Mudzimu, ndi pfaneleo ifhio ine ya tea u vhonala nga maanḓa, nahone ndi ngani?
14 U vha na lufuno ndi nḓila i swayeaho vhukuma ya u edzisa Khotsi ashu wa ṱaḓulu. Vhukuma, arali ri tshi ṱoḓa u fana nae, ri fanela u vha na lufuno. (1 Yoh. 4:16-19) Lufuno lune ra vha nalwo vhukati hashu lu ri ṱalula sa vhafunziwa vha Yesu, na vhashumeli vha Yehova. (Yoh. 13:34, 35) Naho tshivhi tshe ra tou tshi mamela tshi tshi nga ri khakhisa, ri fanela u lwela u sumbedza vhaṅwe lufuno tshifhinga tshoṱhe. U ita vhuḓidini ha u sumbedza lufuno na dziṅwe pfaneleo dza u ofha Mudzimu zwi ḓo ri thusa u iledza u ita tshivhi na zwiṅwe zwithu zwi si zwavhuḓi.—2 Pet. 1:5-7.
15. Lufuno lu kwama hani vhushaka hashu na vhaṅwe?
15 Lufuno lu ita uri ri ṱoḓe u itela vhaṅwe vhathu zwithu zwavhuḓi. (Vha-Roma 13:8-10) Sa tsumbo, arali munna na mufumakadzi vha re mbinganoni vha tshi funana, vha ḓo dzula vha tshi fulufhedzea. U funa vhahulwane, u katela na u ṱhonifha mushumo wavho zwi ḓo ita uri ri vha thetshelese na u ḓiṱukufhadza khavho na vhulivhisi havho. Vhana vhane vha funa na u ṱhonifha vhabebi vhavho vha amba zwavhuḓi nga havho. Arali ri tshi funa vhathu, ri nga si vha dzhiele fhasi kana u amba navho nga lunyadzo. (Yak. 3:9) Nahone vhahulwane vhane vha funa nngu dza Mudzimu vha dzi fara nga vhulenda.—Mish. 20:28, 29.
16. Lufuno lu ḓo ri thusa hani vhuḓinḓani hashu?
16 Pfaneleo ya lufuno i fanela u dovha ya vhonala vhuḓinḓani hashu. Nga nṱhani ha u funa Yehova zwi tshi bva mbiluni, ri nga si tende u kulwa nungo nga vhathu vha si na dzangalelo tsimuni yashu kana vha sa aravhi zwavhuḓi. Nṱhani hazwo, ri ḓo bvela phanḓa ri tshi huwelela mafhungo maḓifha. Lufuno lu ḓo ri ṱuṱuwedza uri ri lugiselele zwavhuḓi uri kone u bvelela vhuḓinḓani. Arali ri tshi funa zwa vhukuma Mudzimu na vhahura vhashu, ri nga si vhone mushumo wa u huwelela nga ha Muvhuso sa muhwalo. Nṱhani hazwo, ri ḓo u dzhia sa ndugelo khulwane nahone ri ḓo u ita nga dakalo.—Mat. 10:7.
DZULANI NI TSHI ṊEA YEHOVA VHUGALA
17. Ndi ngani ri tshi vhuyelwa nga u ṱhogomela uri a ri swikeleli vhugala ha Mudzimu?
17 Vhathu shangoni ḽine ra tshila khaḽo a vha zwi ṱhogomeli uri zwo khakhea lungafhani u ita tshivhi, fhedzi riṋe ri a zwi ḓivha. Zwenezwi zwi ri thusa u ita vhuḓidini ha u lwisana na u sendamela hashu kha u ita zwivhi. U ṱhogomela uri ri na zwivhi zwi ita uri ri gudise mvalo dzashu u itela uri dzi dzhie vhukando nga u ṱavhanya musi ri tshi lingea u ita zwithu zwo khakheaho mbiluni dzashu na mihumbuloni yashu. (Vha-Roma 7:22, 23) Ndi ngoho uri ri nga vha ri si na nungo, fhedzi Mudzimu a nga ri ṋea maanḓa a u ita zwo lugaho kha vhuimo naho vhu vhufhio.—2 Vha-Kor. 12:10.
18, 19. (a) Ndi mini zwine zwa ri thusa uri ri kone u lwisana na mimuya mivhi? (b) Ri fanela u ḓiimisela u ita mini?
18 Arali ri tshi ṱoḓa u ṋea Yehova vhugala, ri fanela u dovha ra lwisana na mimuya mivhi. Mafumo ashu a lwa muya e ra a ṋewa nga Mudzimu a ri thusa u lwisana nayo nga hu bvelelaho. (Vha-Ef. 6:11-13) Sathane u dzula a tshi khou lingedza u ita uri Yehova a si ṋewe vhugala ho mu teaho. Diabolo u dovha a bvela phanḓa a tshi ita vhuḓidini ha u tshinya vhushaka hashu na Yehova. Fhedzi Sathane u shona lungafhani musi riṋe na vhaṅwe vhashumeli vha Mudzimu vha dzimilioni vha songo fhelelaho ri tshi dzula ri tshi fulufhedzea nahone ri tshi ṋea Mudzimu vhugala! Nga zwenezwo, kha ri bvele phanḓa ri tshi renda Yehova, ri tshi edzisa zwivhumbiwa zwa ṱaḓulu zwine zwa ri: “Murena Mudzimu washu, ndi’we wo fanelwaho nga thendo na zwikhoḓo na maanḓa, ngauri ndi’we wo sikaho zwoṱhe; zwo bvelela, zwo sikiwa nge wa zwi funa.”—Ndzumb. 4:11.
19 Kha ri ḓiimisele u dzula ri tshi ṋea Yehova vhugala hu sa londwi zwine ra nga sedzana nazwo. Ri na vhungoho ha uri u a takala musi vhashumeli vhawe vhanzhi-vhanzhi vha fulufhedzeaho vha tshi ita vhuḓidini vhuhulwane ha u mu edzisa na u vhonetshela vhugala hawe. (Mir. 27:11) Ungari ri nga ḓipfa nga nḓila i fanaho na ya Davida we a imba a ri: “Ndi U livhuha nga mbilu yoṱhe, Muṋe wanga, Mudzimu wanga; dzina ḽau thi fhidzi u ḽi ṋea thendo.” (Ps. 86:12) Ro lavhelela ḓuvha ḽine ra ḓo vhonetshela ngaḽo vhugala ha Yehova ro fhelela nahone ri tshi kona u mu renda u ya nga hu sa fheli! Dakalo ḽeneḽo ḽi ḓo tshenzhelwa nga vhathu vhane vha thetshelesa. Naa ni khou vhonetshela vhugala ha Yehova Mudzimu zwino, no lavhelela u ita nga u ralo u ya nga hu sa fheli?
[Mbudziso Dza Pfunzo]
[Zwifanyiso kha siaṱari 27]
Naa ni khou vhonetshela vhugala ha Yehova nga dzenedzi nḓila?
