Mbudziso Dzi Bvaho Ha Vhavhali
Mbudziso Dzi Bvaho Ha Vhavhali
Muvhuso Wa Shango Wa Vhaisimane Na Vhaamerika wo vha lini muvhuso wa vhusumbe wa vhuporofita ha Bivhili?
▪ Tshifanyiso tshihulu-hulu tsha tsimbi tshe tsha vhonwa nga Khosi Nebukadanetsara a tshi imeli mivhuso yoṱhe ya shango. (Daniele 2:31-45) Tshi amba fhedzi nga ha mivhuso miṱanu ye ya vhusa u bva nga tshifhinga tsha Daniele u ya phanḓa, na ye ya kwama nga hu swayeaho vhathu vha Mudzimu.
Nḓila ye Daniele a ṱalutshedza ngayo tshenetsho tshifanyiso i ṋea muhumbulo wa uri Muvhuso wa Shango wa Vhaisimane na Vhaamerika wo vha u tshi ḓo bva kha wa Roma, hu si uri wo vha u tshi ḓo kunda wa Roma. Musi Daniele a tshi vhona tshenetsho tshifanyiso, tsho vha tshi na milenzhe ya tsimbi ye ya vha i tshi swika na kha zwikunwane. (Kha milenzhe na zwikunwawe, tsimbi yo vanganywa na vumba.) * Ṱhalutshedzo yeneyo i sumbedza uri Muvhuso wa Shango wa Vhaisimane na Vhaamerika wo vha u tshi tshi ḓo bva kha milenzhe ya tsimbi. Ḓivhazwakale i a khwaṱhisedza uri mafhungo eneo ndi o teaho. Muvhuso wa Britain, we wa vha u nga fhasi ha Muvhuso wa Roma, wo thoma u vha na maanḓa mafheleloni a vho-1700. Nga murahu, muvhuso wa United States of America wo thoma u vha na maanḓa. Naho zwo ralo, muvhuso wa shango wa vhusumbe wa vhuporofita ha Bivhili wo vha u sa athu vhumbwa. Ndi ngani? Muvhuso wa Britain na wa United States yo vha i sa athu shumisana nga nḓila i swayeaho. Zwenezwo zwo itea tshifhingani tsha Nndwa ya Shango ya U Thoma.
Nga tshenetsho tshifhinga “vhana vha muvhuso” vho vha vho farakanea vha tshi khou shuma ngei United States, Ofisini Khulwane dzi re Brooklyn, New York. (Mat. 13:36-43) Miraḓo ya tshigwada tsha vhaḓodzwa yo vha i tshi khou huwelela mashangoni ane a langiwa nga Muvhuso wa Britain. Tshifhingani tsha Nndwa ya Shango ya U Thoma muvhuso wa Britain na wa Amerika yo vhumba vhuthihi u itela u lwa na maswina ayo. Samusi u fhisetshela lushaka zwo vha zwo anda, yo dovha ya sumbedza u vhenga vhane vha vha tshipiḓa tsha mbeu ya “musadzi” wa Mudzimu, ya thivhela khandiso dzavho, ya dovha ya valela dzhele vha rangaho phanḓa mushumoni wa u huwelela.—Ndzumb. 12:17.
Nga zwenezwo, u ya nga vhuporofita ha Bivhili, muvhuso wa shango wa vhusumbe a wo ngo thoma mafheloni a vho-1700 musi Britain i tshi thoma u vha na maanḓa. Nṱhani hazwo, wo vha hone mathomoni a ḓuvha ḽa Murena. *
[Ṱhaluso dzi re magumoni a siaṱari]
^ Vumba ḽo vanganywaho na tsimbi ḽi imela madzangano a re nga fhasi ha wonoyo Muvhuso Wa Shango Wa Vhaisimane Na Vhaamerika u re na maanḓa a ngaho a tsimbi. Nga u ya ha tshifhinga, ḽeneḽi vumba ḽo ita uri zwi si leluwe uri wonoyo muvhuso u shumise maanḓa awo nga nḓila ine wa ṱoḓa ngayo.
^ Yeneyi ṱhalutshedzo i khou khakhulula mafhungo e a haseledzwa kha siaṱari 57, phara 24 kha bugu Vhuporofita ha Daniele na zwifanyiso zwi re kha masiaṱari 56 na 139.
[Tshifanyiso kha siaṱari 19]
Vhahashu vha tshinnani vha malo vha ngei ofisini khulwane dza Watchtower vho valelwa dzhele nga June 1918
